Lukas 20
20
Tinilaw si Isa bong lakka man ninggai kapatut na
(Matiyu 21.23-27; Malkus 11.27-33)
1Pag-anu siꞌ, disu llaw sasang si Isa noan jama ni langga mehe sampay masaplag umanat mahap, luu siga imam langkaw ka ga guru saraꞌ agama sampay ga matatoa bay pasōng pa mman na. 2Tilaw da niiya, “Oy karapatan nu buwat kajinisan ni langga tuu? Baan teꞌ kami bong soy bay muwanan kau kapatut?”
3Iya tampung si Isa, “Doꞌ kam bi la. Tilaw ta doꞌ kam duhuꞌ. Bong tatampung bi tilaw ku, boꞌ bi baan ku bong soy bay muwanan aku kapatut buwat mimon meꞌ looy siꞌ. 4Ituu tilaw ku: Soy ilay bay muwanan si Yahiya kapatut na mandi jama? Tuhan kilay, atawa manusiyaꞌ sadjaꞌ?”
5Sila baw siꞌ tu, lay doꞌ duhuꞌ isun bong oy pataꞌ tampung da. Yuk da padisu-padisu, “Yaꞌ bitu la luu jalan man tabi tumanjataꞌ. Bong itu tabi māꞌ lakka man Tuhan, yuk na na baw, ‘Bong meꞌ looy, ongoy baw kam yaꞌ bay pitsayaꞌ ni umanat na?’ 6Bong baw itu yuk tabi, ‘Kapatut na lakka man manusiyaꞌ sadjaꞌ,’ piligru ningkitabi. Batiꞌ ta mintu, mimon jama ntuu ngahiyak kitabi na baw ka batu sabap pitsayaꞌ sila si Yahiya yana disu nabi.” 7Dari siꞌ, tampung da ni si Isa, “Yaꞌ la katoonan kami.”
8Pag halling si Isa, “Bong meꞌ naa, yaꞌ du baw kam baan ku bong soy bay muwanan aku kapatut.”
Dalil pasal siga panungguꞌ ma yaꞌ tapangandohan
(Matiyu 21.33-46; Malkus 12.1-12)
9Pag-anu siꞌ, lay na baw si Isa ngandalil ni baanan jama ndooy, yuk na, “Luu disu jama bay ngabbun poon anggul, boꞌ lay nohoꞌ tinungguan ni jama. Pag-anu, lay ya lome pa lahat disu, boꞌ hallom na ya ndooy. 10Dari pag taabut kakattuan anggul looy, lay na sohoꞌ dapu kabbun looy disu ata na pilay ngaddoꞌ bahagiꞌ na. Sugaꞌ yaꞌ bay ndean meꞌ ga panungguꞌ looy. Gam pin, lay gi llagpiꞌ ata na boꞌ sinohoꞌ moleꞌ limboy-limboy tangan jaꞌ.
11“Pag-anu, lay na baw dapu kabbun looy nohoꞌ ata na sarī pilay. Sugaꞌ meꞌ looy du siꞌ, lay du llagpiꞌ meꞌ da, boꞌ lay gi pinakiyaꞌ-kiyaꞌ. Pag-lupus, boꞌ na sinohoꞌ moleꞌ limboy-limboy tangan jaꞌ du. 12Pus meꞌ looy, lay na baw dapu kabbun looy nohoꞌ ata sarī ni katallu na pilay. Sugaꞌ lay du ya llagpiꞌ sampay lay na ga ya bakat meꞌ da. Boꞌ lay gi hiniyakan pa poan kabbun looy.
13“Pag-anu yuk dapu kabbun looy siꞌ, ‘Pooy tu la meꞌ ku buwat? Subay situ anak ku na mismu, yana kakasi ku, sohoꞌ ku pilay. Mastiꞌ mag-arat na sina mintu sila niiya.’
14“Sugaꞌ pag takita meꞌ ga panungguꞌ looy anak na na mismu takka, gam pin lay sila isun, yuk da, ‘Ilooy na silay lalla ma kapusakahan kabbun tuu. Tu kam, papatoy tabi na ya mari kapakitabi na kabbun tuu.’ 15Dari lay na ya ginuyud-guyud pa poan kabbun looy, boꞌ na lay pinapatoy.
“Na,” tilaw si Isa, “pagka meꞌ looy kadarihan siga panungguꞌ looy siꞌ, batōy ilay la sila meꞌ dapu kabbun looy? 16Baan ta kam, mastiꞌ pilay jaꞌ silay ya pa mman siga panungguꞌ looy, boꞌ na mapatoy sila labbasakayi. Pag lupus, boꞌ pina-ntan meꞌ na kabbun na man siga panungguꞌ sarī.”
Pag lay jaꞌ siꞌ takale bay bitsala si Isa meꞌ ga jama ndooy, yuk da, “Sipais! Kamura-murahan yaꞌ du luu jama buwat meꞌ looy ni lahat tabi.”
17Pag-anu, ilooy ma ngandaꞌ si Isa pa mman da sambayan na halling, “Pooy meꞌ na niyaꞌ? Pahamun bi teꞌ bong oy kamaatunan suwat looy njawom kitab, ilooy ma yuk na,
‘Batu ma bay tinimanan meꞌ siga tukang buwat lumaꞌ batu, ilooy ya bay dari patingkat kapansahaliyan na man sikamimon.’#(20.17) Kitab Jabul 118.22.
18“Indanan bi ituu. Batu looy ilay siꞌ tuwaꞌ pa aku. Sagannap ma nuwak aku, bbos-bbos sibuꞌ du sina karuha da ka labuꞌ taꞌ batu looy siꞌ. Maka soysoy ina labuꞌ taꞌ batu looy, mastiꞌ pong-mamōng jaꞌ sina. Maka sagannap ma kalabuan meꞌ batu looy, mastiꞌ pipis jaꞌ sina.”
Pataꞌ kina binayaran sukay parinta bangsa Rom atawa niyaꞌ?
(Matiyu 22.15-22; Malkus 12.13-17)
19Na pag tabista meꞌ siga guru saraꞌ agama ka ga imam langkaw sila na siꞌ bay awnan si Isa panungguꞌ ni dalil looy siꞌ, kainagon da nungkuban iya. Sugaꞌ yaꞌ gi bay luu dapat da ngusik iya sabap hanggaw baw sila taggahaꞌ hiluhalaꞌ na baw baanan ga jama ndooy.
20Dari buwatan da, labba mandooy, wā maimanan si Isa balangkali luu na dapat da malkalaꞌ iya. Kainagon da, pa-ntan da na si Isa pa mman gubnul nohoꞌ hinukum. Maka lay gi sila nohoꞌ jama palamud ni ga si Isa magbawuꞌ-bawuꞌ dambuwaꞌ atay sila ka iya. Maksud da mayu-mayuhan si Isa balangkali tasiit da ya ni bitsala na. 21Dari yuk disu ninsila ni si Isa, “Tuwan Guru, tud tumatandaꞌ na ningkami tuwaꞌ jaꞌ bitsala nu sampay tōꞌ nu. Yaꞌ ko minig jama. Wā ko magkanaalla noan jama kabanahan pasal kahandak Tuhan. 22Pagka meꞌ naa Tuwan Guru, luu situ siꞌ la tilaw ku. Bong ningkau, sikatuwaꞌ kilay ni saraꞌ bangsa tabi mayaran sukay pa mman panghuluꞌ sultan bangsa Rom, atawa niyaꞌ?”
23Na si Isa baw siꞌ tu, tasayu na du maksud da niit bitsala na. Dari yuk na ninsila, 24“Boonan bi teꞌ ku pitu disu pilak.” Luu jaꞌ siꞌ, yuk na, “Limbagan soy tu ni sīn tuu ddas ka awon na?”
Tampung da, “Sultan Sisal, panghuluꞌ sultan bangsa Rom.”
25Dari yuk na ninsila, “Pagka meꞌ naa, oy-oy sukuꞌ Sultan Sisal, deanun bi iya. Damikiyan, oy-oy sukuꞌ Tuhan, deanun bi du Tuhan.”#(20.25) Sukuꞌ Sultan Sisal yana sukay parinta. Sukuꞌ Tuhan yana aseꞌ tabi niiya.
26Dari siꞌ tumatandaꞌ na ni sikamimon ndooy tud yaꞌ luu dapat da niit si Isa ni bitsala na. Boꞌ tud bay haylan sila ni tampung na. Dari lay na jaꞌ sila diyam-diyam.
Sinual si Isa pasal jama pinakallum
(Matiyu 22.23-33; Malkus 12.18-27)
27Na ndooy siꞌ, luu baanan paki ni palhimpunan inawnan Saddusi. Na mimon Saddusi pitsayaꞌ bong jama lay na matoy, yaꞌ na luu masa da pinakallum bbos-bbos. Dari luu ninsila pasōng pa mman si Isa, 28yuk da, “Tuwan Guru, njawom suwat Nabi Musa, bong luu lalla ndahan, boꞌ lay na matoy yaꞌ gi bay anakan, talpaksaꞌ konoꞌ pinūt bawu na meꞌ danganakan na. Dari tabangunan na awon danganakan na bong danda looy bay hanak.#(20.28) Kitab Tawrat, Duteronomi 25.5.
29“Na ntuu konoꞌ, bay luu pituꞌ lalla magdanganakan. Pag-anu siꞌ, kuwan ma siyaka, lay na ndahan, sugaꞌ yaꞌ gi san sila anakan, lay na ya matoy. 30Dari lay na baw pinūt bay nda na meꞌ danganakan na ma pasunuꞌ. Sugaꞌ yaꞌ gi sila bay anakan, lai na du matoy lla na. 31Damikiyan, pag ni katallu ngabut sampay ni kapituꞌ na sibuꞌ du karuha da. Yaꞌ gi du san bay hanak sampay lay jaꞌ matoy sikamimon lla na. 32Song hallom, sampay danda looy, lay na du matoy. 33Na Tuwan Guru, bong mattan luu gi mintu masa jama matoy pinakallum, pagka sila sikapituꞌ bay pingkaꞌ sitampu ka danda looy, mamooy na lay la mintu lla na?”
34Pag tampung si Isa, “Halloman manusiyaꞌ ina masi llum ni junyaꞌ tuu, ndang nabiat sila handa atawa halla. 35Sugaꞌ pag taabut ahirat, sarī na. Sagannap ma initung meꞌ Tuhan tawop pinatabeꞌ ni okoman na, pag taabut da pinakallum, niyaꞌ na sina handa atawa halla. 36Maka yaꞌ na sila kuhi matoy saumu batan sibuꞌ na du karuha da ka malaikat. Boꞌ tumatandaꞌ na anak Tuhan sila batan lay na sila pinakallum pabalik.
37“Na buktiꞌ man tabi mindoga jama matoy pinakallum lagi, mamintang jaꞌ kam ni bay suwat Nabi Musa pasal suwara Tuhan bay pōꞌ man poon kayu-kayu looy noleyab na meꞌ api. Yuk Tuhan ni Nabi Musa, ‘Aku na situ Tuhan ma sinumba meꞌ Nabi Ibrahim, Nabi Isahak, ka Nabi Yaꞌkub.’#(20.37) Kitab Tawrat, Kalakka 3.6.
38“Na ilooy ilay siꞌ yana disu pamintangan man tabi mindoga jama matoy pinakallum pabalik. Batan jaman Tuhan ilay bay magpalman ni Nabi Musa, hallom na banahan ga Nabi Ibrahim bay matoy. Sugaꞌ hantak bitsala Tuhan jaman na magpalman, san sila bay na matoy, lay na sila llum pabalik. Batan yaꞌ sina luu jama matoy kasumba Tuhan. Ilooy du kasumba, yana sagannap ma llum.”
39Dari yuk siga guru saraꞌ agama baw siꞌ tu kasohean, “Inaa ya tampung ayad Guru.” 40Pus meꞌ looy, yaꞌ na luu bay nawakka nual si Isa pabalik.
Papuꞌ Sultan Daud yana panubuꞌ na
(Matiyu 22.41-46; Malkus 12.35-37)
41Pag-anu siꞌ, yuk si Isa ni baanan jama ndooy, “Pamāꞌ siga guru bi Almasi yana disu panubuꞌ Sultan Daud. Boꞌ bana du. 42Sugaꞌ ongoy baw Sultan Daud bay ngawnan panubuꞌ na Papuꞌ na. Saꞌ ba, luu njawom Kitab Jabul ilooy ma yuk Sultan Daud mattoꞌ,
‘Yuk Tuhan ni Papuꞌ ku: Ningkōꞌ ko ni bihing ku huwin pa kawnan, 43boꞌ nnaꞌ ku mimon banta nu ni diyoꞌ pāt battis nu.’#(20.42-43) Kitab Jabul 110.1.
44“Na bong lay awnan Sultan Daud Almasi yana Papuꞌ na, baan bi teꞌ ku pooy meꞌ Almasi dari Papuꞌ Sultan Daud magsabtan ka iya panubuꞌ na? Pamikihan bi teꞌ.”
Iyakin kam ni siga guru palsu
(Matiyu 23.1-36; Malkus 12.38-40)
45Pag-anu siꞌ, sasang mimon jama masi pakale, yuk si Isa ni ga mulit na, 46“Iyakin kam taggahaꞌ lay na baw kam mintu kalakkotan meꞌ tabiat siga guru saraꞌ agama. Sila ina bong lumān, tigiꞌ sila magparorog ka juba ayad. Kainagon da subay sila inalak ni mayran. Bong ni jawom langga, kainagon da subay na pin sila ni lugar patingkat ni duhuan. Luu-luu paballangan, kainagon da subay sila pinaehe nohoꞌ ningkōꞌ ni paningkoan numbul satu. 47Ni kamulakab napsu da, ngandupang jaꞌ sila siga bawu danda supaya takoleꞌ da mimon altaꞌ da. Boꞌ patahaꞌ da lagi duwaa da ni mayran bahasa basag sila ngisbat Tuhan. Baan ta kam banahan, tud bohat sina mintu hukuman Tuhan njataꞌ da.”
Trenutno izabrano:
Lukas 20: sjm
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 2021, Wycliffe Bible Translators, Inc. All rights reserved.
