Jṉ. 9
9
Jesus kusuru akiinian tsuarma
1Jesus ni unuiniamuri̱ji̱a̱i̱ wesa áishmaṉ kusuru akiinian wainkiamiayi. 2Ni unuiniamuri̱sha aniasarmiayi “Uuntá, ju̱sha ¿urukamtai kusuru akiiniawit. Yana tunaari̱ji̱a̱i̱ṉ kusuru akiiniait. Níniuja̱i̱mpiash, aparí̱niuja̱i̱mpiash túrunawit?” tiármiayi. 3Jesus chicharainiak “Ni tunaari̱ji̱a̱i̱nchusha ni aparí̱niuja̱i̱nchusha túrunaiti. Antsu Yus ni aya̱shí̱n túratniua nu paant atí tusa túrunaiti. 4Tsawai̱kia takastiniaiti. Yamaikia Winia akuptúkua nuna takatrí̱n túratniuitjiai. Kashi ajasmatai takastin atsuttawai. 5Jú̱ nuṉkanam pujakun shuara enentái̱n tsáapnimtikratniuitjiai” tímiayi. 6Nuna chichas nuṉká usukmi nuṉkaja̱i̱ pachimiar kusuru ji̱n yakarmiayi. 7Nuyá̱ chichaak “Seruí pajamtai entsanam nijiamauta” tímiayi. Seruisha nu chichamnum “akupkámu” tawai. Kusurúsha we nijiamar péṉker íimiar támiayi.
8Nuyá̱ ni írutkamuri̱sha tura tuke wáinin armia nusha chicharainiak “Ju̱ka pujus kuítian tuke seamniuya núchakait” tuíniakui 9Chíkich “Ee, núkete” tiármiayi. Chikicha “Atsá, núchaiti kame nuash túmainti” tiármiayi. Tura niṉki “Ee, witjiai” tímiayi. 10Takui̱ anintruiniak “¿Nuikia itiura yamaisha íimiam?” tiármiayi. 11Tutai “Áishmaṉ Jesusa nu tsakusan jí̱run yakartur ‘Entsa pajamtai Seruiniam nijiamauta’ turutmiai. Takui̱ wena nijiamaran paant iimjiai” tímiayi. 12Tutai “Nu áishmaṉsha ¿tui̱ṉ pujá?” tiármiayi. Nisha “Cha, nékatsjai” tímiayi.
Pariséu kusuru tsuarman inintrúsarma
13Nuyá̱ kusuru tsuarman Pariséunam júkiarmiayi. 14Kame Jesus kusurun tsuarmia nui̱ ayampratin tsawantauyayi. 15Tuma asamtai Pariséusha itiurak íimnium tusar aniasarmiayi. Nisha chichaak “Ji̱ruí̱ tsakusan yakarámtai nijiamaran paant iimjiai” tímiayi. 16Nuyá̱ chíkich Pariséu shuarnumia̱ nuamtak tunainiak “Ju̱na tsuáruka Yusai̱ya̱nchuiti. Kame ayampratin tsawantai̱ túraiti” tiármiayi. Tura chikicha “Yajauch túrin shuaraitkiuiṉkia jú̱nisaṉ túratniun tujintkia̱a̱yi” tiármiayi. Nuja̱i̱ akannáikiarmiayi. 17Tsuármancha ataksha aniasarmiayi “Ámin tsuármarua nu ¿warí enentáimtam?” tiármiayi. Tutai “Wikia ‘Yúsnan etserniuiti’ tajai” tímiayi.
18Tura Israer shuar nekas kusurúitiat yamái iimiui tu enentáimtuscharmiayi Pariséu. Tuma ásar ni aparí̱ncha untsukar 19inintrúsarmiayi “¿Ame uchiram kusuru akiinia tárumna núkait. Itiurak yamaikia imia?” tiármiayi. 20Ni aparí̱sha chicharainiak “Ii uchirí̱ṉkia kusuru akiiniama nu nékaji. 21Tura iisha nékatsji itiurak yamaikia imia. ¿Yátsuk péṉker awajsait? Nisha úuntchakait ni aniastarum. Niṉki ujatmákarti” tiármiayi. 22Sapijmiak tiármiayi. Israer shuara úuntri̱ṉkia “Jesus Yus akupkámu asa nekas Krístuiti” tuinia núnaka Israer shuara iruntai̱nmaya̱ ji̱i̱ki̱ akupnákti tiniu ásarmatai tsuarma aparí̱ ashamkarmiayi. 23Nu asamtai ni aparí̱ “Nisha úuntchakait ni aniastarum” tiármiayi.
24Nuiṉkia Israer shuara uuntri̱ kusuru tsuarman ataksha untsuk chicharainiak “Yus íimmianum nekasa nu titiá, ju̱ áishmaṉka tunaarinniuiti nékaji” tiármiayi. 25Tutai “Kame tunaarinchashit. Nékatsjai antsu ju̱nak nékajai. Yaunchu kusurúitiatan yamaikia iimjiai.” 26Ataksha anintruiniak “¿Itiurtámkama, itiur íimtikrammia?” tiármiayi. 27Nisha chichaak “Yaunchu tájarme tura anturtatsrume. ¿Urukamtai ataksha ujakat tusarmesha wakerarum? ¿Nuiṉkia Niniu ajastin enentáimprumek?” tímiayi.
28Nuiṉkia katsekainiak chicharainiak “Ámeka ní shuari̱nme. Tura iikia Muisaisa shuari̱ntji. 29Yus Muisaisan akupkaiti iikia nékaji antsu nu áishmaṉ nékatsji. ¿Tuya̱ntskait?” tiármiayi. 30Áishmaṉ tsuarma chichaak “¿Ausha itiurtsuk áminiait? Winia íimtikrurma nu átumka nékatsrume tuya̱ṉkit. 31Paant nékaji tunaarinniun Yus anturtsui. Tikishmatar ni wakeramun túruinia nunak anturui. 32Yáunchusha kusuru akiinian tsuáruka peṉké atsuwiti. 33Ju̱ áishmaṉ Yusai̱ya̱nchuitkiuṉka peṉké túracha̱a̱yi” tímiayi. 34Nui̱ṉkia chicharainiak “Ámeka tunaarintin akiiniaitiatmesha ¿iin jintintin átaj tamek?” Nuna tiar ji̱i̱ki̱ awemarmiayi.
Enentái̱n kusurú
35Kusurú tsuarman ji̱i̱ki̱ awemarma nuna Jesus nekaamiayi. Tura wainiak “Yusa Uchirí̱a nu enentáimtamek” tímiayi. 36Tsuarma chichaak “Uuntá, turuttia wisha nekaan enentáimtustaj” tímiayi. 37Jesussha chichaak “Wainme. Witjiai ámiji̱a̱i̱ chichaajna nu” 38tutai tikishmátar “Uuntá, enentáimtajme” Jesusan tímiayi. 39Nuyá̱ Jesus chichaak “Shuara enentái̱n nekaan akantratajtsan táwitjiai. Ni enentái̱n kusuru ai̱ṉ íimtiktinian tura anaṉmamuk ‘Yúsnan nekaan paant iimjiai’ tana nuna ukusturtinian táwitjiai” tímiayi. 40Tutai Pariséu shuar nui̱ pujuarmia nu nuna antukar “¿Nuiṉkia iikia kusurúkaitiajⁱ?” tiármiayi. 41Jesussha chichaak “Átum kusurúitkiurmeka atumí tunaarí̱ wáinchakrum sumamachu áintrume. Tura ‘paant iimjiai’ tau asarum sumamaitrume” tímiayi.Jṉ. 15:22-24
Trenutno izabrano:
Jṉ. 9: jiv
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
©2009 Avant Ministries in cooperation with Wycliffe Bible Translators, Inc. All rights reserved.
