Jṉ. 7

Jesusa yachi̱sha Nin enentáimtuscharma

1Nu naṉkaamasmatai Jesus Kariréanam wekaimiayi. Jutanam wéchamiayi Israer shuara uuntri̱ nui̱ mátaj tutai. 2Tura Israer shuar aak áakmatai namper jeatémamtai 3Jesusa yachi̱ wishikiainiak “¿Urukamtai ju̱i̱sha pujam? Ame unuiniamuram túram nuna íisarat Jutanam wetá. 4Ashí shuar nekaawarat tákumka ú̱kam túrawaip. Ti tujintiamu túriniaitkiumka ashí shuar íimmianum túrata” tiármiayi. 5Ni yachi̱sha ishichkisha Nin enentáimtachu ásar tiármiayi.

6Tura Jesus chicharainiak “Winia tsawantur nampernum wétin jeatsui. Atumji̱a̱i̱ṉkia náṉkamas tsawant wétin péṉkeraiti. 7Ju̱ nuṉkanmaya̱ aents atumniaka kajertamatsrume. Antsu ni tunaari̱n etsertamu ásar Wíniaka kajertuiniawai. 8Átumka nampernum wetarum. Wikia tsawantur jeachkui wéatsjai” tímiayi. 9Ju̱na tinia Jesuska Kariréanam juákmiayi.

Aak áakmatai nampernum Jesus timia

10Ni yachi̱ wéarmatai Jesussha nampernum wémiayi. Tura nekarawara̱i̱ṉ tusa ú̱mak wémiayi. 11Israer shuara úuntri̱sha námper irunturmanum e̱a̱kar “Nu áishmaṉsha ¿tui̱ṉ pujá?” tiármiayi. 12Ashí shuarsha Nin áujmatiarmiayi. Chíkich “péṉkeraiti” tiármiayi. Tura chikitcha “Péṉkerchaiti. Aya anaṉkartawai” tiármiayi. 13Tura Israer shuara úuntri̱n ashamainiak u̱u̱k áujmatiarmiayi.

14Nampersha ajapén ajasmatai Jesus Yusa Uunt Je̱e̱n wayá̱ shuaran unuiniamiayi. 15Israer shuara úuntri̱sha nuna iisar ti enentáimsar chichaak “Ju̱sha unuimiátrachiatcha ¿itiurak imiá neka?” tiármiayi.

16Jesussha chichaak “Wi unuiniajna nu winia chichampruchuiti antsu Winia akuptúkua Núnan unuiniajai. 17Yus wakerana nuna shuar nekas umiktinian wakerakka winia chichamprun nekaattawai. Nekas Yúsnaitkiuiṉkia nuna nekaattawai. Aya wi enentáimmiaja̱i̱ṉ chichaakuisha nuna nekaattawai. 18Ni enentáimmiaja̱i̱ chichaana nuka ashí shiir enentáimtursarti tusa chichaawai. Antsu nin akupka nuna shiir awajsarti tusa wakerak nekas wáitratsuk tawai. 19Muisais Yusa akupkámuri̱n atumí úuntri̱n amaschamka. Tuma ai̱ṉ nu umitsuk mantuatin wakerutarme” tímiayi Jesus. 20Nu shuarsha chichainiak “Wáurtsumek. ¿Ya mantamataj tusa wakera?” tiármiayi. 21Jesussha chichaak “Ayampratin tsawantai̱ chikichkí túramtai ti enentáimtsurmek. 22Muisais ashí tsupirnaktinian akupkachmiayi. Antsu ni úuntri̱ṉkia nuna akupka áiniawai. Tuma ai̱ṉ átumka Muisais akupkámu umiktai tusarum ayampratin tsawantai̱sha uchi áishmaṉ tsupirniuitrume. 23Wátsek Muisais akupkámu uminkiati tusarum ayampratin tsawantai̱sha uchi áishmaṉ tsúpiriatrumsha ¿urukamtai Wi ayampratin tsawantai̱ áishmaṉka aya̱shí̱ takamtsuk tsuármatai kajertarum? 24Shuar túrana nu iisam wárik sumamtikiawaip. Antsu inintrúsam paant nekaam nekasa nu enentáimtusta” tímiayi Jesus.

Jesus Yusai̱ya̱ akupkámuiti

25Nuyá̱ Jerusaréṉnumia̱ shuar chicharainiak “Maatai tuinia núchakait. 26Tura nui̱ ashí ántamunam étserui tura suntar páchiniatsui. ¿Ii úuntri̱sha ‘Nekas Krístuiti’ tu enentáimtuiniawash? 27Antsu nekas Kristu taa tuya̱ṉ winiá nekanashtatui tura ju̱ pujamuka ashí nékaji” tiármiayi.

28Jesus nuna antuk Yusa Uunt Je̱e̱n wajá kakaram chichaak “Winia nekararum tuyá̱ winiaj nu nékarme. Kame núnisrum enentáimprume. Tura winia enentái̱rja̱i̱ táchaitjiai antsu winia Apar akuptúkuiti. Nisha ti nekas akupniúsha átumka nékatsrume. 29Antsu Winia akuptúkuitkiui ai̱ya̱ tau asan Wikia nékajai” tímiayi. 30Nuyá̱ sepunam eṉkeataj táyat achikcharmiayi ni tsawantri̱ jeachu asamtai. 31Tura untsurí shuar Niin enentáimtusar “Kristu taa ¿nuna naṉkaamas aentsti tujintiamun túratpiash?” tiármiayi.

“E̱a̱tkáttarme tura wáitkiashtatrume” tímiayi Jesus

32Pariséusha tura Yúsnan pujurniu peṉkeri̱sha Jesusnan timian antukar suntaran akupkarmiayi Jesusan achikiar sepunam eṉkeawarat tusar. 33Nuyá̱ Jesussha chicharainiak “Aya ishichik tsawant atumji̱a̱i̱ pujustatjai. Nuyá̱ ataksha Winia akuptúku pujana nui̱ waketkittiajai. 34Átumka e̱a̱tkáttarme tura Wi wéajna nui̱ wéchamniaitkiuram wáitkiashtatrume” tímiayi.

35Israer shuarsha nuamtak aniniaisarmiayi “¿Ju̱sha tui̱ wéakuiṉ iisha wáinkiashtatajⁱ? ¿Israer shuar Krésianam pujuinia nui̱ we nú aentsun unuiniartatuak? 36Ni timia nu itiurkit. ‘Átumka e̱a̱tkáttarme tura Wi wéajna nui̱ wéchamniaitkiuram wáitkiashtatrume’ tana nu ¿itiurkit?” tiármiayi.

Yamaram iwiaakman sukartin entsa

37Námper amúamunam ti shiir najanawarmia nu tsawantai̱ Jesus wajaki̱ kakaram chichaak “Shuar ni enentái̱n kitiamakka Winin taa umar kitiakén imikrati. 38Winia enentáimturna nuka ni enentái̱ya̱ entsa waa áintsaṉ yamaram iwiaakman súana nú entsa jiinkittiawai” tímiayi. 39Nuna taku Jesus “Ashí Yusan enentáimtusarun Yusa Shiir Wakaní̱ súsatniuiti” tímiayi. Tura núnisaṉ Yus Papiniumsha áarmaiti. Antsu Jesus tuke nayaimpiniam wéatsa̱i̱ṉ Yusa Wakaní̱ shuar súsachmauyayi.

Shuar niisháa niisháa enentáimmia

40Chíkich shuarsha nuna antukar “Ju̱ nekas Yúsnan etserin tátinia nuiti” tiármiayi. 41Chíkichkia “Ju̱ka nekas Krístuiti” tiármiayi. Tura chíkichkia Jesus Kariréanmaya̱iti tu enentáimiainiak tiármiayi “Warí ¿Kariréanam Kristu áminkiait? 42Yus Papinium paant tawai ‘Krístuka yaunchu úunt akupin Tawit weanmaya̱ akiiniatniuiti, tawai. Tura Tawitia pépruri̱ya̱ Piriṉnumia̱ átiniaiti’ tawai” tiármiayi. 43Tuma asamtai shuar niisháa niisháa enentáimprar kanakiármiayi. 44Chíkich ainia nuka “sepunam eṉkeatai” tiármiayi túrasha túracharmiayi.

Israer shuara uuntri̱ Jesusan enentáimtuscharma

45Nuyá̱ suntarsha waketkiarmiayi. Tura Pariséusha tura Yúsnan pujurniu peṉkeri̱sha “¿Urukamtai itiachuram?” tutai 46suntarsha chichaak “Chikichkisha ju̱ áishmaṉ chicháa ánis chichaschaiti” tiármiayi. 47Nuyá̱ Pariséu chicharainiak “Atumsha anaṉnarume. 48Pariséutisha uuntcha nuna enentáimtuiniawash. 49Peṉké shuarka yaunchu akupkámun nékachua nuka yajauchiniam yumiṉkramu áiniawai” tiármiayi.

50Nikiutémusha kashi Jesusan tarimia nu Pariséuitiat chichaak 51“Íi shuartikia shuar ni túramun etserkamu ántutsuk sumamtikiachminiaiti” tímiayi. 52Nuiṉkia nisha chicharainiak “Wats amesha Kariréanmaya̱chuashitiam. Yus Chicham áujsam nekaattame. Kariréanmaya̱ Yúsnan etserin peṉké táiniatsui” tiármiayi. 53Nuyá̱ ashí ni je̱e̱n waketkiarmiayi.

Trenutno izabrano:

Jṉ. 7: jiv

Istaknuto

Podijeli

Kopiraj