Matta 26
26
Mbanya təkəra Yesu
(Mar 14:1-2; Luk 22:1-2; Yoh 11:45-53)
1Nda Yesu tə wurandə dəkə dəhə sə'inga, ngə cha nar nyi nə shawa nyi inda, 2“Wi nda zəndə hi, ənda Ladər Dləgəlnda tə həyadzə hanyi mətləu. Ya aku bəji nga njo nənyi Zər Ndə nə nji ka nda kukwanda nyi.”
3Kəl ngə ka wawa'ar fərist ka njirawawa'a nə Yahuda, tə tsəmtədzə tə patla gau fərist nda njo nga Kayafa. 4Ngə nda mbatə nya ənda nda kwa ɗana ngəya nyi ləbam nə Yesu ka nda səya nyi nda tsəya nyi. 5Kəl ja, nda na, “Ngwa məna da mər ku bəjir ladər nə wa, ma əngə wa njo tliya mwali.”
Nja Dzəvəya Yesu vu Baitanya
(Mar 14:3-9; Yoh 12:1-8)
6Sakanda Yesu vu Baitanya ku ki Shiman ndə nda bibi tə ɗaka səya. 7Nda nda kwa səm sərsuma kəl ngə vanya mala tə shili na təkə mal, chaɓə na mal nda kwa shi'uni kwitəkwitəu nda nja kwa ɗəl na kwaba 'ualəu, ga pəu nyi ku kəra Yesu. 8Nda shawa inda la'a kəl ngə huɗa nda tla, ngə nda na, “Mya gwa'atə cha ɗahurnda mal nga? 9Njo nda ɗəlnda mal nga, ya njo uya kwaba 'ualəu, njo vala nji ɗaliɗali na kwaba kwaba nyi!” 10Yesu zəndə sənda nda kwa pəa, ngə cha nar nda, “Aka mi ngə hyo la'a bikər mala nga? Sə ngə cha mər na'a nga mənakə gagaɗa. 11Nahi ka nji ɗaliɗali wa tanyi, kəl nda naya a da mən kə'i hi wa'atanyi wa. 12Mal ngə cha pəkə ɗa nga, cha ɓatliya dzaya ka haɗə nga. 13Jiri yo nar hi, dəhə mbwa nda njo bəzə Mafakə Mənakə tə dunəya na, kəl nja ɓwanya təkəra sənə mala na mər na, ga nja ɗənghatə na cha.”
Yahuda tə Dləukəri ka Cha Tləɗanda Yesu
(Mar 14:10-11; Luk 22:3-6)
14Kəl zhang ku huɗa shawa daɗədaɗə kwabəu mətləu inda, nda njo nga Yahuda Iskərayoti tə yada wawa'ar fərist, 15ga na, “Mi sənda hyo na'a ma ya tləɗanda Yesu nə hya?” Ngə nda nənyi kwaba azurfa makərkumənyi. 16Fwatə tə bəji nda Yahuda tə ghəya gwa'a laku nda cho tləɗanda Yesu.
Yesu ka Shawa Nyi tə Səm Sərsum Ladər Dləgəlnda.
(Mar 14:12-21; Luk 22:7-13, 21-23; Yoh 13:21-30)
17Pəshir tangərmar pəchir ladər nə gwazhilakə kəla tləlam, shawa Yesu tə shili da cha ga jau nyi, “Aman ko i ea ɓatliya nghə sərsum Ladər Dləgəlnda?”
18Ngə cha nar nda, “Ma'i ma gwa da vanya ndə ku ta mələm, hya nar nyi. ‘Maləm tə na, bəji ɗa gəlati, ku ki nghə eo səm sərsum Ladər Dləgəlnda ka shawa ɗa.’ ”
19Kəl ngə shawa inda tə mər wi nda Yesu tə nar nda, nda ɓatliya sərsum Ladər Dləgəlnda tangnda.
20Nda akə tə ɗa, ngə Yesu ka shawa daɗədaɗə kwabəu mətlə inda tə ngya ka səm sərsuma. 21Nda nda kwa səm sərsuma, ngə Yesu tə nar nda, “Jiri yo nar hi, zhang ku pama hi kwa tləɗanda ɗa.”
22Huɗa shawa inda tə tla gagaɗa, ngə nda ghəya jau nyi kər zhang kər zhang nda kwa na, “Naya ngə zəm Tlaka?”
23Ngə Yesu tə ɓəlakə nda ga na, “Ndə nə eo ha cha ea ku shala zhang nə na, nacha ngo tləɗanda ɗa. 24Zər Ndə kwa tah tang wi nda cha tsəfətsəfə nyi ku Likatəkata, kəl ja, kirpəu na ndə ngə kwa tləɗanda Zər Ndə nga! Bəliya a da nja nda yah nyi pa'a wa.”
25Kəl Yahuda nda tləɗanda nyi nda tə na, “Naya ngə nganə zəm maləma?”
Ngə Yesu tə ɓəlakə nyi, “Jan ka nati.”
26Ku huɗa səm sərsum nda, ngə Yesu tə hətə gwazhilakə ga mərtə nyi usaku nə Hyel, ga njinjiɗiya ga nənyi nə shawa nyi inda. Ndə cha, “Dləutsə ma hya kwasa, kumər dzaya na.”
27Kəl ngə cha hətə ɗeɗika nə ɓitir anapəu, ga mərtə nyi usaku nə Hyel ga nənda. Ndə cha, “Sa ma dəhə hi, 28aka mashi ɗa na, nda nyabiya alkawal nda Hyel tə mər ka nji, nda njo pənda ka nji ɗanghəu, ka farbikər səpəla'a kənda. 29Yo nar hi, a tsə'u yo tsakətə sa ɓitir anap nə səkə wa, kəl bəji nda məno sa taɗənyi kə'i hi ku təlkur Ada ɗa.”
30Nda nda nanda miya fal Hyel, ngə nda hya'atə ga təra gyo Dəgəl Zaitun.
Yesu tə Dəkar ənda Bitrus kwa Kəpal Zəndə Nyi
(Mar 14:27-31; Luk 22:31-34; Yoh 13:36-38)
31Kəl Yesu tə nar nda, “Əvu'i na dəhə hi kwa ngya ɗa, aka sənda kwa ɗa naya, aka Likatəkatə nati, ‘Yo dəgə ndər ɓəla, biri kətəng tsəu kwa wiɗa.’ 32Kəl ja, ahir ya hya'ati ku hwa, yo zhibiya manə hi dzəva Galili.”
33Ngə Bitrus tə nar nyi, “Mada alenya nja ngya ngha, sər gwa'atə da yo ngya nghə na'a pa'a wa!”
34Kəl Yesu tə nar nyi, “Jiri yo nar ngha, təvi tiwir vəgəm ənya, ko kəpal zəndə ɗa zhaka makərəu.”
35Bitrus tə na, “Mada njo tsəya ɗa a sər gwa'atə da yo kəpal zəndə nghə wa.” Əngə dəhə shawa inda tə na tsəu.
Pətlənya Yesu ku Getsemani
(Mar 14:32-42; Luk 22:39-46)
36Kəl ngə Yesu ka shawa nyi tə təra yatə vanya mbwa nda njo nga Getsemani, ngə cha nar nda, “Ngya ma tangna, yo tsaɗar dzə biyama ka pətlənya.” 37Ngə cha nga Bitrus ana nguli Zabadi mətlə inda, ngə cha ghəya ngatə ɓwaɓwatə ku ɗufwa cha gagaɗa, cho ɗəngha gagaɗə na sənda kwa uya nyi. 38Cha nar nda, “Huɗətla nda ya nə ku ɗufwa ya sakana, a ɗati dəgal gagaɗə wi sər ya tah. Ngya ma tangna, hya ɓəla tsa'a na ya.”
39Manda cha tsaɗəndadzə dzən nda, ngə cha səya tsupətənya, ga pətlənya, “Ada, ma cha kwa ɗa cha, ka hənda ɗa ɓwaɓwatə nə təkəra ya na, dəhə ka ənga a da sənda yo ingə ko mər wa, kəl sənda i ka.”
40Ngə cha ɓəla shili dza shawa inda ngə cha həya nda nda kwa njihanyi, ngə cha nar nyi nə Bitrus, “Mi na! A da hya kwa nau ɓəla tsa'a naya mada nə saka zhang wa? 41Ngya ma na ɓəla ana pətlənya tsa sərmbukəu da pətə təhi. Shanguɗə kwa i, kəl ja, dzə təutə ti.”
42Ngə Yesu tə ɓəl mətləkunyi ga pətlənya nə Hyel, “Ada, ma cha ɗatə tuku kəl ya sa ɓwaɓwatə na, a dləukərtə ya sənda i ka cha ɗa naya.” 43Ngə cha ɓəl shili da shawa inda ga həya nda ku hanyi səkəu, aka hanyi wurta nyandə lya nda. 44Ngə Yesu tə ngya nda ga ɓəl ki pətlənya makərkunyi, tang wi inda tangərma inda. 45Ngə cha ɓəl shili da shawa inda ga nar nda, “Tsə'uta hi kwa njihanyi ana ɓəlsar ya? Ndzam ma! Bəji ɗatə ləhəu, nda nja kwa tləɗanda Zər Ndə nə njir mər səpəla'a. 46Hya'atə ma məna təra, janə ndər tləɗa ɗa kwa shili.”
Nja Səya Yesu
(Mar 14:43-50; Luk 22:47-53; Yoh 18:3-12)
47Tsəu Yesu kəla udiya ɓwanya, Yahuda zhang ku huɗa shawa daɗədaɗə kwabəmətlə inda tə shili na dlama nji ɗang ana katsakər ka zəwa. Gau fərist ka njirawawa'a nə Yahuda ngə tə sənda. 48Ngə ndər tləɗa nyi nda tə ɓatliya ga nar nda, “Ndə nda ya yi gaɓəti, na cha ngə ndə nə hyo gwa'a na, səya nya ma.”
49Yahuda tə shili, ngə cha yi tisanghə da Yesu ga na, “Usə ja Maləm,” ga gaɓətə nyi tətərpəu.
50Kəl ngə Yesu tə ɓəlakə nyi, “Bazhi, kusa mər sənda shili na ka.”
Təma ngə nji'inda shili ga səya Yesu ga gəzəya nyi ɓaɓaləu. 51Kəl zhang ku huɗa nji'inda kwa nəu Yesu inda tə tsəbiya katsakər ga gəga mava gau fərist nda, ga katsənda himya cha. 52Ngə Yesu tə nar nyi, “Ɓəlau katsakər ngha gwa ku ki nyi, dəhə ndə nda kwa pa na katsakər, katsakər kwa tsa nyi. 53A da hya zəndə ya, ya kwa nau gwa'a vala tsa Ada ɗa, ya təma cho sətə ɗa dzuku chama i'i ndiya matsa dzuku nə ləvaləva kwabəmətlə ma? 54Kəl ja, ma ya mər ənga, aman Likatəkatə nda tə na tang wi nə kwa ɗana nyabiyadza?”
55Kəl ngə Yesu tə nar nyi nə dlama nji'inda, “Ya ɗa ka ndər fa'a laku nə hya shili na kə'i katsakər ka zəwa ka sə ɗa ya? Ənya əzəkəu, yo dlədləɓa nə nji ku Mbwa'alə Hyel, ya a da hya sə ɗa wa. 56Dəhə sə'inə tə ɗa, aka ga cha nyabiya sənda njir mətakər tə tsəfətə ku Likatəkata.”
Kəl ngə dəhə shawa inda tə wiɗə zhang zhang na hwi.
Yesu Mar Njir Nəuma
(Mar 14:53-65; Luk 22:54-55, 63-71; Yoh 18:13-14, 19-24)
57Nji nda səya Yesu nda tə təra na cha yo ki Kayafa, gau fərist, hinda ka maləm gadlagadla ka njirawawa'a tə tsəmtədza. 58Bitrus kwa nəu nda tsatsal tsatsal yi tsa'a ku ki gau fərist nda, ga gwa ngya ka ləvaləva, ga cha la'a sənda kwa ɗa. 59Wawa'ar fərist ana dəhə njirawawa'a cham nə njir Yahuda, kwa gwa'a nji'inda kwa mbandzə nyi bikə nə Yesu ka nda tsəya nyi, 60madangə ɗang tanyi nji'inda tə pə ɓwanya gəzhi təkəra cha, a da nda uya təkəɗər ɓwanya nda tə nji ka njo tsəya nyi wa. Ahir nga, kəl nji mətlə tə hya'atə, 61ga na, “Ndə nə tə na, kwa nau cha huɓənda Mbwa'alə Hyel, kwa ɓəla hərti ku hanyi makərəu.”
62Kəl ngə gau fərist nda tə hya'ati ga nar nyi nə Yesu, “A səda ko ɓəlakər təkəra sə'inə nji'inə kwa na təkəra kə nə ma?” 63Kəl ja, Yesu tə da'atanyi ɗiyu. Ngə gau fərist nda ɓəla nar nyi, “Səmnda fəla na tləmər Hyel nda na pi, macha nakə ngə Kəristi Zər Hyel.”
64Ngə Yesu tə ɓəlakə nyi, “Wi ngə nakə nga. Yo nar hi dəhə hi, fwatə sakana a biyama hyo la'a Zər Ndə tə ngya tə chisəma Hyel ndə nda na gyalkur dəhəu, ana ənda cho səya ku ləmbəkəu kya huɗamələm.”
65Təkəra ənga gau fərist nda tə tətanda ləkutə dzə nyi, ga na, “Həyatə tə cha tə Hyel! Mi məno ɓəla gwa'a! Hima hya ngatə ti ənda cha həyatə Hyel! 66Mi sənda la'a hya?”
Ngə nda ɓəlakə nyi, “A mər tə cha bikə nda nji ka njo tsəya nyi.”
67Kəl ngə nda təfəu nyi tuli ku huɗəma cha, alenya nji tə dəgənyi na matəkum, alenya nji tsəu tə dəgəunyi chi, 68nda kwa na, “Takər nə ea ja, Kəristi! Wa nga dəgəya ngha!”
Bitrus tə Kəpal Zəndə Yesu
(Mar 14:66-72; Luk 22:56-62; Yoh 18:15-18, 25-27)
69Sakanda Bitrus tə ngya biya tə huɗəki, kəl ngə zhang ku pama kwatəra gau fərist nda tə shili ta'i təkəra cha ga na, “Nakə ma'a, nahi nda ka Yesu ndər Galili nga.”
70Kəl ngə cha kəpal manə nda dəhəu. Ndə cha, “A da yo zəndə səngə ko ɓwanya təkər ngə wa.” 71Kəl ngə cha hya'atə ga tərata nyi biya nya nyaki. Kəl ngə vanya kwatəra tə la'a nyi biyanda səkəu, ngə cha na nə nji'inda biyanda nda, “Ndə na, nanda nda ka Yesu ndər Nazarat nga.”
72Ngə Bitrus tə ɓəla kəpal səkəu, ga na, “Yo səmnda fəla, a da yo zəndə ndə ngə wa!”
73Ahir səkardzə kushiu, alenya nji'inda tə ta'i tangnda tə shili da Bitrus ga nar nyi, “Jiri, zhang kə ku pama njir nəu ndə na, aka ɓwanya nghə chuɗəbiya nghə ti!”
74Kəl ngə Bitrus tə ghəya kirpənda kərnyi cha kwa səmfəla cho na, “A da yo zəndə ndə ngə pa'a wa!”
Ɗəɗəu tanyi ngə vəgəm tə tiwi. 75Kəl ngə Bitrus tə ɗənghatə ɓwanya nda Yesu tə nar nyi nda, “Təvi tiwur vəgəm ənya, ko kəpal zəndə ɗa zhaka makərəu.” Ngə cha hya'ati ga təra biya, ga ki tiwi 'ual'ualəu.
Trenutno izabrano:
Matta 26: hbbNT
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© Wycliffe Bible Translators, Inc. and © The Nigeria Bible Translation Trust 2018
