मत्याल 2
2
पोत ऊळवालोर येसुन ऊळलाह वास्तोर
1बेह्रोग़ एरोद राजाना कालमते, यहुदा पटटा बेत्लेहेम नाटेनगा येसु पुटिस मतोग़. ताना पया अद पटटा मोदुल सहर येरुसलेमते, बोर उकान ऊळिसि पुनवालोर वातोर. ओर पोळ्द पेसनेनाहि वेल्लाय जेक देसेमताहि येरुसलेमते वासि, पता कीयलाह बोटटोर. 2“यहुदिरा राजाल पुटटोग़ इनजोर तोहतनद उकातुन माट पोळ्द पेसना बाजे ऊळतोम, अहे ओन दंडुम अरयकोम इन्जि वातोम. ओग़ पुटटोग़ु बेगाडोग़?” इन्जि वेर उकान ऊळवालोर ताल्ह्कतोर. 3(दुस्रोग़ ओसो बोग़ राजाल पुटटोग़), इद कबुर केंजिसि एरोद राजाना जीवा डक इता, अद्रमे एरोद इंजेके बाताल कीयनोग़, इन्जि आलिह कीसि पूरा येरुसलेमतोर वने मिळ्ह्कतप आतोर. 4पया राजाल यहुदिराङ सबेटोर पेर्मालोरिन ओसो सास्त्रमगूरुरिन, उंदि जागाते जमा कीसि ओरिन ताल्ह्कतोग़, “मीवा सास्त्रम वेहतपु, देवुळ लोहवाल राजाना पुटमुळि, बेगा आस मनदग़ा?” इन्जि राजाल ताल्ह्कतोग़. 5-6अस्के ओर इतोर, “यहुदा पटटा बेत्लेहेम नाटे, महरज! बाराह्क इतेके देवुळता मुनेतोग़ कबुरतोग़, सास्त्रमते तेना लोप्पा इद्रम रासिस तासतोग़:
‘ए यहुदा पटटा बेत्लेहेम नाटेनोरिर, मीवाय नाटे नावा इस्रयेल लोकुरिन अय केवाल ओर्वोग़ सेह्नाल पुटनोग़ इन्जि #
तोहचीतव पोल्लोङ 7:16-17
मीवा नाग़ यहुदा पटटे उड्ला नाग़ इनमाटु,’ #
मीका 5:2; इब्रितोर 7:13-14 इन्जि देवुळ इन्ह्ता.”
7इद पोल्लो केंजिसि, एरोद राजाल उकान ऊळवालोरिन “इह वाट,” इन्जि तनगा कुस्क्ने केयतोग़, केयिसि “मीक बेद उका दिसता, तान मीट ऊळतस्केडाहि नेंड एवनाह बेचोक दियाङ आताङ, नाक बराबर वेहाटु,” इन्जि ओग़ु (पुट वाता पेकाना वय्स पुनदलाह) ओरिन बेस ताल्ह्कतोग़. 8ओर राजान वेहतापया, राजाल ओरिन बेत्लेहेमतके लोहतोग़, लोहनेके ओरिन नाळेह कीस इतोग़, “मीटु अगा अन्जि ओन पेकान बेस-नेह्ना पर्ह्काटु. मीक दोर्कतोग़ इतेके, नाक वासि ओना जाडा वेहाटु, अस्के नना वने अन्जि, ओन दंडुम अरयकन,” इतोग़.
9राजानाङ इव पोल्लोङ केंजिसि ओर उकान ऊळवालोरु बेत्लेहेम नाटे दायलाह पेसतोर. पया ऊळाटु, बेद उकातुन ओर पोळ्द पेसनके ऊळिस मतोर, अदे उका ओरा मुनेह-मुनेह पेससोर अंदु, पया पेकाल मता लोता पोग़ोन अन्जि रोमता. 10उका रोमतदिन ऊळिसि, ओरिह्क बेचोनो गिर्दा वाता! 11पया ओरु उका रोमतद लोतगा नेङतोर, अगा पेकानु, ओना तलोग़ मरियानु ऊळतोर, ऊळिसि पेकानाङ काल्क अर्सि, ओरु ओन दंडुम अरतोर. ओसो ओरु तमाङ सोमताङ पेटिनु तेंडिसि, बंगरि, वेल्ला दाराता दूपमि, अतर्नेयु, इद्रमताङ पेकाह्कु वाटटोर. 12पया वेन पेकान एरोद हव्कनोग़, इदिन देवुळ पुन्जि “एरोद राजानके मल्स अनमाटु,” इन्जि ओरिह्कु कलाते कबुर वेहता. अदिह्कु ओरु तमा देसेमतके दुस्रा अग़दुह्क पेसिस अतोर.
एरोद पेकोरिन हव्किह्तोग़
13उकान ऊळवालोर अतापया ऊळाटु, योसेपिन उंदि देवतुल कलाते कलियिसि वेहता, “पेकान हव्कलाहि, एरोद राजाल कोज पेह्कसोर मन्ह्तोग़. अदिह्के निमा तेदा, पेकानु, ओना तलिनु पोसि मिसर देसेमते विता. अहे अग्डाहि मल्स वाटु इन्जि, नना नीक वेहनाह्जोम, मीटु अगाने मन्ह्टु,” इन्जि वेहता. 14अदिह्क पया योसेपि सीता अरताहे पेकानु, ओना तलिन पोसि, नग़्काडा-नग़्काने मिसर देसेमते पेसिस विततोग़.#2:14 बेत्लेहेमताहि मिसर देसेम कमसेकम वारममेटा पय्नम आंदु. 15अहे ओरु बेह्रोग़ एरोद राजाल हानाह्जोम, अद देसेमतेन मतोर, पया मल्स वातोर. नना नावा मग़िनु मिसर देसेमतग्डाहि केयतन#होशे 11:1 इन्जि, वेल्लाङे वर्साना मुने देवुळबाबाल तना कबुरतोना संगे वेहचि. ओर मल्स वातस्के, अद कबुर करल आता.
16ओर मुवुर मिसर देसेमते अतापया, उकान ऊळवालोर नाक नाळेह कीतोर इनजोर ऊळिसि, एरोद राजाल पकाय ओङ आतोग़. ओङ आसि, उकान ऊळवालोरिन ताल्ह्कता वेलाता लेका कीसि, (वेग़ पुटटोग़ पेकाल रेंड वर्साह्क उड्लोग़ मनदनोग़ इन्जि, राजाल पुतोग़. इद्रम गंता कीसि, वेग़ पेकाल बेत्लेहेमतेन इंजेक मनदनोग़ इन्जि,) बेत्लेहेमते ओसो तानाङ एरेगूरेताङ नाह्कने, बोर रेंड वर्सानोर ओसो ओरिह्काय उड्लोर पेकोर मतोर, ओरगा सीपय्किन लोहचि, ओरिनु कतमे हव्कनाह कीतोग़.#तोहचीतव पोल्लोङ 12:4
17-18देवुळता कबुरतोग़ यिर्मयाल वेल्लाङ वर्साना मुने वेहतद मता, अद इह मन्ह्ता:
रामा इनदनद नाटे, दुकमते आस्कनाङ अळयनाङ, केयनाङ,
बेरा आल्का वेनदा वाता.
रागो तनाङ पिलाङ-पेकोर हातोर इन्जि अळयह्ता.
ओर हाताह्कु, अदु मेक्र्ने मनदा पग़वो आंदु. #
यिर्मयाह 31:15
बेत्लेहेमतोर पेकोरिन हव्कतस्के इद पोल्लो करल आता.#2:17-18 इस्रयेल देसेमतोर याकुबि इनवाना कुट्मळताहि पुट वातोर (पुटमुळ 32:28). याकुबना उड्ला मुते, अदे इद रागो, ओर येसु पुट वायनामुने रेंड अजर्क वर्साना कालमतोर मतोर. येसु पुटना आरुङ नूह्कु वर्साना मुने बेबिलोन देसेमतोर सीपय्क वासि, इस्रयेल देसेमतुन बूळे कीतोर. अस्के रागोना कूळतोर वेल्लाटोरिन तमा देसेमतके दोहच ओतोर. वेरिन दोहच ओयना अग़दे, रामा नाग़ मता. अद नाटे इद दुकमता पोल्लोतुन ऊळिसि, रागो तना गुमयातगा अळतप आस्ता, इद्रम यिर्मयाल कबुरतोग़ वेहन्दोग़. इंजेके येसुना कालमते बेत्लेहेमते मतोर रागोनाये जालपिलतुह्क इद दुकम अरता, अदिह्क यिर्मयाल रासतद पोल्लो ओसो उंद देबा करल आता.
मिसरताहि मलयना
19एरोद राजाल हातापया, मिसर देसेमते योसेपना लोतोर मनेके उंद देवतुल कलात कलियिसि ओन वेहता, 20“योसेपि, पेकान हव्कलाह ऊळिंदुर, ओर हातोर. निमा इंजेके तेदिसि पेकानु, ओसो ओना तलिन पोसि, इस्रयेल देसेमते मल्स अन,” इता. 21अदिह्क पया ओग़ तेदिसि, पेकानु ओसो पेकाना तलिनु पोसि, इस्रयेल देसेमते मल्स वातोग़. 22मति यहुदा पटटे अर्केलाल राजाल तना तपे बेरोग़ एरोदिना जागाते राजेम कीस्तोग़, तेन केंजिसि ओग़ अद पटटे दायलाह रेयतोग़. ओसो कलाते देवुळता कबुर दोर्कताह्कु, यहुदा पटटुन विळ्सिसि गालिल पटटे अतोग़. 23अगा एव्सि ओग़ु नासरेत इनदनद (मरियाना) नाटे अन्जि जागा आतोग़. “ओन नासरेततोग़ इनदनुर,” इद्रम देवुळता कबुरतोर, देवुळ लोहवाल राजाना लोप्पा मुने वेहच मतोर, अद इंजेके करल आता.
Trenutno izabrano:
मत्याल 2: माडियाबाय्बल
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 2021, Wycliffe Bible Translators, Inc. All rights reserved.
