Mateo 13
13
Kwent nanzee chaan zha kuu nzhann
(Mr. 4:1‑9; Lc. 8:4‑8)
1Thib wiz mroo Jesús leen yuu ta mbet Jesús kon re zha kuu ngeteed lo Jesús, ne ngwa Jesús mndob Jesús roo nitdoo Galilea. 2Ne kwathoz men mkaltaa lo Jesús, tsa mke Jesús leen thib kano ne mndob Jesús leen kano lo nitdoo. Ne lee re men mrin roo nitdoo. 3Tsa mloo Jesús kwaro kwaa lo re men por kwent nanzee.
Ne nzhab Jesús:
―Nal tan thib kwent lo goo, lee thib zha kuu nzhann mroo ndalo bin lo yu. 4Ne leettsa ngego zha bin lo yu, thib nete mla roo net, ne myaad re min ndowe. 5Tedib nete mla xid ke, ta yent naroob yu; ne kwathoz lijer mlene, tak lut yu nzo ta mlay. 6Ne leettsa mla be mgole, tak yent naroob yu lozhe kona mbize. 7Tedib nete mla xid yits, ne mzhen re yits tsa mluux yitse ne mndaate xle. 8Per lee tedib nete mla lo yu naal, kwathoz wen mzhene ne kwathoz ngoke. Thib bin mndaa gayoo nzob, lee tedib nete mndaa tson gale ne lee tedib nete mndaa galbtsiiy. 9¡Os lee goo ndob nza goo ndoblo yen goo koree!
Chebee mloo Jesús por kwent nanzee
(Mr. 4:10‑12; Lc. 8:9‑10)
10Tsa lee re zha kuu ngeteed lo Jesús mbig lo Jesús, ne nzhab zha:
―¿Chebee pur kon kwent nanzee niʼa lo re men?
11Jesús mkab ne nzhab:
―Diox mndaa yalnzhaak lo goo, tsa yen goo re kuu nagaats chaan ta nabee Diox; per lo tedib net zha mndaat Diox diiz yen zhay. 12Tak lee zha kuu nyen kuu wli chaan Diox, Diox tsow tsa yen zhay masraa; per lee re zha kuu nyente, asta lut kuu nyen zha teyiibe lo zha. 13Kona pur kon diiz nanzee nin lo re zha, tsa tegal wii zhay yent zha kuu ngwii zha, ne tegal gon zhay yent zhay. 14Lo re zhaʼa mrolo kuu nzhab profet Isaí zha ndala, leettsa nzhab profet lo re zha ndala:
Tegal gon gooy ne yent gooy,
tegal wii gooy ne yent goo kuu ngwii goo.
15Tak mkow yek re zha yez ree, taxal re zha kuu now nza nak zha,
ne taxal re zha kuu now ngutlo nak zha,
tsa gagt wii zhay ne gagt gon zhay
ne tsa gagt yen zhay kuu nzhon zha.
Koree ntsow tsa bretabt zha lon, tsa tegwen zha. [Is. 6:9-10]
16’Per wen nda re goo zha kuu nyen kuu ngwii ne nyen kuu nzhon. 17Tak wlipaa na nin lo goo, tyen re profet kuu ngoo ndala, ne re zha kuu nali mndo lo Diox, ngwalaaz zha gawii zha re kuu ngewii goo nal, per mwiit zhay; noga ngwalaaz zha gagon zha re kuu ngeyon goo, per mbint zhay.
Jesús mndaa kwent xomod nak kwent nanzee chaan zha kuu nzhann
(Mr. 4:13‑20; Lc. 8:11‑15)
18’Kenza goo tsa yen goo naa xomod nak kwent nanzee chaan zha kuu ndalo bin lo yu. 19Lee re zha kuu nzhon re diiz, kuu ndaa kwent naa xomod nlaaz Diox nabee Diox leettsoo re men, ne nyent zhay, zhaʼa nak taxal bin kuu mla roo net. Nyaad Maxuuy nkib xkiiz Diox leettsoo zha. 20Ne lee bin kuu mla xid ke ta yent naroob yu, bina nak taxal re zha kuu nzhon xkiiz Diox, ne kwathoz laz zha nkayaa zhay. 21Per lee zhaʼa nak taxal bin kuu nzot lozh naats, kona neyt ndo zha lo xkiiz Diox. Ne leettsa nzin thib yalti lo zha o ndreke men dits zha, tak nyelaaz zha Diox, tsa nlaa zha Diox. 22Lee bin kuu mla xid yits, bina nak taxal re zha kuu nzhon xkiiz Diox, per kwathoz ntsow zha xgab re kuu yezlyu ree, ne ndablaaz zha keno zha naroob temi. Re kona ntsow nyaant xkiiz Diox leettsoo zha, ne ndaate diiz taa zha xle. 23Per lee bin kuu mla lo yu naal, bina nak zha kuu nzhon xkiiz Diox ne nyen zhay. Zhaʼa nak taxal bin kuu ndaa kwathoz xle. Taxal bin kuu mndaa gayoo nzob, lee tedib net zha nak taxal bin kuu mndaa tsongal nzob, ne lee tedib net zha nak taxal bin kuu mndaa galbtsii nzob.
Kwent nanzee chaan nzob xtil ne yizh goob
24Jesús mndaa tedib kwent nanzee lo re zha, ne nzhab Jesús:
―Lee nal tan tedib kwent nanzee lo goo. Tsa ne goo xomod nak leettsa nabee Diox leettsoo re men. Leey nak taxal thib zha kuu nzhann nzob xtil wen lo yu. 25Per leettsa mdat reta zha, tsa lee thib zha kuu nayii ne zha, mndaab ne mloo yizh goob xid nzob xtil zha. Ne leettsa ngwalo mloo zhay, tsa ndya zha. 26Ne leettsa lee nzob xtil mlen, mzhene ne mla tone, no yizh goob ndab xid nzob xtil. 27Tsa lee re zha kuu nke tsiin lo zha kuu nak chaan yu, nzhab lo zha: “Zha Nabee, ¡at nzob xtil wen mloʼaa lo yu! ¿Xomod mlen yizh goob xide?” 28Tsa lee zha kuu nak chaan nzob xtil nzhab: “Thib zha kuu nayii nen mtsow kona”. Tsa lee re zha kuu nke tsiin lo zha mnaabdiz ne nzhab: “¿Chu nlaaza ya nee ne kib nee yizh goob?” 29Per lee zha nzhab: “Aha, kibt gooy. Tak os lee goo kib goo yizh goob, cha noga nzob xtil kib goo. 30Mas wen blaa goo thibka zhene, asta leettsa dop yalgonn. Leettsa taalʼn re zha kuu thop yalgonn, tsa ner re yizh goob thop zha ne liib zhay par yeeke thitanax. Ne lee nzob xtil thop zha ne kotsow zha leen loo ta nzotsow xoobʼn.”
Kwent nanzee chaan mbiz mostaz
(Mr. 4:30‑34; Lc. 13:18‑21)
31Jesús mndaa tedib kwent nanzee lo re zha, ne nzhab Jesús:
―Leettsa lee Diox nabee leettsoo re men, leey nak taxal thib mbiz mostaz kuu mloo thib mbyi lo yu. 32Leey nak thib mbiz kuu mas lut lo reta mbiz, per leettsa nlene masraa nzhene nake re ya kuu nzhann zha leen wert. Ne nzhake thib ya naro ne lee re min ndyaad ndexkwaa lyaat lo re zhite.
33Noga nzhab Jesús:
―Leettsa lee Diox nabee leettsoo thib men, leey nak taxal lebadur kuu mloo thib ngot xid tson medid arin tsa yezhoobe.
34Reta koree nzhab Jesús lo re men kon diiz nanzee, ne os leey nagte kon diiz nanzee nit zhay lo re men. 35Koree ngok, tsa mrolo kuu nzhab profet kuu ngoo ndala, leettsa nzhab profet:
Kon diiz nanzee nin re kuu nagaats chaan Diox,
kuu nzogaats desde leettsa mdexkwaa yezlyu. [Sal. 78:2]
Jesús nzhab xomod nak kwent nanzee chaan nzob xtil ne yizh goob
36Leettsa ngwalo mchaats Jesús re men, tsa mndaab Jesús leen yuu, ne lee re zha kuu ngeteed lo Jesús mbig ne nzhab lo Jesús:
―¿Xomod nak kwent nanzee chaan nzob xtil kon yizh goob?
37Jesús mkab ne nzhab:
―Lee zha kuu nzhann nzob xtil wen, nak na Kuu Mzin Ngok Men. 38Ne lee yezlyu nak taxal yu, ne lee re zhiinn Diox kuu nabee Diox leettsoo, nak taxal nzob xtil, ne lee re zha kuu nzhon diiz lo Maxuuy, zhaʼa nak taxal yizh goob. 39Lee zha kuu nayii nen mloo yizh goob, zhaʼa nak Maxuuy. Wiz bluz leettsa naabʼn kwent lo reta men, leey nak taxal wiz kuu thop zha yalgonn, ne lee re mandad chaan Diox, nak taxal re zha kuu thop yalgonn. 40Leeka taxal nthop re mos yizh goob ne nteyy zhay lo ki, leeka tata gak wiz bluz leettsa naabʼn kwent lo re men. 41Lee na Kuu Mzin Ngok Men, taalʼn re mandad da thop re zha kuu ntsow, ntsow re zha da kuu went, ne reta zha kuu ntsow kuu went. 42Ne ko re mandad da zha gabil. Tya gonn zha ne tub zha keley. 43Tsa lee re zha kuu nali nak lo Diox la xni zha ta nabee Xutʼn, taxal nla xni wiz la xni zha. ¡Os lee goo ndob nza goo ndoblo yen goo koree!
Kwent nanzee chaan or chaan perla ne chaan yex
44’Leettsa nabee Diox leettsoo men, leey nak taxal kwathoz or kuu nzogaats lo thib lo yu. Ne lee thib zha mzal ora, tsa mkaatska zhay tya. Ne kwathoz laz zha ndya zha ne mtho zha reta kuu nap zha, ne mzhii zha yuʼa, par gak ora chaan zha.
45’Leettsa nabee Diox leettsoo re men, leey nak taxal thib zha kuu ndiy nkwaan tyen ke kuu le perla kuu kwathoz nap. 46Ne leettsa nyetsal zha thib kuu kwathoz chul na, tsa ndya zha ne mtho zha reta kwaa nap zha, ne mzhii zha keʼa.
47’Leeka tata, leettsa nabee Diox lo re men, leey nak taxal yex kuu ngobi zha leen nitdoo, tsa niit zha relota mbel. 48Leettsa ngwalo mze yex zha, tsa ngoo zhay asta roo nitdoo, ne ndob re zha roo nitdoo mbi zha re mbel. Ne ngo zha re mbel wen leen chekwit ne lee re mbel kuu nzhowt men ngobi zha. 49Leeka tata kozhaa re mandad chaan Diox re zha went xid re zha kuu nali nak. 50Tsa ko zha re zha went leen orn ki, tya gonn zha ne tub zha keley zha.
51Tsa mnaabdiz Jesús lo re zha, ne nzhab Jesús:
―¿Chu myen goo re kwent nanzee ree?
Lee re zha mkab ne nzhab:
―Myen neey.
52Tsa nzhab Jesús kwent nanzee ree lo re zha ne nzhab Jesús:
―Leettsa lee thib maestr, kuu nloo xkiiz Diox, wlipaa nyen xomod nak leettsa nabee Diox leettsoo men, nzhak zha taxal thib mndan yuu, kuu nzhaak ngoo re kuu kub ne re kuu gox xid re kuu nap zha.
Jesús mzin yez Nazaret
(Mr. 6:1‑6; Lc. 4:16‑30)
53Or ngwalo mni Jesús re kwent nanzee ree, tsa mroo Jesús kon re zha kuu ngeteed lo Jesús tya, 54ne mzin re zha laz Jesús. Ne wiz sabd mndelo Jesús mloo lo re men ta nkaltaa re zha Israel nteed xkiiz Diox. Tsa mzegey leettsoo re men mbin kuu mloo Jesús, ne mbez zha lo re altaa zha:
―¿Xomod mteed zha ree yalnzhaak ree? ¿Chebee nzhaak ntsow zha re milagr thoz? 55¡Lee zha ree nak thib zha tbaata, ne nak zha xgann Che kuu nak karpinter ne xnaa zha nak Mari, ne re wets zha nak: Santiag, Che, Simún ne Judas! 56Ne leeka loʼaa nzhee nzi re btan zha. ¿Xomod mteed zha re kuu nzhaak zha?
57Kona ngwalaazt re men Jesús.
Per lee Jesús nzhab:
―Neeka thib profet nkayaat re tawlaz zha zha wen ne neeka re zha liz zha.
58Kona mtsowt Jesús tyen re kuu thoz tya, tak ngwalaazt re men Jesús.
Trenutno izabrano:
Mateo 13: zao
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 2007, Wycliffe Bible Translators, Inc. All rights reserved.
