JAN 2
2
Pé ma fonŋo co wa Kana kàʔà ni ge
1Wlɛrɛ syɛn da doró, ki tanriwoʔo na, à pe po pé ma fonŋo co wa Kana kàʔà ni, ga kí nyɛ wa Galile klo ni le. Jesu wi no wi dá bo wa kpo fonŋo deʔe na ge. 2À pe Jesu ní, wi ploʔofɛɛ yeri be kpo wa ki fonŋo cohaʔa na ge. 3Dufɛn wi gâ fleʔe nyiŋi ga na ge, Jesu wi no wɔ̀ɔ yɔ́ɔ̀ po: «Dufɛn wí ma kɔ hɛɛn ma be.» 4Jesu wɔ̀ɔ wí po: «Cɛlɛ, ga mí bi hanri ge mo ban má biʔi yo ná kan ge. Na nyiŋi ki ìn je dyɛʔɛ kpɛn.»
5Ki nyiŋi na, Jesu wi no wɔ̀ɔ kí yo tungɔɔ ma be mà yo: «Nòo yo ye yraʔa o yraʔa ga hanri, yeʔe hanri.»
6 Juwifiyee pe dá ŋglɛnrɛ cɔʔɔ noli tyɛʔɛ be mà na pè kon na jeri mà yala pe srɛʔɛ furu kayoro ní de. Nà ki cɔlɔ là nigbe bí nyi ge, pa li gban bì litri nyɛʔɛ too ticɛrɛ kɔ we, ná kiì ban, pa ke bo too noli. 7Jesu wɔ̀ɔ tungɔɔ po be: «Ye ki cɔʔɔ gee nyi nyumu ní me.» À pe mí le wa ke nî. À ke nyi fɔ mà no wa ke noro na de. 8Jesu wɔ̀ɔ pé po: «Ye mà ko kpo, ye ya mi kan fɛti kundiʔi ma we.» À pe mi ko ma yâ mi kân wí ma. 9Nyumu ma mi dá grɛʔɛ dufɛn ge wi ìn bo wí ma ki dufɛn wi jɛhaʔa cɛn ge, di tungɔɔ bee pe dá nyumu ko me, pe daʔa cɛ́n. Fɛti kundiʔi wi gâ mi jɔ mâ mi wele ge, wɔ̀ɔ fonŋo pɔlɔ yeri we, 10mà bɔ́ɔ̀ po: «Hɛn wì bɛfu wi hîn ki hli mà dufɛntanʔa kan hɛɛn ma be kpɛn. Nà pe dufɛnfafaʔa jɔ ki kruʔu ma wi na ná da mà tipɛɛn kân pe ma. Di mo we, má ma dufɛntanʔa yaʔa ge mà báʔà kân ŋaŋa wiì ni.»
11Kafongblɛlɛ la Jesu wi dá hanri ge liì li wi da lí hanri wa Galile klo kàʔà ga ni pé na yeri Kana ge. Wi da lí hanri mà wi kpangbanma tyɛʔɛ me hɛɛn na be. Ki kala na, wi ploʔofɛɛ à pe pa wí na kpo.
12Ki kruʔu ma wiì nì, wi no nì, wi cyɛɛn ní, ní wi ploʔofɛɛ ní be à pe na blɛn mà kɛri wa Kapɛrinamu kàʔà ni ge mà yâ wlɛrɛ tà kɔ wa.#2:12 ma wèle wa Mat 4:13 ni wè.
Jesu wí ma kɛri Nyɛʔɛlɛ li sràʔá go ni
(Mat 21:12-13; Mar 11:15-17; Luk 19:45-46)
13Juwifiyee pe Toromo srɛʔɛ fɛti wlɛʔɛ paʔa da gáa nori ge, Jesu wɔ̀ɔ jɛ mà kɛri wa Jerusalɛmu kàʔà ni ge. 14Wɔ̀ɔ yâ hɛɛn nya wa Nyɛʔɛlɛ li sràʔá go ni pé na niri nì, mbara nì, ní kòtoʔo pɛrɛ wa. Wɔ̀ɔ ní mà gbejanra hrufɛɛ nya be wa klɛnhaʔa. 15Wɔ̀ɔ maʔala tìn aple mà hɛɛn pè bɛfu prɔ wa Nyɛʔɛlɛ li sràʔá go ni ge, ní pe mbara nì, pe niri nì de. Wɔ̀ɔ ní mà gbejanra hrufɛɛ pe tabaliyee ŋroʔo mà pe can can mà pe gbejanra wo de, 16màʔa yo kòtoʔo pɛrɛfɛɛ ma be mà pe po: «Ye yè yrɛbɛ kpe, ye nyini wa pi ní. Yò ga ní bì na To wi go krɛʔɛ caan go adi.»#2:16 maʔa tonli Ŋuʔu 93:5 ni wè.
17Wi ploʔofɛɛ à pe lama to ga nì kí nyɛ wa nyoŋoʔo Nyɛʔɛlɛ li sɛbɛ ni we mâ yo: Ma go kí ma na glan ceŋge fɔ ki glanʔama à mi po nɛbo kwɔʔɔ gi wa na lama ni me.#2:17 ma wèle wa Ŋuʔu 69:10 ni wè.
18Juwifiyee pe lagwɔɔ à poo po: «Má bi nyaʔa kafonlo hanri jango woʔo cɛn wó yo sye nyɛ má ma ma gbàn ma ki woʔo ga hanri ge?» 19Jesu wɔ̀ɔ pé po: «Nà ye ki sràʔá go ga can ge, pa miʔi fan bìʔi yrígi nɛ fonŋo.»#2:19 ma wèle wa Mat 26:61; 27:40; Mar 14:58; 15:29 ni wè. 20Juwifiyee lagwɔɔ à poo po: «E, mo má biʔi fan wlɛrɛ tanri kpafoʔo ni yo? Pé ma yɛʔɛ too syɛn ní yɛʔɛ noli kɔ ki sràʔá go ga ki fanma na me.»
21Ali nàʔa ja bo wi dá sraʔá go kayoʔo yo, di wi daʔá yo wiì tapolo wi wre namyɛlɛ liì na. 22Ki pomo na me, wi da gâ ba nyɛ̀ mâ nyini kuu ni be nyiŋi ga na ge, wi ploʔofɛɛ à pe lama to ga nì wi dáa nyu pé kan ge. À pe pa ga na kí nyɛ wa nyoŋoʔo Nyɛʔɛlɛ li sɛbɛ ni we ní ga nì Jesu wi dá yo ge.
Jesu wí na hɛɛn pe lama cɛnni me
23Nyiŋi ga na Jesu wi dá bo wa adi Jerusalɛmu kàʔà ni, Toromo srɛʔɛ fɛti na we, à hɛɛn fafaʔabaa ma wi kafonŋoo nya ge mà pa wí na. 24Di Jesu wi ìn dàʔa ta bì da honri bì da ba pé na, mɛjɛn wi dá hɛɛn pè bɛfu pe lama cɛn me. 25Wi ìn dà jori hɛn wà bí hɛɛn pe kaʔa tyɛʔɛ ge wiì na we, mɛjɛn wi dá hɛn wi lama cɛn me.
Trenutno izabrano:
JAN 2: NLK10
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Bible Society of Côte d'Ivoire
