If you would like a copy of this version please contact info@davaraudiobibles.org

Pengo Parja New Testament, CC-BY-SA-4.0, The Love Fellowship. Pengo Parja New Testament, CC-BY-SA-4.0, Davar Partners International, 2021.

Pengo Parja New Testament

Pengo Parja Bible by The Love Fellowship is licensed under Creative Commons Attribution-ShareAlike 4.0 License.

“ମାନାୟ୍ ଚଚ୍‌ନି କାଜିଙ୍ଗ୍ ହେୱାର୍ ମୁମ୍‌ଦ ହେଲେକେ ହାର୍ଦି କାମାୟ୍ କିମାଟ୍, ନଇଲେ ମିଙ୍ଗେଙ୍ଗ୍ ସରଗ୍‌ନି ଆବା ମିଙ୍ଗେଙ୍ଗ୍ ପୁରଷ୍କାର୍ ହିଦୁନ୍, ଇଦାଙ୍ଗ୍ କାଜିଙ୍ଗ୍ ଏପେଙ୍ଗ୍ ସାବ୍‌ଦାନ୍ ଆଜି ମାନାଟ୍। ଏପେଙ୍ଗ୍ ଦାନ୍ ହିନିହିଙ୍ଗ୍ ବେସି ପାଟ୍‌କାର୍ ଲେକେ ଜାର୍ ମୁମ୍‌ଦ ମରି ତୁବ୍‌ତି ଲେକେ ୱେଚ୍‌ମାଟ୍, ହେୱାର୍ ମାନାୟାର୍‌ତାକେ ଜୟ୍-ଜୟ୍ ପାୟା ଆଦେଙ୍ଗ୍ ଯିହୁଦିର୍ ପାର୍ତାନା ଇଞ୍ଜ ଆରେ ହାକ୍‌ଡ଼ିତ ହେଲେକେ କିନାର୍। ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍‌ଚାନାଙ୍ଗା, ହେୱାର୍ ଜାର୍-ଜାର୍ ପୁରଷ୍କାର୍ ପାୟାଆତାର୍‌ନା।
ମାତର୍ ଏପେଙ୍ଗ୍ ଦାନ୍ ହିନିହିଙ୍ଗ୍ ମି ତିନିକେଇ ଇନାକା କିନାତା, ହେଦାଙ୍ଗ୍ ମି ଡେବା କେଇ ପୁନ୍‌ମେତ୍, ହେଲେକେ ମି ଦାନ୍ ହିନାକା ଡ଼ୁକ୍‌ଚି ହିତିଲେକେ ଆନାତ୍, ଆରେ ମି ସରଗ୍‌ନି ଆବା ପା ହେ ୱିଜୁ ହୁଡ଼୍‌ଦାନାନ୍, ହେୱାନ୍ ମିଙ୍ଗେଙ୍ଗ୍ ପାଡ଼୍‌ ହିଦ୍‌ନାନ୍।


ପାର୍ତାନା କିନିହିଙ୍ଗ୍ ପାଟ୍‌କାର୍ ଲେକେ ଆମାଟ୍। ଇନେସ୍‌କି ହେୱାର୍ ମାନାୟାରିଙ୍ଗ୍ ଚଚ୍‌ନି କାଜିଙ୍ଗ୍ ଯିହୁଦିର୍ ପାର୍ତାନା ଇଞ୍ଜ ଆରେ ରାସ୍ତାନି ଚକ୍ କନାତାକେ ନିଲ୍‌ଚି ପାର୍ତାନା କିଦେଙ୍ଗ୍ ଇଚାକିନାର୍। ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍‌ଚାନାଙ୍ଗା, ହେୱାର୍ ଜାର୍-ଜାର୍ ପୁରଷ୍କାର୍ ପାୟ୍ ଆତାର୍‌ନା। ମାତର୍ ଏପେଙ୍ଗ୍ ପାର୍ତାନା କିନିହିଙ୍ଗ୍ ମି ବିତ୍ରେ ଇଞ୍ଜ ହାଲାଟ୍, ଆରେ ଏପେଙ୍ଗ୍ କାପାଟ୍ ଗେସ୍ତି ମି ଡ଼ୁକ୍‌ତି ସରଗ୍‌ନି ଆବା ମୁମ୍‌ଦ ପାର୍ତାନା କିୟାଟ୍। ଲାଗିଙ୍ଗ୍ ମି ସରଗ୍‌ନି ଆବା, ଇନେସ୍‌କି ମି କାପାଟ୍ ଗେସ୍ତି ପାର୍ତାନା କିନାକା ହୁଡ଼୍‌ଦାନାନ୍। ଆରେ ହେୱାନ୍ ମିଙ୍ଗେଙ୍ଗ୍ ପାଡ଼୍‌ ହିଦ୍‌ନାନ୍।
ଆରେ ଏପେଙ୍ଗ୍ ପାର୍ତାନା କିନିହିଙ୍ଗ୍ ବିନ୍‌ଜାତିର୍ ଲେକେ ର କାତାତିଙ୍ଗ୍ ବାର୍-ବାର୍ ୱେଚ୍‌ମାଟ୍, ଇନେସ୍‌କି ହେୱାର୍ ବେସି କାତା ୱେଚ୍‌ଚିସ୍ ମା ମାପୃ ମା ପାର୍ତାନା ୱେନାନ୍ ଇଞ୍ଜି ମାନ୍ତ ବାବିକିନାର୍। ମାତର୍ ହେୱାର୍ ଲେକେ ଆମାଟ୍, ଲାଗିଙ୍ଗ୍ ମିଙ୍ଗେଙ୍ଗ୍ ଇନାକା ଦର୍‌କାର୍, ଏପେଙ୍ଗ୍ ଏନ୍‌ୱି ଆଗେ ମି ସରଗ୍‌ନି ଆବା ହେଦାଙ୍ଗ୍ ପୁନାନ୍। ଏପେଙ୍ଗ୍ ଇଲେକେ ପାର୍ତାନା କିୟାଟ୍,
‘ଏ ମା ସରଗ୍‌ନି ଆବା, ନି ତର୍‌ ଈଶ୍ୱରଆତ୍ମା ଇଞ୍ଜି ମାନିକିନାପ୍।
ଈଶ୍ୱର ସାସନ୍ କିନି ରାଜି ୱାୟେତ୍। ଇନେସ୍ ଲେକେ ସରଗ୍‌ତାକେ, ହେଲେକେ ପୁର୍ତିତାକେ ମି ଇଚା ପୁରା ଆଏତ୍।
ନେଞ୍ଜେଙ୍ଗ୍ ମାଙ୍ଗେଙ୍ଗ୍ ଦର୍‌କାର୍‌ଆନି କାଦି ହିଦା।
ଆରେ ଆପେଙ୍ଗ୍ ଇନେସ୍ କିଜି ଜାର୍-ଜାର୍ ବିରୁଦ୍ ନିକାରିଙ୍ଗ୍ ପାପ୍ କେମା କିତାପ୍‌ନା, ହେଲେକେନେ ମା ପାପ୍ ୱିଜୁ କେମା କିଦା।
ଆରେ ମାଙ୍ଗେଙ୍ଗ୍ ଶୟତାନ ପରିକ୍ଷାତାକେ ତାତ୍‌ମା, ମାତର୍ ଶୟତାନନି ପାପ୍ କାମାୟ୍‌ତାଙ୍ଗ୍ ରକ୍ଷା କିଦା। (ହେଲେକେ ନି ରାଜି, ସାକ୍ତି ଆରେ ନି ଜୟ୍-ଜୟ୍ ଯୁଗ୍ ଯୁଗ୍‌ତ ଆୟେତ୍। ଆମେନ୍।)’
ମାତର୍ ଏଚେପାଦ୍ନା ମି ବିରୁଦ୍ ନିକାରିଙ୍ଗ୍ ପାପ୍ କେମା କିତିସ୍, ଲାଗିଙ୍ଗ୍ ମି ସରଗ୍‌ନି ଆବା ପା ମିଙ୍ଗେଙ୍ଗ୍ ପାପ୍ କେମା କିଦ୍‌ନାନ୍। ମାତର୍ ଏପେଙ୍ଗ୍ ମି ବିରଦ୍ ନିକାରିଙ୍ଗ୍ ପାପ୍ କେମା କିଉଦେର୍, ଲାଗିଙ୍ଗ୍ ମି ସରଗ୍‌ନି ଆବା ପା ମି ପାପ୍ ୱିଜୁ କେମା କିଦୁନ୍।

ଉପାସ୍ କିନିହିଙ୍ଗ୍ ପାଟ୍‌କାର୍ ଲେକେ ଆମାଟ୍, ମାତର୍ ହେୱାର୍ ଉପାସ୍ କିନାପା ଇଞ୍ଜି ମାନାୟ୍ ମୁମ୍‌ଦ ଚଞ୍ଜି ଆଦେଙ୍ଗ୍ ଜାର୍-ଜାର୍ ମୁମ୍ ୱାଚିକିଜି ମାନାର୍, ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍‌ଚାନାଙ୍ଗା, ହେୱାର୍ ଜାର୍-ଜାର୍ ପୁରଷ୍କାର୍ ପାୟାଆତାର୍‌ନା। ମାତର୍ ଏପେଙ୍ଗ୍ ଉପାସ୍ କିନିହିଙ୍ଗ୍ ମି କାପ୍ଡ଼ାତାକେ ଚିକାଣ୍ ଇବାଟ୍ ଆରେ ମୁମ୍ ନୁଜ୍ୟାଆଡୁ, ଲାଗିଙ୍ଗ୍ ଏପେଙ୍ଗ୍ ଉପାସ୍ କିନାଦେରା ଇଞ୍ଜି ଇନେର୍ ପା ପୁଞ୍ଜୁର୍, ମାତର୍ ମି ସରଗ୍‌ନି ଆବା ପୁଞ୍ଜ୍‌ନାନ୍ କି ଏପେଙ୍ଗ୍ ଡ଼ୁକ୍‌ଚି ଇନାକା କିନାଦେରା। ଆରେ ମି ସରଗ୍‌ନି ଆବା ୱିଜୁ ହୁଡ଼୍‌ଦାନାନ୍ ହେୱାନ୍ ମିଙ୍ଗେଙ୍ଗ୍ ପାଡ଼୍‌ ହିଦ୍‌ନାନ୍।


ହେଲେକେ ପୁର୍ତିତାକେ ଜାର୍-ଜାର୍ କାଜିଙ୍ଗ୍ ଦନ୍ ରୁଣ୍ଡାଇ କିମାଟ୍। ଇମେତାକେ ପିଡ଼ି ଆରେ ପ୍ରାଲ୍ ତିନ୍‌ଞ୍ଜି ବାନ୍ୟା କିନାତ୍, ଆରେ ଚର୍‌କୁ ଟୁଣ୍ଡି ହଣ୍‌ଜି ଚର୍‌କିଜି ଅନାର୍। ମାତର୍ ଇମେତାକେ ପିଡ଼ି ଆରେ ପ୍ରାଲ୍ ତିନ୍‌ଞ୍ଜି ବାନ୍ୟା କିଉତ୍ ଆରେ ଚର୍‌କୁ ଟୁଣ୍ଡି ରିକ୍‍ଚି ଚର୍‌କିଜି ଅଦେଙ୍ଗ୍ ଆଡୁର୍, ଇଲେକେ ସରଗ୍‌ତାକେ ଜାର୍-ଜାର୍ କାଜିଙ୍ଗ୍ ଦନ୍‌ସମ୍ଫତି କିୟାଟ୍। ଦନ୍‌ସମ୍ଫତି ଇମେତାକେ ମାନ୍‌ଗାନାତ୍, ଇନେସ୍‌କି ମି ମାନ୍ ପା ହେବେ ନେ ମାନ୍‌ଗାନାତ୍।


ମି କାଣ୍‌କୁ ଗାଗାଡ଼୍‌ନି ବଇଟାଲେକେ। ଲାଗିଙ୍ଗ୍ ମି କାଣ୍‌କୁ ଇନାୱେଡ଼ାଙ୍ଗ୍ ହାର୍ ମାନ୍‌ଗିନିକ୍, ଲାଗିଙ୍ଗ୍ ମି ୱିଜୁ ଗାଗାଡ଼୍‍ମୁଡ଼ି ପା ହାର୍ ମାନ୍‌ଗାନାତ୍। ମାତର୍ ମି କାଣ୍‌କୁ ଇନାୱେଡ଼ାଙ୍ଗ୍ ବାନ୍ୟା ମାନିକ୍, ଲାଗିଙ୍ଗ୍ ମି ୱିଜୁ ଗାଗାଡ଼୍‍ମୁଡ଼ି ମାଜ୍‌ଗା ଆନାତ୍। ଯଦି ଏପେଙ୍ଗ୍ କରାପ୍ କାତା ମାନ୍ତ ବାବିକିଜି ଇନାଦେର୍ ନା ମାନ୍‌ତିଙ୍ଗ୍ ଅଜଡ଼୍ କିଦ୍‌ନାତ୍ ଇଞ୍ଜି, ମାତର୍ ମି ମାନ୍ ମାଜ୍‌ଗା ନେ ମାନ୍‌ଗାନାତ୍, ପାଚେ ମି ମାନ୍ ବିତ୍ରେ ବେସି ମାଜ୍‌ଗା ଆନାତ୍!


ରକାନ୍ ହଲିଆ ରଞ୍ଜେମାଡ୍ ରିକାର୍ ମାଲିକ୍‌ତିଙ୍ଗ୍ ହେବା କିଦେଙ୍ଗ୍ ଆଡୁନ୍। ଲାଗିଙ୍ଗ୍ ହେୱାନ୍ ରକାନିଙ୍ଗ୍ ଆକାର୍ ଆନାନ୍ ଆରେ ଜେକନିକାରିଙ୍ଗ୍ ଲାଡ୍ କିନାନ୍, ରକାନିଙ୍ଗ୍ ଇଚା ଆନାତ୍ ଆରେ ଜେକନିକାରିଙ୍ଗ୍ ଗିଣ୍ କିନାନ୍। ଏପେଙ୍ଗ୍ ଈଶ୍ୱର ଆରେ ଦନ୍ ଇ ରିଣ୍ଡେକାଙ୍ଗ୍ ହେବା କିଦେଙ୍ଗ୍ ଆଡୁଦେର୍।”


ଇଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍‌ଚାନାଙ୍ଗା, “ଲାଗିଙ୍ଗ୍ ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍‌ଚାନାଙ୍ଗା, ଏପେଙ୍ଗ୍ ଇନାକା ତିନ୍‌ଞ୍ଜି ଜିନାଦେର୍, ହେଦାଙ୍ଗ୍ କାଜିଙ୍ଗ୍ ଚିନ୍ତା କିମାଟ୍। ଗାଗାଡ଼୍‌ତିଙ୍ଗ୍ ଡ଼ୁକ୍‌ତେଙ୍ଗ୍ ଇନାକା ଉସ୍‌ପାନାଙ୍ଗ୍ ଇଞ୍ଜି ହେ ବିଷୟରେ ଚିନ୍ତା କିମାଟ୍। ଇନେସ୍‌କି ଜିବୁନ୍ କାଦିତାଙ୍ଗ୍ ଗାଜା ଆରେ ଗାଗାଡ଼୍ ହେନ୍ଦ୍ରାତାଙ୍ଗ୍ ଗାଜା ଆକାଇ। ବାଦାଡ଼୍‌ନି ପଟିକାଙ୍ଗ୍ ହୁଡ଼ାଟ୍, ହେୱେକ୍ ବିୟାନ୍ ୱିତୁକ୍ କି ତେଜୁକ୍ କି କଲ୍‌କିତାକେ ରୁଣ୍ଡାଇକିଜି ଇଟୁକ୍, ମାତର୍ ସରଗ୍‌ନି ଆବା ହେୱେକାଙ୍ଗ୍ କାଦି ହିନାନା। ଏପେଙ୍ଗ୍ ଇନାକା ହେ ପଟିଙ୍ଗ୍‌ତାଙ୍ଗ୍ ଗାଜା ଆକାୟ୍? ମି ବିତ୍ରେ ଇନେର୍ ଇଲେକେ ମାନାର୍, ଇନେର୍ ଇଦାଙ୍ଗ୍ କାଜିଙ୍ଗ୍ ଚିନ୍ତା କିଜି-କିଜି ବେସି ଜିଦେଙ୍ଗ୍ ଆଡ୍‌ନାଦେର୍?
ଆରେ ମି ହେନ୍ଦ୍ରା କାଜିଙ୍ଗ୍ ଇନା ଚିନ୍ତା କିନାଦେରା? ବାଡ଼୍‍ଦି ପୁଇକୁକାଙ୍ଗ୍ ହୁଡ଼୍‌ଜି ହିକାଆଡୁ, ହେ ୱିଜୁ ଇନେସ୍ କିଜି ଡିନିକ୍, ହେ ୱିଜୁ କଷ୍ଟ କିଉକ୍, କି ନୁଲ୍ ଡ଼ଚୁକ୍। ମାତର୍ ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍‌ଚାନାଙ୍ଗା, ‘ରାଜା ଶଲମନ ଆଜି ପା ବେସି ହଲ୍‌ନାକା ଆରେ ୱାରି ଆନି ହେନ୍ଦ୍ରା ଉସ୍‌ପିସ୍ ମାଚାନ୍। ମାତର୍ ତା ହେନ୍ଦ୍ରା ଇ ରଞ୍ଜାଙ୍ଗ୍ ପୁଇ ଲେକେପା ହାର୍ ଆୱାଦାଙ୍ଗ୍ ମାଚାତ୍।’
ମାତର୍ ବାଟାନି କାଚ୍ରାତିଙ୍ଗ୍ ପା ହେଲେକେ ହେନ୍ଦ୍ରା ହିତାନ୍‌ନା। ହେ କାଚ୍ରା ନେଞ୍ଜେଙ୍ଗ୍ ଜିତାତ୍‌ନା ଆରେ ୱିଗାଲିଙ୍ଗ୍ ହେ କାଚ୍ରାତିଙ୍ଗ୍ କାଚାଆନି ନାଣିତାକେ ତୁହିହିନାର୍। ଏପେଙ୍ଗ୍ ପୁନିଲେକେ ଯେ, ଈଶ୍ୱର ହେ କାଚ୍ରାତାଙ୍ଗ୍ ମିଙ୍ଗେଙ୍ଗ୍ ଆଦିକ୍ ହେନ୍ଦ୍ରା ହିଦ୍‌ନାନ୍। ଈଶ୍ୱରତାକେ ଏପେଙ୍ଗ୍ ଏଚେକ୍ ପାର୍ତି ଆକାୟ୍? ଲାଗିଙ୍ଗ୍ ଇନାକା ତିନାଙ୍ଗ୍ କି ଇନାକା ଉଣାଙ୍ଗ୍ ହେ ବିଷୟରେ ଅଲପ୍‌ପା ଚିନ୍ତା କିମାଟ୍।
ଇମ୍‌ଣାକାର୍ ଈଶ୍ୱରତିଙ୍ଗ୍ ପୁନ୍‌ୱାତାର୍‌ନା ଇୱିଜୁ ବିଷୟ ପାୟା ଆଦେଙ୍ଗ୍ ଡେକ୍‌ଚି ବୁଲାଆନାର୍, ହେଦାଙ୍ଗ୍ ମି ସରଗ୍‌ନି ଆବା ଈଶ୍ୱର ପୁନାନ୍, ଯେ, ଇୱିଜୁ ବିଷୟ ମିଙ୍ଗେଙ୍ଗ୍ ଦର୍‌କାର୍। ମାତର୍ ଏପେଙ୍ଗ୍ ଈଶ୍ୱର ସାସନ୍ କିନି ରାଜି ଆରେ ଦରମ୍ ବେଣ୍‌ତାଙ୍ଗ୍ ଜିଦେଙ୍ଗ୍ ଉପାୟ୍ କିୟାଟ୍, ଏପେଙ୍ଗ୍ ହାର୍ଦି କାମାୟ୍ କିନାକା ଇଚାକିନାନ୍, ହେଦାଙ୍ଗ୍ କାଜିଙ୍ଗ୍ ମିଙ୍ଗେଙ୍ଗ୍ ଦର୍‌କାର୍‌ଆନି ଇୱିଜୁ ବିଷୟ ଈଶ୍ୱର ହିଦ୍‌ନାନ୍। ଲାଗିଙ୍ଗ୍ ୱିଗା କାଜିଙ୍ଗ୍ ଚିନ୍ତା କିମାଟ୍, ଲାଗିଙ୍ଗ୍ ୱିଗା ଜାର୍-ଜାର୍ କାଜିଙ୍ଗ୍ ଚିନ୍ତା କିନାଦେର୍। ନେଞ୍ଜେଙ୍ଗ୍‌ନି ଦୁଃକ୍ ନେଞ୍ଜେଙ୍ଗ୍ କାଜିଙ୍ଗ୍ ସାରି।”

Lyssna på ମାଥିଉ 6