Populära bibelverser från Mateyo 6

Dela

Kuandiila londai uzumbe wa lwingu na utanda wakwe! Ne ndivyo mwinkwe viya vyoshe.

Msheje sungu kwa mbuli za keloi! Mushi wa keloi una zakwe sungu. Vyabesha, kila mushi una ntoγo zakwe.

Ne vyeleka, nikimiti: Msheje sungu kwa mbuli ya ugima wenyu kuγamba: Tijei? ao du: Tinywei? Msheje sungu kwa mbuli ya mili yenyu kuγamba: Tizwikei? Ugima so ukulu kuzinka ṅkande? Ṅwili so mkulu kuzinka shuke?

Miya iwe ukivika ingila nyumbai mwako mwe chumba che ndai, uzuγale luvi, udahemvika isho uikifishize! Kangi isho mweikala ashihooniγwa atazavikuuziza.

Vikai ivyoho: Tate yweshu we uko mwe lwingu! Zina jako jigimbikwe! Uzumbe wako uize! Uvyokunda vibontoke kunu shi sa uko mwe lwingu!

Utinke lelo nkande yetu yetiagiza!

Utiushilize masa yetu, sa ishwi tivyowaushiliza weshu masa!

Ushetiingize mwe miγezo! Miya utivunile mwe vibada! Hambu wako ni uzumbe na nguvu na utana kale na kale.

Hambu mkiushiliza wenyu wavyomibanila, hata ishe ywenyu ywa kilwingu atazamiushiliza vyenyu.

Olelai madeγe yeanga ulanga! Nkayahanda, nkayaluka, nkayaika mako, kangi ishe ywenyu ywa kilwingu ayashuγa. Inywi nkamuyazinka hakulu?

Mshekiumbikile mali kunu shi! Hambu kunu zabindwa ni visaga na nkanga, kangi zafokolwa, zabaiγwa ni wabavi. Miya kiumbikilei mali mwe lwingu! Hambu kuja nkazibindwa ni visaga na nkanga, kangi nkazifokolwa, nkazibaiγwa ni wabavi. Hambu mali yako iliko, ne moyo wako uliko.

Nkakuna mwedaha kutumikila wazumbe waili; hambu atamshuka yuja muṅwe, amkundishe yuja mtuhu, ao akianga na yuja ywa bosi atamubela yuja mtuhu; nkamdaha kumtumikila Mulungu haṅwe na mali ya kiinushi.

Ati Mulungu avutila ivyoho mani ya tunduwi yeikala lelo, kangi keloi yaashiγwa mwe moto, asheisiize kumivutila inywi? Nini mkishetozesha vyedi?

Miya iwe ukiinkila cha mbazi uleke, mkono wako wa kumosho ushetaile, wa kulume uvyoγoshola, kangwe chiya cha mbazi yako chifishiγwe! Kangi isho mweona viya vyefishiγwa atazavikuuziza.

Teγelezai utanda wenyu msheuγoshole he mesho ya wantu mkiolelwa ndiwo! Ati mu ivyoho, nkamna upokezi kwa ishe ywenyu mweikala mwe lwingu.

Mkifunga msheifye vyeni, sa waja wehemba wavyoγoshola! Hambu waja wafisha vyeni vyawe, kangwe waoniγwe ni wantu kuti: Wafunga. Kweli namiti: Wazabinda kuγuwa upokezi wawe. Miya iwe ukifunga shisha mutwi wako mavuta, kangi uhake cheni chako, kangwe usheoniγwe ni wantu kuti: Wafunga, uoniγwe ni isho mweikala hashihooniγwa! Kangi isho mweona vyefishiγwa atazavikuuziza.