Matthieu 13

Kɨkɛna bíbwǎh binâ

(Marc 4.1-9; Luc 8.4-8)

1Ɨ́ dʉ́o laá, Yésʉs nzě mɔa ɨ́ mbɛ̌r waá, tó di sí lɨ́ ebʉ́m é mâŋ. 2Mentumo me bʉ̂r nzě swâl ɨ́ súm nyé á be yɨ́. Mpuo bʉr nyaá ntɔ̂ʼ sâ ó, nye mɔ́aa tɨ̂, tó di sí ɨ́ byɛ̂l. Entumo e bʉ̂r, lɨ́ɛ nzě lîʼ tín, mitîtyěl lɨ́ ebʉ́m é mâŋ. 3Nye nzě dwe bé milɛ́ʼlá ɨ́ nzɨ̌ bikɨkɛna ɨ́ buo buo. Nye ó: «Yé á be ó e nyʉ́ʉ́ mbêl mempeʼ á to le emyam mémpeʼ ɨ́ pemé yé nyá. 4Jɔʼ nyé á be, nye mû lɨ́ emyam mémpeʼ pemé e pemé yɨ́, wɨ̂ʼ páʼ mémpeʼ nzě kur nzɨ́ e nzɨ̌. Binʉ̌n ntɔ̂ʼ sulo, byê nzě tor mémpeʼ maá mɨ́mɛ̂h. 5Gúú pâʼ mémpeʼ kur ɨ́ sí mékóʼ, bwǎh mpâ l'abuo tɨ̂. Mempeʼ, mé ntɔ̂ʼ kpâhwǎ pâh, ebě, bwǎh yé á be tɨ̂ʼ yɨ́, yé á bé abuo. 6Sâ gwár, jɔʼ dʉ́o lé á kah yɨ́, dwéhé nzě ŋmɛ́ha, nzě dîʼ mípáhá mémpeʼ myaá. Myé ntɔ̂ʼ swâh, ebě, myé á bé abe e mikaalé mimpâ. 7Gúú pâʼ mémpeʼ ntémé nzě kur ɨ́ mindwínɨ́nɨ́. Mindwínɨ́nɨ́, myê nzě gwɨ́e, nzě kâʼ mípáhá mémpeʼ myaá, myê nzě líre. 8Damá jóʼo nó, gúú pâʼ mémpeʼ wɨ́ɛ, wé á si kur ɨ́ sí métyɛʼ. Mempeʼ maá nzě gúmo mpúmó. Lɨ́ʼ étín gúmo mpúmó nter. Lʉ́ʉ́ étín, mpumó mekám mésaman. Lʉ́ʉ́ ntémé, mpumó mekám mélɛ̂l.» 9Nye e bé ó: «Mʉr dí e megwǎl mé éjóʼo nyá, nye jóʼaa náǎ!»

Yésʉs jaá lwilwib e bʉr ɨ́ nzɨ̌ bikɨkɛna ɨ́ yé?

10Nó ómpʉ́n mé Yésʉs, bé á nze sîhlě súm nyé á be yɨ́, bê nzě díŋɔɔ e né ó: «Gǒ lwǐb e bé ɨ́ nzɨ̌ bikɨkɛna ɨ́ yé ɛ́?» 11Nye ntɔ̂ʼ yala e bé ó: «Bɨ̌n ó Nzyɛ̌m á gwîh bisá mésǒ bi Mpóʼo nyé. Nó bɨ́ɛ á bé agwíhɔɔ byê. 12Ebě, mʉr dí e sâ gwár nyá, óbáʼǎ dweŋɔɔ byúú. Nyé odi e byé ɨ́ buo buo. Nó waá dí tʉ̂toʼó, abe e sɔ̂ʼ nyá, ódɛ́ʼɔɔ̌ damá jóʼo mâ sâ gwár nyé dí e yé yɨ́. 13Mě lwilwib e bé ɨ́ nzɨ̌ bikɨkɛna ó, ebě, bé lɨ́ edwɛ̂ʼ e mîh mimběʼ, abee. Bé lɨ́ ejôʼlo, ajóʼo, agʉ́a ntémé. 14-15Nó lɔ́ɔ́ mé ngwíha milɔ̌b Ésayie, wé á dira yɨ́. Nye á boo lɛ́ɛ ó:

“Bɨ̌n bé ókʉ́ gwá jôʼlo.

Sâ gwár, bɨ̌n bé ákóʼó jóʼo.

Bɨ̌n bé ódwɛ̂ʼ.

Sâ gwár, bɨ̌n bé ákóʼó bee.

Ebě, bʉr bâ, bɨ́ lɨl míléme.

Bɨ́ dibe mégwǎl mɔ́ɔ́.

Bɨ́ dible míh mɔ́ɔ́, ó, mé ayɨ́ kǎ bee, megwǎl mɔ́ɔ́ akǎ jóʼo; ocwóó wɔ́ɔ́, akǎ gʉ́a.

Bé ntémé, bé adwirǎ nko mé dí yɨ́, ó me tíʼɨɨ bê.”»

16Yésʉs ntɔ̂ʼ lɛ́ɛ e bé ó: «Bɨ̌n bɨɛ, metyɛʼ me mpóm, mé e bɨ̌n, ebě, míh mɨ́n, mé lɨ́ ebee; megwǎl mɨ́n lɨ́ ejóʼo! 17Mě lɛ́ɛ́ bɨ́n lɨ́ otyeetye ó, ogwíha o mílɔ̌b ɨ́ buo buo le otîtyěl o bʉ̂r, bé á gwɨ̂gwɨm ó, bé béyɨɨ sá bɨ́n dí ebee yɨ́, sâ gwár, abee, le ejóʼǒ sá bɨ́n dí ejóʼo yɨ́, sâ gwár, ajóʼo yê.»

Pahlá kɨkɛna me mbêl mempeʼ

18Yésʉs ntɔ̂ʼ lɛ́ɛ ó: «Jóʼláá gá bé sá kɨkɛna dí elɛ́ɛ, dumo e mbel mempeʼ yɨ́. 19Jɔʼ mʉ̂r dí elɛ́ɔɔ̌ Mbɨambɨa Lɔ́ɔ́ dí edumo e Mpóʼo mé Dâ Nzyɛ̌m wɨ́, nye l'agbâ wé ɨ́ nkɔb yɨ́, mʉr waá nwɨɨla ó, le empah e nzɨ́, gúmó mémpeʼ mé á kukur yɨ́. Sátan ntɔ̂ʼ pyâl, nzě dɛ̂ʼ mpeʼ yé á kur ɨ́ lémé mʉ̂r waá yɨ́. 20Nyâʼ mʉ̂r nwɨɨla ó e sí mékóʼ, gúmó mpeʼ yé á kur yɨ́. Nyɨ́haá, nye lɨ́ ejóʼǒ Mbɨambɨa Lɔ́ɔ, ntɔ̂ʼ nʉa wé e bisʉhʉʉ. 21Sâ gwár, lɔ́ɔ waá, wé anî nyé ɨ́ léme tʉ́ŋlʉ̌. Nyě jaá baʼle wé ó njɨ ɨ́ mâ péh jɔʼ. Jɔ̌ʼ túú le tíblá mû sí pyâl ɨ́ lɔ̌b lɔ́ɔ waá yɨ́, nyé obɨm ébɔ̌ʼ ɨ́ léme, ntɔ̂ʼ gwâʼ. 22Nyʉ́ʉ́ ntémé nwɨɨla ó e mpeʼ yé á kur lɨ́ mindwínɨ́nɨ́ yɨ́. Nye á si kʉ jóʼo Mbɨambɨa Lɔ́ɔ. Sâ gwár, mitúú mí sí le gwɨ́má ókúm le ogbaa, byé á si dímle nye ɨ́ nzɨ̌ mikóo myɔ́ɔ́, ntɔ̂ʼ kâʼ Mbɨambɨa Lɔ́ɔ, wé l'akǎ tô dóló. 23Nyʉ́ʉ́ mʉ̂r ntémé nwɨɨla ó e mpeʼ yé á kur ɨ́ mpǎŋ sí métyɛʼ yɨ́. Nyɨ́haá, nyɨ́ jóʼǒ Mbɨambɨa Lɔ́ɔ, le egwá nʉa wê. Sá tɨ̂ʼ ó wé á gúmo mpumó ɨ́ twiʼ yé yɨ́. Lɨ̂ʼ étín, lé á si gúmo mpumó nter. Lʉ́ʉ́, mpumó mekám mésaman. Lʉ́ʉ́ ntémé, mekám mélɛ̂l.»

Kɨkɛnǎ bébebébe ká

24Yésʉs ntɔ̂ʼ báʼǎ lɛ́ɛ bé kɨkɛna swîh. Nye ó: «Mpóʼo mé Dâ Nzyɛ̌m nwɨɨla ó e mʉr á be mbɨambɨa mpeʼ ɨ́ pemé yé nyá. 25Ɨ́ gúú pum, bʉr bɨ́bɛ̂h ɨ́ bijô ɨ́ súgúgú, nyʉ́ʉ́ ntɨ̂m e mbɨn wé nzě pyâl ɨ́ pemé yaá, nzě be bíbébebébe bíká gúmó mímbɨambɨa mémpeʼ mé á beŋɔɔ yɨ́, ntɔ̂ʼ laa. 26Jɔ̌ʼ mbɨambɨa mpeʼ, yé á pâh, gúmo mpúmó yɨ́, bibébebébe bíká nzě pâh ntémé. 27Nó ó ósyɛ̂l o mésâ ó mʉ̂r pemé, bé á nze to dî e né ó: “Dâ, go á bé así bě mbɨambɨa mpeʼ ɨ́ pemé yô? Á bébebébe ká yɨ́ɛ, yê ka duho wó?” 28Nye nzě yala e bé ó: “Ntɨ̂m e mbɨn wǎm ó b'á sâ mpʉ́nʉ̌.” Nó ó ósyɛ̂l o mésá bé, bé á dî e né ó: “Nzê gʉ́ kam ó, bɨ̌h tô tɨ̂ yê, mâʼ yé gúmo gwár ɛ̌?” 29Nye ó: “Heʼé, yé e nkul epyâl ó, bɨ́n sí tɨ̂ bébebébe ká nó, yé e nkul etɨ̂l le mpeʼ mpâ. 30Bírɨ́ɨ́ gâ, byé gwɨ́aa sɔ́má, tó pyâl ɨ́ jɔ̌ʼ swɨɨ ékpɛm, jɔʼ bé ngá kpɛm méde yɨ́. Jɔʼ yaá ó mé ólɛ́ɛ ókpɛma ó, lɨ́ esôʼ, bé táaraa emɛɛ bébebébe ká yaá, kâʼ yé mimbom, díʼɔɔ yê. Píe tɨ̂, bé okpɛm méde mempâ, kaale mé ɨ́ nkuna nyǎm.”»

Kɨkɛna mâ díh é nzɔ́m

(Marc 4.30-32; Luc 13.18-19)

31Nye báʼǎ nzě sâ bé yʉ́ʉ́ kɨkɛna. Nye e né ó: «Mpóʼo mé Dâ Nzyɛ̌m nwɨɨla ó e díh é nzɔ́m nyʉ́ʉ́ mʉ̂r á nʉa, myam ɨ́ pemé yé lɨ́. 32Lé á be ɨ́ buú twâʼwo ɨ́ sɔ́má mpúmó nyɨnyɛ̂h. Sâ gwár, ɨ́ jɔʼ lé á ka pâh yɨ́, lɨ́ bánǎ sâ mpěʼ nɨ́nɨ́ɨ́, lɨ́ elaa mémpeʼ mɨ́mɛ̂h ɨ́ mpwaʼ, nzě sâ lɨ́ ɨ́ ntuuu. Binʉ̌n, byê nzě lʉ́o mɔ̂ʼ mɔ́ɔ́ ɨ́ milɔ́ɔ́ mí lɨ́ yaá.»

Kɨkɛnǎ levure

(Luc 13.20-21)

33Nye ntɔ̂ʼ báʼǎ sâ bé kɨkɛna swîh: «Mpóʼo mé Dâ Nzyɛ̌m nwɨɨla ó e levure nyʉ́ʉ́ mʉ́má á sol tʉ́ŋlʉ̌ okílo ó pǔ blêr mekám mébá le otɛ̂n yɨ́. Yê nzě nkaŋle, tó kumo ɨ́ jɔ̌ʼ tímé blêr, wé á nkaŋle wɨ́wɛ̂h yɨ́.»

Yésʉs lɨ́ elɛ̂ʼle bʉ̂r ɨ́ nzɨ̌ bikɨkɛna

34Yésʉs á dwidwe mentumo me bʉ̂r milɛ́ʼlá mímyɛ̂h ó, ɨ́ nzɨ̌ bikɨkɛna. Nye á bé alwib e bé ɨ́ nzɨ̌ swîh. 35Nye á sâ nó ó, milɛ́á mé nyʉ́ʉ́ ngwíha milɔ̌b, myé nkʉ̂ dira. Yê cɛmá ɨ́ Mekaná mé Nzyɛ̌m ó:

«Me ólwib e bé ó ɨ́ nzɨ̌ bikɨkɛna.

Me ólɛ́ɛ bé milɔ̌b mi dí misolá mí, táare ɨ́ jɔ̌ʼ kʉ́ e sí, byé á be apǎ bě kuhá yɨ́.»

Pahlá kɨkɛna mé bébebébe ká

36Yésʉs nzě líʼe éntumo e bʉ̂r, nî mbɛ̌r. Ompʉ́n bé nzě sîhlě súm nyé á be yɨ́. Bé e né ó: «Páʼláá bɨ́h kɨkɛna mé bébebébe ká ɨ́ pemé.»

37Yésʉs nzě yala e bé ó: «Mʉr dí ebě mpeʼ mpâ nyá, nye ó Mwân mé Mʉr. 38Pemé yé, yé ó sí yɨ̂. Mpǎŋ mpeʼ, yé lɛ́ʼlé ó, nkɔb bʉr o dí ɨ́ Mpóʼo mé Dâ Nzyɛ̌m bá. Bébebébe ká, yé ó bʉr o dí ɨ́ nkɔb mé Sátan bá. 39Ntɨ̂m e mbɨn wé á nze be bébebébe ká nyá, nye ó sɔ́ŋ meleme. Swɨɨ ékpɛm, wé lɛ́ʼlé ó, esúʼlá é sí yɨ̂. Okpɛma, bé ó beéngeles mé Nzyɛ̌m. 40Mpʉ bé dí epɛ̌ʼ bébebébe ká, dîʼ yé lɨ́ ebéʼé yɨ́, nó ntémé ó bé ngá sâ bʉ̂r lɨ́ esúʼlá é sí yɨ̂ʼ yɨ́. 41Mwân mé Mʉr ólómo bééngeles bé, ó bé ntáa nzě pɛʼ ɨ́ Mpóʼo nyé mebɔ̌ʼ mɨ́mɛ̂h mé óbɨma bʉ̂r ɨ́ miléme ó, bé sâʼ misyóm má. Bé ódwih ntémé osyɛ̂l o mísyóm bɨ́bɛ̂h. 42Nyé oguho bé ɨ́ duró lé ólûl, gúmó bé ójóno le epûʼlo médye yɨ́. 43Nó bʉ̂r o dí tîtyěl ɨ́ míh mé Nzyɛ̌m bá, ngá pǎn mpʉ dʉ́o ɨ́ Mpóʼo mé Sɔ́ŋ wɔ́ɔ́ yɨ́. Mʉr dí e megwǎl mé éjóʼo nyá, nye jóʼaa náǎ!»

Kɨkɛna ésǒ ɨ́ pemé

44«Mpóʼo mé Dâ Nzyɛ̌m nwɨɨla ó e sá dí ɨ́ buo ódimé, yaá nyʉ́ʉ́ mʉ̂r á sol ɨ́ pemé yɨ́. Nó nyʉ́ʉ́ mʉ̂r swîh á to pû, ntɔ̂ʼ kúlwa lɨ́ esǒ lé laá, nye ntɔ̂ʼ báʼǎ búblo yé tɨ̂. Nye nzě buú soho, ntɔ̂ʼ tó bɛ́ma mébi mé mɨ́mɛ̂h, búla, nzě bwâm pemé yaá e mɔnɨ́ yé.»

Kɨkɛna pérel dí ɨ́ buo ódimé nyá

45«Mpóʼo mé Dâ Nzyɛ̌m nwɨɨla ntémé ó e mʉr dí esáa ébwâm ópérel ó dí ɨ́ buo ódimé bá. 46Jɔʼ nyé á to bee pérel ngwár á be ɨ́ buú buo ódimé nyá yɨ́, nye ntɔ̂ʼ tó bɛ́ma mébi mé mɨ́mɛ̂h, ntɔ̂ʼ búla, nzě bwâm mbɨambɨa pérel waá.»

Kɨkɛna óntâm

47«Mpóʼo mé Dâ Nzyɛ̌m báʼǎ nwɨɨla ó, le ontám bé dí eguho ɨ́ mâŋ lɨ́ esú lé émɛ̂r mímbi mí ósû mímyɛ̂h wɨ́. 48Jɔʼ wé á be, wé mû sí lóno yɨ́, ojʉ̂l bé ósû ntɔ̂ʼ dulo wé tín, diŋɔɔ sí, pɛ́hɔɔ ósû, kaalɔɔ mímpǎŋ mí ósû ɨ́ mekwám, myahɔɔ baá o dí abe e nyɔm bá. 49Mpʉ yaá ntémé ó ngá sáŋɔɔ lɨ́ esúʼlá é sí yɨ̂ʼ yɨ́. Beéngeles, bé ónzě gbâ mbɔ́ʼ páʼ bíbɨ́bla bi bʉ̂r le otîtyěl o bʉ̂r. 50Bé oguho bíbɨ́bla bi bʉ̂r ɨ́ duró lé ólûl. Gʉ̂ʼ ó bé ngá jóno le epûʼlo médye yɨ́.»

Bisâ bi dí lɨ́ ekʉ̌m bí

51Yésʉs nzě dî e bé ó: «Nzê bɨ̌n bé lɨ́ egwá jóʼo bíkɨkɛna bîʼ bíbyɛ̂h ɛ̌?» Bê nzě sʉ nkâm. 52Nye nzě lɛ́ɛ e bé ó: «Lɛ̂ʼla metié nyɨnyɛ̂h mû mpʉ́n ɨ́ Mpóʼo mé Dâ Nzyɛ̌m nyá, nyě nwɨɨlá ó e mʉr mbɛ̌r dí etʉ̂to lɨ́ ekʉ̌m lé, nʉnʉa bísá byé tɨ̂. Yɨ̂ʼ jɔʼ, nyě nʉá ó bisá bídwân. Yʉ́ʉ́ jɔʼ, nʉa byaá bi myâ.»

Bʉr ó Nazarɛ̂t, bé adyɛ̂ʼwo e Yésʉs

53Jɔ̌ʼ Yésʉs á sil elwib e bé ɨ́ nzɨ̌ bikɨkɛna byaá yɨ́, nye ntɔ̂ʼ laa tɨ̂. 54Nye nzě tô gúmó nyé á bwaʼ yɨ́, nye ntɔ̂ʼ lɛ̂ʼle bʉ̂r ɨ́ mempáh bísulá mɔ́ɔ́, ɨ́ mbi dí ó, bʉr bɨ́bɛ̂h, bé á be ɨ́ buú kâm wɨ́. Bê nzě díila ó: «Nyě duhó e wɨ̂ʼ ócwóó le mâʼ ménkul wó? 55Ntʉ mwân mé kábína nyâʼ ǎ? Ntʉ̌ Maria dí nyɔ̌ŋ ɨ́? Jacques, Yóseb, Simon, bé e Yʉ̂d, bé abe bɨ́ɔɔ́ bé? 56Ntʉ mɨ́ná gá le okɛ́l bɨ́bɛ̂h dí etiʼe wâʼ báʼ ɛ̌? Á nyɨɛ bá duho e wɨ̂ʼ ócwóó le nyɨ̂ʼ nkûl wó?» 57Bê nzě bɨm ébɔ̌ʼ ɨ́ miléme, ntɔ̂ʼ benɔɔ nyê. Jɔʼ yaá ó Yésʉs á nze lɛ́ɛ e bé ó: «Bé jaá bene édwáawo ngwíha milɔ̌b mé Nzyɛ̌m ó, njɨ ɨ́ sí yé le ɨ́ mbɛ̌r bʉ̂r wé tʉ́ŋlʉ̌.» 58Nó Yésʉs á bé abuú sâ mésimá tɨ̂, ebě, bé á bé adyɛ̂ʼwo e nye.

Trenutno izabrano:

Matthieu 13: ozm

Istaknuto

Podijeli

Kopiraj