Mateyo 11
11
Intumi shafumine kuli Yohane Mubatishi
(Luk. 7.18-35)
1Ulo Yesu ashilile ukubeba ifyakuchita abakusambila bakwe ikumi na babili, alifumineko, ayile akosambisha nokubilisha mumishi.
2Nomba ulo Yohane ali muchifungo, alyumfwile imilimo yaku Klistu. Elo atumine bambi abakusambila bakwe kuli Yesu. 3Elo balimufumbile ati, “Napo niwe basosapo ati akwisa, nangula tuli nokulindila umbi?”#Mal. 4.5
4Elo Yesu ayasukile abatuminwe ati, “Bwelelenimo mukamushimikileko Yohane ifyo mwaumfwa nokubona: 5impofu shikobona, abalemana bakoyenda, abafyona bakopola, bankoma-matwi bakoumfwa, abafwa nabo bakobuka, nabachula bakoshimikilwa Ubutumi Bwawama. 6Balishuka abantu abatakayikapo pali nebo!”
7Ulo abakusambila bakwe balikuya, Yesu atatikile ukusosa kumabumba abantu ifyakwa Yohane ati, “Ulo mwayile kuli Yohane muchiswebebe, findo mwalikufwaya ukubona? Napo mwalikufwaya ukubona ifyo itete lisunkana kumwela? 8Nindo mwafwayile ukuya mukubona? Napo muntu uufwite ifyakufwala ifyelele? Iyowo, abantu bafwala ifyelele basangwa mumananda amfumu! 9Njebeniko, findo mwayile mukubona? Napo musoseshi? Ina, nachine mwalibwene umuntu umukulu ukuchila umusoseshi. 10Pakuti Yohane eye Amalembo asosapo ati, ‘Nakutuma intumi yanji, nakwituma pantanshi yobe, ukuti ikuwamishe inshila yobe.’#Mal. 3.1 11Nachine nkomweba ati, tapapo nangu umo umukulu uuchilile pali Yohane. Nomba uyo uuli umunini mubufumu bwaku Lesa, mukulu ukuchilapo pali ye. 12Ukutatikila kunshita shakwa Yohane Mubatishi nokufika nduno, abantu balalwisha ubufumu bwakumulu, elo balesha ukubupoka kufiso. 13Abasoseshi bonse na Mafunde akwa Mosesi asosele kabela pafyabufumu mbu ukufikila napanshita yakwa Yohane Mubatishi. 14Echo kati mukofwaya ukusumina amashiwi abo, Yohane e Eliya ngulya uwali nokwisa.#Mal. 4.5 15Umfweni, ukwete amatwi aakumfwa, omfwe!”
16Elo Yesu asosele ati, “Kanshi nikundo ningabalinganyako mba bantu bamuli njino nkulo? Bali ukubati bana abekele pachisanke abakoyitabana nabanabo ati, 17‘Twalimulishishe tumitolilo twapabwinga, nomba mwe namasha kayafishisha kumo! Twalimbile inyimbo shapachililo, nomba mwe nomusowa kawafishisha kumo!’ 18Ulo Yohane Mubatishi ayishile, alikwikanya ukulya nokunwa waini, nomba abantu baebele ati, ‘Ali nomupashi uubi!’ 19Elo Umwana wa Muntu ayishile, alikulya nokunwa. Abantu bonse baebele ati, ‘Boneni ngu muntu! Wakumutoba, nichakolwa nakambi nichibusa wabamisonko nembifi!’ Nomba umulangwe waku Lesa ulaboneka ukuba uwachine kumilimo yauko.”
Imishi yabula ichichetekelo
(Luk. 10.13-15)
20Nomba Yesu atatikile ukukalipila abantu bamumishi umo achitile imilimo iyafiso ifikulu iyinji pantu tabalapilepo iyowo. 21Echo asosele ati, “Yangwee, ubulanda kuli webo Kolasine! Yangwee, ubulanda nakuli we Betesaida! Nga chakwebati imilimo iyafiso ifikulu iyachitikilwe muli mwebo yachitikilwe muli Tule na Sidoni,#11.21 Tule na Sidoni: misumba yabenafyalo iyabela kumutule-suba kutali na Galili. Abantu bankulya tabakwetepo ishuko ilyakumfwako kumashiwi aku Yesu nokubonako imilimo yakwe kubati nimfilya chali kubena Kolasine na Betesaida. abantu bankulya kale-kale nga balifwite amasaka nokuyitila imitoyi ukulanga ukuti balapila kumabifyo abo. 22Nachine nkomweba ati, pali nkalya kasuba kabupingushi, umulandu wenu mwe wakubipisha ukuchila wabena Tule na Sidoni. 23Nawebo Kapenaumu, napo wakusumbulwa kufika nakumulu? Iyowo, wakwisa kuposwa mumulilo uutashimapo. Pantu ifyafiso ifikulu ifyachitikilwe muli webo nga fyachitikilwe mu Sodomu, nga epo uli ukufika nanduno.#Esa. 14.13-15; Ukut. 19.24-28 24Echo nkomweba ichine ati, pali nkalya kasuba kabupingushi, umulandu wenu mwe wakubipisha ukuchila wabena Sodomu.”
Yesu eupela ukutusha
(Luk. 10.21-22)
25Pali njilya nshita Yesu asosele ati, “Bata, mwe Kateka wamulu nechalo! Nkomutotela pantu mwalanga mfi ifintu kubatasambilila ifyo mwafishile kubamano nabasambilila. 26Ina, Bata nchi echo mwatemenwe ukuti chichitikwe mukufwaya kwenu.
27“Bata balimpela nebo ifintu fyonse. Takupo nangu umo uwayishiba Umwana, kano Bata benka. Nakambi takupo uwayishiba Bata, kano Umwana enka nabo Umwana asala ukubafisulwilako.
28“Iseni kuli nebo bonse mwe bakatele nokulemenwa, elo nande nakumupela ukutusha. 29Pinteni ikoli lyanji, elo musambilile kuli nebo, pantu ndiwayichefya nokufuka umutima, elo mwakusanga ukutusha mumitima yenu. 30Pakuti ikoli lyanji lyangukile, elo nechipe chanji chipubile.”
Trenutno izabrano:
Mateyo 11: LalaNT
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Chilala New Testament © Bible Society of Zambia, 1998.
