LUKAS 13
13
Yita kay hamda Law ma nir-niramna kay gu-gum ma vu'ɗina
1Hay liy namna sum sara ma talamu, nisi vum labara kay sle ma li tam sum sa Galileyana sa Pilatus rigas busuwsi hiɗi ɗifinna visiya. 2Nam hotsi dita: Nigi var ala sum sa Galileyan fi lasta nala kayni kay nisi suluk suw sum sa galeliya segen su? 3A'a, nan digiya, la nigi hamgiɗi, nigi kaf ma ba goyo. 4Lebo, sum sa doogo yam glafandina, sa hay Silowe sa simdira ɦo gaa kisiya cisi goy kawna, nigi var ala nisi joo'o suw sum sa hay Yerusalemna kaf su? 5A'a, nan digiya, la nigi hamgiɗi, nigi kaf ma ba goyo.
6Nam disi law ma nir-niramna mara kep ala: Sa mara kep gu-gumna ka piy hay sine gulda-guldana valam zaw. Nam ma kay gar vuɗna hay humamu, may nam fiɗi. 7Nala nam di tam sa ma ŋom sinen ala: Wulini busat liy ɦidi nan ka coy gar vuɗna hum gu-gumna zawni, may nan fi vuɗ humam noŋɗi, nala naŋ ma kaam gaa'a, nam col hay sinena kay sli liyn goy waa'a kay mige? 8May nam hot ditiya dumu: Bum-ziyna, hinim busa kep tuwa loge, kay nan fi zumum diramu, cuk zigidik kuɗum kaw, 9la nam fi vuɗ wacaka kla. May la nam vu'ɗina, naŋ ma kaam maŋ goyo.
Cat ta moyn ta'ta yeray goyo
10Hay fatta vi sabatn tara kep Yesu ka hat hay sinagogŋa mara'a. 11Cat tara kep ay hay liy namna, busat doogo yam glafandi fulla muɗa' moyo, na' hormosi gaa'a, as kay col kulo ja ɗiger noŋɗi. 12Yesu wa'a, nam ka di ta' ala: Cata, nak buti goyo kay moyna vagu. 13Nam tun ɓalam ka'a, wulini wulini, na' col kulo ja ɗiger, tun caw subur Lawna kaw. 14May sa ma ŋolla vi sinagogŋa dikam ɓulaka kay mige Yesu muɗ cat kayni goy ŋaa'a hay buura vi sabatna, nala nam sli dita di tam sumuna: buur ma sumun li lop hayna ka karkiya ɗisu? Nala nigi as kay muɗ tuwgi goy ŋaa'a jar buur namna lakŋi, may hay buura vi sabatnɗi. 15May Bum-Sumuna hot dita: Nigi sa milena, hay buura vi sabatn kayni nigi ka gra luwayna hiɗi kurona kulo hay gulina valam pa kay tuɗum ci niyɗi su? 16May cat zawni ti goota vi Abraham, busat wulin doogo yam glafandi na' ka juni kay Satan, a na' fi gra goy kay zigewna hay buura vi sabatna kayni may hay liyamɗi su? 17Hay li ma nam di slen kayni dina, nisi kaf sa gaw talamna caw zulo yuloŋ'. Sumun kaf li firiya kay lop ma gajijit kuɗumna ma nam lumna pet.
Law ma nir-niramna kay jaf gu-seneve hiɗi kufna
Mat 13:31-33; Mark 4:30-32
18Nam di lo: Mulda vi Lawna ŋray hiɗi mige? Nan ma ŋra' hiɗi mige? 19Na' ŋray ca hiɗi jaf gu-seneve ma san slumu, gum hay sinena valamu, nam wula, muɗ goy guwa, layayn ma dukalawn tun tokosayna valam hay humamu.
20Nam disi lo: Nan ma ŋra mulda-Lawna hiɗi mige? 21Na' ŋray hiɗi isna ma cat yawamu, kom jar futuwna ir tasa ɦidi, ta-ta futuwn muɗ kuf kafe.
Vun-gala ma hebayna
Mat 7:13-14, 21-23; 8:11-12
22Yesu jik hay hoyok-ziy ma ŋulona hiɗi ma gurayna kaf, nam ka hatsiya, iram muɗi hay hagat ta Yerusalemta. 23Sa kep jobom ala: Bum-Sumuna, sum sa fi su'da ma li ɗawn kiɗay ɦawa su? Nam hotsi dita: 24Sogi tuwgiya kay cuk kalafi hay vun-gala ma hebayna, kay nan digiya, sumun ŋolo ma gar a cuk kalafi may nisi asɗi.
25Hay li ma bum-ziyn fokawa kulo'o, hay li ma nam duk vun-ziynawa kaw, nigi ma lak goy jiya, nigi ma dab vun-ziyna, nigi ma di ala: Bum-Sumuna, malaŋ vun-ziyn goy kuma'a malge! Nam ma hotgi dit ala: Liyn ma nigi may hay pana nan wumɗi. 26Hay na'ta nigi ma tun caw di ala: Numa'a ay ti'e ci'e vok iraŋu, naŋ hat hay hagana vuma'a. 27May nam ma hotgi dit ala: Liyn ma nigi ay hayam pana nan wumɗi, patgis goyo hinanu, nigi kaf sa li jiw-zlata. 28Nigi ma tiya mut siygiya kaw, hay li ma nigi ma wi Abraham hiɗi Isaak hiɗi Yakub hiɗi sa jobta-Lawna kaf lakay hay mulda vi Lawna, may nigi ma cukis goy jiya. 29Sumun ma may gal kuɗuwu, gal vulatiya, gal gaa'a hiɗi kayami pa kaw, nisi ma lak ti tina hay mulda-Lawna. 30May segen ŋolo jar sa jewna ma muɗ si sa cawna, segen ŋolo jar sa cawna ma muɗ si sa jewna kaw.
Yesu ka kal hay Yerusalem
Mat 23:34-39
31Hay liy namna kayni, sum segena jar sa Farisena co'o dum ala; kalaŋ goy hay liyn tani, kay Herod min caŋ goyo. 32Nam disiya: Tuɗgi digi tam cekem namna ala: Humaŋu, nan ka digiɗ fuliyan goyo, nan ka yer sumun goyo kay vaydi, kay jifini kaw; hay buurta ɦidit ɗawni yan ma daba. 33Nir na'ta kep la litigekaw nan ma poy vaydi, jifini hiɗi buurta ka'ta kaw, kay sa ma jobta-Lawna fi mit goy hay liy maraɗi, may hay Yerusalem.
34Nigi Yerusalemna! Nigi Yerusalemna! Nigi ci sa jobta-Lawna goyo, sum sa cuki tigina nigi gisi hiɗi goorhoyona kaw. Dok-dok nan min tok sum sa hay Yerusalemna ki slekka tok gurona va' gaa kuɗ gilaŋata' nala, may nigi minɗi. 35Humgiya, ziyna vigi ma hin goyo; may nan digiya, nigi ma wan loɗi, ta-ta hay li ma nigi ma di ala: Sle'ta ka kay nam ma min ma'a hay semda vi Bum-Sumuna.
Trenutno izabrano:
LUKAS 13: Massana
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
BIBALDA TA PELDETTA © L'Alliance Biblique du Cameroun, 2001
