मत्ति 11
11
इसु रो चिभुअ्लि पिका युहन्ना
(लुका ७:१८-३५)
1इसु ताइको तेन्हे चात्यागेलाइहेङ इदोइ काथा दोअ्कान्हुअ्सो वा भेर्पाको देरागेलाइता द्याङगेलाइहेङ धिरपालि रो रेम्काबानाल हिङपालि हानेहि।
2जेलाउ चिभुअ्लि पिका युहन्ना झ्यालखानाता हिलाउ ख्रिस्टको पाका कामगेलाइको बारेता हिङहि। कालाउ वा ताइको चात्यागेलाइहेङ इसुकोता हिअ्लि दिङगिल्हि। 3एम्बालाइ लोतेङ इसुहेङ हिअ्हि, “केलाइ आस पाका ख्रिस्ट ना दोङ हिन्हा? ना केलाइ बोमि हासुङको दामा खानाङ?” 4इसु एम्बालाइहेङ दोअ्हि, “नेलाइ हिङका रो तिङका काथागेलाइ युहन्नाहेङ दोअ्पिसु, 5कान्हागेलाइ तिनावा रो नेङगारागेलाइ त्यावा। रोग्याल्होकालाइ एलावा। न्हातोङ माहिङकालाइ हिङलि दोका जेङका हि। सिकालाइ सिन्हुतेङ ल्होका हि रो निरधनगेलाइहेङ रेम्काबानाल हिङपादोङखे।#यसैया ३५:५-६; ६१:१ 6काङको खातिरसो ताइको खान्धुरता धुकचुक मापाकालाइ सहसाम्पा निङकालाइ जेनावा।”
7जेलाउ चिभुअ्लि पिका युहन्नाको चात्यागेलाइ हानेकान्हुअ्सो इसु चिभुअ्लि पिका युहन्नाको बारेता इन्ता जोम्कालाइहेङ दोअ्लि तेङहि, “नेलाइ उदादाङका थामेता हाइ खाङलि ओल्हेसुन्हा? हाइ भेर्माता हेङगालाइन्हातेङ हिका नालेहेङ? 8एन्सानु नेलाइ हाइपालि ओल्हेसुन्हा? हाइ जाङका धाबा लागाइका द्याङगेलाइहेङ खाङलि? जाङका धाबा लागाइकालाइ ते राजाको महलता कि हिखे। 9नेलाइ हाइपालि ओल्हेसुन्हा कुनु? हाइ आगाधुइकाहेङ खाङलि? एइ, का नेलाइहेङ दोअ्खा, आगाधुइकाखान्तेङ बुङ बाराका एमिहेङ तिङका हिसुन्हा। 10या इङकोङ जाइको बारेता धरमकिताबता लेखेन्हाका हि:
‘खाङ, का ताइको सादेलचरहेङ नाङको आगाआगा दिङगिलाङका,
जाइ नाङको आगाता नाङको दामा त्यार पावा।’#मलाकि ३:१
11“जातिङको, का नेलाइहेङ दोअ्खा, चिभुअ्लि पिका युहन्नाखान्तेङ मानहिका बो हासुङ जोलोम र्हुका मान्थु। कालाउ बुङ सादेलको सारभिता जाइ झाराङखान्तेङ म्हुइका हि, इङको याखान्तेङ मानहिका ज्यावा। 12चिभुअ्लि पिका युहन्नाको पहरसो एलाथिकापा सादेलको सारभि हापाङ आगाइदोङखे, कालाउ चेरफेअ्का द्याङगेलाइ बोलधाकाङ यासेहेङ रिम्खे।#लुका १६:१६ 13हाइपानु युहन्नाको पहरथिकापा झाराङ आगाधुइकालाइ रो नियम#११:१३नियम इदोइ नियम परमेस्वर मोसासो यहुदिगेलाइहेङ पिका हिघाखे।सो सादेलको सारभिको बारेता धुइका हिघाखे। 14नेलाइ काङको दोअ्का काथाता राजि जेङसुन्हा पानु, लोलिगोइका एलिया युहन्ना दोङ।#मलाकि ४:५; मत्ति १७:१०-१३; मर्कुस ९:११-१३ 15जाइको हिङका न्हातोङ हि, इङको हिनाको।
16“एला इदोइ एलाको द्याङगेलाइहेङ का हाइदोफा दाज्याङका? इदोइ ते हातेता घाका म्हुम्हइका जामालाइ चोमालाइभाइका एइ, जाइ एम्बालाइको सानाइतिगेलाइहेङ काइखे रो दोअ्खे:
17‘केलाइ नेलाइको भाअ्सिङ बासुलि म्होअ्न्हाहि, कालाउ बुङ नेलाइ मान्हासुन्हा।
केलाइ बिलौना पान्हाहि, कालाउ बुङ नेलाइ सुरता मापासुन्हा।’
18“कालाउ युहन्ना चातेङ रो आम्तेङ मालोहि, एम्बालाइ वासेहेङ मासान खोअ्का हि दोअ्तेङ दोअ्खे। 19का द्याङको चान चातेङ रो आम्तेङ लोघा, कालाउ एम्बालाइ कासेहेङ दोअ्खे, ‘खाङसु, जिहुका, हेन्जा गोरा आम्का, तिरो ल्होपाका रो निठुरिगेलाइको सानाइति!’ कालाउ बुङ परमेस्वरको बुदिहेङ मुनासिप हि दोअ्तेङ वाको कामगेलाइसोङ साबित पाखे।”
खान्धुर मापाकालाइहेङ चेतानि
(लुका १०:१३-१५)
20जेदोङजेदोङ पुरता इसु हेन्जाङ भारभुसाइका कामगेलाइ पाका हिघाहि। इङको पुरको द्याङगेलाइ ताइको कुकरम लाअ्लि माकिअ्नाङसिङ वा एम्बालाइहेङ हाकाराइतेङ दोअ्लि तेङहि,
21“धिकार खोराजिन रो बेथसेदा पुरको द्याङगेलाइहेङ! हाइपानु नेलाइता पाका सरबङ हिका कामगेलाइ टुरोस रो सिदोन पुरता पानु एम्बालाइ लाम्फा दोङ बोराको धाबा लागाइतेङ रो बुअ्सुरि लाइतेङ कुकरम पालि लाअ्धावा।#यसैया २३:१-१८; इजकिएल २६:१-६; योएल ३:४-८; आमोस १:९-१०; जकरिया ९:२-४ 22कालाउ बुङ का नेलाइहेङ दोअ्खा, निसापको दिनाता नेलाइको खान्तेङ ते टुरोस रो सिदोन पुरको द्याङगेलाइको दासा हेन्जा सहेलि दोका ज्यावा।
23“ओइ कफर्नहुम पुरको द्याङगेलाइ, हाइ ना सादेलथिकापाङ तोल्हेन्हाना कुनु? ना पातेलथिकापा हुलन्हाना। हाइपानु नाता पाका सरबङ हिका कामगेलाइ सदोम पुरता पाकाहिनु इङको नानिको दिनाथिकापा हितेङहिधावा।#यसैया १४:१३-१५; सिरजाइ १९:२४-२८ 24कालाउ बुङ का नेलाइहेङ दोअ्खा, निसापको दिनाता नाङको खान्तेङ ते सदोम पुरको दासा हेन्जा सहेलि दोका ज्यावा।”#मत्ति १०:१५; लुका १०:१२
माइकालाइहेङ माइसापाका
(लुका १०:२१-२२)
25इङको पहर इसु दोअ्हि, “ओइ आबा, सादेल रो सुमिङको प्रभु, का नासेहेङ च्याबास पिखा, हाइपानु ना इदोइ काथा आकिलहिका रो आकिलहिकालाइसो म्होअ्तेङ ताअ्न्हा, कालाउ बुङ जामालाइहेङ इदोइ तिङपान्हा। 26एइ, आबा, हाइपानु नासेहेङ एसाङ पालि रेम्का लागेहि।
27“काङको आबा गोताङ काथाको जिम्मा कासेहेङ पिका हि। आबाबिना चानहेङ हासुङ मानाल्खे रो चानबिना आबाहेङ हासुङ मानाल्खे। कालाउ बुङ चान जाइहेङ आबा नाल्पालि भोखे, एम्बालाइ खिनिङ आबाहेङ नाल्खे।”#युहन्ना १:१८; ३:३५; १०:१५
28“ओइ झाराङ माइका रो ल्हिकाहोइ एरेन्हाकागेलाइ काता लोसु, का नेलाइहेङ माइसा चापाङका। 29काङको जुङगेले फासु रो कासो धिरसु, हाइदोनु का नोइका रो काङको कोन्धाङ नोम्का हि, कालाउ नेलाइ ताइको आत्माता माइसालि निङस्वाना।#यर्मिया ६:१६ 30हाइपानु काङको जुङगेले सुकाका हि रो काङको बोकाना होम्का हि।”
Trenutno izabrano:
मत्ति 11: DHIM
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 2024 (Active), Wycliffe Bible Translators, Inc. All rights reserved.
