MARKUS 10

Digiɗ-goyta vi cata

Mat 19:1-12; Luk 16:18

1Yesu fokis ɗawn pa, tuɗ hay nagata Yudiya. Bugol kayni nam gi kulo gal hena vi niy-lumna Yordan. Sumuna tokay talam ɦir' lo. Nam tun caw hatsi ki nam ka li dok-dok nala. 2Sa Farisena ma talamu, kay wakamu, nisi ka jobom ala: hagat ka kay sa jufna kay gi cata valam goyo lebo mayɗi su? 3Nam hot jobsi ala: Musus gatgi mige? 4Nisi dumu: Musus hinma hagata kay ɗo ɗerwelda ta gi cat goyta. 5Nam disiya: Musus ɗo gatta na'ta kigi kayn kuɗ so'otta vi dikgiya. 6May hay cawa'ta tunita, Lawna kot sa jufna hiɗi cata. 7Kay na'ta jufna ma hin bulumu hiɗi sulumu, tap hiɗi cata valamu, 8nisi ma' sliw-tuwsi ma muɗ kepe: Nisi may ɓuraway goy tak-tak ma' loɗi, may sliwsi kepe, 9kay na'ta va ma Lawna tapamay tapna, hin sana munum jaram goyɗi. 10Hay li ma nisi kal goy vo'o, sa hatayna jobom lo kay kayni. 11Nam disiya: gigekaw ma gi cata valam goyo sli tara'a, nam li zlata-bulo'o tam ta jewta, 12la cata hin jufa' goyo sli mara'a, na' li zlata-bulo'o kaw.

Gurosgurayna

Mat 19:13-15; Luk 18:15-17

13Sumun mar gurosgurayn tam Yesu kay nam ma josiya. May sa hatayna law sa ziysin ɦiya. 14Hay li ma Yesu wi kayni, dikam roŋa, nam di'e: Hin gurosgurayn ma tanu, telsiɗi, kay mulda-wuralawna na' vi sum sa li tuwsi ki nisi nana. 15Nan digi gasita, sa ma vi mulda-wuralawna ki goorgoor naɗina, nam ma kal haya' noŋɗi. 16nam yawsi kulo'o bar ɓalam kisiya, gisi bolo.

Sa ma joriyo ma farayna

Mat 19:16-30; Luk 18:18-30

17Hay li ma nam tun goy hay hagata, sa kep ma talam jaŋi, girif gaa vokomu, ka dum ala bum-yalla ma ŋaana, nan ma li mige kay a nan ma fi yaw irita vatɗit voco'o? 18Yesu dumu: naŋ yan ala Ma-Ŋaana kay mige? Sa ma ŋaa mara mayɗi, may mi Lawna kepe. 19Vun-ma-gatna naŋ wumu: Naŋ ci matɗi, naŋ li zlata-buloɗi, naŋ kulɗi, naŋ ka sinɗi, naŋ li va ma joo tam saɗi, slaŋ yam, buŋu hiɗi suŋu kulo'o. 20Nam dumu: Bum-yalla, slen kayni kaf nan vumi kanu hay goorta vanay pa. 21Yesu cuk iram kalamu, dikam minimu, bugolda nam dum ala: Va hini goy kuɗaŋ kepe; tuɗaŋu, gusaŋ slena vaŋ kaf goyo, vulum mi sa hawna. Naŋaya tapaŋ kuɗanu, naŋ ma fi farayna vaŋ hay wuralawna. 22May dikam muɗ neke kuɗ yoboyn kayni, nam kalay goy hiɗi yorta, kay farayna valam ka ŋolo.

23Yesu ɗuw sa hatayna sa ŋuyi talamna ka disi ala: Lop ŋolo kay nisi sa ka hiɗi farayna kay cuk hay mulda vi Lawna. 24Sa hatayna valamu muɗ huyum kay yoboyna valamu. Yesu hot disi lo ala: Gurona vanu, nisi sa zam ɓam farayna lop ŋol kisiya kay cuk kalaf hay mulda-wuralawna. 25Lamgana as raw hay ŋil baadalla bay lopo suw sa ma farayna ma min kal hay mulda-wuralawna. 26Nisi muɗ ɦuyum' ŋolo di'e: La ki kayn nala, sa ma fi su'da ɗawn mi gige? 27Yesu ɗuwsiya di'e: kayn mi va ma san as a lumɗi, may Lawna as kalam kafe. 28Peter sli ditiya di'e: Ɗuwaŋu, wulini numa hin slena vuma'awa goy pete, tapawa kuɗaŋu. 29Yesu hot dumu: Nan digi gasita: La kuɗan nanu lebo kuɗ labara ma firina vanu san hin ziyna valam goy kla, ɓosiyom sa jufayna kla, sa boyn kla, sulum kla, bulum kla, guron kla, nagat kla, 30nam ma fi slen sem kis suwa hay irita valam ta tanta: Nam ma fi ziyna, fi ɓosiyom sa jufayna hiɗi sa boyna, sumayna hiɗi gurona, hiɗi sinena jar zumalda, may hay hay buur ma vokayna nam ma fi irita vatɗita. 31May sa jewna ŋolo ma muɗ si sa cawna, sa cawna ŋolo ma muɗ si sa jewna kaw.

Yesu di goy jewe kay mitta hiɗi dayta-kulota valamu

Mat 20:17-19; Luk 18:31-34; Mark 8:31-33

32Nisi tun goy hay hagata kay jik kulo hay Yerusalem. Yesu ka tuni voksiya. Sa hatayna ka hay yorta, sa tapay kuɗsina muɗi nari kaw. Nam yi sa doogo yam ma'n goy talamu, tun caw disiya kay sle ma min li talamna. 33Ala: Ɗuwgiya, nay ka jik kulo hay Yerusalem, goora vi sana ma vulis goy hay ɓam muliyan ŋulo sa-ɗifinna hiɗi sa wi-ɗota, nisi ma ka kitat kalam kay cum goyo, ma vulum goy hay ɓam sa waana, 34nisi ma burahamu, ma tuf nenen kalamu, ma watamu, ma cum goyo kaw; buur hiɗi bugolda nam ma day kulo'o.

Jobta vi gurona vi Sebedew

Mat 20:20-28; Luk 22:24-27; Yoh 13:3-17

35Bugol kayni, Yakub hiɗi Yohana gurona vi Sebedew ma tam Yesu, nisi dumu: bum-yalla, numa min ala naŋ ma vi jobta vuma kayni: 36Nam disiya: nigi min ala nan ma lum tigi mi mige? 37Nisi dumu: numa min ala hay gajijita vaŋ ɗawni, naŋ ma vulma liyna kay kep mus hay galaŋ ma jufna, kep hay galaŋ ma gulla may. 38Yesu disiya: Nigi wi va ma nigi job kalamnaɗi, nigi as ci kaway-ma-cina ma nan ma cumna su? Lebo nigi as fi baptisma hiɗi baptisma#10:38 Baptisma ma nam di kalamna tani ɗek pita-gaata valam kla. ma nan fumna su? Nisi dumu: kayni numa asay kalamu. 39Yesu hot disiya: Kawayn-ma-cina ma nan cumna nigi as cum gasi, ir baptisma ma nan fumna nigi as fum kaw, 40may kay mus galan ma gulla lebo galan ma jufna kayn vulum mi san mi nanɗi, may tam nisi sa kayni koti kisina.

41Hay li ma sa doogona hum kayni, diksi tun caw ɓulak tam Yakub hiɗi Yohana. 42Yesu yisi talamu, nam disiya: Nigi wi ala muliyana vi nagata curoɗ sumuna, sum sa ŋulona li sumun dono'o kuɗ ŋolda visi kaw. 43May nigi ma li ki kayn nala jar-tuwgiɗi, kay gigekaw ma min muɗ mi ma ŋolla jargiya nam ma muɗ mi ma sungina, 44gigekaw ma min muɗ goy ma jewna jargiya nam ma muɗ tuwam goy sa ma sunda vigi kafe. 45Kay goora vi sana maawa kay sunumɗi, may nam kay tuwamu ma sun sumuna, vul irita valam goy kisiya kaw.

Yesu mal ir Bartime goyo

Mat 20:29-34; Luk 18:35-43

46Nisi co hay Yeriko. Hay li ma Yesu kalay goyo hiɗi sa hatayna valamu hiɗi sumun kuɗum ŋolo, sa ma dukina yum Bartime goora vi Time, nam ka musi paŋay hagat dam' kay siɗawa. 47Hay li ma nam hum ala jik kayni mi Yesu ma Nasaretna, nam tun caw siwel ala: Yesu, naŋ goora vi David, laŋ slugot kan lige. 48Sumun ŋolo bayam ala nam ma ziŋa, may nam siwel ŋol suwa ala: Naŋ goora vi David, laŋ slugot kan lige. 49Yesu coliya di'e: Yumiya. Nisi yi sa ma dukina dumu: Vaŋ dikaŋu, colaŋ kulo'o, nam ka yaŋu. 50Nam cuk sligar-tuwna valam goyo, colay kulo'o, ma tam Yesu. 51Yesu hot dita dumu: Naŋ min ala nan lum taŋ mige? Sa ma dukina dumu: Rabbuni,#10:51 Rabbuni min di'e Bum-yalla. nan min kay nan ma fi wida vanu. 52Yesu hot dumu: Tuɗaŋ maŋu, vida vaŋ suɗaŋawa. Wulini wulini iram muɗ wi'e, nam tap kuɗ Yesu hay hagata.

Trenutno izabrano:

MARKUS 10: Massana

Istaknuto

Podeli

Kopiraj