मत्ती 28
28
यीशु उन पुनरूत्थान
(मरकुस १६:१-१०; लूका २४:१-१२; यूहन्ना २०:१-१०)
1आराम इन दिन इन बाद्दा हप्ता अन्द पयला दिन व्हातुर आगतेला अच मरियम मगदलीनी अदिक दुसरा मरियम कब्र अक नोळली बंदुर. 2अदिक नोळी, ऊंद हापाळ अच भारी भूकम्प आत, यतिकी परमेश्वर उन ऊंद स्वर्गदूत स्वर्ग टु ईळुकु बंदुन अदिक आव कल्ल इक अलग ढकलुस्कु अदुर मा कुरतुन. 3आऊन रूप बिजली इन घाई अदिक आऊन कपळा बरफ इन घाई बिळेव ईरव. 4आऊन अंज्क देल पहरेदार नळ्गली कुरतुर, अदिक सोत्तुर घाई आगेदुर.
5स्वर्गदूत आ येढ्ढ आर्तेर से अंदुर, “अंजबाळी ना जान्सतीन कि नीव यीशु उक जो क्रूस मा येर्सकु आगीदुन आऊक ढुंढ़सेतीर. 6आव ईल हैलेच, तान वचन इन अनुसार जित्ता आग्यान. बरी, आ जागा अक नोळी यल प्रभु बिदकु ईरोन. 7आऊन चेलागोळी इक तुरन्त होगकु हेळी कि आव सोत्तुर दा टु जित्ता आग्यान, अदिक नोळी, आव नीम से पयला गलील इक होदान. अल नीमी आऊन अव दर्शन सिक्केव अदिक नीव आऊक नोळ सकीर. नोळी, ना नीमी हेळ बुटीन.”
8इदुर मा आंदुर अंज्क अदिक बळा खुशी इन सांगुळ तुरन्त कब्र टु वापस आगकु अदिक चेलागोळी इक ईद समाचार कोळोर साटी वोळली कुरतुर.
9आग यीशु आंदरी सिकदुन. अदिक अंदुन, “सलाम.” आंदुर हात्ती बंदकु अदिक आऊन नव काल हुळकु प्रणाम माळदुर. 10आग यीशु आ आर्तेरी अंदुन, “अंजबाळी; नांद वार्टुरी होगकु अनी कि गलील इक होगी, अल नानी नोळ्यार.”
पहरेदारगोळ्द सुचना कोळोद
11आंदुर होगतेला अच ईरोर कि पहरेदारगोळ दा टु थ्वाळासा पहरेदारगोळ बंदकु पुरा हाल प्रधान याजकगोळ से अनकु केळ्सदुर. 12आग आंदुर पुर्वजगोळ सांगुळ जमा आगकु सम्मति माळदुर अदिक सिपाहीगोळी हापाळ चाँदी नव सिक्कागोळ कोटकु अंदुर, 13“ईद अनेतीर कि ईळ्लक इक याग नाव मिंगकु ईरेव, रा आऊन चेलागोळ बंदकु आऊक काळताना माळकु ओतुर. 14अदिक अगर ईद मात न्यायाधीश उन किव ताका पहुचुसीत, रा नाव आऊक समझुस बुटेव अदिक नीमी जोखिम टु वाचुस कोंडेव.”
15इदुरसाटी आंदुर पैस्या ताकोमकु ह्यांग आंदरी कल्सकु आगीत. हांग अच माळदुर. ईद मात यहूदीगोळ दा दुर दुर ताका फैलुसेत अदिक ईगासताका प्रचलित आद.
यीशु उन कांळ्सोद अदिक आखरी आग्या
(मरकुस १६:१४-१८; लूका २४:३६-४९; यूहन्ना २०:१९-२३; प्रेरितगोळ १:६-८)
16 #
मत्ती २६:३२; मरकुस १४:२८ हन्नेळ चेलागोळ गलील इन आ पहाळ मा होदुर, यारी यारी यीशु हेळीदुन. 17आंदरी यीशु नव दर्शन सिकदव अदिक आऊक प्रणाम माळदुर, पर यारीकारा यारीकारा शंका आत. 18यीशु आंदुर हात्ती बंदकु अंदुन, “स्वर्ग अदिक पृथ्वी इन पुरा अधिकार नानी कोटकु आग्याद. 19#प्रेरितगोळ १:८इदुरसाटी नीव होगी, सप्पा जातीगोळ लॉकुरी चेला माळी; अदिक आंदरी आप्प, पार अदिक पवित्र आत्मा अन्द हेसुर देल बपतिस्मा कोळी, 20अदिक जो आग्यागोळ ना नीमी कोट्टीन अदुर्द पालन ह्यांग माळतार अद कल्सी. अदिक नोळी, ना युग इन अन्त ताका सदा नीम सांगुळ आईन.”
Trenutno izabrano:
मत्ती 28: NTHaa20
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
The New Testament in Holiya Language © The Word for the World International and Holiya Translation Samithi, Kudwa, Gondia, Maharashtra 2020
