Luke 1
1
1မြတ်သော အရှင်သီယိုဖီလာစ်၊ များစွာသောသူတို့သည် အကျွန်ုပ်တို့၌ဖြစ်ခဲ့ပြီး အကြောင်းအရာများကို ရေးသားပြုစုခဲ့ကြသည်။ 2ထိုအကြောင်းအရာများကိုမျက်မြင်သက်သေများဖြစ်၍ ဟဇရသ်အီစာအကြောင်း သတင်းကောင်းကို ဟောပြောသူတို့၏ပြောကြားချက်များအရ ကျွန်ုပ်တို့ထံလက်ဆင့်ကမ်းခဲ့ပါ၏။ 3အကျွန်ုပ်သည်လည်း ထိုအကြောင်းအရာအပေါင်းကို စတင်ဖြစ်ပျက်ချိန်မှစ၍သေချာစွာ လေ့လာခဲ့သူဖြစ်သည့်အလျောက်၊ 4အရှင်ဖတ်ရှုနိုင်ရန် အစီစဥ်အတိုင်း ကျမ်းစာစောင်ကို ပြုစုရေးသားလျှင်ကောင်းမည်ဟု ယူဆပါသည်။ အရှင်ကြားသိခဲ့သောအကြောင်းအရာတို့သည် ဧကန်အမှန်ဖြစ်ကြောင်းကို အရှင့်အားသိစေလိုသောကြောင့် ဤကျမ်းတော်မြတ်ကို ပြုစုခြင်းဖြစ်ပါသည်။ 5ယုဒပြည်၏ ဟေရုဒ်မင်းလက်ထက်၌ ဇကရီယာအမည်ရှိသော “အီမာမ်” ရှေ့ဆောင်တစ်ပါးရှိ၏။ သူသည်အဘိယ “အီမာမ်” အဖွဲ့ဝင်ဖြစ်၏။ သူ၏ဇနီးသည် ဟာရွန့်အမျိုးအနွယ်ဖြစ်ပြီး အမည်မှာအဲ့လီစ်ဘဲသ်ဖြစ်၏။ 6ထိုသူနှစ်ဦးလုံးပင် အလ္လာဟ်အရှင်မြတ်၏ရှေ့တော်တွင် ဖြောင့်မတ်မှန်ကန်သူများဖြစ်ကြ၏။ အလ္လာဟ်၏ “ရှရီယသ်” ပညတ်တော်ရှိသမျှနှင့် ညွှန်ကြားတော်မူချက်များကို တစ်သွေမသိမ်းလိုက်နာကြ၏။ 7သို့သော် အဲ့လီစ်ဘဲသ်သည်အမြုံဖြစ်၍ သားသမီးမရ။ သူတို့နှစ်ဦးစလုံးပင်အသက်ကြီးရင့်ကြလေပြီး။ 8တစ်နေ့သ၌ ဇကရိယာသည် မိမိ၏အဖွဲ့တာဝန်အလှည့်ကျသဖြင့် အလ္လာဟ်အရှင်မြတ်၏ရှေ့တော်တွင် “အီမာမ်” အဖြစ်တာဝန်ကိုဆောင်ရွက်စဥ် 9အီမာမ်” တို့၏ထုံးစံအရမဲကျသဖြင့် အလ္လာဟ်အရှင်မြတ်၏ “ဗိုင် (က်) တွလ်မုကာဒဲစ်” ဝတ်ဗိမာန်တော် အတွင်းသို့ဝင်၍ နံ့သာပေါင်းကို မီးရှို့ဆက်သရ၏။ 10ထိုသို့မီးရှို့ဆက်သနေချိန်၌ ဝတ်ပြုသူလူအပေါင်းတို့သည် အပြင်မှာ ဒိုအာ ဆုတောင်းလျက်နေကြ၏။ 11ထိုအခါ အလ္လာဟ်၏ “ဖရိချ်သာ” ကောင်းကင်တမန်သည် ဇကရိယာရှေ့တွင်ပေါ်လာ၍ နံ့သာပေါင်းမီးရှို့ရာ စားပွဲတော်၏လက်ယာဘက်တွင် ရပ်လျက်နေ၏။ 12ဇကရီယာသည် ကောင်းကင်တမန်ကိုမြင်သောအခါ ထိတ်လန့်တုန်လှုပ်သွား၏။ 13သို့ရာတွင် “ဖရိချ်သာ” ကောင်းကင်တမန်က “ဇကရီယာ၊ မကြောက်နှင့်။ အလ္လာဟ်အရှင်မြတ်သည် သင်တောင်းဆိုသည်သည့် ‘ဒိုအာ’ ဆုတောင်းချက်ကို ‘ကဗူလ်’ ပြုလက်ခံတော်မူပြီ။ သင်၏ဇနီးအဲ့လီစ်ဘဲသ်သည် သင်အတွက်သားရတနာကိုဖွားမြင်လိမ့်မည်။ ထိုသားကို ယာဟ်ယာဟုအမည်မှည့်ရမည်။ 14သင်သည်ဝမ်းမြောက်ရွှင်မြူးလိမ့်မည်။ ထိုသားဖွားမြင်လာသည့်အတွက် လူအများပင် ဝမ်းမြောက်ကြလိမ့်မည်။ 15အကြောင်းမူကား၊ သူသည် အလ္လာဟ်၏ရှေ့တော်တွင် ကြီးမြတ်သူဖြစ်လိမ့်မည်။ သူသည်စပျစ်ရည်နှင့် သေရည်သေရက်ကို မသောက်ဘဲနေရမည်။ မိခင်ဝမ်းထဲမှာ ရှိစဉ်ကတည်းကပင် သူသည် ‘ရူဟုလ်ကုဒွတ်စ်’ သန့်ရှင်းသောဝိညာဥ်တော်နှင့် ပြည့်ဝလိမ့်မည်။ 16ထို့နောက်သူသည် များစွာသောအစ္စရာအီလီအမျိုးသားတို့ကို မိမိတို့၏ထာဝရအလ္လာဟ်အရှင်မြတ်သို့ ပြန်လည်ပို့ဆောင်ပေးလိမ့်မည်။ 17အလ္လာဟ်၏ရှေ့တော်ပြေးဖြစ်၍ နဗီတမန်တော်အီလ်ယာစ်ကဲ့သို့ ခွန်အားတန်ခိုးကြီးလိမ့်မည်။ သူသည် အဖတို့ကိုသားတို့နှင့် ပြန်လည်သင့်မြတ်စေလိမ့်မည်။ မနာခံသောသူတို့အား ဖြောင့်မတ်မှန်ကန်သောသူတို့၏ ဥာဏ်ပညာကိုပြန်လည်ရရှိစေလိမ့်မည်။ အလ္လာဟ်အရှင်မြတ်အတွက် အဆင်သင့်ဖြစ်စေရန် အရှင်မြတ်၏လူစုတော်ကို ပြင်ဆင်ပေးလိမ့်မည်” ဟု ဇကရိယာအားပြော၏။ 18ဇကရီယာက “ဤသို့ဖြစ်မည်ကို ကျွန်တော်အဘယ်သို့သိနိုင်ပါမည်နည်း။ အဘယ်ကြောင့်ဆိုသော် အကျွန်ုပ်သည် အိုမင်းသူဖြစ်ပါ၏။ အကျွန်ုပ်၏ဇနီးမှာလည်း အသက်ကြီးရင့်ပါပြီး” ဟု “ဖရိချ်သာ” ကောင်းကင်တမန်အားပြန်ပြော၏။ 19“ဖရိချ်သာ” ကောင်းကင်တမန်က “ငါသည် အလ္လာဟ်အရှင်မြတ်၏ရှေ့တော်တွင်ရပ်နေရသော ဂျီဗ်ရီလ်ဖြစ်၏။ သင့်အားဤသတင်းကောင်း သင့်ထံ လာရောက်ဟောပြောကြားရန် ငါ့ကိုစေလွှတ်တော်မူ၏။ 20နားထောင်လော့။ သင်သည် ငါ့စကားကိုမယုံကြည်သောကြောင့် ဤအမှုအရာဖြစ်ပွားလာသည့်နေ့တိုင်အောင် စကားမပြောနိုင်ဘဲနေလိမ့်မည်။ အဘယ်ကြောင့်ဆိုသော် အချိန်တန်လျှင် ငါ၏စကားပြည့်စုံလာလိမ့်မည်” ဟုဆို၏။ 21လူတို့သည် ဇကရီယာကို စောင့်မျှော်လျက်နေကြ၏။ ဇကရီယာသည် ဝတ်ဗိမာန်တော်ထဲတွင် ကြန့်ကြာနေသည်ကိုတွေ့၍ အံ့ဩကြ၏။ 22ဇကရိယာသည် ဝတ်ဗိမာန်တော်ထဲမှ ထွက်လာလာသောအခါ စကားမပြောနိုင်တော့သဖြင့် ဝတ်ဗိမာန်တော်ထဲတွင် “ဝဟီ” ဗျာဒိတ်တော်ကိုရခဲ့ကြောင်း သူတို့ရိပ်မိကြ၏။ ဇကရီယာသည် စကားအ၍ လက်ရိပ်ခြေရိပ်ပြလျက်သာနေ၏။ 23ထို့နောက်သူသည် သူ၏တာဝန်ကုန်ဆုံးချိန်၌ မိမိအိမ်သို့ပြန်လေ၏။ 24ကာလအနည်းငယ်ကြာသောအခါ သူ၏ဇနီးအဲ့လီစ်ဘဲသ်သည် ကိုယ်ဝန်ရှိ၍ ငါးလပတ်လုံးအိမ်တွင်းအောင်းလျှက်နေ၏။ 25အဲ့လီစ်ဘဲသ်က “ယခုအခါနောက်ဆုံးမှတော့ အလ္လာဟ်အရှင်မြတ်သည် ငါ့အားကောင်းချီးပေးတော်မူပြီ၊ အလ္လာဟ်အရှင်မြတ်သခင်သည် လူတို့၏ပြစ်တင်ရှုတ်ချခြင်းကို ငါ့ထံမှဖယ်ရှားတော်မူပြီ” ဟုဆို၏။
ဟဇရသ်အီစာဖွားမြင်တော်မည့်အကြောင်း ဟောကြားချက် 26အဲ့လီစ်ဘဲသ်ကိုယ်ဝန်ဆဋ္ဌမလသို့ရောက်သောအခါ အလ္လာဟ်အရှင်မြတ်သည် “ဖရိချ်သာ” ကောင်းကင်တမန် ဂျီဗ်ရီလ်အား ဂါလိလဲပြည်၊ နာဇရသ်မြို့ရှိ မိန်းမပျိုတစ်ဦးထံသို့ စေလွှတ်လိုက်တော်မူ၏။ 27ထိုမိန်းမပျိုသည် ဒါဝူဒ် မင်းမှဆင်းသက်သူ ယူဆူဖ်အမည်ရှိအမျိုးသားတစ်ဦးနှင့် လက်ထပ်ထိမ်းမြားရန် စေ့စပ်ကြောင်းလမ်းထားသူဖြစ်၏။ သူ၏အမည်မှာ မရ်ယာမ်ဖြစ်၏။ 28“ဖရိချ်သာ” ကောင်းကင်တမန်သည် မရ်ယာမ်ထံသို့လာ၍ “အစ္စလာမူအာလိုက်ကွမ်၊ ထူးကဲသောကျေးဇူးတော်ကိုခံစားရသောအမျိုးသမီး၊ အလ္လာဟ်သည် သင်နှင့်အတူရှိတော်မူသည်” ဟုဆို၏။ 29ထိုစကားကြားလျှင် မရ်ယာမ်သည် စိတ်မငြိမ်မသက်ဖြစ်ကာ ဤနှုတ်ဆက်စကားကား အဘယ်သို့နည်းဟု တွေးတောလျက်နေ၏။ 30“ဖရိချ်သာ” ကောင်းကင်တမန်က “မရ်ယာမ်၊ မကြောက်နှင့်၊ သင်သည် အလ္လာဟ်အရှင်မြတ်၏ရှေ့တော်မှာ မျက်နှာသာရလေပြီ။ 31သင်သည် ကိုယ်ဝန်ဆောင်၍ သားရတနာကိုဖွားမြင်လိမ့်မည်။ ထိုသားကို အီစာဟူ၍ အမည်ဖြင့်မှည့်ရမည်။ 32ထိုသားသည်ကြီးမြတ်လိမ့်မည်။ အမြင့်မြတ်ဆုံးသောအရှင်မြတ်၏သားတော်ဟု အခေါခံရလိမ့်မည်။ ထာဝရအရှင်အလ္လာဟ်အရှင်မြတ်သည် သူ့အဖဒါဝူဒ်မင်း၏နန်းမွေကို သူ့အားပေးတော်မူလိမ့်မည်။ 33သူသည် ယအ်ကူးဗ်အမျိုးအနွယ်များကို အစဥ်မပြတ်အုပ်စိုးတော်မူလိမ့်မည်။ သူ၏နိုင်ငံတော်သည် အဘယ်အခါမျှ ကုန်ဆုံးလိမ့်မည်မဟုတ်” ဟု မရ်ယာမ်အားပြော၏။ 34ထို့နောက် မရ်ယာမ်က “အကျွန်ုပ်သည် အပျိုစင်တစ်ဦးဖြစ်နေပါလျက်နှင့် ဤအရာသည် မည်သို့ဖြစ်နိုင်ပါမည်နည်း” ဟု “ဖရိချ်သာ” ကောင်းကင်တမန်အားမေး၏။ 35“ဖရိချ်သာ” ကောင်းကင်တမန်က “ရူဟုလ်ကုဒွတ်စ် သန့်ရှင်းသောဝိညာဥ်တော်သည် သင်၏အပေါ်သို့ သက်ရောက်လိမ့်မည်။ အမြင့်မြတ်ဆုံးသောအရှင်မြတ်၏ ‘ကူဒူရသ်’ တန်ခိုးတော်သည် သင့်ကိုလွှမ်းခြုံလိမ့်မည်။ ထိုကြောင့် သင်မွေးဖွားမည့်ကလေးငယ်သည် သန့်ရှင်းမြင့်မြတ်သူဟူ၍လည်းကောင်း၊ အလ္လာဟ်အရှင်မြတ်၏သားတော်ဟူ၍လည်းကောင်း ခေါ်ဝေါ်ခြင်းခံရလိမ့်မည်။ 36သင့်ဆွေမျိုးဖြစ်သော အဲ့လီစ်ဘဲသ်သည်လည်း အသက်အရွယ်ကြီးရင့်ခါမှ သားရတနာကို ကိုယ်ဝန်ဆောင်လျက်ရှိ၏။ အမြုံမ ဟုခေါ်ခံရသူသည် ကိုယ်ဝန်ဆောင်၍ ဆဋ္ဌမလသို့ရောက်လေပြီ။ 37အကြောင်းမူကား အလ္လာဟ်အရှင်မြတ် မတတ်နိုင်သော အရာတစ်စုံတစ်ခုမျှမရှိ” ဟုဆို၏။ 38မရ်ယာမ်က “ကျွန်မသည်အလ္လာဟ်၏ ‘ဗန္ဒဟ်’ အစေခံဖြစ်ပါ၏။ သင်ပြောသည့်အတိုင်း ကျွန်မ၌ဖြစ်ပါစေ” ဟု “ဖရိချ်သာ” ကောင်းကင်တမန်အားပြန်ပြော၏။ ထိုအခါ “ဖရိချ်သာ” ကောင်းကင်တမန်သည် မရ်ယာမ်ထံမှ ထွက်ခွာသွား၏။
အဲ့လီစ်ဘဲသ်ထံသို့မရ်ယာမ်သွားရောက်ခြင်း 39များမကြာမီမရ်ယာမ်သည် အသင့်ပြင်၍ တောင်ပေါ်ဒေသရှိယုဒပြည်မြို့တစ်မြို့ သို့အလျင်အမြန်သွား၏။ 40သူသည် ဇကရီယာ၏အိမ်သို့ဝင်ပြီးလျှင် အဲ့လီစ်ဘဲသ်ကို “စလာမ်” ပေးနှုတ်ဆက်လေ၏။ 41မရ်ယာမ်၏နှုတ်ဆက်စကားကိုကြားသော် အဲ့လီစ်ဘဲသ်၏ဝမ်းမှကလေးသည် ခုန်လေ၏။ အဲ့လီစ်ဘဲသ်သည် “ရူဟုလ်ကုဒွတ်စ်” သန့်ရှင်းသောဝိညာဥ်တော်ဖြင့်ပြည့်ဝလျက် 42“သင်သည် အမျိုးသမီးတကာတို့ထက် ‘မူဘာရဲက်’ မင်္ဂလာရှိ၏။ သင်၏ဝမ်း၌ရှိသောသူငယ်သည်လည်း ‘မူဘာရဲက်’ မင်္ဂလာရှိ၏။ 43အကျွန်ုပ်အရှင်၏မယ်တော်သည် အဘယ်ကြောင့် အကျွန်ုပ်ထံသို့လာပါသနည်း။ အဘယ်ကြောင့် ဤအခွင့်ထူးကို အကျွန်ုပ်ခံစားရပါသနည်း။ 44သင်၏နှုတ်ဆက်စကားကို အကျွန်ုပ်ကြားသောအခါ အကျွန်ုပ်၏ဝမ်းမှသူငယ်သည် ဝမ်းမြောက်ရွှင်မြူးသဖြင့် ခုန်လေ၏။ 45သင်သည်လည်း အလ္လာဟ်အရှင်မြတ်သခင်မိန့်တော်မူသော စကားတော်အတိုင်း ပြည်စုံလိမ့်မည်ဟုယုံကြည်သဖြင့် ‘မူဘာရဲက်’ မင်္ဂလာရှိ၏” ဟု ကျယ်လောင်သောအသံဖြင့်ပြောဆို၏။
မရ်ယာမ်၏ချီးမွမ်းသီချင်း 46မရ်ယာမ်က၊
“ငါ၏စိတ်နှစ်လုံးသည် အလ္လာဟ်၏ ဂုဏ်တော်ကို ချီးမွမ်းပါ၏။ 47ငါ့ကိုကယ်တင်တော်မူသော အလ္လာဟ်အရှင်မြတ်ကိုအမှီပြု၍၊
ငါ့ဝိညာဥ်သည် အားရရွှင်လန်းပါ၏။ 48အကြောင်းမူကား၊ သူသည် မိမိ၏ ‘ဗန္ဒဟ်’ အစေခံသိမ်းငယ် နှိမ့်ချသောအဖြစ်ကို ကြည့်ရှု၍၊
အကျွန်ုပ်ကို မေ့လျော့မထားပေ။
ယခုအချိန်မှစ၍ နောင်လာနောင်သားအပေါင်းတို့သည်
ငါ့ကို ‘မူဘာရဲက်’ မင်္ဂလာရှိသောသူဟူ၍ ခေါ်ကြလိမ့်မည်။ 49အဘယ်ကြောင့်ဆိုသော် တန်ခိုးနှင့်ပြည့်စုံတော်မူသော
အရှင်မြတ်သည် ငါ့အတွက်အံ့ဩဖွယ်သောအမှုများကို ပြုတော်မူသောကြောင့်ဖြစ်၏။
အရှင်မြတ်၏နမတော်သည် မြင့်မြတ်သန့်ရှင်းတော်မူ၏။ 50အရှင်မြတ်ကိုကြောက်ရွံ့ရိုသေသူအပေါင်းတို့အား သားစဥ်မြေးဆက်
‘ရဟ်မသ်’ ကရုဏာထားတော်မူ၏။ 51လက်တော်ဖြင့် တန်ခိုးတော်ကိုပြတော်မူပြီ။ စိတ်နှစ်လုံးထဲ၌မာနကြီးသူများကို ဖရိုဖရဲကွဲလွင့်စေတော်မူ၏။ 52ရှင်ဘုရင်များကိုနန်းချ၍
သိမ်းငယ်သူများကို ချီးမြှောက်တော်မူပြီ။ 53ငတ်မွတ်သောသူတို့အား ကောင်းသောအစားအစာကို ကျွေးမွေး၍
ချမ်းသာကြွယ်ဝသူများကို လက်ချည်းလွှတ်လိုက်တော်မူပြီ။ 54အရှင်မြတ်သည် ငါတို့၏ဘိုးဘေးများအားပေးခဲ့သည့် ကတိတော်နှင့်အညီ၊
မိမိ၏‘ဗန္ဒဟ်’ အစ္စရာအီလီကိုမစတော်မူပြီ။ 55အီဗ်ရာဟိမ်နှင့် သူ၏အမျိုးအနွယ်များအပေါ်ထားတော်မူသော
ရဟ်မသ်တော်ကို အစဥ်အမြဲပြုခြင်းငှာ သတိရတော်မူပြီ” ဟုဆို၏။ 56ထို့နောက်မရ်ယာမ်သည် အဲလီစ်ဘဲသ်အထံတွင် သုံးလခန့်နေပြီးနောက် မိမိအိမ်သို့ပြန်လေ၏။
ယာဟ်ယာဖွားမြင်ခြင်း 57အဲ့လီစ်ဘဲသ်သည် သားမွေးဖွားရမည့်အချိန်ရောက်သောအခါ သားယောက်ျားကိုဖွားမြင်၏။ 58ဤသို့သူ့အား အလ္လာဟ်အရှင်မြတ်သည် အံ့ဩဖွယ်ကောင်းအောင် “ရဟ်မသ်” သနားကရုနာပြတော်မူကြောင်း ကြားကြသောအခါ အိမ်နီးချင်းတို့နှင့်ဆွေမျိုးသားချင်းတို့သည် သူနှင့်အတူရွှင်လန်းဝမ်းမြောက်ကြ၏။ 59ထို့နောက် ရှစ်ရက်မြောက်နေ့၌ ထိုသူတို့သည်ကလေးငယ်ကို “ဟသ်နာ” ပြုအရေပြားလှီးခြင်းမင်္ဂလာiပြုပေးကြ၍ ကလေးငယ်အားဇကရီယာဟူ၍ အဖ၏အမည်ကိုပင် မှည့်လိုကြ၏။ 60သို့ရာတွင် ကလေးငယ်၏မိခင်အဲ့လီစ်ဘဲသ်က “ထိုအမည်ကိုမမှည့်ပါနှင့်။ ယာဟ်ယာဟုမှည့်ခေါ်ကြပါ” ဟုဆို၏။ 61လူတို့က “သင်၏မျိုးရိုးတွင် ယာဟ်ယာဟုအမည်တွင်သူ တစ်စုံတစ်ယောက်မျှမရှိ” ဟု အဲ့လီစ်ဘဲသ်အားပြန်ပြောကြ၏။ 62ထို့နောက်သူတို့သည် ကလေးငယ်ကို အဘယ်သို့မှည့်စေလိုသနည်းဟု ဖခင်အားလက်ရိပ်ခြေရိပ်ပြ၍မေးကြ၏။ 63ကရိယာသည် သင်ပုံတစ်ချပ်ကိုတောင်းယူပြီးလျှင် “ကလေးငယ်အမည်ကားယာဟ်ယာဖြစ်၏” ဟူ၍ရေး၏။ ထိုသူအပေါင်းတို့သည် အံ့ဩခြင်းရှိကြ၏ 64ဇကရိယာ၏နှုတ်သည် ချက်ချင်းပွင့်၍ လျှာသည်လည်းအနှောင်အဖွဲ့မှလွတ်မြောက်ကာ ပြန်လည်စကားပြောနိုင်လာပြီး အလ္လာဟ်အရှင်မြတ်၏ဂုဏ်တော်ကို ချီးမွမ်းလေ၏။ 65အိမ်နီးချင်းအပေါင်းတို့သည် ကြောက်ရွံ့ကြကုန်၏။ ဤအဖြစ်အပျက်သတင်းသည် ယုဒပြည်တောင်ကုန်းဒေသတစ်လျှောက်လုံးသို့ ပျံ့နှံ့သွား၏။ 66ကြားကြသူအပေါင်းတို့သည် စိတ်နှစ်လုံးတွင်မှတ်သား၍ “ဤကလေးငယ် မည်သို့သောသူဖြစ်လိမ့်မည်နည်း” ဟု ပြောဆိုကြ၏။ အလ္လာဟ်အရှင်မြတ်၏ “ကူဒူရသ်” တန်ခိုးတော်သည် ကလေးငယ်နှင့်အတူရှိတော်မူ၏။
ဇကရိယာ၏ဟောပြောချက် 67ယာဟ်ယာ၏အဖဇကရီယာသည် “ရူဟုလ်ကုဒွတ်စ်” သန့်ရှင်းသောဝိညာဥ်တော်ဖြင့်ပြည့်ဝလျက်၊ ထို့နောက်သူသည် စတင်၍စကားပြောနေသည်။ 68“အစ္စရာအီလီအမျိုးသား တို့၏အရှင် ထာဝရအလ္လာဟ်အရှင်မြတ်ကို ချီးမွမ်းထောမနာပြုကြပါစေသော။
အရှင်မြတ်သည် အစ္စရာအီလီအမျိုးသားတို့ထံသို့ ကြွလာ၍ သူတို့ကိုလွတ်မြောက်စေတော်မူပြီ။ 69အရှင်မြတ်၏ ‘ဗန္ဒဟ်’ အစေခံဒါဝူဒ်အမျိုးအနွယ်တွင် တန်ခိုးကြီးမားသော
ကယ်တင်ရှင်ကို ကျွန်ုပ်တို့အားလုံးအတွက် ပေါ်ထွန်းစေတော်မူပြီ။ 70ကမ္ဘာဦးမှစ၍ ဖြစ်တည်လာသော သန့်ရှင်းမြင့်မြတ်သော နဗီတမန်တော်တို့၏နှုတ်မှတစ်ဆင့် မိန့်တော်မူသည်နှင့်အညီ၊ 71အရှင်မြတ်သည် ငါတို့အား ရန်သူများ၏ လက်မှလည်းကောင်း၊
ငါတို့ကိုမုန်းသောသူအပေါင်းတို့၏လက်မှလည်းကောင်း ကယ်တင်မည်၊ 72ငါတို့၏ဘိုးဘေးများအပေါ်ဝယ် ‘ရဟ်မသ်’ ကရုဏာထားတော်မူမည်ဖြစ်ကြောင်းနှင့်၊
ပဋိညာဥ်သစ္စာတော်ကိုသတိရမည်ဖြစ်ကြောင်း မိန့်တော်မူခဲ့ပြီ။ 73ငါတို့၏အဖ အီဗ်ရာဟိမ်အား ကျိန်ဆိုတော်မူသော ပဋိညာဥ်သစ္စာစကားဟူမူကား၊ 74အလ္လာဟ်အရှင်မြတ်သခင်က ကျွန်တော်တို့ကို ရန်သူတွေလက်ကနေ ကာကွယ်မယ်ဖြစ်ပြီး။
ထို့နောက် သင်တို့သည် မကြောက်ဘဲဝတ်ပြုကိုးကွယ်နိုင်သည်။ 75သင့်ဘဝတလျှောက်လုံး ကိုယ်တော်ကိုမကြောက်မရွံ့ သန့်ရှင်းခြင်း၊ ဖြောင့်မတ်ခြင်းတရားဖြင့် ကိုးကွယ်ပါ။” 76“အသင်ကလေးငယ်၊ သင်သည် အမြင့်မြတ်ဆုံးသောအလ္လာဟ်အရှင်မြတ်သခင်၏ နဗီတမန်တော်ဟု ခေါ်ခံရလိမ့်မည်။အကြောင်းမူကား သင်သည် အရှင်ကိုယ်တော်အတွက်လမ်းကို
အသင့်ပြင်ဆင်ရမည့်ရှေ့တော်ပြေးဖြစ်ပြီးလျှင်၊ 77အရှင်မြတ်၏လူစုတော်အား ‘ဂူနာဟ်’ အပြစ်များကိုခွင့်လွှတ်တော်မူ၍
ကယ်တင်တော်မူမည်ဖြစ်ကြောင်း ပြောကြားလိမ့်မည်။ 78ါတို့၏အလ္လာဟ်အရှင်မြတ်သည် ‘ရဟ်မသ်’ သနားကရုဏာနှင့် ကြွယ်ဝတော်မူ၏။
အရှင်မြတ်သည် ကယ်တင်ရှင်ကို ဂျန္နသ်ကောင်းကင်မှနေရုဏ်အလင်းသဖွယ် ငါတို့ထံသို့ ပို့ဆောင်၍၊ 79သေမင်း၏အရိပ်တွင်နေထိုင်သူများအပေါ် ထွန်းလင်းစေတော်မူလိမ့်မည်။
ထို့အပြင် ငါတို့အားငြိမ်းချမ်းရေးလမ်းသို့လည်း ပို့ဆောင်စေတော်မူလိမ့်မည်” ဟု
“ဝဟီ” ဗျာဒိတ်တော်အားဖြင့် ဟောပြောလေ၏။ 80ကလေးငယ်သည်၊ ကြီးပြင်းလျက် အသိဥာဏ်ရင့်သန်လာ၏။ သူသည်အစ္စရာအီလီအမျိုးသား တို့အလယ်၌ မဟောပြောခင်တိုင်အောင် တောကန္တာရတွင်နေ၏။
Trenutno izabrano:
Luke 1: mtpv-rv
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
This translation of the Musselmani Burmese Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
