Ima̍tiyu 7

Lɛpɔ̄ ode ku̍ āchɛ

(Ilu̍uku 6:37-38, 41-42)

1“A ā de lɛpɔ̄ ku̍ ɔ̄chɛ ni̍, hɛ̄ɛbɛ nīi Ɔwɔ ge̍ e̍e de lɛpɔ̄ ku̍ wɔ ni̍. 2Wu̍chē oji̍ nɛ, lɔkɔ nīi a de lɛpɔ̄ ku̍ ɔ̄chɛ ma̍, i̍ngi̍ngɔ̍ɔ nīi Ɔwɔ ge̍ē de ē ku̍ wɔ a̍nɛ. Lɔkɔ nīi a ge̍ē miya ɔjā de ɔ̄chɛ ma̍ i̍ngi̍ngɔ̍ɔ nīi o̍ ge̍ē miya ē de wɔ a̍nɛ. 3Ligbo̍ yī ɔchi̍ gbo aa̍ la īkprī yī wɔ, a i̍ ho̍ko̍o tū ɔ̄ ni̍; ohu̍ yī oji̍ nīi a chōo̍chē ma̍ īwī ɔbɔbɔ nīi tū la īkprī yī ɔ̍nyīmɔ̄chɛ yī wɔ ma̍/? 4Kana̍ nīi a ge̍ē mlɔtū da ɔ̍nyīmɔ̄chɛ yī wɔ ka ɔ̍lɔ ge̍ kɔ̍ɔ̄ nīi aɔ̍lɔ ge̍ wu̍ īwī hī ɔ̍lɔ īkprī ma̍, nīi ligbo̍ yī ɔchi̍ chī e̍e gbo abɔ̍ɔ la īkprī yī awɔ ɔlɔjā ma̍? 5Awɔ ɔ̄chɛ ɔkɛlā ɔha̍ chōo̍chē ya̍ ɔha̍ ɔla̍ā! De ligbo̍ yī ɔchi̍ ɔla̍ā wu̍ hī īkprī yī awɔ ɔlɔjā o̍bū nīi a ā myɛ̍ma̍ wu̍ īwī hī ɔ̍nyīmɔ̄chɛ yī wɔ īkprī.

6“A ā de ɔjā nīi lɛ cha̍ri̍cha̍ri̍ ma̍ de yoō ni̍; nɛ̄ni̍ o̍ ē chōo̍chē pīya kpa̍ta̍ wā la awɔ. A ā de akpānā chīyēgblāa de eko̍oba ni̍; nɛ̄ni̍, o̍ ge̍ē ba̍ ɔ̄ ikpo̍ bāa ɔchɛ̍kɛ̄chɛkɛ̄ ma̍.

A gāla̍, a ē ma̍

(Ilu̍uku 11:9-13)

7“Chikpo̍ yī ɔjā gɛ, ma̍a a ge̍ē nāa! Gāla̍ gɛ, ma̍a a ge̍ē ma̍! De abɔ̄ ku ɔpu gɛ, ma̍a o̍ ge̍ē lwāa ē de wɔ! 8Wu̍chē oji̍ nɛ, ɔ̄chɛmɔ̄chɛ nīi ge̍ chikpo̍ yī ɔjā, o̍ ge̍ē nāa. Ɔ̄chɛ nīi ge̍ gāla̍ ɔjā, o̍ ge̍ē ma ɔ̄. Ɔ̄chɛ nīi ge̍ chī de abɔ̄ ku ɔpu, e̍ ge̍ē lwāa anu̍ ē de ɔlɔjā. 9Ɔ̄nyɛ hɔ̄ amu lipu̍ yī ala̍ nīi ɔyi̍ yī nū ge̍ chikpo̍ yī ojōre̍ nīi ge̍ē chōo̍chē nāa lɛchɔ̄ de ɔyi̍ yī nū ma̍? 10Kɛ̄ɛ ɔ̄nyɛ nīi ɔyi̍ yī nū ge̍ chikpo̍ yī ɛbɛ̍yēenyi nīi ge̍ē chōo̍chē de yɛgwā de ɔyi̍ yī nū ma̍? 11Ala̍ nīi - āchɛ ɔdwɔ̄bi̍ ma̍ je̍ ɔjā ɔnɛ̄ɛhɛhi la odōde de ayi̍ yī ala̍! Āchɛ ge̍ chikpo̍ yī ɔjā bū la abɔ̄ yī Ɔwɔ A̍dā yī ala̍ nīi hɔ̄ la ichō ma̍, o̍ ē de ɛjā ɛnɛ̄ɛhɛhi ē de wa̍ kana̍ ma̍ ēēe!

12“Ala̍ ā yɛ̍ɛ̄lā de āchɛ lɔkɔ nīi ala̍ chikpo̍ ka āchɛ ɔ̍lɔ ge̍ ya̍ de ala̍ ma̍. Ochi̍chi̍ yī Lihɔ yī Imo̍sīisi ba̍la lɛlā nīi āchɛ ɔkɛrɔ̄ yī Ɔwɔ ngū āchɛ ma̍ hɔ̄ aa̍ a̍nɛ.

Oko̍no̍grīgba ɔlɛfi̍ye̍

(Ilu̍uku 13:24)

13“Ala̍ ga la oko̍no̍grīgba nīi lɛ fi̍ye̍e̍ ma̍. Wu̍chē oji̍ nɛ, oko̍no̍grīgba nīi lɛ grogbo, nīi ɔpɔ̄pū yī nū lɛnyɛnya la ɔgɔ̄ga ma̍ - iyī ayekū oli̍gba̍o̍ nɛ. Āchɛ yɛ̄mɛ̄mɛ̄ pɛ̍ ga abɔ̍ɔ la anu̍ a̍nɛ. 14Oko̍no̍grīgba nīi lɛ fi̍ye̍e̍, nīi ɔpɔ̄pū yī nū lichi̍chi̍ ma̍ anu̍ - iyī ɔhɔ̄leyī a̍nɛ. Āchɛ kplɛ̄ɛ̄ chī ma̍ ɔ̄ a̍nɛ.

Ɔchi̍ ba̍la īkpō nīi o̍ ē wā ma

(Ilu̍uku 6:43-44)

15“Ala̍ ā deyīrɛ yī alarīmɛ̄ ɛha̍ nīi ē wā dikpo̍ba̍ ala̍ ka aɛ̍lɛ - āchɛ ɔkɛrɔ̄ yī Ɔwɔ nɛ ma̍. A ge̍ ma̍ wā lɛ yɛchɛ ji, e̍ lɛ bāa anyīyɛrɔ̄ ma̍, abɔ̍ɔ lipu̍ yī wā - ɛbɛ̍ ɔkwɔ̍ɔ̄chɛ ke̍e̍ nɛ. 16Bū lɛlā nīi e̍ ē ya̍ ma̍ nīi ala̍ ge̍ē bī je̍ wa̍ a̍nɛ. Wu̍chē oji̍ nɛ, ɛkwɔ i̍ ē wa̍ īkpō yī oromu̍ ni̍; ɔkpa̍chichi̍ i̍ ē chī wa̍ īkpō yī ejū ni̍. 17Ɔchi̍ ohiyē wa̍ īkpō ɔnɛ̄ɛhɛhi; ɔchi̍ nīi gbi̍tɛ̄ ma̍ ē wa̍ īkpō ɔdwɔ̄bi̍ a̍nɛ. 18Ɔchi̍ nīi hiyē ma̍ i̍ ē wa̍ īkpō ɔdwɔ̄bi̍ ni̍, onīi gbi̍tɛ̄ ma̍ i̍ ē chī wa̍ īkpō ɔnɛ̄ɛhɛhi ni̍. 19Ɔchi̍ nīi i̍ ge̍ wa̍ īkpō ɔnɛ̄ɛhɛhi ni̍, e̍ ē de ɔ̍ ē hɛ̍ tāajɛ, kpo̍ ɔ̄ tū ɔla̍. 20N ē gba̍a ka de ala̍ gɛ! Ala̍ ge̍ē je̍ āchɛ ɔwarīmɛ̄ ka aɛ̍lɛ āchɛ ɔkɛrɔ̄ yī Ɔwɔ ɛla̍ā bū la ita yī lɛlā nīi e̍ ē ya̍ ma̍.

Ami i̍ je̍ wɔ ni̍ oo!

(Ilu̍uku 13:25-27)

21“I̍ āchɛ nīi ē hī u ka ‘Ādā, Ādā’ ma̍ ge̍ē tū la ɔpiyɛ yī Ɔchwɔ̄lɛ̍ Oro̍ōre̍ yī Ɔwɔ a̍ni̍. Āchɛ nīi ē yɛ̍ɛ̄lā nīi Ɔwɔ A̍dā yī u nīi hɔ̄ la ichō chikpo̍ ka ɛ̍lɛ ge̍ ya̍ ma̍, aa̍ lōri̍īwā ge̍ē tū a̍nɛ. 22Ɔ̄chī ɔla̍ā ge̍ē gbajɛ ma̍, āchɛ yɛ̄mɛ̄mɛ̄ ge̍ē ka ē de u bɛ̍ɛ̄nɛ̄ hīka, ‘Ādā, je̍ka aa̍ alɔ bī riyī yī wɔ ka ɛrɔ̄ yī Ɔwɔ de āchɛ! Alɔ bī riyī yī wɔ nū yapri̍ija ɔdwɔ̄bi̍ yɛ̄mɛ̄mɛ̄, gba̍a yɛ̍ɛ̄lā ɔlɛbɛ̍bi̍ yɛ̄mɛ̄mɛ̄!’ 23Yɛ̄grāa ɔla̍ā, n ge̍ē da wa̍ hwōō hīka, ‘Ami i̍ je̍ ala̍ je̍ ni̍ oo! Ala̍ ā tu̍rɛ gāa hī u, āchɛ ɔyɛ̍ɛ̄lā abi̍!’

U̍nu̍ ɔlɛ brii ba̍la ɔlɛgeegee

(Ilu̍uku 6:47-49)

24“O̍ lɛ i̍ngɔ̍ɔ ma̍, ɔ̄chɛmɔ̄chɛ nīi ge̍ plɛ̍ɛ̄lā yī u nūma̍, ya̍ lɔkɔ nīi n ka ma̍, ɔlɔjā ge̍ē lɛ bāa ɔngrɔ̄ɔ ɔjyɛ̍ɛ̄lā nīi gwo̍ wɔlɛ̍ yī nū che la ichō yī lɛchɔ̄ ɔlwɔhɔ̍hu̍ ma̍. 25Riwō hā ɛbɛ̍bɛ̍-ɛbɛ̍bɛ̍, ɔkpa̍ wa̍a̍ mu chīyēpa, ahuhu gwō wɔlɛ̍ ɔla̍ā ɛbɛ̍bɛ̍-ɛbɛ̍bɛ̍, o̍ chī rɛ abɔ̍ɔ brii. Wu̍chē oji̍ nɛ, e̍ gwo̍ ɔ̄ che la ichō yī lɛchɔ̄ ɔlwɔhɔ̍hu̍.

26“Ɔ̄chɛmɔ̄chɛ nīi ge̍ chī plɛ̍ɛ̄lā yī u nūma̍ nīi i̍ ge̍ chɛ̄ ya̍ lɔkɔ nīi n ka ma̍ ni̍, ɔlɔjā ge̍ē lɛ bāa oli̍bobo ɔha̍ nīi gwo̍ wɔlɛ̍ yī nū che la ichō yī wɔjɛ ma̍. 27Riwō hā ɛbɛ̍bɛ̍-ɛbɛ̍bɛ̍, ɔkpa̍ wa̍a̍ mu chīyēpa wɔ̄ɔ̄, ahuhu gwō u̍nu̍ ɔla̍ā ɛbɛ̍bɛ̍-ɛbɛ̍bɛ̍; o̍ miya tū ajɛ ɔpɔ̄ɔpɛ̄. Ajɛ ogwōgwō yī nū luhuhwi!”

Wɔhu̍ yī Iji̍sɔ̄ɔsi

28Iji̍sɔ̄ɔsi kwɛ̍ɛjī lɛlā nūma̍ wa̍a̍ la ɔkɔ̄ka bɛ̍ɛ̄nɛ̄. Yɛ̄mɛ̄ yī āchɛ ɛla̍ā wa̍a̍ nīi grēeyī ma̍ de kpo̍ hɛ̍ɛgbɛgba wu̍chē yī ɔpɔ̄pū nīi o̍ bī ngū āchɛ lɛlā ma̍. 29Anu̍ ma̍ i̍ lɛ bāa āchɛ ongū lihɔ yī Iju̍u ma̍ ni̍. O̍ ngū wā lɛlā bāa ɔ̄chɛ nīi nāa wɔhu̍ ɔla̍ā ɔnɔ̄nāa ma̍.

Trenutno izabrano:

Ima̍tiyu 7: YBASR

Istaknuto

Podijeli

Kopiraj