Matyo 6
6
Wa̰y ɓla tuna wa̰y naa gɨ bi tɨ ndemni
1«Gorne yḭ wo wa̰y tugla kar gɨna, yḭ ka kar na i ndula ɓla tɨ bi ji nɨ a ɓə i ləg lo, jo tɨ in lo gɨna, yḭ ɓə wa̰y tɨ daa sul tina tɨ i Ba tɨ ndɨlasul ndɔ lo. 2Gorne əm so wa̰y tɨ əm daa əm naa gɨ wo tɨ ndemni gɨna, əm ka ngor kar tɨ sul kuna bi gṵ tɨ ndidi ne a ti tɨ Juyb-a na ləgɨ tɨ peer tay hul la, tɨ ul daan nɨ bi wur taan tɨ a sul lo. Kuri, ən ja gɨ i tɨ bayri, bi kuna paa ne, a ten a wa̰y tɨ daa sul maan teni. 3Lɛ yim, gorne əm daa tɨ lɨma wo wa̰y naa gɨ wo tɨ ndemni gɨna, ka əm daa tɨ gɨlay ka wa̰y ne əm daa tɨ lɨma wo kar una lo, 4nɨ ka wa̰y ne əm naa ti kuru la əm Ba tɨ Ndɨla ne ləg wa̰y tɨ un kuru, naa gɨ əm wa̰y tɨ daa sul.»
Wa̰y ɓla tuna Ndɨla soon sul
Luk 11.2-4
5«Gorne yḭ wo Ndɨla soon gɨna, yḭ ka kar kuna bi tɨ gṵ tɨ ndidi no̰ lo: A taam Ndɨla soon na a ɗa̰y tɨ ndal tɨ Juyb-a na ləgɨ tɨ peer tay la tɨ ul taal la ka bi ləg a. Kuri, ən ja gɨ i, a ten a wa̰y tɨ daa sul teni. 6Lɛ yim, gorne əm wo Ndɨla soon gɨna, wur tɨ əm li hul, əm hul limu tɨ əm sul. Əm soon əm Ba ne ti tɨ un kuru, la əm Ba ne ləg mum kuru ɓə gɨ əm wa̰y tɨ daa sul naa.
7«Gorne yḭ wo Ndɨla soon gɨna, yḭ ka jaa ja ɓududu lo. Bi ne una Ndɨla ɓari lo jo a ka kuna ne. A kay a ho̰ni ɓə Ndɨla ɓə a jaa laa kəysul a ja jaa dɨbla tɨ gor-gor. 8Əm ka tɨm kuna ya̰ lo, kəysul ī Ba una wa̰y ne yḭ taam toni barita yḭ ɓiri. 9Ul mu tɨ Ndɨla soon jo le:
“Ī Ba ne wo tɨ ndɨlasul,
ka bi kay əm ndil jak la,
10ka əm waan hina,
ka bi tɨ nəgri sul ka wa̰y ne əm hul taam kuna a ka tɨ ndɨlasul,
11Kakam le, naa gɨ i tudi ne ka lɛm i mu,
12Ka əm hul ɗina əm tɨ i ɓijim sul,
ɓə yini kaw i hul ɗina i tɨ bi ne ka gɨ i ɓijim sul la.
13Ka i nɨm nɨ i ɓə tɨba tɨ mum tɨ sangni#6.13 Mum tɨ sangni tɨ mum ɓijim ne Sidan so kay tɨ bi kwi ɓə tɨ a daa nɨ a ka a yuga na a hul sula. hul lo
lɛ əm jul i tɨ Ɓijim daa.
Kəysul waan la, dwari la, taan la, tɨ yim maan marway. Amin!”
14«Jo gorne i hul ɗina i tɨ bi na ɓijim ne a ka gɨ i sul gɨna, i Ba ne ti tɨ ndɨlasul kaw hul ɓə ər ɗina tɨ i ɓijim sul la. 15Lɛ jo gorne i hul ɗina i tɨ peer sul lo gɨna, i Ba hul ɓə ər ɗina tɨ i ɓijim sul lo la.»
Wa̰y ɓla tuna tɨm na ndu yuni sul
16«Gorne yḭ ti na ndu yuni gɨna, yḭ ka i jindemni kar kuna bi gṵ tɨ ndidi lo: A ka a jindemni nɨ bi gun una ɓə a kway a ndula wa̰y tudi la wa̰y yḭḭ la. Ən ja gɨ i tɨ bayri, ya̰ ten a wa̰y tɨ daa sul teni. 17Lɛ yim, gorne əm ti na ndu yuni gɨna, ugu əm ji la, əm ka itɨr tɨ əm sul, 18nɨ ka bi ka una ɓə əm kway əm ndula wa̰y tudi ɓee ndu yḭḭ lo. Əm Ba ɓudu ne wo tɨ un kuru jo una la əm Ba ne ləg wa̰y ne əm ka tɨ un kuru ɓə əm wa̰y tɨ daa sul naa la.»
Mum tɨ tina tɨ ndɨlasul
Luk 12.13-34
19«Yḭ ka mum tɨ tina dɨbla tay tɨ nəgri sul tɨ un ne tina la, mara la ɓə ər yunga lo, ta bi tɨ sugi ɓə li taal kura tɨ sila lo. 20Lɛ yḭ tay mum tɨ tina tɨ ndɨlasul, tɨ un ne tina la, mara la ɓə a yunga lo, la tɨ un ne bi tɨ sugi ɓə li taal kura tɨ sila lo la. 21Kəysul gorne i wa̰y tɨ tina wo tɨ nin jo, i ho̰ni wo tɨ nin la.»
Tɨm tɨ un ndeeri
Luk 11.34-36
22«Ji tɨ lampa tɨ ndula ya̰m: Jo gorne əm ji tɨ nga̰ gɨna, əm ndula gun ndeeri la, 23lɛ jo gorne əm ji tɨ nga̰ lo gɨna, əm ndula gun wo tɨ un ɗoyri hul. Jo gorne un ndeeri ne wo tɨ əm ndɔ ley kuna un ɗoyri gɨna, un ɗoyri ne tɨ əm ndɔ ɓə tɨm gasi nari!»
Ndɨla yabu ɓee gursu yabu
Luk 16.13
24«Wo ɓə lɛm bələgɨ tɨ ndidi cida kar lo, kəysul ər ɓə wo ɓudu koor la, ər ɓə ɓudu kumkar la, ɓee ər ɓə ər ndula kay na wo ɓudu lɛ ər ɓə wo ɓudu ləg na wa̰y kar lo bad. Wo ɓudu ɓə cida kar gɨ Ndɨla la gɨ gursu la lo.»
Hul kay tɨ Ndɨla sul
Luk 12.22-31
25«Tɨ nejo ən ja gɨ i ɓə: Yḭ ka i ndɔ cḛy tuna i tudi la yḭḭ la sul lo, ɓee tuna sər ne yḭ taam tɨ i ndula jaa lo. Kəysul tɨm jili ura mum tudi, la ndula ya̰m ura sər la lo a? 26Yḭ ləg ɗḭ tɨ ndɨlasul: A ndu lo la, a ɓya̰ lo, la ta a to tɨ dawlu hul lo la, lɛ ī Ba ne wo tɨ ndɨlasul naa gɨ a tudi! Yḭ hura ɗḭ ne lo a? 27Ja jo tɨ i daan lɛm kil ɓudu ɗula tɨ ər tɨm jili mu tɨ nəgri sul le na ər nya̰ a?
28«Kəyjaa i cḛy ndɔ sər jaa a? Yḭ kay i ji i ləg mum huyri ton tɨ wərgɨ hul na tooni. A ka cida lo la, a yew sər lo la. 29Lɛ wa̰ay Salomo̰ ne ti tɨ mum tɨ tina daan kaw wur sər ndinimani kuna wa̰y huyri ɓudu lo. 30Jo Ndɨla wur sər gɨ mum huyri tɨ waal hul ne o̰ kakam la gaana laa wo a kula gɨna, pay ər lɛm yḭ maan kar nɨ ɓə ne ura lo a? Ay! I hul kula ɗang gaw! 31Yḭ ka i ndɔ cḛy la, i ka ja ɓə: “Kəy jo i ɓə tudi a? Kəy jo i ɓə yḭḭ a, kəyjo i ɓə wur tɨ i ndɔ a?” 32Tɨ bi tɨ Ndɨla una lo jo taam mum ne na lula sul gun. Lɛ i Ba ne ti tɨ ndɨlasul una wa̰y ne i taam tɨ tɨm jili. 33I taam Ndɨla waan la mum kar tugla la, barita ər ɓə gɨ i mum ne gə̰y naa tɨ sul. 34Yḭ ka i ndɔ cḛy gaana jaa lo, kəysul gaana may na ər jaa ne tuna ər sul. Ɗa̰y tɨ lay kaw may na ər pɛw ne tuna ər sul.»
Trenutno izabrano:
Matyo 6: nie
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 2023, ATALTRAB
