मत्ती 17

येशूकी जुजम ग्‍युरुप

(मर्कूस ९:२-१३; लूका ९:२८-३६)

1तेमी ङ्‍यिमा टुककी तिङ्‍ला येशूकी पत्रुस ताङ याकूब ताङ तीकी नुप यूहन्‍नाला खोरो मुला टिनी री थेन्‍बो यी ने केला फेप्‍सुङ। 2ते लोमातिवी दोङ्‍ला येशूकी जुजम ग्‍युर्सुङ। तमा खोकी शाल ति ङ्‍यिमा शरुप दोके वो ग्‍यप्‍सुङ, खोकी नुम्‍बुप नम्‍सा ति वो ग्‍यकुप दोके छासे कर्मु गाल्‍सुङ। 3ती पेला शार्क्येक मोशा ताङ एलिया छ्‍यर्नी येशूकी मुला अरा उरा सिक्‍यावु ति लोमातिवी थोङ्‍सुङ। 4ती थोङ्‍सिमा पत्रुसकी येशूला “ओ चोवो, दाक्‍पु दे देतुप ति ल्‍यामु च्‍युङ्‍सुङ। चोवोकी नोवा वोसिन ङ दे बर्केङ सुम जोयिन। च्‍यिक ति चोवोकी थोक्‍ला, च्‍यिक ति मोशाकी थोक्‍ला, तमा च्‍यिक ति एलियाकी थोक्‍ला।” सिनी सिक्‍यासुङ। 5पत्रुसकी तुक सियी वोतुप पेला छासे वो ग्‍यकुप मुक्‍पाकी छुप्‍नी तिवाला उप्‍सुङ। तमा मुक्‍पी पर नेमा “दी ङे ङ्‍यिङ्‍ज्‍येवु पुज्‍युङ यिनो, दीकी मुला ङ छासे गा लानी वे। ख्‍यिराङ दीकी ताम्‍ङे ङ्‍येना।” सिरुप वोरु यी ग्‍यप्‍सुङ। 6ती थोसिमा लोमातिवा कशेन ज्‍यिवा लानी खवुतुङ्‍मा देसुङ। 7ती पेला येशू तिवी चाला फेप्‍नी तिवाला रेक्‍नी, “खोक लो, ज्‍यिवा माकी।” सिनी सुङ्‍सुङ। 8खोकी तुक सुङ्‍सिमा तिवी येर केला ल्‍हासालेन्‍सिन ते येशू मिसिन यम्‍बा सु साङ मिन्‍दुक।

9खोतिवा री नेमा मर पपिन कितुप पेला येशूकी लोमातिवाला “ङ मी पुज्‍युङ शेप ने सेन्‍बु मालावा सेक्‍ला ख्‍यिरा थोङ्‍गुप ति सुला साङ मालापा।” सिनी क नाङ्‍सुङ। 10तमा लोमातिवी खोला “च्‍यिला यहूदी छ्‍योकी गेकेनतिवी एलिया ति गोमाला वुङ गोकिवी सिनी सिक्‍यावु यिन?” सिनी टिसुङ। 11तमा येशूकी तिवाला “वुतुङ के एलिया ति वानी तेरी ताम्‍ङेतिवा टडिक किवी। 12ङ ख्‍यिराङला सिरिन, एलिया गोमाला के वानी वे। यिने मीतिवी तीला ङो माशेनी खोप्‍रे तीला काङ कितुप नो क्‍यावे, तुकै राङ क्‍यासुङ। तुक राङ क्‍यानी ङ मी पुज्‍युङकी साङ मीतिवा नेसुर छेटाङ खुर गोकिवी।” सिनी सुङ्‍सुङ। 13खोकी तुक सुङ्‍सिमा ती ताम्‍ङे ति बप्‍तिस्‍मा तेरुप यूहन्‍नाकी कोर्ला सुङ्‍गुप यिनोक सिनी लोमातिवी हाक्‍कोसुङ।

डेकी कुलुप पेजा टेकुप

(मर्कूस ९:१४-२९; लूका ९:३७-४३)

14ती ज्‍युक्‍ला खोतिवा मी माङ्‍छ्‍योक जोम्‍बुप दासाला लोक्‍नी फेप्‍सुङ। ते मी मिरा च्‍यिक येशूकी चाला वानी पुमुङ सला चुनी दुक सिनी गोङ्‍बा शुसुङ, 15“ओ चोवो, ङे पुज्‍युङला च्‍यम्‍बा नाङ्‍डे की। ङे पुज्‍युङ ति जा लङ्‍गुप नेजु ग्‍यप्‍नी छासे छेटाङ खुरिन वे। ती ति पर्सा मे नाङ्‍ला तला ग्‍यकिनोक, पर्सा छ्‍यी नाङ्‍ला तला ग्‍यकिनोक। 16तीला ङे चोवोकी लोमातिवी चाला टिनी वायी, यिने तिवी याङ तीला टेक ज्‍यि माथुप।” सिनी सिक्‍यासुङ। 17तमा येशूकी “ओ तेपा माक्‍यानी सेम दुक्‍टा गलुप मीतिवा! ङ नम सेक ख्‍यिरा मुला देतुप्‍जा? नम सेक ङ ख्‍यिराङला हम क्‍यानी देतुप्‍जा? ती पेजाला दे टिनी शोक।” सिनी सुङ्‍सुङ। 18तमा येशूकी ती पेजाला ग्‍यपुप डे तीला वोरु तेन्‍सुङ। खोकी वोरु तेन्‍सिमा डे ति ती पेजी नाङ नेमा थेन गाल्‍सुङ, तमा ती पेजा ति शार्क्येक टेक्‍सुङ।

19ती ज्‍युक्‍ला लोमातिवा छ्‍याकला येशूकी चाला वानी, “ङ्‍यिरा च्‍यिला ती डे ति थेन माथुपुप यिनाङ?” सिनी खोला टिसुङ। 20तमा खोकी तिवाला सुङ्‍सुङ, “ती ति ख्‍यिराङला तेपा अला मेतुप तप्‍की यिन। वुतुङ के ङ ख्‍यिराङला सिरिन, ख्‍यिराङला राय छेर्माङ डुमा च्‍यिक चोयी तेपा वोसिन ख्‍यिरा दी री तीला ‘दे नेसुर फर पोक्‍नी ग्‍युक!’ सिक्‍यासिन ती ति पोक्‍नी डिवी। तमा ख्‍यिरा कि मुथुपुप ति काङ साङ मेवी। 21यिने मोपोर कितुप ताङ ङ्‍युङ्‍ने मादेसिन दुका डे ति थेन मुथुपी।”

येशूकी खोरुङ टुङ्‍गुप कोर्ला येलुङ नम्‍दर शेतुप

(मर्कूस ९:३०-३२; लूका ९:४३-४५)

22तमा येशू लोमातिवी मुला गालीलला जोम्‍बुप पेला खोकी तिवाला “ङ मी पुज्‍युङ मीतिवी लकला चेक तेकिवी, 23तमा तिवी ङला सेकिवी, यिने ङ्‍यिमा सुमकी छेर्मु ङ सेन्‍बु लङ्‍गिवी।” सिनी सुङ्‍सुङ। खोकी तुक सुङ्‍सिमा लोमातिवा छासे सेम्‍दुक क्‍यासुङ।

ल्‍हङाङला से तेतुप कोर्ला

24येशू ताङ खोकी लोमातिवा कफर्नहुमला फेप्‍सिमा ल्‍हङाङकी से दुतुप मीतिवा पत्रुसकी चाला वानी, “ख्‍योरो गेकेनकी ल्‍हङाङला ते गोवु से ति मेतेवी?” सिनी टिसुङ। 25तमा पत्रुसकी “यिन, खोकी तेकिवी।” सिनी सिक्‍यासुङ। पत्रुस खाङ्‍बा शुनी ती ताम्‍ङे कितुप सिनाङ गोमाला राङ येशूकी तीला “सिमोन, ख्‍योरो नासामला चुकै वे? जम्‍बुलिङकी ग्‍येल्‍वुतिवी सु नेसुर से दुकिवी? खोरो पुज्‍युङतिवा नेसुर दुकिवी ताङ की, मी यम्‍बातिवा नेसुर दुकिवी?” सिनी सुङ्‍सुङ। 26तमा पत्रुसकी “मी यम्‍बातिवा नेसुर दुकिवी।” सिनी सिक्‍यासुङ। ती थोसिमा येशूकी “तुकै यिन्‍सिन पुज्‍युङतिवी याङ से ते मोगोनोक। 27यिन्‍सिनाङ दाक्‍पी तिवाला दुक्‍पाला मेख्‍येल्‍शी सिनी ख्‍युरुङ ग्‍येम्‍छोला गल्‍नी जाल ग्‍योप, तमा गोमाला ख्‍येलुप ङ्‍याकी ख पेनी ल्हो। तमा ती ङ्‍याकी खे नाङ्‍ला ङुलकी डप्‍बु च्‍यिक ङ्‍येकिवी, ती ति खुर गल्‍नी ख्‍युरुङ ताङ ङे ते गोवु से ति तिवाला ते।” सिनी सुङ्‍सुङ।

Nu markerat:

मत्ती 17: xsrNT

Märk

Dela

Kopiera