Matyo 11
11
1Gorne Jesu tong ər gṵ naa gɨ ər bi tɨ wa̰y edɨ dɔkɔmɛ kar sap gɨna, ər o̰ tɨ un ne ər si tɨ lwərgɨ nii tɨ lɔr nəgri ne sul tɨ gɨ bi wa̰y ɓla la tɨ Ndɨla beel ɗula la.
Ja̰ Batis na jaa ɓiri
Luk 7.18-35
2Ja̰ Batis wo tɨ dangay hul, ər laa jaa tuna mum gun ne Krist wo ne Ndɨla ɛr ka. Ər ton ər bi tɨ wa̰y edɨ ka a si a ɓiri Jesu jaa ɓə: 3«Pay yim tɨ Mesi ne wo hina ɓee yini ɓə wo jak a̰y a?» 4Jesu duga gɨ a: «I si, i ja gɨ Ja̰ mum gun ne yḭ laa la yḭ ləg la: 5Bi ji nina ləg un la, bi kɔgri si tugla la bi tɨ yo ndula duga ndeeri la, bi huru laa jaa la, bi tɨ ulu wag tɨ ngalɨm la bi tɨ ndemni laa Jaa Ndinimani beel la. 6Ndula laar gɨ wo ne nɨm ər hul kula lɔ lo yin jaa!»
Jesu ja jaa tuna Ja̰ Batis sul
Luk 7.24-30
7Gorne Ja̰ Batis na bi tɨ wa̰y edɨ duga si gɨna, Jesu ɗolɔ tɨ gɨ bi ja jaa tuna Ja̰ Batis sul. Ər ja ɓə: «Kəy wa̰y jo i si i ləg tɨ taap hul a? Uun ne saaw dig a? M-m! 8Lɛ tɨ kəy wa̰y jo yḭ si i ləg a? Wo ne wur ngɔmi ndinimani a? Bi ne wur ngɔmi ndinimani lɛ ti tɨ woom ɓang hul la. 9Kəyjo yḭ si i ləg a? Pay tɨ nebi a? M, ən ja gɨ i tɨ bayri, Ja̰ tɨ nebi la ər ura nebi dwari cam. 10Ja̰ tɨ wo ne Ndɨla ja jaa tuna ər sul tɨ maktub hul ɓə: “Yin ən ɓə ən wo tɨ tomni, tɨ əm kwi tɨ gɨ əm ul kaaw.” 11Kuri, ən ja gɨ i tɨ bayri, tɨ bi gun ne aa toy a daan, wo ne ɗəng ura Ja̰ Batis in teni lɛ, wo ne gaw tɨ Ndɨla waan hul jo tɨ ɗəng ura ər. 12Ɗo lɔ ɓagcagri tɨ Ja̰ Batis na cida tɨ beel ɗula marway ndogle, Ndɨla waan wur tɨ dwari hul la bi tɨ dwari jo ko ka na maan. 13Nebi gun la Moys na gṵ hul ja jaa tuna Ndɨla na waan sul marway na Ja̰ na lula sul. 14Jo yḭ taam jaa ne lɔ una ɓari gɨna, Ja̰ tɨ Eli ne bi ja ɓə ər wo duga hina. 15Wo ne na tori, ka ər laa jaa ne!
16«Ən ɓə bi kalɔ tɨ ndogle lɛmni na kəy bi a? A ti kuna ɓimi ne a ti tɨ un bayri a ka ngor a soon a peer ɓə: 17“Yini koon gɨ i hu lɛ yḭ ɓoon lo! Yini so gɨ i kwan tɨ ulu cḛy lɛ yḭ ɗɨb i tən lo!” 18Kəysul Ja̰ hina, ər twi wa̰y lo la, ər yḭḭ ham lo la, lɛ yḭ ja ɓə: “Ər na jinsə!” 19Wo Ɓa̰ hina, ər twi la ər yḭḭ la gɨna, yḭ ja ɓə: “Ər tɨ wo agri la, wo tɨ ham yḭḭ dɨbla la! Yi ka ər na bi tɨ lambo tay la bi tɨ ɓijim kar paa kɔr.” Lɛ bi ton kay jicina tɨ a ndɔ sul, a ləg ər wa̰y tɨ kar tɨ tugla.»
Ndula cḛy tuna lorgɨ nii tɨ Galile sul
Mat 10.15; Luk 10.12-15
20Gɨna, Jesu ɗolɔ tɨ bi tɨ lwərgɨ nii ne ər ka mum ne ɓɔrji dɨbla tɨ nin meer, kəysul a nɨm a ɓijim lo. 21«Jindemni gɨ yḭ bi tɨ Korajin! Jindemni gɨ bi tɨ Betsayda! Kəysul jo mum tɨ ji ɓɔr ne ən ka tɨ i maan, jo ən ka gɨ bi tɨ Tir la gɨ bi tɨ Sido̰ la gɨna, ɓagcagri, a ɓə sər tɨ ndemni wur na tɨm tɨ borum daan tɨ ɓla ɓə a nɨm a ɓijim lɔ teni. Ta a ɓə a hul kula la. 22Nejo, ən ja gɨ i tɨ bayri, na ɗa̰y tɨ sarya kar, Ndɨla na jaa ne wo tungni tɨ Tir la Sido̰ la sul ɓə sɨgra i maan ura. 23Yḭ bi tɨ Kapɛrnom, i kay ho̰ni ɓə i ɓə ɗɔl tɨ ndɨla sul tɨ ndal a? M-m, yḭ ɓə jir tɨ ɓejere jo. Kəysul jo mum tɨ ji ɓɔr ne ən ka tɨ i maan jo hiina ən ka gɨ bi tɨ Sodom la gɨna, kakamle kaw Ndɨla ɓə a yuga. 24Nejo ən ja gɨ i tɨ bayri, na ɗa̰y tɨ sarya kar, Ndɨla na jaa ne wo tungni tɨ i sul ɓə sɨgra bi tɨ Sodom maan ura.»
Jesu ɓla ər ba gɨ ər bi tɨ wa̰y edɨ
Luk 10.21-22
25Na lula sul ɗay, Jesu so jaa la ər ja: «Ən Ba, Baali tɨ ndɨlasul la nəgri sul la, ən ka gɨ əm barka, kəysul wa̰y ne əm wal gɨ bi tɨ jicina la gɨ bi tɨ mum una la, əm ɓla gɨ əm ɓimi. 26M, ən Ba, əm taam ɓə ka ti kuna paa ne.
27«Ən Ba naa gɨ ən mum gun tɨ ən daa. Ndɨla na ɓa̰ tɨ jaa a, wo ɓudu ne una ər in teni, lɛ tɨ Ba tɨ Ndɨla ngoy jo una ər, ta wo ne una Ndɨla in teni lɛ tɨ ər ɓa̰ ɓudu ngoy jo una ər la ɓla ər gɨ bi la.
28«I hina tɨ ən ndɔ, yḭ bi gun ne i yəg mum ne lur i nari la, ən ɓə gɨ i un tɨ saaw bɛ naa. 29I wur i sul tɨ ən njug lɔ la, i kay tulɔ tɨ ən jaa lɔ. Kəysul yin tɨ wo ɗina la ən tɨ wo hul bor la. Kuna ne gɨna, yḭ ɓə un tɨ saaw bɛ tina. 30Kəysul ən njug somni pel-pel la, ən wa̰y tɨ yəg lur lo la.»
Trenutno izabrano:
Matyo 11: nie
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 2023, ATALTRAB
