João 4
4
Suxo Samaria-nero Piranapni
1Jesus hima João tshinkaluru yohnik-homkahitatshine rawya hiyrunu João yohnik-hima h-batiz-jeta Jesus. Waneya fariseu-ne jemlu xye pirana.
2(Seyni Jesus hi batiz-jekanata halikaka rasruklene tsonu batiz-jekanatna.)
3Jesus himaxinixka wane htshinyehikanaxyawakluna waneya Judeia tshijne ruchpajyatka. Hsatoka Galileia tshijne nwaka.
4Samaria tshijne raluka yaplemta.
5Waneya satu poktshi Samaria tshijne hajeru poktshi rapoka, Sicar tshinikowaka, Jacó-ni mitshi hituru José-ni renektshijnererustsi.
6Wanekananru Jacó-ni hakophale tshinikowaka. Hanikaj-hohnestsi hetkotkani ramanutatka Jesus hyanre tshinanu waneya hakophastsi htuplatatka Jesus.
7Waneya sato suxo Samaria-nero wane tapoka t-sajkapyawakapa. Waneya Jesus wan-tshinro:
— Honha putanno.
8Klu tshinanu Jesus hasruklene poktshi nwaka hyatkana nijittshi ranjixyawakapna.
9Waneya suxo Samaria-nero wla tshinru:
— Haklu tshinanhe panjitno hita Samaria-nerno honha nuxyawakapyi klu tshinanu pixa honukla judeu-neryi pixa? (Wane ttshina suxo klu tshinanu judeu-ne hi rimatletkakna Samaria-nerune.)
10Waneya Jesus hihitlo wla htshinro:
— Pimatkamkalu Hoyakalu henekachle hiyrun-koxa pimatkamkalu panjitjeru wla tshinatshri, honha putanno waneyamka honha panjixinri wale waneya walemka henekanyi honha hiweklu heneklewatatshri.
11Waneya suxo wla ttshinru:
— Honha sajikapi hi pwiya hiyrun-koxa tenopnalu honha yehi. Hiyáhoni hanhe pixa kochpakletanru xye honha hiweklu heneklewatatshri?
12Pixlahe wutsrukate Jacó-ni yohnika tsru hixikatshriwayi? Walenikni henekwu xye hakopha. Hiyrun-koxa wale potniko xye honha hirjekanatni wale, hiwhenene hiyrun-koxa hiprane.
13Waneya Jesus wan-tshinro:
— Ptowru yineru xye honha hiratshri hiyrunukotnaka ronunnahatewatanu.
14Seyni katuktako honha hita henekjexyalu hiratshri hikeklu ronunnahatewatanu. Klu tshinanu honha hita henekjexyalu hakopha rixnatkawa hisatu hitokoteya. Hiweklu hikeklu hohne mnikawnakatupa renekanru.
15Waneya suxo wla ttshinru:
— Nanjityi penejyawakapno xye honha hikeklu nonunnahatewatanutka. Wan-hixatshrono hi nujhalu hewi nsajkapyawakatka.
16Waneya Jesus wla tshinro:
— Ptomhapanru phanuru. Hewitshi hinanu.
17Seyni suxo hihitlu wla ttshinru:
— Hita hi khanurno.
Waneya Jesus wla tshinro:
— Halikaka ptshina, hi khanurno, ptshina.
18Klu tshinanu cinco kata jejine phanurutatka halikaka xye jeji xawakni potuko pimwaleru hi phanurni wale. Hiyáhoni halikaka tokantshi ptshina.
Himalwuru Halikakalutu Piranapni
19Waneya wla ttshina suxo:
— Xawakni nimatyi hinamtatshri pirana hinkakletatshrihetkoyi.
20Wutsrukatenni xye mrijiko rimalwuxyatkaluna Hoyakalu, seyni hixa judeu-nhi wane htshinjeta Jerusalém poktshi Hoyakalu himalwuxikowakni halikaka.
21Waneya wla htshinro:
— Suxo palixanno. Rapokhohnetanu hike yineru himalwutanru Hoyakalu hewi xye himrijiya, hi Jerusalém poktshiyako.
22Hixa Samaria-nerunhi hi himatlu kluneru potu himalwujeta, seyni hixa judeu-nwu wimatlu wimalwutanru klu tshinanu judeu-ne yehi runya hiwekkaklewatatshri.
23Seyni rapokhohnetanu, halikaka wale hohne hapokatka, Hoyakalu himalwutatshine potu himalwutanru Hirtshi Hoyakalu riwejinriyna hiyrun-koxa hpotuknu hchinikanuymana. Klu tshinanu Hirtshi Hoyakalu halukna rimalwutjene wane pixka hixatshine rixyawakna.
24Hiwejikalurni Hoyakalu hiyáhoni rimalwutjene haluk-himalwuretlu riwejinriyna hiyrun-koxa hpotuknu hchinikanuymana.
25Waneya suxo wla ttshinru:
— Nimatlu Messias honukla Cristo tshinkaluru hinanu halikaka. Runiniklunu ptowru potuko ruhle hinkakletanwu.
26Waneya Jesus wla tshinro:
— Walekno hita, hitakni hiynumsatyi pixa.
27Waneklu papko potuko rapokatkana rasruklene. Rimyekna suxo riynumsakanaxyawaka. Seyni hi satukna wanna hepomhatkalo suxo klu talukatka. Hiyrun-koxa hi repomhatkaluna Jesus klu tshinanhe riynumsakanatlo.
28Waneya suxo hiknokahachhajremta. Tyatka poktshi nwaka. Yine tunkaka.
29— Hinanu hetapanru satu jeji ptowruka nkamhaleru nunkakjeru. Hi he xawaka Cristo-katkani wale?
30Hiyáhoni wale poktshi ruchpajyatkana. Jesus nwaka hyatkana.
Jitaklewaklerune, Hamatshine Piranapni
31Waneya wane pchinika Jesus hasruklene nikjixmaklu. Wla htshinruna:
— Kasruklewakleru, pnikanu.
32Seyni wale wla tshina:
— Knijitno nniklerupa hmetjejetanutu.
33Wale tshinanu rasruklene wla htshinkakna:
— Hiyáhola satu yineru haniknijitutlu?
34Waneya Jesus wla tshinna:
— Nnijitni waleni nyokanatjeru halujyawaka nkamhiywaka hiyrunu nnikaxyawakaplu hkamrure nenejikolu.
35Hix-honra hasruha wla tshinreta: “Quatro ksuru pejnu mahata wamyawakaplu.” Seyni hjemanru ntshinyawakhi, himrekhatanu hetanru hitakluchakaka, hitaklu serowata, hmahachata ramikowakatka.
36Hamatshri wenuxikolu hyoptota. Rapatjeyehixnawa halukkaluru hiweklu hike rixiniko mnikawnakatu tshinanupa. Hiyáhoni hitaklewatatshri hiyrunu hamatshri himumuwatanu.
37Xye tshinanni halikaka pirana htshinna wla tshinatshine: “Satni hitaklewatatshri, satni hamatshri.”
38Nyokanathi hamyawakaplu hma mutakanutuko yehi. Pimrine wane kamrurewaxyatka waneya hixa wanna kamrure-ptako hjihlokachatatka.
Hixolune Samaria-nerune Halixyawaklu Jesus Piranapni
39Hixo Samaria-nerune wale poktshi hajene halixlu Jesus klu tshinanu suxo wla ttshinakanata: “Runkakno ptowruka nkamhakanatanru.”
40Waneya Samaria-nerune hapyehixinru Jesus, ranjitluna wanna yehi rutujyawakapa. Hiyáhoni hepi hohne pejnu wane rutukatka.
41Hiyáhoni pimrine hixolune halixlu waleko htokanu tshinanu.
42Wla htshinrona suxo:
— Hi pixa ptokanu tsonu tshinanni seyni waleko htokanu wjemyawaka tshinanu walixlu. Wimatlu halikakni Cristo-ni wale ptowru tshijne Hiwekkakatshrini wale.
Jesus Satokanwakaxyawaklu Galileia Tshijne Piranapni
43Hepi hohne wane rutukatka waneya wane ruchpajya. Galileia tshijne nwaka hyatka.
44Jesus honra mitshi wane htshinatka, “Muphujewnakatuwa pirana hinkakletatshri hi hkahwakpiratka waleko htshijneya.”
45Waneya Galileia tshijne rapojinixka Jesus, kihle yoptole rixluna wane hajene. Tsru niklu hohne Páscoa hohne tshinanu, Jerusalém poktshi hyatkana wanna koxa hiyáhoni wane rexyaluna ptowruka Jesus kamrure wane hkamhakanaxinritka.
Jesus Hitskalajyawaklu Phuru Whene Piranapni
46Jesus satokanwakatlu Caná poktshi Galileia tshijne hwatshri Jesus mitshi honha vinho-ha kamhiywaka nwaka. Wanekananru satu phuru, yeyixawhenetatshri Cafarnaum poktshiya.
47Waneya hjeminixka phuru Jesus Judeia tshijne ruchpajyawaka pirana Galileia tshijne hyiywaka waneya Jesus yehi hya. Ranjitlu Jesus hituru nwaka hyiywakapa rutskalajyawakaplu klu tshinanu hiwhene hipnakastsitkani.
48Waneya Jesus wla tshinru:
— Hetkaluru ho himyekaklewatatshri hma metkanuklunu, hi hetko halixanu.
49Waneya phuru wla tshinru:
— Punhapkatanutshi noturu mupnakanuko pchinika.
50Waneya Jesus wla tshinru:
— Pyanutka pipji nwaka. Piwekawhenethonuka.
Jeji halixtokanutlu Jesus hiyáhoni hyatka.
51Hipji nwaka hyapamtawa htowrene yoptotlu. Runkakluna, wla htshinruna:
— Piwekawheneta!
52Waneya repomhana klu papko hyinuwaka hihlewleta. Wanna wan-tshinru:
— Kapethohne, kayi sreta uma hora, rutuk-patshwaleta.
53Hiyáhoni tsru himatatkalu Jesus tshinyawaklu mitshi: “Piwekawheneta” htshininiklunru klu papko potuko wan-rixatka. Waneya ralixatka wale hiyrunu hipji hajene ptowruneka halixatka.
54Xyekni hepi rixinri hetkaluru Jesus kamhaleru Judeia tshijne ruchpajinixka, Galileia tshijne hyinixka.
Trenutno izabrano:
João 4: mpdBiblia
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
