Nduŋmbi lɛ́Ꞌ, nǔu ŋɡɑplɑ́Ꞌ ɡɛ ḿbɔ́, pɑŋɡɛ́ ɛ̂pɑ́ mʉ́ʉ mbɑꞋmbɑꞋɑ́, ńdɔk lɑmɛ́ndɑɑ yi pɔ́p kɑ niitɛ́nɛ ŋ́ɡʉ nɛ́ zʉꞋ-nɛshi. Ŋ́ɡʉ tɛ ŋ́kúu zúꞋu, ńjʉ́ɔ, mbɔ pɛ́ kɑ fú ntsu-nɛshi, ńtsʉ́ʉ mɑ́mɑ́ ŋɡɔꞋ yí ɛ́ ḿbɔ́nɛ zúꞋu. Pɔ́p jɛ́Ꞌ ŋ́kúu tsɛtú, ŋ́kɛ́ ḿbɔɔ pfú-Tsɑpʉɔ Yɛ́su jʉ́ɔ. Pɔ́p kɑ tʉ́ʉ ńdíŋɛ zʉꞋ ɛ́ pɔ́ ŋ́kʉꞋnɛ wɔ́p, pɔ́p ɡɔ́ɔ ńjʉ́ɔ pʉɔ pɛ́pɑ́ cẅɛt, ḿmɑꞋ mɛndẅí ɛ́ fúk tɛ ŋwɑŋɛ. Pɔ́p pɔ́k tɛ ńtsʉ́Ꞌ ńdíŋɛ pɔ sɛ́, lɑ́ pʉɔ ɛ̂pɑ́ píkŋɛ wɔ́p ŋɡɔ: «Pʉʉ tɔ́ tsɛtsɛt pɛpfú sɛ́, ńdɔ́ɔ ŋu ẅí ɑ ntʉʉ mɛlɑ́Ꞌkʉ̈ɔ́? A kɑ́ pɛ́t zɑ́Ꞌnɛ pɔ́, ɑ zẅíimɛ nǔu nɛvú. Pʉʉ zɛɛ ŋ́kẅíitɛ nu yi ɑ kɑ pɔ́ ńcú mbɔ̌ pʉʉ ŋkɑ́ yi pʉʉ pɛ́pɔ́p kɑ pɛ́tnɛ Ŋɡɑlilɛɛ. A kɑ cú ŋɡɔ: Ɛ́ sɛ́ ḿbíkŋɛ ŋɡɔ pɛ́ fɛn Mɔ́ɔ-Ŋu mbɔ̌ pʉɔ kɛpɔŋ, pɔ́p kẅii wɛ́ nǔu tʉ́ mbɑ́ŋtɛ pɑ́ŋtɛ́nɛ, ɑ zẅíimɛ nǔu nɛvú nǔu mbɑ́ɑtɛ lɛ́Ꞌ pɛ́tɑ́t.»
Pɔ́p zúꞋ pɔ́Ꞌɔ, ŋ́ɡɔ́ɔ ŋ́kɛ́ ŋ́kẅíitɛ ŋɡɔ, ɛ́ mɛnu mi Yɛ́su kɑ zɛɛ ɛ́sẅíi wɔ́p, ɛ́fú zúꞋu, ŋ́ɡʉ ḿbɛ́ɛtɛ mɛnu tsʉʉ mi ɛ́ lɛɛnɛ, ɛ́sẅíi ɡɑŋku pɛ́ ntsɔ̌pmɔꞋ nɛ́ nɛɡɛ́m mbɑ mbɔ̌ pɛcɔ́ pʉɔ nǔu ku yɔ́p. Pɑŋɡɛ́ ɛ̂pɑ́ ḿbɔ́ Mɑlíyɑ ẅi ɑ ḿbɔ́ ńnɑ́ŋ Mɑkdɑlɑ, ŋ́ɡɛ Jɑ̂ɑnɛ, mbɑ Mɑlíyɑ mɑ́ pɛ́ Jɑ̂k, pɔ́p pɛcɔ́ pɑŋɡɛ́. Pɔ́p pɛ́ɛtɛ mɛnu ɛ̂mɑ́ ɛ́sẅíi ɡɑŋntúu-Yɛ́su. Pɔ́p zúꞋ ɛ́ pɔ́ pɔ pɑꞋ njʉɔ lɑ́, pɔ́p pɔɔ pɛ́m. Lɑ́, Pyɛ̂ lɔ sɛ́, ŋ́kʉɔ tɛ ŋ́kúu zʉꞋ-nɛshi, ŋ́ŋɔ́Ꞌnɛ sɛ́, ńjʉ́ɔ pɔ ndɑꞋ yúu-ndẅí yi pɛ́ kɑ lɔknɛ ŋ́kɑ́tɛ pfú-Yɛ́su, ɛ́ nɔɔ nǔu yɛcɔ́ ɡúŋ. Ŋ́ɡɔ ḿbɛn, ɛ́ nɛn ŋ́kʉꞋnɛ wɛ́, ɑ pɔɔ ḿbɔ́ ńjí yúu mi ɛ́ lɛɛnɛ pɔ́.

Ɛ́ kɑ pɛn ḿbɔ́ pɔ lɛ́Ꞌ ɛ̂yɑ́, pɛcɔ́ pʉɔ pɛ́pɑ́, nǔu ku-Yɛ́su lɔ sɛ́ Yɛlúsɑlɛm, ḿbɔ́ ŋ́ɡʉ nɛ́ yɛcɔ́ lɑ́Ꞌ yi pɛ́ fúŋnɛ ŋɡɔ Ɛmɑwûs. Nɛɡʉ tɛ ŋ́kúu zúꞋu pɔ nɛnɛn hɑ́wɑ yɛ́pɑ́. Ńnɛn ḿbɔ́ sẅiŋɛ nǔu mɛnu tsʉʉ mi ɛ́ kɑ lɛɛnɛ. Ŋkɑ́ pɔ́p kɑ pɔ́ sẅiŋɛ, ḿbɔ́ ńzɔŋɛ lɑ́, Yɛ́su ɡɔ́ɔ ńtɔ́ yɛ́ ŋ́kẅɛ́ɛtɛ wɔ́p sɛ̂ndúŋ, pɔ́p pɛpɔ́p pɔ́ ńnɛn. Lɑ́, yɛcɔ́ yúu tɑɑtɛ, pɔ́p pɔɔ wɛ́ lii. Yɛ́su píkŋɛ wɔ́p ŋɡɔ: «Pʉʉ nɛn ńzɔŋ pɔ kʉ̈ɔ́ pɛꞋnɛ?» Pɔ́p zúꞋ ńtʉ́ʉ, ḿmɑꞋ mɛjʉ́ŋ, ɛ́sɑ́ŋɛ tú. Wɛcɔ́ tɑ́Ꞌ nǔu pɔ́p, lík yɛ́ pɔ́ ŋɡɔ Kɛlɛ́ɔpɑs píkŋɛ wɛ́ ŋɡɔ: «Pʉɔ tsʉʉ Yɛlúsɑlɛm jí yúu mi ɛ́ kɑ ɡɛnɛ Yɛlúsɑlɛm nǔu mɛlɛ́Ꞌ mɔ, tɛ ɛ́ tsʉ́Ꞌ pɔ ndɑꞋ ɡu kɛkʉ̈ɔ́?»
A píkŋɛ wɔ́p ŋɡɔ: «Kʉ̈ɔ́ ŋ́ɡɛnɛ?» Pɔ́p cú ŋɡɔ, pɛk lɑ́Ꞌ ḿbɔ́ ḿmɑɑ pɔ mɛnu mi ɛ́ kɑ ɡɛnɛ Yɛ́su ŋu-Nɑ̌ɑzɑlɛt. A ḿbɔ́ kwɑꞋ ŋɡɛ́mndʉ̈ɔ́Ꞌ-Sɛ́ wɛ ɡwɛ́, nǔu mɛfɑꞋ-mɛ́, mbɑ nǔu sẅiŋɛ yɛ́ mbi Sɛ́ mbɑ mbi pʉɔmɛsɔŋ. PɑꞋ Pɛtɑ́tndɑ́-pɑnɔ́ŋpɔꞋ pɔ́p pɑsɑ́Ꞌ lɑ́Ꞌ pɛk kɑ cɑklɛ wɛ́ mbɔ̌ Pilɑ́tu ŋɡɔ pɛ́ ɡʉ ŋ́ŋɑk wɛ́, ńjẅí wɛ́. Pɛ́ kɑ ɡɔ́ɔ ŋ́kɛ́ ŋ́kẅii wɛ́ nǔu tʉ́ Mbɑŋtɛ pɑ́ŋtɛ́nɛ. Lɑ́ mbɔ pɛk m̄bɔ́ ŋ́kwɑŋɛ ŋɡɔ jʉ́ ɡɛnɛ ńdɑ́Ꞌ ńzɑ́Ꞌ ŋkʉ-ŋɡʉ̈ɔ́Ꞌ, lɔ́ŋ-Islɑɛ̂l. Mɔ mɛnu ɡɛ, ɛ́ ŋkɔ̂ɔnɛ ḿbɔ́ lɛ́Ꞌlɑ́Ꞌ yɛ́tɑ́t. Ɛ́ kɑ́ pɔ́ ndɑꞋ pɔ́Ꞌɔ pɔ́, pɛcɔ́ pɑŋɡɛ́ tsɛtsɛt pɛk lɑ́Ꞌ ŋ́kʉꞋnɛ wɛk. Pɔ́p lɑ́Ꞌ ḿmʉ́ʉ ŋkɔ́Ꞌnjí lɔ́Ꞌnɛ, ŋ́ɡʉ zʉꞋ yi pɛ́ kɑ lẅɛꞋnɛ wɛ́ zúꞋu, ḿbɔɔ pfú yɛ́ jʉ́ɔ, ḿbɛn nzʉʉ ɛ́sẅíi wɛk ŋɡɔ pɔ́p kúu zúꞋu, Pɛcʉ̈ɔ́Ꞌ-Sɛ́ cẅɛt mbi pɔ́p, ńcú ŋɡɔ Yɛ́su pɔ́ ntʉʉ! Pɛcɔ́ pʉɔ pɛk lɑ́Ꞌ ńzúꞋ pɔ́Ꞌɔ, ńdɔ sɛ́, ḿbɛn ŋ́ɡʉ yɔ́p nɛshi, ńjʉ́ɔ ɛ́ pɔ́ pɔ ndʉ́ŋndʉŋ pɑꞋ pɑŋɡɛ́ ɛ̂pɑ́ lɑ́Ꞌnɛ ɛ́sẅíi wɔ́p, lɑ́ pɔ́p kɛ́ ḿbɔɔ Yɛ́su jʉ́ɔ.
Yɛ́su ɡɔ́ɔ ŋ́kɛ́ ńcú mbɔ̌ pɔ́p ŋɡɔ: «Pʉɔ kɛ́ jínu. Pʉʉ kɑ́ pɔ́ ɛ́fɛ́Ꞌnɛ ḿbɛ́m mɛnu tsʉʉ mi pɛŋɡɛ́mndʉ̈ɔ́Ꞌ-Sɛ́ kɑ ŋwɑꞋnɛnɛ pɔ́.» Pʉʉ kɑ́ jí ŋɡɔ, ɛ́ kɑ pɔ́ ḿbíkŋɛ ŋɡɔ Nzɑ́Ꞌŋkʉ piitɛ ńjʉ́ɔ ŋɡʉ̈ɔ́Ꞌ lɑ́ ŋ́kúu tsɛt nɛɡúꞋ wɛ pɔ́ kɛ? Ńcú pɔ́Ꞌɔ, ńzɛ nɛkyɛ́Ꞌtɛ mɛnu tsʉʉ mi ɛ́ tsɛt ŋwɑꞋnɛ-Sɛ́ ḿbɔ́ ńdíŋɛ wɛ́, ɛ́sẅíi wɔ́p, ńzɛ nǔu mɛŋwɑꞋnɛ-Mɔ̌sɛ̂ɛ, ḿbɑ́ɑtɛ ŋ́kúu tsɛt mɛ́ pɛŋɡɛ́mndʉ̈ɔ́Ꞌ-Sɛ́. Pɔ́p pɛ́ pɔ́p ɡʉ tɛ ḿbɔ́ ŋ́kúu lɑ́Ꞌ yi pɔ́p pɛ́pɑ́ kɑ pɔ́ ŋ́ɡʉ zúꞋu. Pɔ́p jʉ́ɔ ɑ lɔɔ pɔ pɑꞋ ɑ ḿbɛn ńnɛn tɛ ŋɡɑ sɑk. Lɑ́ pɔ́p ɡẅɛɛ wɛ́, ŋɡɔ pɔ́p pɛpɔ́p lɛ́, mbíꞋŋɡɔ túꞌ tsʉ́Ꞌ ɛ́sʉ́ʉ sʉ́ʉnɛ, zɑꞋ lɛɛ mɔ́. A pɛ́m pɔ́p pɛpɔ́p kúu ndɑ́ yi pɔ́p kɑ pɔ́ ŋ́ɡʉ nɛ zúꞋu. Ŋkɑ́ nɛjʉ́ yúu ɡɛ ŋ́kuꞋ, pɔ́p nɑ́ŋ sɛ́, ɑ pɛ́ɛ mbɛlɛ̂ɛt, ŋ́ɡɑ́ pɑ́Ꞌlɑ́ mbɔ̌ Sɛ́, ḿbʉ̈ɔ́Ꞌtɛ ŋ́ɡɑ́ mbɔ̌ pɔ́p. Pɔ́Ꞌ mík mɔ́p ɡɔ́ɔ ŋ́kɛ́ ńdɛ́ɛnɛ pɔ́p lii wɛ́, ɑ ɡɔ́ɔ ḿbɛ́. Pɔ́p shɔtnɛ ńcú tsɛtsɛt pɔ́p ŋɡɔ: «Yɔ lɔk ḿbɔ́ yúu mi ɛ́ lɑ́Ꞌnɛ ŋ́ɡɛ lɑ́ sẅiŋɛ yɛ́ kúutɛ wǔu ŋkɑ́ yi pɛkŋɛ lɑ́Ꞌnɛ ḿbɔ́ sɛ̂ndúŋ ɑ pɔ́ ŋ́kyɛ́Ꞌtɛ nu-Sɛ́ ɛ́sẅíi wǔu lɑ́!» Pɔ́p lɔ sɛ́ pɔ ŋkɑ́ ɛ̂yɑ́, ńcʉ́ɔ sɛ̂ndúŋ, ḿbɛn ḿbɛn Yɛlúsɑlɛm, ŋ́kẅɛ́ɛtɛ ɡɑŋku-Yɛ́su ntsɔ̌pmɔꞋ nɛ́ nɛɡɛ́m, mbɔ pɔ́p pɛcɔ́ pʉɔ-Yɛ́su cúꞋlɛ. Ŋ́kẅɛ́ɛtɛ wɔ́p pɔ́Ꞌɔ, pɔ́p sẅíi wɔ́p ŋɡɔ: «Ɛ́ nɛ́nẅín ŋɡɔ Ndɛ zẅíimɛ nǔu nɛvú, Símɔ̂ŋ lɑ́Ꞌnɛ ńjʉ́ɔ wɛ́.» Pɔ́p pɛn ḿbɛ́ɛtɛ yɔ́p yúu mi pɔ́p lɑ́Ꞌnɛ ńtɔ́ sɛ̂ndúŋ ńjʉ́ɔ, ŋɡɔ pɔ́p lɑ́Ꞌ ŋ́ɡɔ́ ńdii wɛ́, mbɔ ɑ pɛ́ɛ mbɛlɛ̂ɛt tɛ ḿbɔ́ ŋ́ɡɑp.


Pɔ́p pɛ́t ɛ́sẅíŋɛ sẅiŋɛnɛ, Yɛ́su ɡɔ́ɔ ńcẅɛt ńtʉ́ʉ tsɛtsɛt pɔ́p, ńcɛꞋlɛ wɔ́p ŋɡɔ: «Mbɔ́tnɛ pɔ́ nɛ́ pʉʉ!» Lɛ́m yɔ́p sɑ́ɑnɛ. Pɔ́p pɔ́k, ńzɛ ḿbɔ́ ŋ́kwɑŋɛ pɔ ŋɡɔ ɛ́ jíjʉ́ŋ-ŋu. Lɑ́ Yɛ́su cú mbɔ̌ pɔ́p ŋɡɔ: «Lɛ́m yʉ́ʉ sɛ́ ńtsɔ́Ꞌɔnɛ tsɔ́Ꞌnɛ́nɛ mɛlɑ́Ꞌkʉ̈ɔ́? Pʉʉ mʉꞋlɛ mʉꞋlɛ́nɛ mɛlɑ́Ꞌkʉ̈ɔ́? Pʉʉ líŋɛ mbɔ́ mɑ́ɑ nɛ mɛku mɑ́ɑ lɑ́ ńjʉ́ɔ, ɑ kwɑꞋ mɔ. Pʉʉ mɔɔtɛ wɑ́ɑ lɑ́ ńzúꞋ, jíjʉ́ŋ-ŋu kɑ́ ɡẅɛɛ mbɑp-mbʉʉ pɔ́, ŋ́kɛ́ ḿbɔɔ mɛtsẅí ɡẅɛɛ, pʉʉ kɛ ńjʉ́ɔ pɑꞋ, m bɛn ŋ́ɡẅɛɛ mbɑp-mbʉʉ nɛ mɛtsẅí.» A ɡɔ́ ńcú ḿbɔ́ ńnyɛt wɔ́p nɛ́ mbɔ́ mɛ́ pɔ́p mɛku mɛ́. Pɔ́p pɔ́ ńtsɑ́ɑtɛ tɛꞋ lɑ́ ɛ́ pɛ́t ŋ́kʉꞋnɛ wɔ́p kʉꞋnɛ́nɛ, pɔ́p cú ŋɡɔ kɛ ɛ́ nu ɔ́ɔ? Yɛ́su píkŋɛ wɔ́p ŋɡɔ: «Pʉʉ ɡẅɛɛ yúu kwɛ́tnɛ zɑ́Ꞌnɛ?» Pɔ́p lɔ́ɔ kɛ́m-shú yi tɔɔnɛ ŋ́ɡɑ́ mbɔ̌ wɛ́. A cẅɛ́ɛ, ńtʉ́ʉ pɔ mbi pɔ́p ŋ́kwɛ́t.
A kɑ kwɛ́t tɛ ḿmɛk, ńcú mbɔ̌ pɔ́p ŋɡɔ: «Pʉʉ jʉ́ɔ yúu mi ŋ kɑ pɔ́ ɛ́sẅíi wʉ́ʉ, ŋkɑ́ yi pɛkŋɛ kɑ pɛ́tnɛ ńjúk. Ŋ kɑ sẅíi wʉ́ʉ ŋɡɔ ɛ́ sɛ́ ḿbíkŋɛ ŋɡɔ yɛ́t kʉ̈ɔ́ lɑ́ yi pɛ́ kɑ ŋwɑꞋnɛnɛ nǔu mɔ lɑ́ puutɛ. Mɛnu ɛ̂mɑ́ tsʉʉ tsʉʉ mi ɛ́ tsɛt ŋwɑꞋnɛ-Mɔ̌sɛ̂ɛ, mbɑ tsɛt yi pɛŋɡɛ́mndʉ̈ɔ́Ꞌ-Sɛ́ pɔ́p yi mɛzɔpŋki.» Ŋ́ɡɔ́ɔ ŋ́kɛ́ ńtsɔ́Ꞌ jínu yɔ́p, ŋ́ɡɛ pɔ́p zúꞋ mɛnu mi ɛ́ tsɛt ŋwɑꞋnɛ-Sɛ́. Ńcú ŋɡɔ: «Ɛ́ tsɛt ŋwɑꞋnɛ-Sɛ́ ḿbɔ́ ŋɡɔ: Nzɑ́Ꞌŋkʉ ɡẅɛɛ nɛ lɑ́Ꞌ ńjʉ́ɔ ŋɡʉ̈ɔ́Ꞌ, ḿpfú, lɑ́ Sɛ́ pɛn ńzẅíi wɛ́ nǔu nɛvú nǔu mbɑ́ɑtɛ lɛ́Ꞌ pɛ́tɑ́t. Ɛ́ sɛ́ ḿbíkŋɛ ŋɡɔ pɛ́ lɑ́Ꞌ ńdɔk lík yɑ́ɑ, ńcú nu-Sɛ́ mbɔ̌ lɑ́Ꞌ ŋɡɔ mbɑ wɔ̌ lɑ́ kúpmɛ mɑt wɛ, Sɛ́ likŋɛ mɛnu kɛpɔŋ mɛ́. Pɔ́Ꞌɔ, ɛ́ kɛ ńzɛ Yɛlúsɑlɛm.» Pʉʉ ɡʉnɛ ŋ́kɛ́ ḿbɔ́ pɑjʉ́ ńjʉ́ɔ, nɛlɔk mɛnu ɛ̂mɑ́ ɛ́sɑt lɑ́Ꞌ. Pʉʉ jí ŋɡɔ ŋ ɡɛ ńtɔ́ ńtúu yúu mi Tɑ̌ɑ mɔ kɑ kɑꞋnɛ nɛɡɑ́ mbɔ̌ pʉʉ. Pʉʉ kɛ ńzẅíꞋlɛ pɔ tʉ́sɔŋ tɛ ŋ́kúu ŋkɑ́ yi mɛtʉʉ-Sɛ́ ɡʉ ɛ́fú tʉ́nɛ́pú ńcúŋ ŋ́kúu nǔu pʉʉ.

Yɛ́su cú pɔ́Ꞌɔ, ńdɔk wɔ́p ńcẅɛt, ŋ́ɡʉ tɛ ńtsʉ́Ꞌ nɛkúu Mbɛtɑni, ŋ́kɑꞋ mbɔ́ ŋ́ɡɑ́ tʉ́, ńníꞋ mbɔ́tnɛ nǔu pɔ́p. A pɔ́ ńníꞋ mbɔ́tnɛ nǔu pɔ́p pɔ́Ꞌɔ, ḿbɔ́ ŋ́kɔ́Ꞌ ŋ́ɡʉ nɛ́ tʉ́nɛ́pú. Pɔ́p tsʉ́Ꞌ ńtʉ́ʉ zúꞋu ḿbɔ́ ŋ́ɡúꞋlɛ wɛ́, tɛ ɛ́ kuꞋ, pɔ́p lɔk tsɑ́ɑtɛ ḿbɛn nzʉʉ nɛ́ Yɛlúsɑlɛm. Ŋ́ɡʉ tɛ ŋ́kúu zúꞋu, ŋ́kɛ́ ńtsʉ́Ꞌ ńnɑ́ŋ pɔ tsɛt ndɑ́-nɛnɔŋpɔꞋ ŋkɑ́ tsʉʉ, ŋ́ɡúꞋlɛ Sɛ́.

Lyssna på Lúkɑ́shi 24