Mateyo 13
13
Ichelusho chawakuminsa
(Mk. 4.1-9; Luk. 8.4-8)
1Mukasuba kenka nkalya, Yesu afumine munanda, ayile kwikala mumbali yaku bemba nokusambisha. 2Elo nebumba lyabantu ilikulu lyalilongene kuli Ye. Echo Yesu apateme mubwato nokwikala. Nomba abantu bonse bayikele pamulundu mumbali yaku bemba. 3Elo alibasambishe ifintu ifinji mufyelusho.
Asosele kuli bo ati, “Kwali umuntu uwayile mukuminsa imbuto. 4Ulo alikuminsa, imbuto shimbi shawile munshila, elo ifyuni fyalishile nokushilya. 5Shimbi shawile mulubwelekese, apatali umushili uwinji. Bwangu-bwangu shalimenene. 6Ulo akasuba kaninine, imisongo yalifotele nokuma pantu imishu tayayinjilepo panshi. 7Shimbi nasho shawile muminga, elo iminga yalikulile nokushitabilisha. 8Nomba shimbi shawile mumushili uuweme, nokutwala shalitwite ifilyo. Shimbi shatwite umwanda umo, shimbi amakumi asano nalimo, elo shimbi nasho amakumi atatu.”
9Pakupwisha Yesu asosele ati, “Umfweni, ukwete amatwi aakumfwa, omfwe!”
Umwalola ifyelusho
(Mk. 4.10-12; Luk. 8.9-10)
10Nomba abakusambila bayile kuli Yesu nokumufumba ati, “Mulandu ndo mukobebela mufyelusho?”
11Elo naye abasukile ati, “Kuli mwebo kwalipelwa ukwishiba ifyamubumfisolo ifyabufumu bwakumulu, nomba bo tabapelwapo iyowo. 12Pantu uyo uukwetepo tunini, akapokwa noto akwete. 13Echo abantu mba nkobebela mufyelusho, pakuti ukubona balabona, nomba tababweneshapo, ukumfwa balomfwa, nomba tabomfwishapo nangula ukwiluka. 14Kuli mba fikofikilishiwa ifyo umusoseshi Esaya asosele ati,
‘Ukumfwa mwakumfwa,
nomba tamwakelukepo.
Ukubona mwakubona,
nomba tamwakabweneshepo.#Esa. 6.9-10
15Pantu amano abantu mba anini,
namatwi abo alikoma,
namenso abo alishibata.
Nga chitaba mfi,
nga balabona namenso abo,
balomfwa namatwi abo,
nokwiluka mumano abo.
Elo nga baalukila kuli ne,
nande kuti nabaposha.’
16“Nomba mwebo mwalishuka pantu amenso enu alabona, namatwi enu alomfwa. 17Nachine nkomweba ati, abasoseshi nabantu baku Lesa abenji balikufwayisha ukubona ifyo mukobona, nomba tabafibwenepo iyowo. Elo balikufwayisha ukumfwa ifyo mukoumfwa nomba tabafyumfwilepo.
Umwalola ichelusho chawakuminsa
(Mk. 4.13-20; Luk. 8.11-15)
18“Nomba umfweni umwalola ichelusho chawakuminsa. 19Inshita abantu bomfwa amashiwi aasoswa pafyabufumu bwaku Lesa, Satana alesa nokufumyamo ifyo baumfwa mumitima yabo. Nshi embuto shaminshilwe mumbali yanshila. 20Nomba imbuto ishawile mulubwelekese, ebantu abomfwa amashiwi aku Lesa, bwangu-bwangu baumfwa nokusekelela. 21Nomba amashiwi nga tayenjilisha mumitima yabo, yekalamo bwaka inshita iinini, kuntu ulo kwayisa ubuchushi nomwalu, pamulandu wamashiwi aku Lesa, bwangu-bwangu baleka ukumfwa amashiwi nga. 22Bambi nabo baba kubati nimbuto ishawile muminga. Mba ebomfwa amashiwi aku Lesa, kuntu pamulandu wakufwayilisha ifintu fyamuchalo nobuchindami, elo mfi fintu filafininkisha amashiwi, epo tabatwalapo ifitwalo. 23Nomba bambi eko bali ababa nge mbuto ishawile mumushili uuweme. Mba ebomfwa amashiwi aku Lesa nokuapokelela mumitima yabo, elo batwala ifitwalo, bambi umwanda umo, bambi amakumi asano nalimo, bambi nabo amakumi atatu.”
Ichelusho chalunsekwe
24Nakambi Yesu abebele ichelusho nachimbi ati, “Ubufumu bwakumulu buli kubati muntu waminshile imbuto iiweme mwibala. 25Nomba inshita abantu bali mutulo, alishile umulwani wakwe nokuminsamo ulunsekwe muli tiligu nokuya kaya. 26Ulo fyamenene nokukula nokutwala inseke, elo ulunsekwe nalo lwabonekele. 27Elo ababomfi bamwibala bayishile nokumufumba ati, ‘Bashikulu, napo tamwaminshilepo tiligu mwibala lyenu? Mba nikwisa lwafuma ndu lunsekwe?’ 28Elo abasukile ati, ‘Umulwani wanji ewachita nchi!’ Elo abamilimo bamwebele ati, ‘Napo mukofwaya ukuti tuye tukalunukulemo?’ 29Elo naye abasukile ati, ‘Iyowo, pantu kuti mwanukawila kumo natiligu. 30Shilekeni shonse shikulile pamo ukufikila panshita yakulobolola. Elo nakweba abasefi ukuti batale banukule ulunsekwe nokulukaka imipo nokulocha, elo tiligu ena batutile mubutala bwanji.’”
Ichelusho chakaluseke kamasitadi
(Mk. 4.30-32; Luk. 13.18-19)
31Nakambi Yesu asosele ati, “Ubufumu bwakumulu buli kubati kaluseke kamasitadi, ako umuntu abyele mwibala lyakwe. 32Kaluseke kanini ukwinekantu pambuto shonse, kuntu kaalikulile ukuchila pafimpukesa fyonse nokuba ichiti ichikulu. Nefyuni fyalishile nokupikamo finsa mumisambo yachiko.”
Ichelusho chamimena
(Luk. 13.20-21)
33Nakambi Yesu abebele nachimbi ichelusho ati, “Ubufumu bwakumulu buli kubati mimena iyo umwanakashi ayabikile muli bansako batatu, nokufuba umufuba ukufikila onse watutumuka.”
Icho Yesu abomfeshe ifyelusho
(Mk. 4.33-34)
34Fyonse mfi Yesu abebele mufyelusho. Talikubasambishapo bwaka, sembi mufyelusho mwenka. 35Achitile mfi mukufikilisha ifyasosele umusoseshi ati,
“Nakusambishisha mufyelusho,
nakumulondolwela ifintu ifitayishibikwa ukufuma pakutatika kwachalo.”#Amal. 78.2
Yesu aalula ichelusho chalunsekwe
36Ulo Yesu ashile amabumba abantu ayinjile munanda. Elo abakusambila bakwe bayile kuli Ye nokuti, “Mutwalwileko ichelusho chalunsekwe lwamwibala.”
37Naye alibalwilile ati, “Uyo uwaminshile eye Umwana wa Muntu. 38Ibala ndilya echalo, imbuto nshilya ekwebati bantu bamubufumu bwaku Lesa. Ulunsekwe ebantu bamubi ngulya. 39Akapondo kaminshile ulunsekwe, eye Satana. Ukulobolola ninshita yakupwa kwachalo. Abasefi ebangelo. 40Fyenkefyo ulunsekwe bakulukaka imipo nokulocha mumulilo, efyo kwakuba kumupwilo wachalo. 41Umwana wa Muntu akutuma abangelo bakwe ukuti abafumye mubufumu bwakwe abantu babufi nabachita ububi bonse. 42Akubaposa muchimbili-mbili chamulilo. Nkulya kwakuba ukulila nokukwesanya ameno. 43Echo abantu baku Lesa bakusanika kubati kasuba mubufumu bwaku Lesa. Umfweni, ukwete amatwi aakumfwa, omfwe.
Ichelusho chabuboni ubwafiswa
44“Nakambi ubufumu bwakumulu buli kubati buboni bwafishilwe mwibala, ubo umuntu afisulwile nokubufisa pambi. Nomba mukusekelela kwakwe, ayile kushitisha fyonse ifyo akwete nokushita ndi bala.
Ichelusho cha mpande
45“Nakambi ubufumu bwakumulu buli kubati musambashi uwabukwebo uukofwaya-fwaya impande ishiweme. 46Ulo ashisangile ishiweme ukuchila ishakale, alile nokushitisha fyonse ifyo akwete nokuyishita.
Ichelusho chesumbu
47“Nakambi ubufumu bwakumulu buli kubati lisumbu ilyaposelwe pali bemba ukwikata inswi ishipusene-pusene. 48Ulo lyayiwile, balikulile pamulundu. Bayikele panshi nokusala inswi ishiweme nokushibika mumiseke, kuntu ishibi balishiposele. 49Emfyo chakuba kumupwilo wachalo. Abangelo bakwisa mukupatula ababi ukufuma kubalungamikwa, 50nokubaposa muchimbili-mbili chamulilo. Nkulya kwakuba ukulila nokukwesanya ameno.”
Ifyabuboni bwabwangu nobwakale
51Elo Yesu afumbile abakusambila bakwe ati, “Napo mwafyumfwa fyonse mfi?”
Nabo balyasukile bati, “Ina.”
52Naye elo abasoseshe ati, “Umusambishi uuli onse uwamafunde alisambilila amashiwi aabufumu bwakumulu, aba kubati umwine wananda uufumya muchipawo chakwe ifyabwangu nefyakale.”
Bakana Yesu ku Nasaleti
(Mk. 6.1-6; Luk. 4.16-30)
53Ulo Yesu ashilile ukusosa mfi, alifumineko. 54Ayile kuchalo chakumyabo#13.54 kuchalo chakumyabo: Boneni amashiwi abulondoloshi pa 9.1. uko asambishe abantu munanda yakulombelamo Lesa. Ulo ashilile ukusambisha, abantu abenji abaumfwileko balishimbilwe nokusosa ati, “Nga uyu mulangwe akwete wafuma kwisa? 55Napo ngu temwanapo wakwakapala wamapulanga? Teye mwana Maliya? Nawabo wakwa Yakobe, Yose, Yuda na Simoni? 56Napo bankashi shakwe nabo temba benka twikala nabo nkuno? Nomba ngu muntu afisanga kwisa fyonse mfi?” 57Echo balimusulile.
Elo Yesu abebele ati, “Umusoseshi balamuchinshika kumbi konse, kuntu kuchalo chakumyabo, namunanda yakwe emo bamusula.” 58Echo Yesu tapyungileko imilimo iinji iyafiso ifikulu nku, pantu abantu tabamuchetekelepo.
Trenutno izabrano:
Mateyo 13: LalaNT
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Chilala New Testament © Bible Society of Zambia, 1998.
