Epotor i 2
2
Bibin bite Búwejet Beenabe bu
1H'aamo hu hunak hite *efeet ite Pantakot#2.1 A̱juk Esaraha i 23.15-21; Buluwa bu 16.9-11. hireeŋa, *kéeyilene ku kareyi fe ni kakuukanooro tand'afeeneŋ. 2Kaja kajamu, n'áweninee t'etiir álind, aŋ'a̱juk kite eyam yómbokun etibe tu boko. N'álind t'enuuf i fe ti kariikee du. 3Ni kajuk naane wúleluf weenokoore ni sineemak wéeŋaasina, abe nu wúwaajinooro weesiiŋo t'ánoan tu boko kareyi fe. 4Huruw fe tu boko n'ahooj bib nu Búwejet Beenabe bu, abe ni kásit káhamin ti kíhaminiin kuway, huruw naane Búwejet bu buwuno i éehamin.
5N'abaj Serusalem Esuwif kéejube, kéenuutina tu búsuk bu fe bite etaam ye. 6Hi kajame hu naane áwenina i, ni kakuukanooro kahooj. Ni kátumb fu kábaŋo, ábuki huruw fe tu boko aŋ'ajam kéeyilene ku ti báhamin ti kíhaminiin koone. 7Ni kajahale naane, abe n'iŋi kaane:
—Bokondu kiŋki káhamin iyu, kereŋ bákateiit *Gálile kareyi fe? 8Buŋ b'aamo fu huruw t'úne n'aŋ'ajamiin ti báhamin ti kíhaminiin k'ájuwe ku? 9Bakaake t'úne kéenuutina Part, bakaaku Medi n'Elam, n'abaj kéenuutina Mesopotami, *Súde ni Kapadoos, Pont n'Asi, 10Firisi ni Pamfili, *Esipt, nu músuk mite Libi meeemo mu inde Siren; n'abaj kéenuutina *Rom, 11n'abaj keebukee ku Esuwif, ni bakan keeyoosee ku bítim bite Esuwif i, n'abaj kéenuutina Kiret n'Arabi, abe bare uŋ'újamiin n'iŋi kasok ti kíhaminiin kite k'úne buroon bómbokun bite b'Atambatun!
12Ni kátumb fu kajahale dómbokun, kámeyiit yooŋ naŋ ni kaware fu kayinoor. N'iŋi kaanoor:
—Kame fíya bonde buŋ?
13Bare bakaake n'iŋi kafin kásuw kéeyilene ku. Iŋi kaane:
—Jaa, káwusanawusan fu!
Piyeer n'aseede ni báhamin boone
14Náami Piyeer n'arito ni bakaaku *epotor sumoŋu n'afeeneŋ u, abe n'ataŋk éehamin ni hahooja hu aane:
—Aruun Esuwif i, n'aruun fe keekine ku beebe Serusalem, arijamatan jak áriimeyi b'ija bee kasokuuun. 15Ariene bokonde káwusanawusan, bare tókoiit, ábuki afiyeit naane túrumina i#2.15 Tu hunak hite efeet naane Pantakot, Esuwif i kásoŋkaariit kañoofo éjoma. Nu bújom, iŋi kajab kalaw t'afeeneŋ t'Enuuf ite Atambatun, abe ni katik kañoofo. Tu buñoofo bu yooŋ t'ifi káhujo. Piyeer n'aane makamu kañoofoorut, kayinaat káyemi bakan kéewusane.. 16Bare b'arijame bee beemo fu bonde bu Sowel *ayiŋana ite Atambatun abine bu asok. Aanaan:
17«Atambatun aane:
bonde b'ija fu káhinu tu kunak kiraanu ku:
íñje kásiku tu Búwejet búuma iiwun húŋgowulan hánohan fe;
ehaawa yeenuun nu búsuŋgute boonuun kayiŋan tu huruwu húuma,
éhombokun yeenuun ni bíhaaniin boonuun káyawut.
18Hee, tu kunak kondu íñje kásiku tu Búwejet búuma
iiwun háyine hu ni haare hu kéejeŋginam ku,
abe boko kayiŋan tu huruwu húuma.
19Íñje káhinu t'etiir tu bufor bu buroon beejahale ésuk i,
abe t'etaam i, n'íhin buroon beehaŋiin kikaw:
kabaju halan, ni sineemak, ni hárunda heehahe,
20taanak tu kábaani túruk naane káajiim,
abe hiim hu kalaañu jif naane halan
bala hunak hómbokun hu h'Anahaan u abin hu te ho hireeŋ.
21Náami an fe eeyak karuwu Anahaan u kafaku#2.21 Sowel 3.1-5..»
22«Aruun bakate ku *Israyel, arijamatan jak b'ija bee kasokuuun: Yesu ite u *Nasaret, akina an árimeyie kaanuku Atambatun ámoomi ne o, ábuki awunowun éehin tu buhooŋuuun buroon beejahaluun ni beehaŋuun kikaw, naane árimeyie i bo aruun kumuumuun. 23Ániine ondu n'ásikee asaanuun naane Atambatun anoŋke i eesok, o eefiye u éemeyi bo. Abe aruun ariyoolo fu, aruun kéesiko ku arisaan ehoofoora i keetibo *t'ekuruwa#2.23 A̱juk Májiye 27.35; Mark 15.24; Luk 23.33; Saaŋ 19.18.. 24Bare Atambatun n'aritano t'eket i, abe n'aramo ti sílaam site te yo, ábuki étumbut éyini kajokio ti sembe site te yo#2.24 A̱juk Májiye 28.5-6; Mark 16.6; Luk 24.5.. 25Múniyo *Dafit aanaan uŋu hoone hu:
“Iŋ'ijuk Anahaan u hágilaam kep,
ábuki ámoomi n'íñje kaanuku doon itim dílaamanam.
26Iŋ'ite ho h'eholam ejokokane fu,
kirim kúuma yooŋ fe keetoofe;
humuum eniam yooŋ kayihu t'eyakar,
27ábuki awe Atambatun, at'a̱wasam t'ésuk ite keekete ku,
ata yooŋ a̱was eni yite an úuwe eenabe u yeefut t'élum i.
28Á̱wufooramwufoor ñítim ñite buroŋ bu;
awe káhinu hikawam heetoof, ábuki awe káyemi n'íñje#2.28 Élookiin i 16.8-11..”
29«Kújakuwe, íyinooniuun kasoku beekuure ti faaf úne Dafit. Aketaket abe n'ahokee. Élum yeene yooŋ eroŋa t'úne beebe. 30Bare akina ayiŋana ite Atambatun yéeni, abe ámoomi kaanuku Atambatun abinabina awaato aano o bibin káhinu ake eeyak kánuutina tu noota noone éeyemi áyi naane akina#2.30 A̱juk Élookiin i 132.11; 2 Samiyel 7.12-13.. 31Dafit asoŋka biŋandan bíriteina bite *b'Afakana u t'eket i. Uŋu hoone hu h'áhamine fu h'aane hu:
“Awasutee t'ésuk ite keekete ku,
abe enio efutut t'élum i#2.31 Élookiin i 16.10..”»
32Piyeer n'áwutiyen aane:
—Yesu ondu, Atambatun aritanoritan t'eket i, abe irireyi fe irijukajuk ni ñíkin uni. 33Ayiteeyit t'etiir inde *baatos Atambatun, abe akina Atambatun Faaf u n'asaano Búwejet Beenabe bu beefiyee bu busokee. O Yesu n'ásik bo asaan uni; bo b'af'arijuk iye, abe n'arijam yooŋ. 34Ábuki Dafit humuumo asireit t'etiir bufor bu naane Yesu, bare aanaan:
«Atemit aanaan Anahaan úuma:
“A̱riiko inde baatosam
35ayak abin áami ikalaa enatoora íiwe tuus,
awe á̱ayemi áyi u#2.35 Élookiin i 110.1..”»
36«Náami bakate ku Israyel kareyi fe kawarawar kámeyi bonde nu múniyo: Yesu ondu a aritibe u t'ekuruwa i, o a Atambatun áhine fu éeyemi Anahaan u n'Afakana u yooŋ toko!»
37H'ésuk i kajame hu bondu, nu bugoriin faa tu suhol. Ni kákandijen Piyeer ni bakaaku epotor kaaniin:
—Kújakuwe, kame naŋ n'iriware fu káhinu?
38Piyeer n'aaniin:
—Ariwatanooro kinij koonuun keejakut ku, abe huruw t'aruun n'áhin eebostee tu huruwu hite Yesu *Kiris man wuhoofoor woone nu wuboŋketee, abe Atambatun n'aŋ'awunuun Búwejet Beenabe bu. 39Ábuki aanaan o kawunuuun bo, aruun, ni bakañuuun, ni keekine ku t'akambe, bija yooŋ ni k'Atemit Atambatun ite úne ayak ku karuwu kareyi fe.
40Piyeer n'asooñ áhaminiin afiyo, kaanuku keehaŋo káyilen, kikawiin yooŋ keehaŋ kayaŋgu. Aŋ'aaniin:
—Arifak tu bokondu kéenijaariit ku ajakee!
41Bakan keehooje-hooj ni kajok ti báhamin boone, abe ni *kabostee. Hunak hondu, bakan keereeŋe súñjune síhaaji ni káwutiyen kaŋaabo *kéeyilene ku. 42Iŋi kajok alit tip ti b'epotor i bimbi kaliikeniin, ni kariiko t'afeeneŋ biriiko beejake, ni kafiitar kumburu ku t'afeeneŋ#2.42 ni kafiitar kumburu ku t'afeeneŋ: iŋi kañoofo abe ni kafiitar kumburu ku kéehin Éhijiima yite Anahaan u., abe n'iŋi kalaw yooŋ t'afeeneŋ.
Buroŋ bite kéeyilene ku étiyar i
43Ésuk i ereyi fe ni kajahale dómbokun, ábuki *epotor i iŋi káhin buroon beehooje beehaŋiin kikaw. 44*Kéeyilene ku kareyi fe ni kajokoor áwariee, abe doon dite afeeneŋ, dite yooŋ bakaaku#2.44 A̱juk yooŋ Epotor i 4.32-35.. 45Aŋarko iŋi kajoohen sitaam sooniin bija ebaj yeeniin fe, abe n'iŋi káruboor sírirem si kabaje su, kaliik huruw ti bakola boone. 46Húnakonak fe iŋi kafand bukuukanooro *t'Enuuf ite Atambatun. Iŋi kafiitar kumburu ku tu sunuuf sooniin, abe ni kañoofo t'afeeneŋ siheliin ti katoofu kep, abajut yooŋ biyitooro. 47Iŋi kasokoroor Atambatun, abe ésuk i ereyi fe n'émaŋiiin. Húnakonak fe Atemit ti káwutiyeniin bakan keefake éyeni.
Trenutno izabrano:
Epotor i 2: cwt
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 1999, Wycliffe Bible Translators, Inc. All rights reserved.