मत्ती 12
12
ङासोप ङ्यिमाकी चोवो
(मर्कूस २:२३-२८; ३:१-६; लूका ६:१-११)
1चेयी ज्युक्ला ङासोप ङ्यिमाला येशू ताङ खोकी लोमातिवा टे शिङ ख नेवा क्यानी फेपिन कितुप पेला लोमातिवा ल्होवा लानी टे ङ्यिमा थुनी सोनोक। 2ती थोङ्सिमा फरिसीतिवी येशूला “ल्हो ताङ! ख्योरे लोमातिवी ङासोप ङ्यिमाला कितुप मेङ्गुप लाका किनोक।” सिनी सिक्यासुङ। 3येशूकी तिवाला सुङ्सुङ, “ग्येल्वु दाऊदकी खुरुङ ताङ खोरो मुला वोतुपतिवा ल्होवा लावु पेला काङ क्यासुङ सिनी कोन्छ्योककी सुङला ख्यिरा मारा? 4दाऊद कोन्छ्योकला सोवा देकुप खाङ्बी नाङ्ला शुनी कोन्छ्योकला पुलुप शुब्ज्याङ ति लानी खुरुङ ताङ खोरो मुला वोतुपतिवी मासो रो? ती शुब्ज्याङ ति कोङ्यारतिवी मिसिन मी यम्बी साप मेङ्नोक।#१ शमूएल २१:१-६; लेवी २४:९ 5येलुङ ङासोप ङ्यिमाला कोङ्यारतिवी यहूदी ल्हङाङ नाङ्ला ङासोप ङ्यिमाला कितुप मेङ्गुप लाका क्यासिनाङ तिवाला क्येन मोफोकिवी सिनी कोन्छ्योककी मोशाला नङ्गुप ठिमला ख्यिरा मारा? 6ङ ख्यिराङला सिरिन, यहूदी ल्हङाङ सिनाङ छ्ये वोतुप ति दे वे। 7‘ङला बुल्वा मोगोवी, यिने ख्यिरा च्यम्बा कितुप गोकिवी।’ सिनी टि वोतुप कोन्छ्योककी सुङगी तेन्दोक ति वुतुङ ख्यिरा हाक्कोवु यिन्सिन क्येन तेर मोगोवु मीला ख्यिरा क्येन मेतेरुप्जा।#होशे ६:६ 8च्यिलासिसिन ङ मी पुज्युङ ति ङासोप ङ्यिमाकी चोवो यिन।”
लाक्पा च्यिक शोरुप मीला टेक च्यितुप
9ती ज्युक्ला येशू तेसुर यहूदी छ्योखाङ नाङ्ला फेप्सुङ। 10तमा ते लाक्पा च्यिक कम्बु ठोक गलुप मी यी नोक। ते वोतुप ललाइ मीतिवी येशूला क्येन तेरुप नोनी दुक सिनी खोला टिसुङ, “काङ ङासोप ङ्यिमाला नेर्पु टेक ज्यितुप गिवी ताङ मेङ्गिवी?” 11तमा येशूकी तिवाला सुङ्सुङ, “दोजो ख्यिरा पर्ला ललाइकी ति लुक च्यिक वे, ती ति ङासोप ङ्यिमाला मुक्तुम नाङ्ला लुम्सिन ख्यिरा तीला पाङ्ला मेदेन्वी रो? 12लुक सिनाङ मी ति मङ खक्छ्येवु मिन रो? तुक क्यानी ङासोप ङ्यिमाला लाका ल्यामु कितुप गिवी।”
13तमा येशूकी ती लाक्पा कम्बु ठोक गलुप मी तीला “ख्योरो लाक्पा क्योङ।” सिनी सुङ्सुङ। तीकी लाक्पा क्याङ्सिमा ती लाक्पा टेक्नी यम्बा लाक्पा दोके ल्यामु गाल्सुङ। 14ती थोङ्सिमा फरिसीतिवा तेसुर थेन गल्नी येशूला सेतुपला केवुल क्यासुङ।
कोन्छ्योककी पेतुप लावा
(मर्कूस ३:७-१२; लूका ६:१७-१९)
15तिवी खोरो तेन्दोकला केवुल क्यावु ति येशूकी हाक्कोनी खो तेसुर फेप्सुङ। यिने मी माङ्छ्योक खोकी तिङ्ला तिङ्यासुङ। तमा खोकी तिवी पर्ला वोतुप नेर्पुतिवा तेरीला टेक च्यिसुङ। 16तमा खोकी खोरो कोर्ला सुला साङ मासिर सिनी तिवाला क नाङ्सुङ। 17दी ति कोन्छ्योककी लुङ्तेम्बा यशैया नेसुर दुक सुङ्गुप कोन्छ्योककी सुङ ति तेरी छेवुला यिन,
18“ङे थोक्ला पेतुप लावा ति दी राङ यिन।
दी ति ङे ङ्यिङ्ज्येवु यिन।
दीकी मुला ङ छासे गा लानी वे।
ङ ङे थु चाङ्मा ति दीला तेरिन।
तमा दीकी तेरी मिरिककी मीतिवाला ङे ठिम टेङ्बुकी थोक्ला ख्याप्टाक किवी।
19ती ति सु ताङ क्यानी साङ खाँदा मिकिवी,
च्यार साङ मग्यकिवी।
लाम नेवा सी साङ तीकी वोरु मोथोवी।
20ङे ठिम टेङ्बुकी ग्येला कितुप तुजे मालेपा सेक तीकी ककुप ङ्युङ्माला मोच्योकिवी,
शितुछ्येप सलोक्टी मेसेवी।
21तमा तेरी मिरिककी मीतिवा तीकी मिङला रेवा किवी।”#यशैया ४२:१-४
येशू ताङ बालजिबुल
(मर्कूस ३:२०-३०; लूका ११:१४-२३)
22तमा मीतिवी डेकी कुल्नी मिक साङ मोथोङ्गुप, ताम्ङे साङ लप मुथुवु मी यीला येशूकी चाला टिनी लेसुङ। तमा खोकी तीला टेक च्यिसिमा ती मी ति ताम्ङे लप थुपुप ताङ मिक थोङ थुपुप गाल्सुङ। 23ती थोङ्सिमा मी माङ्छ्योक हलेवा लानी, “काङ दी याङ ग्येल्वु दाऊदकी गिपा यिन्दे की?” सिनी सिक्यासुङ। 24तमा ती थोनी फरिसी छ्योक्पाकी मीतिवी “दी मी तीकी याङ डेकी ग्येल्वु बालजिबुलकी ओङ नेमा डेतिवा देन्गिनोक।” सिनी सिक्यासुङ। 25तिवी तुका नासाम तङ्गुप ति येशूकी हाक्कोनी तिवाला सुङ्सुङ, “चुका ग्येल्खाप साङ खोप्राङ पर्ला ख्ये पेसिन तिवा ना डिवी। तमा चुका ग्येसा याङ्ना मिछाङ साङ खोप्राङ पर्ला ख्ये पेसिन तिवा अला मुलुवी। 26शैतानकी शैतानला तेन्सुङ सिसिन तिवी पर्ला ख्ये पेकिवी। तुक क्यासिन तिवी ग्येल्खाप ति चुक क्यानी लु थुप्किवी रो? 27दोजो बालजिबुलकी ङार नेमा राङ ङे डेतिवा देन्गिवी सिसिन ख्यिरा लोमातिवी सी ङार नेमा डेतिवा देन्गिवी रो? तुक क्यासिन ख्यिरा लोमातिवी ख्यिराङला क्येन तेर्किवी। 28यिने ङे कोन्छ्योककी थु चाङ्मा नेमा डेतिवा देन्गिवी सिसिन ती ति कोन्छ्योककी ग्येल्खाप ख्यिरा पर्ला वा वे सिरुप ति छ्या तेन्दुप यिन। 29चुका मी तीकी साङ गोमाला मी रम्बुला कोङ माकिन्दा सेक्ला ती मी तीकी खाङ्बा शुनी तीकी नोर टोङ्बातिवा कुनी डो थुप्किवी रो? यिने ती खाङ्बी मीला कोङ किन्सिमा तिराङ तीकी खाङ्बा कुनी डो थुप्किवी। 30सु ङे छ्योला मेवे, ती ति ङला क्येन तेरुप मी यिन। सी ङ ताङ मुला मीतिवा कोन्छ्योकला टि मेङ्गिवे, ती ति मीतिवाला कोन्छ्योक नेसुर थरा थुरा तोङ्गुप मी यिन। 31तुक क्यानी ङ ख्यिराङला सिरिन, मीतिवी क्यावु चुका दिक्पा ताङ कोन्छ्योककी तेन्दोकला ताम्ङे मेलोवा क्यावु ति माफ ङ्येकिवी, यिने कोन्छ्योककी थु चाङ्माला मारे तङ्गुप ति माफ मेङ्येवी। 32तमा चुका मी तीकी ङ मी पुज्युङला ताम्ङे मेलोवा सिवे, तीकी दिक्पा माफ ङ्येकिवी, यिने कोन्छ्योककी थु चाङ्माला ताम्ङे मेलोवा सिरुप तीला दी कल्वाला ताङ वुङ्गुप कल्वाला साङ तीकी दिक्पा माफ मेङ्येवी।”
दोङ्बु ताङ तीकी डेलु
(लूका ६:४३-४५)
33“दोङ्बु ल्यामु वोसिन डेलु साङ ल्यामु राङ गोर्किवी। दोङ्बु मेलोवा वोसिन डेलु साङ मेलोवा राङ गोर्किवी। डेलु ल्हानी तीकी दोङ्बु चुकै वे सिरुप ति हाक्कोकिवी। 34ओ दुक्टाकी गिपातिवा! ख्यिराङ सेम दुक्टा वे, चुक क्यानी ताम्ङे ल्यामु कि थुप्किवी? च्यिलासिसिन सेमला काङ क्येङ नोके, ती ति ख नेमा लप्किवी। 35सेम जङ्बु वोतुप तीकी खोरो सेमला काङ ल्यामु ज्याक्वे, ती ल्यामु ति देन्गिवी। तमा सेम दुक्टा वोतुप तीकी खोरो सेमला काङ दुक्टा ज्याक्वे, ती दुक्टा राङ देन्गिवी। 36ङ ख्यिराङला सिरिन, मीतिवी काङ ताम्ङे तेर्मे क्यावे, ती ताम्ङे तेर्मेकी तेन्दोक ति कोन्छ्योककी ठिम तोङ्गुप तुजेला खोकी दोङ्ला खोरो राङ लप गोकिवी। 37ती तुजेला ख्योरो क्यावु ताम्ङे नेमा राङ कोन्छ्योककी ख्युरुङ क्येन मेतुप याङ्ना क्येन वोतुप सिनी ठिम क्या नङ्गिवी।”
योनाकी तकी कोर्ला
(मर्कूस ८:११-१२; लूका ११:२९-३२)
38तमा यहूदी छ्योकी गेकेनतिवा ताङ फरिसी छ्योक्पाकी मीतिवा ललाइ ललाइकी येशूला दुक सिक्यासुङ, “ओ गेकेन, गेकेनकी ङि्यराङला त च्यिक छ्या तेन्दुप ति ल्हाप नो वे।” 39तमा खोकी तिवाला सुङ्सुङ, “दुक्टा ताङ शम्डेनकी गिपाकी तिराङ त छोल्गिवी, यिने दी गिपाकी मीतिवी कोन्छ्योककी लुङ्तेम्बा योनाकी त मिसिन यम्बा त थोङ्गुप मेङ्येवी। 40च्यिलासिसिन योना ङ्याकी खोक्पी नाङ्ला ङ्यिमा सुम ताङ नुप सुम लुवु दोके ङ मी पुज्युङ साङ ङ्यिमा सुम ताङ नुप सुम से दिङ्ला लुकिवी। 41कोन्छ्योककी ठिम तोङ्गुप तुजेला निनवेकी मीतिवा लानी दी गिपाकी मीतिवाला क्येन तेर्किवी, च्यिलासिसिन योनाकी ख्याप्टाक क्यावु थोसिमा निनवेकी मीतिवा दिक्पा ने सेम ग्युर्सुङ। यिने ल्होसा, योना सिनाङ मङ छ्ये वोतुप ति दे वे। 42कोन्छ्योककी ठिम तोङ्गुप तुजेला ल्होकी थाकाकी लुङ्बा नेसुर वावु ग्येल्मी साङ दी गिपाकी मीतिवी तेन्दोकला क्येन तेर्किवी, च्यिलासिसिन ती ति ग्येल्वु सोलोमनकी रिक्पा ङ्येन्दुपला जम्बुलिङकी तिङ्मा नेसुर वासुङ। यिने ल्होसा, सोलोमन सिनाङ मङ छ्ये वोतुप ति दे वे।”
डे लोकुप
(लूका ११:२४-२६)
43“डे च्यिक मी ललाइ नेमा थेन्सिमा ङासोप दासा छोलिन सिरा दासा पाङ्थेरी नेवा युकिवी, यिने तीला मेङ्येवी। 44तमा तीकी ‘ङ कनी नेसुर थेन वावे, ते राङ लोक्नी डोयी।’ सिनी सिवी। लोक्नी वासिमा ती दासा ति तोङ्बा वोतुप ताङ चेङ्गा जोनी रिनी ज्यकुप ति तीकी थोङ्गिवी। 45तमा ती ति गल्नी खुरुङ सिनाङ मङ दुक्टा वोतुप डे दिनतिवा टिनी वानी ती दासाला शुनी ते राङ देकिवी। तुक क्यानी ती मी ति गोमाला सिनाङ ज्युक्ला मङ मेलोक्पा डिवी। ती दोके दुक्टा वोतुप दी गिपाकी मीतिवा साङ तुकै राङ डिवी।”
येशूकी आमा ताङ नुपतिवा
(मर्कूस ३:३१-३५; लूका ८:१९-२१)
46येशूकी मी माङ्छ्योकला येन्देन नङ्यिन वोतुप पेला खोकी आमा ताङ नुपतिवा खो ताङ मुला ताम्ङे कितुप नोनी पाङ्ला लानी देनोक। 47ती पेला मी यी येशूकी चाला वानी, “गेकेन, गेकेनकी आमा ताङ नुपतिवा गेकेन ताङ मुला ताम्ङे कितुपला पाङ्ला लानी देन्नोक।” सिनी सिक्यासुङ। 48तमा येशूकी तीला “सु ङे आमा यिन? सु ङे नुपतिवा यिन?” सिनी टि नाङ्सुङ। 49तमा खोकी लोमातिवी थाकाला छ्या देनिन सिरा सुङ्सुङ, “ल्हो ताङ, ङे आमा ताङ नुपतिवा दिवा राङ यिन। 50सु देवाच्येनला ज्यु वोतुप ङे पपी नोवाला युकिवे, तिवा राङ ङे नुप ताङ नुम ताङ आमा यिन।”
Nu markerat:
मत्ती 12: xsrNT
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
© 2014, Wycliffe Bible Translators, Inc. All rights reserved.
