San Mateo 9
9
(Mr. 2:1-12; Lc. 5:17-26)
1Chiy biiu Jesús láani tuby barcu par gudeedny dets nisqui ax bdzɨnny ladxny. 2Ruy güené de bniety tuby bniety nguiu ni aguty tɨɨxni, nágaab lo daa xtenbɨ. Chi guná Jesús dec laadeb reldilaazdeb laany ax raipny bniety racxúqui:
—Guzaclaazu llingaana. Abaania perdón de xtuldu.
3Chiy tuby tiop de maistrɨ ni nán ley baandeb xgab: “Bnietquɨ rsaclob Dios cun de xtiidxbɨ.” 4Ne cun Jesús gucbeegacny xi xgab cayundeb, ax raipny laadeb:
—¿Xínii runtɨ mal xgab? 5¿Cún ni nagánru par gac? ¿Ta gapiab: “Abaania perdón de xtuldu”, o gapiab: “Güeste, queguza”? 6Per anre iliuua laat dec nare Bniety ni bxiaald Dios napa guelrnabee lo guɨchliuré par gúna perdón de duld.
Chiyru ax raipy Jesús bniety racxúqui:
—Quegüeste. Cuáa daa xtenu. Quebia lizu.
7As güeste bnietqui ax zíab lizbɨ. 8Chi guná de bniety ziy, laadeb bdxibdeb ne guniizadeb de diidx zaac lo Dios pur guelrnabee ni bguaadny de bniety.
(Mr. 2:13-17; Lc. 5:27-32)
9Chi bdiia Jesús ruy, deni zény ax gunány tuby bniety nguiu ni lá Madeu. Laab zubbɨ rut runbɨ cobrɨ xte de impuest, ax raipny laab:
—Guzanald nare.
Chiyru güesú Madeu zenaldbɨ Jesús.
10Chiguld deni caquiiny Jesús liz Madeu cun iraru de ni run cobrɨ xte impuest ne cun de bɨny ni quɨt nabány zec ni rnabee ley ni zenuu de bniety Israel, iratedeb zubnédeb Jesús lo mɨlly cun de xpɨnny. 11Chiy chi guná de fariseu ziy, ax gunabdiidxdeb de xpɨny Jesús:
—¿Xínii caquinné xmaistrɨt de cobrador xte impuest ne de bɨnduld?
12Chi bindiag Jesús xi caniideb, ax cuaibny:
—De bniety ni nazaac ne ni nadaan quɨt xi lieedxti racdeb doctor sino que de bniety ni racxú, laadebɨy raclieedxdeb doctor. 13Gulchia ne gulseed xi zelo xtiidx Dios rut rnii: “Ni mazru rcaaza ná ilaslaaztɨ saa bniettɨ xlat ni xi gúnguntɨ par nare.” Anre, nare quɨt zeldtia par de ni ná güen sino que nare zelda par de bɨnduld te par yialaazdeb pur de xtulddeb.
(Mr. 2:18-22; Lc. 5:33-39)
14De xpɨny Juany Bautist güebinuudeb Jesús, ax gunabdiidxdeb laany:
—¿Xínii dunnɨ cun de fariseu quesentiand rcuuannɨ, ne de xpɨnbiu quɨt rcuuanti?
15Jesús cuaibny lodeb:
—Rut rac tuby saa, ¿tatix ruu de bioos nalas chi zuguané bíiny laadeb? Per teru idzɨny dxi ni ibicá bíiny, chiyru icuuandeb.
16’Ruteete quɨt tu rcuaati rmiand tuby ladiiuxy cun tuby ldaa lady cuby pur ni rlliuun lady cubyqui, ax mazru rguillaangui ladiiuxqui. 17Nicza quɨt rdaati vin cuby láani de guidiiuxy, te pur zallaa guidiiuxqui, ax rac perdid zeclɨ vin ne zeclɨza de guidyqui. Pur ningui ná par taa vin cuby láani guidy cuby, te par ni tuby ni stuby quɨt gac perdid.
(Mr. 5:21-43; Lc. 8:40-56)
18Lalzi ni canii Jesús ziy, bdzɨny tuby bniety ni rnabee laniudoo xte de bniety Israel, ax guzullibbɨ lo Jesús, raipbɨ laany:
—A llindxaapa téstepac guty. Per belati laabiu gueedbiu izubnaabiu quiaby ax sbíi ibányby stuby.
19Chiyru zéne Jesús laab cun de xpɨnny. 20Chiy tuby bniety gunaa ni racxú aguc tsɨbtiop iz quɨt rbezti racbɨ guelguzan, gubiib nez dets Jesús ax bguaaldbɨ punt xabny. 21Te pur laab baanbɨ xgab cun iguaaldbɨ xabny abiacacbɨ. 22Per Jesús gubiecquiny, ax gunány gunaaqui chiy raipny laab:
—Guzaclaazu llindxaapa. Abiacu pur ni güeldilaazu nare.
Parzi hóracqui biacbɨ.
23Chi bdzɨny Jesús liz bniety ni rnabee laniudoo xte de bniety Israel, ax gunány azuguaa de muisquɨ ruy par chacuaatsdeb llindxaapbɨ, ne quesentiand ruun de bniety pur laaby. 24Chiy raipy Jesús laadeb:
—Guldiia láanquɨ. Dxapeenquɨ quɨtllɨ gutytiby, raaissiby.
Parzi blliznédeb laany. 25Chiyru gunabeeny bdiiadeb, ax biiuny. Chiy gunaazny naa dxapeenqui, ax güesteby. 26Parzi iduibte nezqui brɨɨch diidx pur ni gucqui.
27Chi bdiia Jesús ruy, chiy guzanald tiop ciagu laany, rbɨxtiadeb, rniideb:
—¡Jesús, llingaan David, blaslaazbiu dunnɨ!
28Chi biiu Jesús yuu rut zuguaany, de bnietqui gubinuudebny, chiy gunabdiidxny laadeb:
—¿Ta reldilaaztɨ dec nare zelee isiaca laat?
Laadeb cuaibdeb:
—Roldilaazlan, Dad.
29Chiyru bguaald Jesús bslodeb, raipny laadeb:
—Su chagac zec ni reldilaaztɨ.
30Chiy guzulo rianlodeb, ax raipny laadeb:
—Quɨt tu gaiptit xa guc bianlot.
31Per cuantpac bdiiadeb ruy, guzulo catɨɨchdeb diidx iduibte nezqui xi baany Jesús.
32Chi bdiia de bniety ni bsiacny bsloni, chiy bdzɨnné de bniety tuby gúp ni nuu bɨndxab láanni. 33Ne cuantpac gulée Jesús bɨndxabqui láani gúpqui, ax guzulo rniib. Parzi quesentiand bdxalo de bniety ne guniizadeb:
—Gady chúuti dxi inián saa milagrɨc nez Israelré.
34Per de fariseu guniideb:
—Bnietquɨ rbéeb de bɨndxab láani de bniety pur lagac guelrnabee xte bɨndxab ni rnabee lo de bɨndxab.
35Jesús güeny irate de guɨdx ne de ciuda ni ná nezqui, chiy cad tuby de ruy biiuny laniudoo par bseedny de bniety. Bseedny laadeb xtiidx Dios, raipny laadeb xa ná guelrnabee xte Dios ne bsiacny de bniety ni rac calí rac ne de ni gúp iralote guelguidx. 36Chi guná Jesús irate de bnietqui ax bgány laadeb pur ni zuguaadeb nalas, guelzii zecpacza de llíily ni quɨty xpastorni.
37Chiy raipny de xpɨnny:
—Didxldíquɨy, zieny bniety rcaaz icuadiag xtiidx Dios, per quɨtti zieny bniety par iliuu laadeb. 38Pur ningui, gulnaab lo Dios par ixiaaldny mazru zieny bniety par iliuu laadeb.
Trenutno izabrano:
San Mateo 9: zab
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 1995, Wycliffe Bible Translators, Inc. All rights reserved.
