Ruk. 8

Nuwa̱ Jesusan yáiṉkiarma

1Nuyá̱ untsurí péprunam Jesus wekaráktak Yus akupeana nuna shiir chichaman etserkiní̱ wekaimiayi. Tura ni unuiniamuri̱ tuse armia nu nemarsarmiayi. 2Yaunchu untsurí nuwa̱ jaa armia nuna tura iwianchruku armia nunasha Jesus tsuararmiayi. Nu nuwa̱sha Nin nemarsarmiayi. Nusha ju̱ ármiayi, Maktaranmaya̱ Marí, siati íwianch ji̱i̱rkimiuya̱nia nusha 3tura úunt akupin Irutisa takarniúri̱ Chusa nuwé̱ Juancha tura Susancha tura chíkich untsurí ni takakmari̱n súsar Jesusan yaiṉkiarmiayi.

Atsaamin atsaampramun Jesus unuiniamu

(Mat. 13:1-9; Mar. 4:1-9)

4Untsurí péprunmaya̱ Jesusan iistai tusar jíinkiarmiayi. Tura untsurí káunkarmatai ju̱ métektaku chichaman Jesus unuiniamiayi.

5 “Atsaamin atsaamprataj tusa jiinkimiayi. Atsaamki̱ wesa jiṉkiái jintiá iniaararmiayi. Túrunamtai wénak najakarmiayi. Nuyá̱ chiṉki tariar yúawarmiayi. 6Chíkich jiṉkiái kaya írunmanum iniaararmiayi. Nu jiṉkiái tsapainiar etsa̱ sukuam wárik kararmiayi. 7Chíkich jiṉkiái jaṉkiniam iniaararmiayi. Tura jaṉkisha jiṉkiaisha mái̱ metek tsapainiar jaṉki kaṉkar ajakramiayi. 8Tura chíkich jiṉkiaisha péṉker nuṉkanam iniaararmiayi. Tura tsapainiar péṉker nerekar chíkichkia siancha nerekarmiayi.” Tuasua amik kakantar chichaak “Kuíshim ákuiṉkia antuktarum” Jesus tímiayi.

(Mat. 13:10-17; Mar. 4:10-12)

9Nuyá̱ ni unuiniamuri̱ Jesusan aníak “Ju̱ métektaku chicham támena nu ¿warintkume̱a tame?” tiármiayi. 10Tutai Jesus chichaak “Yus ni akuptáiri̱n átum nekaachma nuna nekamtikramprume. Tura chikichnaka wainiainiayat kusurua núnin ártí tusan tura ántuiniayat nekaacharat tusanIsa. 6:9 aya métektaku chichamja̱i̱ jintintiátjai” tímiayi.

Atsaampramu chichaman Jesus paant jintintiámu

(Mat. 13:18-23; Mar. 4:13-20)

11 “Wats ju̱ nekaatarum. Jiṉkiaisha Yusa Chichame̱n nakumui. 12Jintiá iniaaru tana nuka shuar aya ántana nuna nakumui. Yusan nekas enentáimtus uwempracharti tusa íwianch wárik taa nu chichaman ni enentái̱ya̱n júawai. 13Kayanam iniaaru tana nuka shuar antuk waras umíana nuna nakumui. Tura nú shuar kaṉkape̱ atsá asamtai ishichik tsawantini̱ṉ umikiar itiurchatan wáinkiar wárik kanainiawai. 14Jaṉkiniam iniaaru tana nuka tuke enentáiji̱a̱i̱ umíatsna nuna nakumui. Nu shuarsha ántuiniawai túrasha ni wakeramuri̱ji̱a̱i̱ wekainiawai. Ju̱ nuṉkanmaṉ ana nuna tí pachiniakui tura kuítian ti wakeruiniakui, warastinniak enentáimtuiniakui Yus Chicham ni enentái̱n takaatsui. Nuja̱i̱ kaṉkarma ásar nerektinian tujintiainiawai. 15Tura jiṉkiái péṉker nuṉkanam iniaaru tana nuka shuar antuk umiinia nuna nakumui. Nisha antukarmia nuna péṉker enentáimtusar yawe̱tsuk umirkar tí peṉker nerenawai.

Ashí iwiainiakma átatui

(Mar. 4:21-25)

16 ¿Shiripkin ekeemak nukuktinkiait? Peaknum wáaptak ikiuschatniuiti. Antsu je̱a̱ wainia nu paant wáinkiarat tusa yakí̱ ekentsatniuiti. 17Núnisaṉ ashí nekaachma ana nu paant átatui. Tura u̱kma ana nu nekanattawai. Tura iwiainiakma átatui. 18Tuma asamtai anearum péṉker antuktarum. Shuar takakna nu patatsamnia átatui. Túrasha takaktsuna nu, takakjai tu enentáimtumana nuka jurunkíttiawai” tímiayi.

Jesusa nukurí̱, Jesusa yachi̱

(Mat. 12:46-50; Mar. 3:31-35)

19Jesus pujamunam nukurí̱sha tura yachi̱sha tariarmiayi. 20Tura Jesusan chicharainiak “Ame nukusha yatsumsha a̱a̱ wajasar untsurmainiawai” tiármiayi. 21Tutai Jesus chichaak “Ee, nukuruiti, yatsuruiti tura Yus tana nuna antuk umíana nusha winia nukuruiti, winia yatsuruiti” tímiayi.

Nasesha entsasha Jesusan umirma

(Mat. 8:23-27; Mar. 4:35-41)

22Chíkich tsawantai̱ Jesus ni unuiniamuri̱ji̱a̱i̱ kanunam eṉkemprar “Antumiaṉ amaini̱ wetái” tímiayi. 23Entsanam wésar Jesus kanarmiayi. Tura aya aneachma nase ti kakaram násentkui tampá tukumar kanun init awayá̱statuk awajmiayi. 24Túram nuiṉkia Jesusan ishintiainiak “Uuntá, iisha entsá waya̱a̱ji” tiármiayi. Nuiṉkia Jesus nantaki̱ nasencha entsancha chicharkamiayi. Nú chichamaik nasesha meṉkakamiayi tura entsasha miaaku ajasmiayi. 25Nuyá̱ ni unuiniamuri̱n chicharuk “¿Urukamtai Winia enentáimtursachuram?” tímiayi. Tura nisha ashamainiak ti enentáimprar “¿Ausha warí áishmaṉkait? Nasesha entsasha Ni chicharkam umirainiatsuk” tiármiayi.

Jataranam Jesus iwianchrukun tsuarma

(Mat. 8:28-34; Mar. 5:1-20)

26Kariréa amaini̱ Jataranam jeawarmiayi. 27Kanunmaya̱ Jesus jiinkimtai nu péprunmaya̱ áishmaṉ Nin tarunmiayi. Nú aishmaṉsha yaunchu iwianchrukuyayi. Misú wekas je̱á̱ pujutsuk aents iwiarsamunam pujuyayi. 28-29Iwianchkia nú aishmaṉkan ti kakaram nupet wémiayi. Tura emetatai tusar uwejé̱ncha nawe̱ncha jiruja̱i̱ jiṉkiá wéarmiayi. Túrasha tujintkiarmiayi. Nisha jiruncha tsurí wémiayi. Tura íwianch aents atsamunam útsuk awemamiayi. Nú aishmaṉ Jesusan wainiak tikishmátar kakantar chicharuk “¿Urukamtai wini̱i̱sha tarutnium, Uunt Naṉkamantu Yusa Uchirí̱ Jesusa? Winia wáitkiarsaip tusan seajme” tímiayi. Íwianch niin pujurun Jesus ji̱i̱ki̱ akupeam tú timiayi. 30Jesus nú aishmaṉkan aníak “¿yáitiam?” Tutai ni chichaak “Wikia Untsuríntjiai” tímiayi. Untsurí íwianch niin pujurma asa nuna tímiayi. 31“Iin uunt wá̱a̱nam ii jiinkimiaj nuiṉ akuptúkam amutkaip” íwianch Jesusan seawarmiayi. 32Nui̱ ishichik arantach nainnium untsurí kuchi shushuṉmak yujarmiayi. Tura íwianch chichainiak “Antsu kuchiniam waya̱tin tsaṉkatrukta” tiármiayi. Tutai Jesuska “Ayu, wetarum” tímiayi. 33Nuna takui̱ íwianch áishmaṉnumia̱ jíinkiar kuchiniam waya̱warmiayi. Túram kuchisha nánatanam akaikí̱ iniaawar entsanam utsanawar jakekarmiayi.

34Kuchin wainniusha túrunan wáinkiar ashamkar péprunmasha tura arantcha etserkatai tusar tseke wéarmiayi. 35Etserkarmatai iyutai tusar untsurí shuar wéarmiayi. Tura Jesus pujamunam jeawar íwianch jíintiukiarmia nú aishmaṉkan péṉker ajas pushí entsar Jesusa nawe̱n pujan wáinkiarmiayi. Tura ashamkarmiayi. 36Iwianchruku áishmaṉ tsuarman wáinkiarmia nu yama taan ujakármiayi. 37Tura ti ashamainiak Jataranam aents ashí Jesusan “Wetá” tiármiayi. Tutai Jesus kanunam eṉkemár wémiayi. 38Íwianch jíintiukiarmia nú aishmaṉ Jesusan wisha ame wéamunam winitiaj tusa seamiayi. Tutai Jesus nuna suritiak 39“Antsu ame je̱e̱miin weme Yus ámin túrutma nu ashí etserkata” tímiayi. Tutai áishmaṉ we Jesus niin túramia nuna ashí nu péprunam etserkamiayi.

Jairu nawantri̱n tura nuwa̱ncha Jesus tsuarma

(Mat. 9:18-26; Mar. 5:21-43)

40Tura Jesus katiṉkí̱ Kariréanam tatí tusar nákas pujuarmiayi. Tuma ásar Ni waketki̱ katiṉkí̱ támatai nu aentssha warasar áujsarmiayi. 41Tumai̱ Israer shuara iruntai̱ je̱á̱ uuntri̱ Jairu náartin támiayi. Ni taa Jesusa nawe̱n tikishmátar “Winia jearui̱ waitneasam winitritia” tímiayi. 42Ni nawantri̱ chikichik amia nu tuse uwí takaku jakatajtsa pujakui nuna tímiayi. Jesus “ayu” tinia wéakui ti untsurí aents nemariarmiayi. Tura untsurí shuar kae̱ ajas weena ásar chanuawarmiayi.

43Nui̱ nuwa̱ páchitkia wémiayi. Nisha tuse uwí numpa ajapeak wáitias pujuyayi. Tsuákratniua nui̱sha ni kuítri̱n ashí ajapaitiat tsuámarchauyayi. 44Jesusa úkuri̱i̱ni̱ winiá weantuk ni pushirí̱ náṉkatramuri̱n antiṉmiayi. Nuna tura nú chichamaik numpa ájapeamuncha péṉker ajasmiayi. 45Nuiṉkia Jesus chichaak “¿Ya Winia antintkia?” tímiayi. Tura “peṉkesha antiṉchajme” tuíniakui Pítiur ni tsaníakmari̱ji̱a̱i̱ Jesusan chicharuk “Uuntá, ti untsurí antinmasha tura ti untsurí chanunmainiasha ¿itiura ‘ya Winia antintkia’ tame?” tiármiayi. 46Tútaisha Jesus chichaak “Nekas Winia antintkiayi. Winia kakarmarja̱i̱ tsuárajna nuna nékajai” tímiayi.

47Nuyá̱ nu nuwa̱sha nekarayapi tusa kuraṉki̱ taa Jesusa nawe̱n tikishmátramiayi. Tura ashí aents ántuiniamunam urukaku antiṉkia tura itiura wárik péṉker ajasmia nuna ujakmiayi. 48Nui̱ṉkia Jesus nuwa̱n chicharuk “Nawantru, shiir wetá. Winia nekas enentáimtursa asam péṉker ajasume.” 49Jesus tuke chichas pujái̱ uunt Jairu je̱e̱nia̱ taa Jáirun chicharuk “Ame nawantrum jakayi. Unuikiartin tuke itit awajipia” tímiayi. 50Tura Jesus nuna antuk chichaak “Ashamkaip. Áyatik Winia nekas enentáimtursata. Túrakmin nawantrum péṉker ajastatui” tímiayi.

51Je̱á̱ jeawar Jesussha Niji̱a̱i̱ untsurí waya̱tniun surimkiamiayi. Antsu aya Pítrun, Jakupun, Juáṉnasha tura nuwa̱chi aparí̱n nukurí̱ncha waya̱tniun tsaṉkatkamiayi. 52Ashí útainiak atakka wáinkiashtatjapi tu útiarmiayi. Túmainiakui Jesus peṉké jakaan nékayat chichaak “Útirpa. Nuwa̱chikia jákachai antsu kanarai” tímiayi. 53Jakaancha urukaku taa tusar wishikrarmiayi. 54Nuyá̱ Jesus nuwa̱chi uwejé̱n achik kákantar chicharuk “Nawantru nantaktia” tímiayi. 55Túram nisha jakayat atak iwiaaku ajasmiayi. Tura nú chichamaik nantakmiayi. Túrunamtai Jesus “ayuratarum” tímiayi. 56Nuwa̱chi aparí̱ nukurí̱sha ti enentáimprarmiayi. Tura Jesus “Ju̱ túramu peṉké etserkairap” tímiayi.

Trenutno izabrano:

Ruk. 8: jiv

Istaknuto

Podijeli

Kopiraj