Luqaasa 18
18
Miinggii woossod garkk taamarsseeza
1Yesuusa fa taamarita azalekka ubba wode woossod garkk tamaarssodayis kozhii yeegii aaziso odeeza: 2«Pettii katama Xoossis yashittowa asisikka yeellatoowa pettii dayinay yeza 3Ye katama gancce pettii am7at yeza. Izakka, ‹Taasinnee ta morkkay gancce yez moota pirddoba› yeegii ubba wode ye dayinnakka daaburssiza. 4Daynnay xiqqa wodes i oda si7aam ixxeeza, zin guyepp fa wozinar qopp, ‹Taanii Xoossis yashittaam, asis yeellataam ixxikokka, 5yha am7at tana ubba wode waayithiza gishos izis pirddoda; yeegii qoppeeza» yeegeeza.
6Godaykka, «Wuce dayinay geezana yi si7oytta; 7Xoossay qammannee gallas eziko uukkiza fa maraxxeezitayis pirddoosa? Unttan maaddodayis gam7inee? 8Ta yinttis odizana si7oytta, ellisii pirddoda. Maaqqozin, As Na7ay yi7iz wode sa7all ammano demmadeshsha?» yeegeeza.
Ferisaawanne qaraxe gachisiz atha
9Ma mahii, Yesuusa, fana geeshsh as garkk uddii ceeqinttizitaysinnee yhankkita borizitayis yhay garkke yeegii aaziso odeeza: 10«Nam7i asitay woossodayis Xooss kara yhanigeeza. Pettay Ferisaawe yhankkay ma qaraxe gachisiz as. 11Ferisaaway eqqii paas woossittar, ‹Xoossayyo taanii yhankkitay garkk bonqqiza, zhucannee laammiza as, ubbarakka ma yha qaraxe gachisiz athay garkk baa gishos nena ta galatiza. 12Saaminttapp nam7i toke xoomiza, ta denggizbaz ubbaypp asiraata kessiza› yeegeeza.
13«Zini qaraxe gachisizay ma haakor eqqii hara attozin salo dhoqqi gi be7adayis yashittii fa tira qoxxitar ‹Xoossayyo, tana nagaranchchana maarooye› yeegii woosseeza.#Mat. 23:12; Luq. 14:11 14Ta yinttis odizana si7oytta; Farasaawayppe yhay qaraxe gachisizay Xooss tiina geesh maaqqii fa kara maaqqeeza. Abis giiko, fana dhoqqi dhoqqi udiza as kawuzhoda, fana kawushiza as dhoqqi dhoqqi goda» yeegeeza.
Yesuusarannee duude na7ita
(Mat. 19:13-30; Mar. 10:13-31)
15Yesuusa duude na7itayil afa fa kusha gaddii anjjoday garkk asay eeko ki7iza. Yesuusa tamaaritay yeya bi7ii abis Yesuusako ki7inee yeegii kacceeza. 16Zin Yesuusa na7ita faako xeegii, «Na7itay taako ye7odana kayppetee; ye7o goytta. Abis giiko, Xooss kaatetithay yhayititay garkk haneezitayis. 17Ta yinttis turo odiza; Xooss kaatetitha duude na7ita garkk ekkozay oonkka ezayid gellamii» yeegeeza.
Dure athay oyichi
(Mat. 19:16-30; Mar. 10:17-31)
18Ayihude halaqqitaypp pettay, «keeha asitamaarayyo, medhina de7o denggodays ab ootho?» yeegii oyceeza.
19Yesuusa eziko, «Abis tana keehayyo yeegii xeegee? Pettii Xoossapp attin hara keeha baaya. 20Laammippe, wodhippe, kasitippe, worddo markattippe, ne adannee ne indat bonchchoba yeegiz kiita erinee» yeegii oyceeza.#Kes. 20:12-16; Nam7i. 5:16-20
21Athaykka, «Yeyitita ubba ta na7atithapp aykkii naagttar gam7eeza» yeegeeza.
22Yesuusa yeya si7ii «Yeezako, nees pettibaz pacciza; nees yez baz ubba bayizii manqqitayis inggoba; salo nena shalo naagiza. Yeezii maaqqii tana kaalloba» yeegeeza. 23Zin athay yeya si7ii ezis gaame shalo yeza gishos iita qiiratteeza.
24Yesuusa atha bi7ii, «Dure asis Xooss kaatetithii gelo wayizii un77odeshsha! 25Dure Xooss kaatetitha gelodayppe gimaale narppe lukor aadhizay shawukkiza» yeegeeza.
26Yeya si7eez asitay, «Yeya maaqqiko o attodee!» yeegeeza.
27Yesuusa, «Asis danda7inttoowa baz Xoossis danda7inttiza» yeegeeza.
28Phixiroosa, «Yeezako nu nubaz ubba ashshii nena kaalleeza» yeegeeza.
29«Yesuusa tuma ta yinttis odiza; Xooss kaatetithayis gi fa kara woy fa machchato woy fa ishita woy fa adannee fa indat woy fa na7ita ashsheezay; 30Yha wodayid gaame dakko, ye7od alamayid medhina de7o ekkozay oonkka baaya» yeegeeza.
Yesuusa fa yhayiqo bagga mahii odeeza
(Mat. 20:17-19; Mar. 10:32-34)
31Yesuusa taphpho nam7ita faako xeegii, «Ane Yerusalaame wolla yhammada, nabitay As Na7ay bagga xaafeezibaz ubbitay ezayid polinttoda. 32E Ayihude baa asayis aadhii ingginttoda. U eza toochchoda, cazhodannee ezal afa cuttoda. 33Eza garafeezaypp guye wodhoda, Zin hayidzantho gallas E yhayiqopp dendoda» yeegeeza.
34Zini e tamaaritay yey ubbaypp pettibazkka akaakekkaya. E xuuray unttis qosintteez gishos E waageezakko erekkaya.
To7a athay be7eeza
(Mat. 20:29-34; Mar. 10:46-52)
35Yesuusa Iyarkko ukkodar pettii to7a athay oge gaxa bettii woossiza. 36To7a athay asitay ye aqayir aadhodar si7ii, «Yey abba?» gi oyceeza. 37U, «Naazirete Yesuusa yhayir aadhiza» yeegeeza.
38E, «Dawute na7ayyo, Yesuusa, tana maarooye» yeegii uukkeeza.
39Tiin tiin yhanigizitay, «Hayizoba» gi qoddeeza. Zin E, «Dawute na7ayyo, tana maarooye» yeegii darisii uukkeeza.
40Yesuusa eqqii atha faako ko7od garkk kiiteeza. Athaykka, eeko shiiqin, 41«Ta nees ab udod garkk koyee?» yeegii oyceeza.
To7ay, «Godayyo ta be7adayis koyiza» yeegeeza.
42Yesuusa, «Bo7oba, ne ammanay nena patheeza» yeegeeza. 43Athay izir bi7ii atteeza. Xoossa bonchchittar Yesuusa kaalleeza. As ubbay yeya bi7ii Xoossa galateeza.
Trenutno izabrano:
Luqaasa 18: MeloNTL
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
The Word for the World Ethiopia
