Tavaꞌu 14
14
Avalamu Mulivunoxu Loto
1-9Ioxe, no tauu ie ane Bera, anu tatananu tuala ne Sodomu xe Bilusa anu tatananu tuala ne Xomola, xe Sinap anu tatananu tuala ne Atama, xe Semevelu anu tatananu tuala ne Sevoimu, xe tatananu tuala ne Bela, tuala ane ne ilemolu kalumo lexe Soalu. Kedolulaome anu tatananu tuala ne Elamu. Anu musaxila'a ta tatananu tuala no xalee ne Sodomu mo ne Xomola mo ne Atama mo ne Sevoimu mo ne Bela. Anu musaxila'a tauu ie mavulovexa mo mulelia tamei. Xe no anu tauu ie mavulovexa mo mulelia tatalu la ane'i ilomuxu vaikalau Kedolulaome uasi. Ioxe, no anu tauu iexu mavulovexa vile mo mulelia tami'asou, la sou anu mu'avali'a ta menexu tatalu, eiae Amulapelu anu tatananu tuala ne Vaviloni, Alioku anu tatananu tuala ne Elasa mo Taitalu anu tatananu tuala ne Xoimu. Ane'i ta tatananu tuala tami'a ne, ilo'a ta mitema sou 'oto'oto noxi'a milai sou ilo'a ta mitema sou 'oto'oto noxou Lepaimu ne Asutelo-kananimu sou ilo'a mi'oto, la ane'i tami'a ne mitaloxolixa'a Lepaimu ilo'a ta mitema sou 'oto'oto noxou. La mitaloxolixa'a ta Sus ne Amu mo ta Emu ilo'a ta mitema sou 'oto'oto noxi'a no latia ne Kiliataimu. Xe mitaloxolixa'a ta Xori no laxa'ilu ne Seiru ka milelemuline'i milai mitalo no tuala ne Elu-paran 'alai no xalee lia vitanisi. Ka sou mixiu sou mixixao milivu mine'e ne Kadesi. Mitaloxolixa'a ta mitema sou mive'ave'a no xalee lia ne Ameleki mukalusi. Ka ilo'a ta Amolu ne Asason-tama mi'oto la ane'i mitaloxolixa'a mukalusi. Xe ili'i, la ta tatananu tuala ta'uve ne Sodomu ilee Xomola mo ne Atama mo ne Sevoimu mo ne Bela mino'a ta mitema sou 'oto'oto noxi'a sou milai no vanunu ne Sitimu sou ilo'a ta tatananu tuala ne Elamu mo ne Xoimu, mo ne Vaviloni mo ne Elasa mi'oto. Ane'i ta mitema sou 'oto'oto noxi'a ta tatananu tuala ta'uve ne, ilo'a ta mitema sou 'oto'oto noxi'a ta tatananu tuala tami'a ualasi'a lexe, Amulapelu ilou Alioku mo Kedolulaome xe Taidalu, ilo'a mi'oto.
10Vanunu ne Sitimu ne, koluta taxataxasou mu'ana'ana no anu. Ioxe, ta tatananu tuala ne Sodomu ilee Xomola iexe lexe i'ume loxo 'o la ua, ilo'a ta mitema sou 'oto'oto noxi'a se'i mitalotaloxo milu'e no taxataxa, ia tavu'alo noxi'a ne mi'ume milai no laxalaxa'ilu. 11Kedolulaome ilo'a ta menexu tatalu ne, mitaloxolixa'a ane'i ta'uve ne mole mi'unalai ne Sodomu ilee Xomola. Mi'unalai xe miuatu sou milai, la mitavule mimii no nano ne mukalusi, mo mitavule la'ilali kalumo. 12Loto ne, anu muxolu ne Sodomu, mole ane'i mi'una la mino'u kalumo mo mixumixu.
13Ia itema vile noxi'a ane ne, ane'i mi'oto la anu mu'ume mulai noxou Avalamu anu itemasie Evalaio la mua'alou sou eiae Loto, xo anu Avalamu ne mulai muxolu 'alai no ovu tavuna noxou Mamule itemasie Amolu. Mamule ilo'a ta vimovimou eiae Esikolu ilou Anelu. Ane'i tatalu ne Avalamu ta menexu. 14Ioxe, anu Avalamu mulomu lexe vimou 'olu, Loto ane ta mitema mino'u ne, la sou mu'avali'a ta mitema sou 'oto'oto noxou itiitisi'a muxali loxo itemaxu mavulovexa vile mo itemaxu ta'uve mo mavulovexa vile mo ta'uve mo muxatele tatalu (318) sou milelemuline'i Kedolulaome ilo'a ta menexu tatalu mole milai mixali ne Den. 15Milai xe milai mixali ne Den, la Avalamu mukalipala'ane'i ta mitema noxou la'oluxa'a tamei. Xe no 'olovoxo la mialivulane'i la mitaloxolixa'a moso mukalusi. Milelemuline'i xoo mole milai mixali ne Ova ne Temasukasi. Tuala ane ne muxolu no paxa sevile ne Temasukasi. 16Mi'ume mimii e ane'i mino'u mo milivunoxu Loto ilo'a ta sema mo ta mitema noxou mo mi'ami'a kalumo.
17Milivu mixali, io ili'i no anu 'oto'oto ane ne, la tatananu tuala ne Sodomu mulai sou mualaxu Avalamu no vanunu vile ilemolu lexe Save. Ilemolu vanunu ane ne kalumo lexe “Vanunu Noxou Tatananu Tuala”. 18#Eva 7:1-10Xe Melikisateki tatananu tuala ne Salemu, anu itema sou u'elaxa'a ta sipsip ulai noxou Lataua Manina Teitexi. Muno'u la'ilali xe uaini sou mulai noxou Avalamu. 19Mulai muxali noxou, la mualusou, muvikala aloxo 'o, “Lataua Manina Teitexi anu ane mukoinu mimii latala loxo loxotolo ilou lia ualusine! 20Anu molu mulosine xavi sou netaloxolixa'a ta mitema sou 'oto'oto ane ngongi'a nge'oto ne. Laixe nenge ta'itinu Lataua ualasou.” Xe Avalamu muavuti la muta'olunu mimii ane anu mulai mu'umenu mulivunoxu ne, la'oluxu mavulovexa vile. Xe muavuti la mulosou Melikisateki la'oluxu vile.
21Xe tatananu tuala ne Sodomu muavuti la muvikalanu Avalamu aloxo 'o, “Mimii piena e ne'umenu mulivu ne, natetelisou mo uai noxine ne, ia ta mitema noxilo ne, nalivulixa'a ine'e noxilo ukalusi.” 22Xe Avalamu muavuti la mukolinu aloxo 'o, “Eni atulu no iou IAUE Lataua Manina Teitexi, Anu molu mukoinu loxotolo mo lia, mo eni avikala manina aloxo 'o. 23Eni umomomo sou atetelisou mo ano'u mii vile uai noxine uasi, loxo 'o io nini navikala lexe ninisi ane, nini neitixeni mimii la ane eni exali itema sou lavuluti 'o. 24Mo eni umomomo sou eni ano'u mii vile uasi. Mimii ane ta mitema noxilo mino'u, ane eni opoleli musexelaxusi. Ia ta vivilo tatalu e Anelu ilou Esikolu mo Mamulesi ane lexe nini nalosi'a na'a.”
Trenutno izabrano:
Tavaꞌu 14: ataNTpo
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 2013, Wycliffe Bible Translators, Inc. All rights reserved.