JAN 6
6
Jesu wí ma nabii 5 000 kan, à pe li
(Mat 14:13-21; Mar 6:30-44; Luk 9:10-17)
1Ki kruʔu ma, Jesu wɔ̀ɔ toro wa nyugbɔmo namyɛʔɛ gegee na, ma pé na yeri Galile mâ nì ná yeri nɛ Tiberiyade ge. 2À hɛɛn fafaʔabaa ma na pa wí na, mɛjɛn pe dáa wi kafonŋoo nyaʔa ge, nyiŋi ga na wi dáa yabaa pori be. 3Jesu ní, wi ploʔofɛɛ ní à pe yâ luʔu angogo na mà klɛn wa. 4Mɛjɛn ki dá bo kí ma ko cɛnri Juwifiyee pe Toromo srɛʔɛ fɛti wlɛʔɛ kí bi no. 5Jesu wi gâ wele mâ janma fafaʔa nya kí na pan wì krugu ge, wɔ̀ɔ Filipe po we: «Wó bi bru wà syɔ hanbe buú kan janma ma mí li ge? 6Jesu wi daʔa cɛ́n kɔ ga wiì wí bi hanri ge. Di wi dá ki woʔo ga yo ge jango bì Filipe po bùu wele.» 7Filipe wɔ̀ɔ wí po: «Ali nà pe ja saamo pii kɛ̂ bru syɔ bì bɔɔ konʔolo cɛn cɛn bùu tiʔibi pe na, wòo gban bì pe yala.» 8Wi ploʔofɔlɔ wà dà bo wa, à pe noo yeri Andre na wi lɛɛ yeri we Simo Pyɛri, wɔ̀ɔ Jesu po we: 9«Mí ma bru kɔgunnu nya naʔa ní fyɔbiʔi syɛn ní najɛple là ma. Di ki wobo pa pi gban bì nyaʔa no ki janma ma na me?» 10Jesu wɔ̀ɔ pé po: «Ye janma po mi klɛn.» Janma à mi klɛn nya na ge, mɛjɛn ki dá bo nyaflɔʔɔ deʔe. Nabii pe dá saamo ma kɛ kɔgunnu nyoʔo kɔ ge (5 000). 11Jesu wɔ̀ɔ bru kpe we mà Nyɛʔɛlɛ syeri le mòo tiʔibi bee na pe dá bo klɛnhaʔa ge. Wɔ̀ɔ ní mà fyɔbiʔi tiʔibi ge pé na nɛ. Pè bɛfu à pe ta fyɔbiʔi na ge mà yala ga nì pe dá jori bì da ge. 12Pè bɛfu pe gâ li mâ tìn nyiŋi ga na ge, wɔ̀ɔ wi ploʔofɛɛ po be: «Ye brukonro ní fyɔkonro kpoʔolo be ba pí ma kori ge. Yò ga pí yaʔa pi cɔʔɔ.» 13À pe pí kpoʔolo mà pi le kpogoo kɛ̂ ma kɛ syɛn ni. À ke nyi ba na pí ma kori ge ki bru piʔi kɔgunnu ni ŋa pé ma ka ge.
14Hɛɛn pe gâ ki kafonlo la nya wí ma hanri ge, à pe yo: «Ki woo ŋa wí nyɛ Nyɛʔɛlɛ leyoo kanyɛmɛ na, ŋa pe dá yo wí gà ba ban naʔa drunya ni we.»
15Nyiŋi ga na Jesu wi gáʔà nya hɛɛn pé naʔa ca bùu co fanŋa na bi yɔɔ́ krɛʔɛ klo fɔlɔ ge, wɔ̀ɔ jɛ be pè tanla mà kɛri mà yâ luʔu angogo yugu na, wì yɛ nigbe.
Jesu wí ma tanʔa nyumu yugu na
(Mat 14:22-23; Mar 6:45-52)
16Yaa paʔa da gâ gɔ kɔ ge, wi ploʔofɛɛ à pe trigi angogo na mà no wa nyugbɔmo na me, 17mà yâ je wa pe nyumu kɔrɔ ni ge jango bì hru bì doro wa nyugbɔmo namyɛʔɛ gegee na bì yà no wa Kapɛrinamu kàʔà na. Yebliʔi ki da gmó. Jesu wɔ̀ɔ po wi ìn je pé co kpɛn. 18À tiflɛgbɔʔɔ mà jɛ na funnu mà na nyumu kpoʔoro me. 19Pe da gâ bo pé ma nyumu kɔrɔ hɔʔɔ mâ cilo pii pèè kɔ, kɔgunnu yoo, noli yoo, à pe Jesu nya wí na tanri nyumu yugu na na flo wa pe nyumu kɔrɔ tanla ge. Fyara à ti pé co. 20Di wɔ̀ɔ pé po: «Yò gáa fyaʔa. Mì wi.»
21À pe cori bùu kpe nyumu kɔrɔ ni ge. Ki nyidege na ge, pe nyumu kɔrɔ àʔa no wa deʔe ga na pe dáa sye ge.
Janma mí na Jesu ca we
22Ki kpɛntoʔo na ge, janma ma mi dá go wa nyugbɔmo namyɛʔɛ gegee na ge, à miʔi nya nyumu kɔrɔ nigbe dá bo wa dron. À miʔi cɛn mà yo Jesu wi ìn dà je waʔa nî wi ploʔofɛɛ ní be. Di wi ploʔofɛɛ pe da gɛri pè yɛ. 23Kiì nì kì bɛfu ní, à nyumu kɔrɔrɔ tà mà jɛ wa Tiberiyade kàʔà namyɛʔɛ na mà pan be deʔe ga tanla wò fɔlɔ wi dá Nyɛʔɛlɛ syeri le mâ bru kan hɛɛn ma á poo ka ge. 24Pa hɛɛn pe ìn dà gâ Jesu ní wi ploʔofɛɛ nya be, à pe je ki nyumu kɔrɔrɔ ni de mà nyumu kon mà kɛri Kapɛrinamu kàʔà ni bì yà Jesu ca we.
Jesu wí nyɛ nyuwyeʔe bru
25Pe gaâ wì nya nyiŋi ga na wa nyugbɔmo namyɛʔɛ gegee na ge, à poo po: «Krɛʔɛfɔlɔ, má ma pan naʔamɛ ge nyaʔa nyiŋi na?» 26Jesu wɔ̀ɔ pé po: «Mí biʔi yo ye ma kanyɛmɛ na, yoò na na ca kafonŋoo gee kala na mí ma hanri á ye nya ge. Di yé na na ca, mɛjɛn ye dí bru ka mà tìn. 27Yò gáa tunŋu ko jango bì da akaba ba taʔa pí bi baa fonri ge. Di ye da tunŋu ko jango bì baa ba taʔa pi ìn bi gà fonʔo ge, ba pí na nyuwyeʔe bajegɔ kanʔa we. Akaba ba Hɛn Pyɔ wí bi gân ye ma ge, piì bi. Mɛjɛn To Nyɛʔɛlɛ lí moo fara mà li jɛnlɛ pa le wi na.» 28À poo po: «Wó biʔi po mɛlɛ bí da ga hanri Nyɛʔɛlɛ lí ma cori ge?» 29Jesu wɔ̀ɔ pé po: «Ga Nyɛʔɛlɛ lí ma cori yé hanri ge, kí ga: Ye pà ŋa na lí ma tun ge.» 30Ki nyiŋi na, à pe ní mòo po nɛ: «Nyaʔa kafonlo li má bi hanri wo kan, jango wo pa má na ge? Dee di, má bi nyaʔa hanri? 31Mɛjɛn wò tokpɔɔ pe dáa manɛ ka wa sinbriʔi ni ge, nɛ pa kí nyɛ wa nyoŋoʔo Nyɛʔɛlɛ li sɛbɛ ni we mâ yo: ‹Wi dáa namuru bru kanʔa pé ma. À pe noo ka.› »#6:31 ma wèle wa Nyi 16:4,15; Ŋuʔu 78:24 ni wè.
32Jesu wɔ̀ɔ pé po: «Mí biʔi yo ye ma kanyɛmɛ na bì yo Mowisi ban wi dáa namuru akaʔa kanʔa ye ma ge. Di na To wiì wi wí na namuru akaʔa kanʔa ye ma ga kí nyɛ akacɛnŋɛ ge. 33Mɛjɛn akaʔa ga Nyɛʔɛlɛ lí na kanʔa ge, kiì gi ga kí na jrɛʔɛ wa namuru ni ná nyuwyeʔe kanʔa drunya ma we.» 34À poo po: «Kundiʔi, maa ki bru kanʔa we wo ma su.» 35Jesu wɔ̀ɔ pé po: «Bru ŋa wí na nyuwyeʔe kanʔa hɛɛn ma be, wiì wi ŋa domi nì we. Funŋu ki ìn bi gà ŋa co adi wí bi ban nà krugu ge. Nyujɔʔɔ ki ìn bi gà ŋa co adi wí bi ba ná na ge. 36Mɛjɛn mi da glú màʔa yo ye kan mà yo, yé ma na nya, di ye ìn ba ná na. 37Na To wí na bee kanʔa ná ma ge, ki woo pè bɛfu pé bi da ban nà krugu. Hɛn ŋa wí bi da ban nà krugu ge, mi ìn bi yà ki woo prɔ we fyeu. 38Mɛjɛn mi ìn dà jɛ wa namuru ni de bì drigi naʔa tra na jango bì baa na nadanma miì hanri. Di mí ma trigi naʔa jango bì baa Nyɛʔɛlɛ nadanma hanri la lí ma na tun ge. 39Ŋa wí ma na tun wi nadanma mí ma: Pè bɛfu bee wí ma kan ná ma ge, wà nigbe wò gá bunŋu, di mí bi ba pè bɛfu nyɛ́ bì pe yrígi wlɛdanʔaŋa na ge. 40Mɛjɛn na To wi nadanma miì ma me: Hɛɛn pè bɛfu bee pé bi Pyɔ nya we bi ba wí na ki woo pe nyuwyeʔe bajegɔ ta. Mí bi ba pe nyɛ bì pe yrígi wlɛdanʔaŋa na ge.»
41Jesu pɔɔ da gáʔà yo mâ yo wí nyɛ bru ŋa wí ma jɛ wa namuru ni mâ trigi naʔa tra na de, àʔa Juwifiyee bɛn be. À pe na nyu pe ní kaplɛmɛ ni, 42mà yo: «Ki woo ŋa wiì ban Josɛfu pyɔ we yo? Wó ma wi to nì, ní wi no cɛn we. Kí ma hanri mɛlɛ wɔ́ɔ kɔ mâ yo wiì wí ma jɛ wa namuru ni de.» 43Jesu wɔ̀ɔ pé po: «Yò gáa nyu ye ní kaplɛmɛ ni banmɛ ge. 44Hɛn wà wóo gban bì ban nà krugu, kí po To ŋa wí ma na tun wi ìn wi kle ge. Domi fanna, mí bi ba ki woo nyɛ̀ bùu yrígi wlɛdanʔaŋa na ge. 45Kí nyɛ wa nyoŋoʔo Nyɛʔɛlɛ leyoo pe sɛbɛɛ ni be mà yo: ‹Nyɛʔɛlɛ lí bi ba hɛɛn pè bɛfu krɛʔɛ.› Hɛn ŋa wí bi da nuru To Nyɛʔɛlɛ ma le bí da li krɛʔɛmɛ taʔa me, ki woo pɔɔ ban nà krugu.#6:45 ma wèle wa Esa 54:13 ni wè.
46Di hɛn wɛ̀ ìn je To nya we, nà ki ìn bo ŋa wí ma jɛ wa Nyɛʔɛlɛ na mâ pan wiì wi ge. Wiì wí ma To nya we.
47Mí biʔi yo ye kan kanyɛmɛ na, hɛn ŋa wí bi ba ná na, ki woo pɔɔ nyuwyeʔe bajegɔ ta. 48Mí nyɛ bru ŋa wí na nyuwyeʔe kanʔa ge. 49Yè tokpɔɔ pe dá bru ŋa ka wa sinbriʔi ni ge, pé noo yeri manɛ. Di pe dá gu. 50Ɛɛn di, mí na bru ŋa pin wí ma jɛ wa namuru ni mâ trigi naʔa tra na de. Hɛn ŋa wí bi ki bru ka we, wòo gà gu adi. 51Mì wi mí nyɛ ki bru we, ŋa wí nyɛ nyuwyeʔe woo mâ po wí ma jɛ wa namuru ni mâ trigi naʔa tra na de. Hɛn ŋa wí bi ki bru ŋa ka we, ki woo pɔɔ nyuwyeʔe bajegɔ ta. Mɛjɛn bru ŋa mí bi gâ ge, wiì wi ŋa na wre ní de. Mí bi ti kân drunya hɛɛn pè bɛfu pe nyuwyeʔe tama kala na.»
52Ki nyiŋi na ge, Juwifiyee à pe na kakara wa pè ní gbanʔa mà yo: «Wí biʔi po mɛlɛ bí gban bí wi wre kan wo ma, wo ti ka ge?»
53Ki nyiŋi na, Jesu wɔ̀ɔ pé po: «Mí biʔi yo ye ma kanyɛmɛ na, nà ye ìn Hɛn Pyɔ wi wre ka de bì wi disyan jɔ ge, paʔa bo yoò nyuwyeʔe ní. 54Ŋa wí na na wre ka de mâ na na disyan jo ge, nyuwyeʔe bajegɔ nyɛ ki woo ma we. Mí bi bɔɔ nyɛ bùu yrígi wlɛdanʔaŋa na ge. 55Mɛjɛn na wre tiì di tí nyɛ akacɛnŋɛ ge. Na disyan àʔa po nyujɛnmɛ. 56Hɛn ŋa wí bi da na wre ka de bí da na disyan jo ge, paʔa bo ki woo wí na kori wa na nî. Mì à mi na kori wa wiì ni we kpo. 57To ŋa wí ma na tun ge wí nyɛ nyuwyeʔe na. Mì fanna, mí nyɛ nyuwyeʔe na kpo wi fanŋa ni ge. Ki podeme na, hɛn ŋa wí bi da na wre ka de ki woo pɔɔ ba bo nyuwyeʔe na mì na fanŋa ni ge. 58Bru wiì wi ŋa wí ma jɛ wa namuru ni de. Woò nyɛ nɛ pa yè tokpɔɔ pe woo wi dá bo ge. Pee pe dá gu, di hɛn ŋa wí bi ki bru ŋa ka we ki woo pɔɔ nyuwyeʔe bajegɔ ta.» 59Jesu wi dá ki kaʔa gee yo ge nyiŋi ga na wi dá bo na hɛɛn krɛʔɛ be wa Juwifiyee sɛrigo ni wa Kapɛrinamu kàʔà ni ge.
Nyuwyeʔe bajegɔ kayoro
60Jesu wi ploʔofɛɛ pe fafaʔa dàʔa yo mà yo: «Ki krɛʔɛmɛ ma mí nyɛ gbanma wɛʔɛ. Han bi gban bì mi kpɔʔɔ?» 61Di Jesu wi daʔa cɛ́n wa wi lama ni me mà yo kí na pe bɛnʔɛ. À pe na nyu pè ní kaplɛmɛ ni. Wɔ̀ɔ pé po: «Ki woʔo ga kí ma ye lama wlele me ye na yo? 62Nà ye gá ba Hɛn Pyɔ nya wí na luru ná sye wa namuru ni de, deʔe ga na wi dá bo ge, pa yeʔe po mɛlɛ? 63Nyɛʔɛlɛ li Nyìli li lí nyɛ nyuwyeʔe kanfɔlɔ we. Wre fanŋa koò nyɛ yraʔa kà. Kayoro da mí ma yo ye kan, tiì fanŋa ni yé ma Nyɛʔɛlɛ li Nyìli ta la lí na nyuwyeʔe kanʔa ge. 64Di pèè nyɛ naʔa ye ni, pe ìn ba tí na. Mɛjɛn mà kpe ki hlinyiŋi na, Jesu wi dá bee cɛn pe ìn dà ba wí na ge, mà ŋa cɛn wí bi bɔɔ le wi bɛnfɛɛ pe kyɛrɛ̀ ni de.» 65Jesu wɔ̀ɔ yo: «Kiì kɔsɔ na, mi daʔá yo ye kan mà yo, hɛn wà wóo gban bì ban nà krugu, kí po na To wiì fanŋa ban ge.»
66Mà kpe ki nyiŋi na ge, à wi ploʔofɛɛ pe fafaʔa mà hru kruʔu ma. Pe ìn dàá ba wí na adi. 67Ki nyiŋi na, Jesu wɔ̀ɔ wi ploʔofɛɛ kɛ̂ ma kɛ syɛn yugu we mà yo: «Yèé be, yé ma cori bì hru kpo yo?» 68Simo Pyɛri wɔ̀ɔ wí po: «Wò fɔlɔ, pa mo má nyɛ nyuwyeʔe bajegɔ kayoro yofɔlɔ ge, nà wo hru mà krugu ge, pa wo ba han na si? 69Ki tɔ na ge, wòó wó ma paʔa na mà nì màʔa cɛn mà yo má nyɛ Nyɛʔɛlɛ li wofràa mà po ŋa Nyɛʔɛlɛ lí ma troʔo naʔa ge.» 70Jesu wɔ̀ɔ pé po: «Mì ban mí ma yèé hɛɛn kɛ̂ ma kɛ syɛn fara we yo? Àʔa hín bo wà nigbe nyɛ naʔa ye ni Sotanri.» 71Jesu wi dáa Simo pyɔ pin, ŋa pé na yeri Judasi Isikariyɔte we. Ali Judasi nòo ja bo wi dá bo wi hɛɛn kɛ̀ ma kɛ syɛnwoo we, wi dá bì ba Jesu le we wi bɛnfɛɛ pe kyɛrɛ̀ ni de.
Trenutno izabrano:
JAN 6: NLK10
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Bible Society of Côte d'Ivoire
