Matta 19
19
Dlədləɓə təkəra Təkər Sal na Mala
(Mar 10:1-12)
1Nda Yesu tə wurandə pə sə'inga, ngə cha ngyar Galili ga təra yi tə hə'i Yahudiya nda biya tiya dəl Urdun. 2Dlama nji ɗang gagaɗə tə nəu nyi, ngə cha mbandə njir shiləka.
3Alenya njir Farisi tə shili da cha ka ga nda ngəya nyi ləbam, nda jau nyi, “Tsaubar kəmən dləukərtə ndə gədlənda mala nyi təkəra kala sə ya?”
4Ngə Yesu tə ɓəlakə nda, “A da hya kəratsəntə ku likatəkatə Hyel ma? Aku tangərma Hyel tə ɓatlə nda sal ana mala? 5Ngə Hyel tə na, ‘Aka ənga, ndə kwa ngyar ada nyi ana ama nyi, nda kwa daɓətə dzə na mala nyi, nji mətlə inda nda kwa ɗa zhang.’ 6Aka ənga a tsə'u da nda nji mətlə wa, dzə zhang nda. Aka sənda Hyel na kərnyi tə daɓəya, ngwa ndə da təkəbiya wa.”
7Kəl ngə njir Farisi inda tə jau nyi, “Ya mya gwa'atə Musa na ənda ma nda gədlənda mala nyi cha ɓəliya sar cha nənya?”
8Ngə Yesu tə wum ga nar nda, “Ɓaɓalkura kəra hi nga gwa'atə Musa dləukər hya gədlənda mala kəhi. Kəl ja, a da cha əngə tangərma wa. 9Yo nar hi ja, ma ndə tə gədlənda mala nyi, ya a da təkəra kasalikur wa, ga həbiya vanyi mala, kasalikur nda cho məra.”
10Ngə Shawa nyi inda nar nyi, “Ma cha əngə sənda ku pama sal na mala ja, bəliya ngwa ndə hə mala wa.”
11Ngə Yesu tə ɓəlakə nda, “A da dəhər nji ngə kwa nau dləukər chul ngəna dlədləɓə wa, kəl nda nji'inda Hyel tə hagwa nda chi. 12Aka alenya nji da nja yah, a kiɗa nda da wa, alenya nji tsəu, nji nga mərtə nda ənga, alenya nji tsəu tə ngyar hə mala ka gwa'a təlkur huɗamələm. Ma ndə nda kwa nau dləukər dlədləɓə ngə ja, ba cha məra.”
Yesu tə Səkə Nyi Papa'akur nə Ngulisha'a
(Mar 10:13-16; Luk 18:15-17)
13Ahir nga, alenya nji tə shili na ngulisha'a shiɗəɗə da Yesu ka cha fəkə nda chi, cha pətlə kənda nya, kəl ngə shawa nyi inda tə tsə nda. 14Ngə Yesu tə na, “Ngyar ma ngulisha'a shiɗəɗə nda shili da ya, ngwa hya da ka nda wa, aka təlkur huɗamələm nə nji wi ingə nga.”
15Ngə cha fəkə nda cha cha ga səkənda papa'akur, ngə cha təra.
Tlakala nda na Gəna
(Mar 10:17-31; Luk 18:18-30)
16Kəl jan vanya ndə tə shili da Yesu ga na. “Maləm, mi sə mənakə nda tuku kər ya məra ga ya uya pi nda ba'anawa?”
17Ngə Yesu tə ɓəlakə nyi, “Ka mi ko jau ɗa təkəra sə dura? Hyel ngə zhang tanyi ndə duru. Kəl ja, mangə ka jawa, macha ko i ka uya pi nda ba'anawa, ɓəlati gadlagadla inga.”
18Ngə cha jau, “Gadlagadla manə lya?”
Ngə Yesu tə na, “Ngwa ka da tsa ndə wa, ngwa ka da mər kasalikur wa, ngwa ka da həl wa, ngwa ka da tla gəzhi təkəra ndə wa, 19ka hətə nyi səli nə ka ada ngha ana ama ngha, tsa'a na ka nyida təwul ngha wi nda ko nyida kərngha.”
20Ngə zər nda ɓəlakə nyi, “A ɓəlatə təya gadlagadla ingə dəhəu. Kəl mi sənda tar ya?”
21Ngə Yesu tə nar nyi, “Macha kwa i ka ɗa jirwa#19:21 jirwa: Ndə nda tsa'atsa'a ku dəhə səu. ma'i ka ki ɗəlnda dəhə gəna nda tsa ka, ka təkənda kwaba kwaba nyi nə nji ɗaliɗali, ko uya zhar kya huɗamələm, ahir nga, ka shili nəu ɗa.”
22Nda tlakala nda ngatə ənga, ngə cha təra na huɗətla, aka ndər gəna cha gagaɗa.
23Ngə Yesu tə nar nyi nə shawa nyi, “Jiri yo nar hi, cho ɗa dza'u nə ndər gəna cha gwa ku təlkur huɗamələm. 24Yo tsakətə nar hi, kusə dləgwam tərabiya ku chira libəra, tsa ndər gəna kwa gwa ku təlkur Hyel.”
25Nda shawa nyi inda tə ngatə ənga, ngə nda mər məngəl, nda kwa na, “Ya macha əngə ya, wa kwa uya mbəɗa?”
26Ngə Yesu tə ndzamar nda ga na, “Anə ndəu, sənda pa'a kwa nau ɗa nga, kəl ja, anə Hyel dəhə sə kwa nau ɗa.”
27Ngə Bitrus tə nar nyi, “Jan ea ngyar tə dəhə sə ga nəu ngha. Mi zhar nda eo uya ja?”
28Ngə Yesu tə nar nda, “Jiri yo nar hi, aku taɗər dunəya ngo shili nga, bəji nda Zər Ndə kwa ngya ku dzəga təlkur nyi nda na səli, nahi nji'inda nəu ɗa tsəu, hyo ngya ku dzəga təlkur kwabəmətləu, hyo səm təlkur təkəra nyavi kwabəmətlə nə Isra'ila. 29Ana madawa tə ngyar ki nyi, ndara zamə nyi ndara kwamə nyi ndara ada nyi ndara ama nyi ndara ngulisha'a ndara fa nyi i, aka ya, cho uya zhar zhaka gharəu ana njo nənyi pi nda ba'anawa. 30Kəl ja, ɗang tanyi nji'inda tangərma, kwa ɗa ka nji batəbata, nji batəbatə tsəu kwa ɗa tangərma.
Trenutno izabrano:
Matta 19: hbbNT
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© Wycliffe Bible Translators, Inc. and © The Nigeria Bible Translation Trust 2018
