ປັຣນາຍ ປາລີ່ ພາຍາ 12
12
1ກວາຍ ອາແລ່ະ ກາ ມັ່ກ ເນົ່າ ຕຽຮ ແຕີ່ອ໌ ອັນ ຕະ ໂລ່ຍຮ, ອັນ ລາ ກວາຍ ດັງ;
ມາ ກວາຍ ອາແລ່ະ ຕາ ມັ່ກ ເນົ່າ ຕຽຮ, ລາ ກວາຍ ຊາກູລ.
2ເຢືາງ ເຈົາຣາຊີ ຊັອງ ຣໍ່ອ໌ ຣາງຶ່ຮ ໂຈະ ກວາຍ ອໍ;
ມາ ອັນ ອີ ຕະ ໂຕ່ດ ກວາຍ ກາ ອາລັ່ອຮ ເງ່ ຕາ ອໍ.
3ກວາຍ ແຣັ່ງ ຕາ ເຕ່ອ໌ ແອີດ ກຼີດ ກຼອດ ຈອດ ອໍ;
ມາ ກວາຍ ຕານັ່ອງ ອໍ ຕາຢຶ່ງ ຄຳ ລາລື່.
4ລາກວຍ ກາ ເບີນ ຣາງຶ່ຮ ຣາແຮີ ອໍ ປາຊະ ປາເຢືາງ ກາຢາອ໌ ອັນ;
ມາ ລາກວຍ ກາ ເມືາງ ປໍ ຣາຕັອງ ກຣັອງ ປໍ ຕາແປັຮ, ລາ ນ່ະ ເບິ ອຶນໂຊະ ປຣີ່ໆ ຕຶ່ງ ອຶງຮາງ ກາຢາອ໌ ອັນ.
5ມັຮ ເງ່ ກວາຍ ຕານັ່ອງ ອໍ, ເຕ່ອ໌ ເນົ່າ ຊາອຳ;
ມາ ມັຮ ເງ່ ກວາຍ ແຣັ່ງ ມັ່ກ ອີ ອາໂລກ ຊັອງ.
6ມັຮ ປັຣນາຍ ກວາຍ ແຣັ່ງ ຕະ ໂອນ ເນົ່າ ປິິ່ດ ຣາແປີບ ແຢີບ ຣາເວືາຍ;
ມາ ມັຮ ປັຣນາຍ ກວາຍ ຕານັ່ອງ ອໍ ເຕ່ອ໌ ຣາຈ່ອຍ ກວາຍ ໂອນ ແວັດ ແຕ ເນົ່າ ອີ ຕະ ໄລ່.
7ກວາຍ ແຣັ່ງ ແກີດ ຣາລຸຮ ກະ ຈຸ່ມເຈືອ ອັນ ແກີດ ແດັດ ປິ່ດ ຊາລີຣ;
ມາ ຈຸ່ມເຈືອ ກວາຍ ຕານັ່ອງ ອໍ ດັຮ ປາງ ກອນ ຮອນ ປາງ ອາເຈົາ.
8ເກືາ ກວາຍ ຣາໄງ່ອ໌ ຣາລັ່ງ ຣັ່ບ ລາ ດັອຮ ບຸມບວລ ຮູລ ຢຸນຢົ່ງ;
ມາ ເກືາ ກວາຍ ຣາງຶ່ຮ ໂກ່ະ ຣັ່ບ ລາ ເນົ່າ ກາຈັງ ເຈືາດ ພູມາດ ເຣືາງ.
9ຄາອ໌ ແກີດ ກວາຍ ເມືາດ ກາ ຕະ ນ່ະ ຊູລ ຈາ ນ່ະ ອາຍາ,
ແຕ ຕະ ນ່ະ ອາຍາ ມາ ຈາ ນ່ະ ຊູລ.
10ກວາຍ ຕານັ່ອງ ອໍ ບັນ ກຍາອ໌ ອໍ ຊັນຕຣັ່ນ ອັນ;
ມາ ກວາຍ ແຣັ່ງ ປາຊັງ ຕັຮ ມັຮ ຊັນຕຣັ່ນ ອັນ.
11ກວາຍ ກາ ແທຣິງ ຕະ ເນືາ ໄທຣ, ກວາຍ ກັອຍ ເບີນ ໂດຍ ຕາ ຣາລໍ່ ທຣໍ ຕາ ຣາລິ່ຮ;
ມາ ກວາຍ ດຸ ເປາະ ກູເກືາງ, ອັນ ຕະ ດຸງ ຕາ ຕຸ່ກ ກາໄຣ ຕະ ໄທຣ ຕາ ຕຸ່ກ ກູປຼູອ໌, ໂລ່ ເມືາດ ກາໄຊ ກູມໍ.
12ມັຮ ກວາຍ ໂກ່ະ ໄລ່ ຈໍ່ອ໌ ເລືອຍໆ ເງ່ ມານະ ໂລ່ບ ມານະ;
ມາ ມັຮ ກວາຍ ຕານັ່ອງ ອໍ ກູດຸ ຕະ ກາດະ ຈາ ຕຶ່ງ ຣານາ ປຍາຍ໌.#12:12 ຣານາ 12 ໄນ່ ຕາ ເບີນ ແຈງ ຕຶ່ງ ປັຣນາຍ ເຮັບເຣີ.
13ກວາຍ ແຣັ່ງ ຕານ ຊາງ ກູວາງ ໂຈະ ຈະ ເບີມ ຍ່ອນ ແຕ ປັຣນາຍ ອັນ ອາໂລກ;
ມາ ກວາຍ ຕານັ່ອງ ອໍ ຕາ ເບີນ ປິ່ດ ຣາແປີບ ແຢີບ ຣາເວືາຍ.
14ກວາຍ ແຄວ໌ ຕະ ອຶນຕີ, ອຶນເຕົ່າ ອັນ ອີ ເບີນ, ລາ ເບີນ;
ມູເຈິງ ກັອຍ ເຕ່, ກວາຍ ລື່ ເບີນ ເກືາ ແຕ ຣານະ ອໍ ອັນ ຕະ.
15ກວາຍ ຊາກູລ ຄຶ່ດ ປາຍ ມັຮ ຣານະ ອັນ ຕະ ລາ ປຍາຍ໌ ເຈີ່;
ມາ ກວາຍ ຣາໄງ່ອ໌ ຣາລັ່ງ, ອັນ ຊາງັດ ປັຣນາຍ ເນົ່າ ປາຕັບ ປານໍ ປາຕໍ ປາກິ່ຣ.
16ກວາຍ ຊາກູລ ຕີອ໌ ຣາງິ່ລ ຈິ່ລ ກູແຕອ໌;
ມາ ກວາຍ ຣາໄງ່ອ໌ ຣາລັ່ງ ຣາລິງ ຕາ ເບີນ ໂຕຍ໌ ຣາໂລຍ໌ ຕາ ເບີນ ອີດ ມັຮ ປັຣນາຍ ກວາຍ ການໍ່ອ໌ ພູມາດ ອັນ.
17ກວາຍ ຕານັ່ອງ ອາຕີ ລື່ ແຕ ຣານະ ກາ ອັນ ເຮີມ;
ມາ ພາເຍືານ ມາລ່ຳ ມາລ່ອຍ ຊາງັດ ແຈມ ຊວລ ຕຶ່ງ ອາລ່ອງ ຢອງ ຊວລ ຕຶ່ງ ຕາຣົ່ງ.
18ກວາຍ ກາ ປາຍ ອາລັ່ອຮ ມາ ຕາ ເບີນ ຄຶ່ດ ອຶນໂຍ່ງ, ລາ ນ່ະ ອັນ ໄປ່ອ໌ ກວາຍ ການໍ່ອ໌ ແຕ ດາວ;
ມາ ປັຣນາຍ ກວາຍ ຣາໄງ່ອ໌ ຣາລັ່ງ ເຕ່ອ໌ ປົວ ໂອນ ແກີດ ບັນ ລັ່ຮ.
19ປັຣນາຍ ອາຕີ ປຍາຍ໌, ແອີດ ດູ່ນ ກູມໍ ກຣໍ ກາໄຊ;
ມາ ປັຣນາຍ ອາຕີ ອາໂລກ, ແກີດ ແດັດ ປິ່ດ ຊາລີຣ.
20ກວາຍ ມັ່ກ ອາລັ່ອຮ ເງ່ ຕາ ອໍ ອາປັຮ ອັນ ເບີນ ຣາງຶ່ຮ ອາໂລກ;
ມາ ກວາຍ ອາລັ່ອຮ ເງ່ ອໍ, ແອີດ ຣໍ່ອ໌ ບູຍ ລາແຮີຍ ລາແຕິ່ຮ.
21ກວາຍ ຕານັ່ອງ ອໍ ຕາ ເບີນ ຣາມົຮ ເກຣ່າະ ກຣຍາດ ອຶນເຕົ່າ;
ມາ ກວາຍ ຕາ ອໍ ເບີນ ຕຸ່ຮ ຕັລ ຕາກັລ ຕາບີງ.
22ເຢືາງ ເຈົາຣາຊີ ອຶງຄື່ນ ກວາຍ ຕະ ອຶນຕີ ອາໂລກ;
ມາ ອັນ ຊັອງ ຣໍ່ອ໌ ໂຈະ ກວາຍ ກາ ຕະ ນ່ະ ປັຣນາຍ ກາ ໄລ່ ປາຍ.
23ກວາຍ ຣາໄງ່ອ໌ ຣາລັ່ງ ຕາ ເບີນ ອາປັຮ ປາຍ ອັນ ດັງ ຊາອຶ່ຍ;
ມາ ກວາຍ ຊາກູລ ດຸ ປາຍ ປັຣນາຍ ກາ ຕະ ໂອນ ເນົ່າ ດັງ ອັນ ເຈຍ ປຼຸງ.
24ກວາຍ ແທຣິງ ເຕ່ອ໌ ແກີດ ຊົດ ກວາຍ ການໍ່ອ໌;
ມາ ກວາຍ ປາງາຍ, ອັນ ແກີດ ຊູລ ເນົ່າ.
25ກວາຍ ກາ ບິ ຕາ ລາເງ່ດ ກາແຍດ ຕາ ກຼຽມ, ນ່ະ ອັນ ໂດລ ເກຣີ່ງ ອຶນຕັອງ;
ມາ ປັຣນາຍ ລາເມ່ນ ອໍ ຕະ ໂອນ ກວາຍ ແກີດ ຣໍ່ອ໌ ຣາງຶ່ຮ ຊັນຕຣຸ່ຮ ລ່ອມ.
26ກວາຍ ຕານັ່ອງ ອໍ ເດີງ ເຢົ່າ ເປາະ ປໍ ຣານາ ປຍາຍ໌;
ມາ ກວາຍ ຕາ ອໍ ຕະ ໂອນ ຈະ ອັນ ເບີມ ແກຼິ ຣານາ.
27ກວາຍ ປາງາຍ ອາລັ່ຮ ອີ ຕະ ຈາ ເລີຍ ໄຊອ໌ ກາ ອັນ ອຶມປັນ,#12:27 ປັຣນາຍ ເຮັບເຣີ ຕຶ່ງ ຣານາ 27 ໄນ່ ຕາ ເບີນ ແຈງ. ເບີນ ເນົ່າ ອາຕີ ປາຍ: ‘ກວາຍ ອາລັ່ຮ ຕາ ດັງ ເບີນ ຊັນຕຣັ່ນ ອັນ ປວາຍ.’
ມາ ກວາຍ ແທຣິງ ເບີນ ຕຽນ ວັ່ນ ຊາປັ່ນ ປຣະ.
28ກວາຍ ຕາປູ່ນ ເງ່ ຕານັ່ອງ ອໍ ແກີດ ກົງ ອາມົ່ງ ດູ່ນ;
ມາ ກວາຍ ຕາປູ່ນ ເງ່ ຕາ ອໍ ແກີດ ກູຈີດ ປິ່ດ ແດັດ ດຽລ.
Trenutno izabrano:
ປັຣນາຍ ປາລີ່ ພາຍາ 12: ກາຕາງ
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 2023 (Active) Wycliffe Bible Translators, Inc. All rights reserved.