Njɔyn 6
6
Njisə̀s ə pfɨtê nɔ̂yn ə ghɨ̀kè
(Matyò 14.13-21; Mâk 6.30-44; Lûk 9.10-17)
1Epàm ətəyn, Njisə̀s è chùmtè èpàm sə Vəynse ə ndò tyâŋà ndûə engyinə̂ enjwì ə Ngalìlîvè, e tɔŋtə̂ kəpî nə njwîə Tìpelùsvè. 2Nɔ̂yn ə ghɨ̀kè e chûmtə̀ Vəyn, kûmə̀ nə ghənə tè nyi mə ə fe ghɛ ə kayntə ghɛ ə è tè nə̂, tsuʼə ə̀ghɨ ezafə. 3Njisə̀s ə kɔʼɔ tsɨsə̂ etûə pfɨ̀yn yî chùmtè èpàm sə vəynse. 4Shîŋə̀ azhi ezaʼa tsɛke tè paʼsə pə̂ ndò. 5Njisə̀s ə naynə̂ ka ə fe mə nɔ̂yn ə tsɨəke tè nyîə pə̂ se Vəyn, È və ke pfɨf se Filìp nə, “Ghâsènì nyiə nə̀ zhɔnə ghayn fɨazhiəve nə və tsɨ̂ə kwəynə̂ se fo sê ghɨ ghɨ̀nə ə?” 6È tè pi zɨnə mə se mɔ̀mə Filìp, pîza kâynè ke èghɛ zɛ ə È nə̀ nə̂.
7Filìp ə pə̀ynsə̀ nə, “Kə nâʼàpî ndè nə kyî fɨ̂atə̀fè se zhi, ə kyi sə̂ kyi tsɛ sèshəyn se kɛ sepɛ̀ se zhɔyn efɨazhiəve kə ve kwəyn sê ghənə.”
8Chùmtè èpam ə̀ Vəyn və mɔ̀ʼɔ, e tɔŋtə̂ nə Andɨ̀lò, mə ə̀ tè nyi ànyìə Shimùyn Pità ə ke pì nə, 9“Vâyn èndômə̀ vîvè nyì fâyn, mə è nyîə kyi mtoʼtə̀ mə àpayn mə kwaŋmè m̀tâyn è mbwɔ̀vè epɨ̀a. Pîza ve kaʼa ve kwəyn zayn sê ghɨ ghɨ̀nə ghe tsɨ̂ə nyiə?”
10Njisə̀s ə pìə sê chùmtè èpàm sə vəynse nə, “Ghàyn pi nə, ghɨ ətəynghe tsɨsə ə chi.” Wə̂ynvè tè tsɨə kə fumə nyi. Ghɨ ətəynghe əkɨ̂m ə tsɨsə̂ əchi. Fumə əfètə̂ ànɔ̀yn ndômnè ghè tè kàʼa ghə nyi kam setâyn. 11Njisə̀s ə fiə àpayn əkwaŋ ətəynke ə fo àzɔ̀ŋnè sê Zhə̀fè ə fo nə chùmtè èpàm sə Vəynse chyate sê ghɨ ghɛ ə tè tsɨs fumə. Njisə̀s ə nə̀ kə pî zamə è mbwɔ̀ vɛ, nâʼà ghənə əkɨ̂m ə zhiə kolə. 12Kə ghənə əkɨ̂m tè zhi kol, Njisə̀s ə pìə sê Chùmtè èpàm sə vəynse nə, “Ghàyn komte sə tɛ ə te faŋ, ə ghâsènì tàʼa sàŋnə təynte səndô.” 13Ghənə komtə̂ èpɨaʼle epɨayn vɛ èkɨ̂m ve ə lwinə ekwà njò sepɛ̀.
14Kə ghɨ ghɛ ə tè nyì fu tè fe ghɛ ekaynə zɛ ə Njisə̀s tè nəyn, ghɨ ətəynghe ə pìə nə, “Səmɔʼ ə̀ vɨ̀nə nyì ke nâʼà Fɨ̀aʼtè vɛ ə tè tsɨ̀ne nə è tə pə̀ ə mbi” 15Njisə̀s tè nyîə ke nə ghənə tè nyì ke epɨaʼtêzè se kyiə Vəyn se nə̀yn nə è və nyi fɔ̀yn sə atyaʼ, È və fɨnə ndô kɔʼɔ ə pfɨyn kè və̂yn nɨŋ.
Njisə̀s ə kwì etûə M̀mò
(Matyò 14.22-33; Mâk 6.45-52)
16Kə shîŋə̀ ezhwikwɨləke tè kwəyn, chùmtè èpàm sə Njisə̀sè ə tso ndûə enjwì, 17ə njiə ə ngwùʼ èghaʼâ sè kɛsə̂ tyàŋà ndùə engyinə̂ ə Kàpanùm, tuʼve ə chîə pə̂, ndɔ̀ʼɔ Njisə̀s nyiəm pəyn sê ghənə. 18Ə̀ nyi fumə ashìŋə̀, fofa tɛ kyîke e tsɛ̂, nə̀ʼsə̀ tsò nâʼà sə ŋaŋ. 19Ə̀ tè se nyi mə chùmtè èpàm sə təynse ə kwì zaʼâ mâyl seta zaʼâ ndûə sèkyàʼ, ə ke fe Njisə̀s È kwîə etuə m̀mò, pə̂ paʼsə̂ etipìə ngwùʼ èghaʼâ. Fâyn zə ko ghənə nâʼà sə ŋaŋ. 20Pîza, Njisə̀s ə pìə sê ghənə nə, “Kə ghàyn fayn. Ə̀ nyi Mi.” 21Ghənə ə ke saŋnə njiə ndzɨsə vəyn ə ngwùʼ èghaʼâ, kè sə ashìŋə̀, ngwùʼ ə tyàŋə̀ fɨə elùʼ vɛ ə ghənə tè ndwìə ətəyn.
Ghɨ tè kyiŋə Njisə̀s
22Tuʼfe komtəfe, nɔ̂yn kɛ ə ke tè faŋ apàs enjwì əmɔ̀ʼɔke ə fe kê nə ə̀ nyì ke ngwùʼ èghaʼâ èmɔ̀ʼ fumə. Ghənə e kê nə Njisə̀s paʼà ndò ətəyn yî chùmtè èpàm sə Vəynse, pîza mə yîghə̀ ghənə pâʼà ndò əmɔʼ. 23Ngwùʼ seghaʼâ sə mɔ̀ʼɔse mə se ndo ə Tìpelùs ə pə̀ ə ngwùŋ ènjwì etipì elùʼ vɛ nɔ̂ynkè tè zhi payn ə kwaŋke mə Pɛ̂pɛ fo tsoke àzɔ̀ŋnè. 24Kə nɔ̂ynkè fe nə Njisə̀s yî chùmtè èpàm sə Vəynse tè va fu, ghənə ə njiə fɛ sengwùʼ seghaʼâsè ə ndùə ə Kàpanùm, kyiŋə ndûə Njisə̀s.
Njisə̀s ə pì nə zhi nyi Apayn ə kwaŋ kɛ ə ke nə̂ ghɨghe ndamə
25Kə ghɨ ətəynghe tè fe Njisə̀s apàs enjwì əmɔ̀ʼɔke, ghənə ə pìə sê Vəyn nə, “Tyə̀ynsè, ò pə̀yn zɨ̂yn fa ə?”
26Njisə̀s ə pə̀ynsə̀ ghənə nə, “M pîə sê ghàyn səmɔʼ nə, ghàyn kyiŋə pə̂ Mi kûmə̀ nə ghàyn tè zhi apayn ə kwaŋke, nâʼàpî ndè ə zhiə kolə, ə̀ vachi kûmə̀ ə̀ghɛ ə kayntə ghɛ M tè nəyn nə ghàyn ə kyiŋə Mi. 27Kə ghàyn nə fɨaʼa sê fɨazhiə vɛ ə ve pofə, ghàyn è pɨlə fɨaʼà sê fɨazhiə vɛ ə ve kyi ndam zɛ ə ze tə mîə va. Ə̀ vɨnə nyi efɨazhiə vɛ ə Vâ Wùə tə fo sê ghàyn kûmə̀ nə Zhə̀fè, mə za nyi Pɨ̀a, nyi mə È və ndə̀m chwìə èfɨ̀aʼa ə Vəyn wìyn.”
28Ghənə ə pfɨfə sê vəyn nə, “Ghàs kàʼa ə ghàs ghayn ghɛ endom se nə̀yn eghɛ zɛ ə Zhə̀fè kyiŋə nə ghàs nəyn ə?”
29Njisə̀s ə pə̀ynsə̀ nə, “Ghɛ zɛ ə Zhə̀fè kyiŋə nə ghàyn nəyn nyi nə ghàyn pomə sê Mi vɛ ə È tom.”
30Ghənə ə pə̀ynsə̀ sê Vəyn nə, “Ə̀ nyi chwìə èkè ə Ò kaʼa Ò nəyn kə ghàs fe ə pomə ghô ə? Ò kàʼa Ò ghayn tso nâʼà ghe? 31Ghə̀pɨ̀a ə pɨ̀a ghasə ə tə zhi fɨazhiə vɛ ə tɔŋtə nə manà zâ elùʼ ashəshəve, kè eghɨ kə Ŋwàʼlè ə̀ Fèzhə̀ pìə nə, ‹È və fo fɨa zhiəve mə ve ndo ekwùtwəyn, nə ghənə zhi.›”
32Njisə̀s ə pìə sê ghənə nə, “M pîə sê ghàyn səmɔʼ nə, ə̀ vachi Mosîs ə è tè fo payn ə kwaŋ kɛ ə ke ndô pə̂yn ekwùtwəyn se ghàyn, ə̀ nyi Pɨ̀a Vɨ̂mvè ə è fo kàyntè àpayn ekwùtwəyn. 33Kûmə̀ nə M nyi kàyntè àpayn ə kwaŋ kɛ ə Zhə̀fè fo mə ke ndo ekwùtwəyn fo ə̀ghɨ mbiə èndam zɛ ə ze tə mîə va.”
34Ghənə ə pìə sê Vəyn nə, “Tyə̀ynsè, fo ghàs è payn ə kwaŋ nə kɨ̂yn shîŋə̀ tekɨ̂m.”
35Njisə̀s ə pìə sê ghənə nə, “M nyi apayn ə kwaŋ kɛ ə ke fo ndam zɛ ə ze tə mîə va. Ghɨ ghɛ ə ghe pə̂yn sê Mi, chɨ̀ŋ tə fɨnə zafə va ghənə, ghɨ ghɛ ə pomə sê Mi, ə tɔŋə pfɨŋve tə tàʼa zaf ə ghənə. 36Zôyn, Mə tè tsàyn sê ghàyn nə, ghàyn ə fe Mi pîza ə tàʼa pomə̂ sê Mi. 37Nâʼàpî ndè vɛ ə Pɨ̀a Vɨ̂m fo sê Mi nə̀ pə̂ se Mi. M vayn kaʼa M tə chum kɛsê nâʼàpî ndè vɛ ə è pə̀yn sê Mi. 38Kûmə̀ nə M paʼà tso pəyn ekwùtwəyn se nə̀yn eghɛ zɛ M kɔ̂ŋɔ̀, pîza se nə̀yn ə zɛ ə Pɨ̀a Vɨ̂m vɛ ə È tom Mi kɔ̂ŋɔ̀. 39Ə̀ nyi èkɔ̂ŋ ə vɛ È tom Mi nə, kə M njise nâʼà èmɔ̀ʼ əfètə̂ ghɛ ə È fo sê Mi əkɨ̂m, pîza nə M zomse ghənə əkɨ̂m endam ə fetuʼfe kwuŋsəfe. 40Ghɛ zɛ ə Pɨ̀a Vɨ̂m kyiŋə nyi nə nâʼà ghɨ ə̀kɨ̂m ghɛ ə ghe fe Vayn ə pomə sê vəyn kyi ndam zɛ ə ze tə mîə va. Mə M tə zômsə̀ ghənə endam ə fetuʼ fe ekwuŋsəfe.”
41Ghɨ ə Isìlây ətəynghe ə zhə̀tə̀ se tɨ̀mnə zɔ̀ kûmə̀ Njisə̀s kə È pì nə, “Ə̀ nyi Vəyn payn ə kwaŋ kɛ ə ke ndô pə̂yn ekwùtwəyn.” 42Ghənə ə ke pì nə, “Wùə vɨ̀nə nyi Njisə̀s, ke nâʼà va Njosɛ̀f, mə ə̀ va Və? Ghâsènì nyîə ke pɨ̀a ə̀ Vəyn è nyìə Vəyn. È kwì zayn sə̂ pîə zôyn nə zhi ndo pə̂yn ekwùtwəyn ə?”
43Njisə̀s ə pə̀ynsə̀ nə, “Kə ghàyn fɨyn tɨmnê zɔ̂ sə ghàyn ə ngɨŋ. 44Ghɨ vayn kaʼa pəyn sê Mi ə̀ tsɛ̂ kə va mə Pɨ̀a vɛ è tom Mi nji pə̂yn ndò ghənə sê Mi, ə M tə zomsè ghənə ə fetuʼfe kwuŋsəfe. 45Ə nyàʼ kə fɨ̀aʼtèsè tè pi nə, ‘Nâʼàpî ndè tə pə̂ ə nyi mə ə zaʼle Fezhə̀ vəyn.’ Nâʼàpî ndè vɛ ə è zɨ Pɨ̀a ə zaʼlə̂ sê Vəyn, pə̀ ndò se Mi. 46Wùə vîvè paʼà fe Pɨ̀a; ə̀ tsɛ kə va vɛ È ndò sê Zhə̀fè; ə nyì ke Vəyn Vɛ ə è nyi mə è və fe Pɨ̀a. 47M tsâ se ghàyn səmɔʼ nə, vəyn vɛ è pomə kyi endam mə ze tə mîə va. 48M nyi apayn ə kwaŋ kɛ ə ke fo ndamze. 49Ghə̀pɨ̀aə pɨ̀a ghaynghe tè zhi apayn ə kwaŋ kɛ ə tè tɔŋtə nə manà elùʼ ashəshəve, pîza ghənə ə kwuə. 50Pîza payn ə kwaŋ kɛ ə ke ndô pə̂ ekwùtwəyn nyi kɛ ə zhi nâʼàpî ndè kəynke, ə è tə tàʼa kwu. 51M nyi apayn ə kwaŋ kɛ ə ke fo ndam zɛ ə ze ndô pə̂yn ekwùtwəyn. Mə ə ò zhi payn ə kwaŋ ə ətəynke, ə ò tə ndam faŋ. Payn ə kwaŋ kɛ m tə fo sê ghàyn nyi ewiyn vɨmve, kə m fo sê mbi kə è zə kyi èndam.”
52Kə ghɨ ghɛ tè zɨ zamə, ghənə ə zhə̀tə̀ efɨsə endwɔ̀zè sè saʼnə̂ è ngɨŋsə ə ghənə̂sè pîə nə, “Wùə vɨ̂nə kàʼa è fo zayn wiynə vəyn nə ghâsènì zhi ə?”
53Njisə̀s ə pìə sê ghənə nə, “M pîə sê ghàyn səmɔʼ nə, ə ghàyn tàʼa zhi ewiyn ə Va Wùəvè, se fɨnə mɨə mndəm mə Və̂ynmè, ə ghàyn sə ghànə ngɨŋ ə kyi va ndam zɛ ə ze tə mîə va. 54Ghɨ ghɛ ə zhi wiyn vɨm ə mɨə m̀ndəm mɨ̂m kyi endam mə ze tə mìə va, M tə zômsè ghənə ə fetuʼfe kwuŋsəfe. 55Kûmə̀ nə wiyn vɨm nyi kàyntè àpayn ə kwaŋke, ndə̂m mə̂m me nyi kàyntè afɨa ə mɨəke. 56Ghɨ ghɛ ə zhi wiyn vɨm ə mɨə m̀ndəm mɨ̂m nyì ghâsè ghənə, M nyi ghasè ghə̀ ghənə. 57Pɨ̀a vɛ È nə̀yn nə ghɨghə nyi ètwɔ ə tom mi, kûmə̀ vəyn, m pɔŋə ndamə. Kèpî kə nâʼàpî ndè vɛ ə è zhi wiyn Vɨm, M tə nə̂ vəyn nə è və nyi ètwɔ. 58Ə̀ za nyi nə M nyi apayn ə kwaŋ kɛ ə ke ndô pə̂ ekwùtwəyn, M vachi kə apayn ə kwaŋ kɛ pɨ̀a əpɨ̀a ghaynghe tè zhi, pîza ghənə ə kwuə. Pîza nâʼàpî ndè vɛ ə è nə̀ zhi wiyn Vɨmve nə̀ ndamə faŋə.”
59Njisə̀s tè wàmnə̀ əghɛ ghɨ̀nə̀ ə̀kɨ̂m, mə è zaʼlə̂ əghɨ ə ndɛ̂ atsɨ̀ynte ə Kàpanùm.
Wâmnè ə Njisə̀szè pə̀ èndam zɛ ə ze tə mîə va
60Chùmtè èpàm sə Vəyn se tsɨəse ə zɨə èzaʼlê nə zɨ̂nə̀ ə pìə nə, “Zaʼlê zɨ̀nə nyiə tɛ se chùmtè. Ə̀ kàʼa zɨte nde zəyn zə ə?”
61Mə wùə paʼà tsàyn pî ghɛze sê Vəyn, Njisə̀s ə kê nə ghənə tè nyîə tɨmnə̂ zɔ kûmə̀ zɨnə mə, ə ke pì se ghənə nə, “Zaʼle nə zɨ̂nə nə̀ ndò nə ghàyn za pomə̂ zaynzə ə? 62Ə ghàyn fe, Vâ wùə è kɛsə ndô ndùə ekwùtwəyn, elùʼ vɛ ə è tè nyi ətəyn sə shi, ə ghàyn ghayn ghe? 63Ghɛ zɛ ə ze fo ndam nyi Sezuʼ sə Fezhə̀sè. Wiyn ə wûəvè va nâʼà eghɛ zhîze. Ghɛ ghɛ M tsâ sê ghàyn nyi Sezuʼ è ndame. 64Pîza ghàyn yîghe pomə̂ va.” (Njisə̀s tè piə È zhə̀tè se zaʼlê mə È ke ndô ghɨ ghɛ ə nə̀ pomə va sê Vəyn, è wùə vɛ ə è nə̀ pəʼlə Vəyn.) 65È və kwəynsə̂ nə, “Ə̀ zɨnə nyì kepî èghɛ zɛ M tè tsàyn sê ghàyn kə M tè pi nə, ghɨ yîghe vayn kaʼa ə ghe pəyn se Mi ə̀ tsɛ̂ kə va mə Pɨ̀a Vɨ̂m və nə̀yn nə ghənə pəyn sê Mi.”
66Kûmə̀ zɨnə mə, chùmtè èpàm sə Njisə̀s se tsɨəse ə kɛsə kəmnə̀ ə tàʼa fɨnə ndù yighə̀ Vəyn. 67Njisə̀s ə ke pfɨf se chùmtè èpàmse njòse pɛ nə, “Ghàyn pɔŋɔ kyiŋə kəpî se kɛse mə?”
68Shimuyn Pità ə pə̀ynsə̀ nə, “Se fɨnə ndù sê ndè ə Pɛ̂? Ò nyiə kyi èwâmnè zɛ ə ze nə̂ nə wùə ə kyi èndam zɛ ə ze tə mîə va. 69Mə zôyn, ghàs pomə̂ ndò ke nə ə̀ nyì ghô wùə è Ŋwaʼa vɛ ə è ndò pə̂yn sê Zhə̀fè.”
70Njisə̀s ə pə̀ynsə̀ sê ghənə nə, “Ə̀ tè chɔʼ mi ghàyn njòse pɛ̀, mə va zamə? Pîza wùə èmɔ̀ʼ ə ghàyn ə fètəyn nyi ndə̂plè.” 71È tè wàmnə̀ kûmə̀ Njondàs, ə va Shimùyn Èskalɔ̀t. Njondàs, pi kə è tè nyi wùə èmɔ̀ʼ əfètə̂ sèchùmtè èpàm njòsepɛ̀, nyi vəyn vɛ ə è tè pəʼle Njisə̀s.
Trenutno izabrano:
Njɔyn 6: bfm
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
©2022 CABTAL
