Mat 10
10
Yesu akpɛ banɔkpɛkpɛ liɔfɔ ni tiaʋa ba
1Yesu axwa yɛ badɔkpasi liɔfɔ ni tiaʋa ba akpɛ likpɔ lɛ aki ba kigagla si tɔ biakɔ kpikpini ifuɛfuɛ zimizi ne kudo no ani tɔ biakɔ yɔni ɔnyanya kakaa elu. 2Banɔkpɛkpɛ liɔfɔ ni tiaʋa ba gi axwa ɛ, ba enyi na enu: Simon gi yɛ ke bizɛɛxwa si Petro e, ni yeneminyime Andrea; Yakobo ni yeneminyime Yohanes gi benu Zebedeo yɛ bebi ba ɛ; 3Filipo ni Bartolomeo; Toma ni Mateo gi onu ɔbɔgyɔ ɛ; Yakobo gi onu Alfeo Yebi ni Tadeo; 4Lɛ bagɔgɔ ba benu Simon, gi ádɔ ní Kanaa ɛ, ani Yuda Iskariot gi yɛ akpɛ Yesu awla ɛ.
Yesu asi yɛ banɔkpɛkpɛ liɔfɔ ni tiaʋa ba kidiliɛ gi biabitɛ ɛ
5Lɛ Yesu akpɛ banɔkpɛkpɛ liɔfɔ ni tiaʋa ba a, lɛ asi ba si, “Mlakítrɛ ní banama gi bénu Yudanɛ ma klɔ ɔ, lo Samaria ɔma ɔtɔtɔ mɛ ɛ. 6Boŋu i, mlatrɛ ní Israel bebi ba gi balɛ ŋwisi iʋesi gi ilila kinɛ ɛ klɔ. 7Lɛ xegi mlɛtrɛ ɛ, mlapani liboe lɛ ya si, ‘Aya Kaʋaŋaa keti i pɔnɔ!’ 8Mlayɔ ni banyanya ba, tɔ mlenyime bekpo ʋa, mleplo kunya kyikyĩ yɔ banyanya ba su atɔ mlakpikpini ifuɛfuɛ zimizi ne kudo no. Aya aki mlɔ fãa, mlɔ kyɛ mlakɔ fãa 9Mlakíkpɛ kibɔɛ tɔ́tɔ isu ya a; 10mlekívu igudo, iiki kude gaga loo liwu ʋla, afɔkpa ʋla loo aloo ose vuga vuga a. Lɛ ese linu si, ɔxwɛwa kakaa ɛ, aaŋa bidɔ ɔ dɔnɔ ní yɛ ohihe tata lɔ me e.
11“Xe mleku ɔma ɔtɔ lo ɔma sisami ɔtɔ mɛ ɛ, mlapɛ́ ɔnɔ gbã gi adimɛ si yizɛ mlɔ ɛ, atɔ mlatí yɛ klɔ kɔkpɛni mlɔ lisɛpoe le e. 12Xegi mleti iku kepe atɔ mɛ ɛ, mlapani kepea mɛ benete ba si, ‘Kusuyɔ kí mlɔ!’ 13Lɛ xegi banima ní kepea mɛ bɛzi mlɔ ɛ, mlaki tɔ mlɔ kusuyɔɔ kuze ní kepea aʋa; pɔ̀ xe bázɛ mlɔ ɛ, tɔ mledzini mlɔ kunɔpanɔɔ kuzɛ. 14Lɛ xe kepe atɔ aloo ɔma ɔtɔ ɔ́zɛ mlɔ aloo ɔ́ta mlɔ kutu i, mlesugu ovugbo lo mlɔ kuklikpɔɔ aplɛ ní iklɔ atɔ mlasɛ. 15Sugba, sugba mɛɛsi mlɔ si, ní litsixwawe le aʋa ɛ, Aya aadi banama gi beze ní Sodom ni Gomora asigaga a sani ɔma lɔ klɔ mɛ benete ʋa a.
Yesu apani ní keduyɔyɔ alia klɔ gi kiaba su u
16“Mlata kutu! Mɛɛkpɛ mlɔ ŋwisi iʋesi kinɛ ní kuŋwafudroʋi yo kusi. Lɛ loso e, mlete liboe ŋwisi bagblaga kinɛ pɔ̀ tɔ mlayɔ ŋwisi abronuma kinɛ ɛ. 17Mledi isu ya aʋa mɔmɔmɔ, lɛ ese linu si banɔatɔ biavu mlo tsinɔ ní otsixwaklɔ ɔ, lɛ biafiaʋi mlɔ bidɔ ní Yudanɛ ma itsaklɔ ɔ. 18Kɔ kpɛ mɛ loso e, biaxwa litsi ni mlo ní baʋaŋa ba ani bekusi ʋidi ba aŋu mɛ; lɛ gani lɛ mɛ ɛ, mlaapani liboe Gbã nɛ kí bekusi ba ni banama gi bénu Yadanɛ ma kyɛ ɛ. 19Xegi bɛmani mlɔ ní litsi le me e, mlɔ begyodi ʋa bakípisa ní liboe lɛ gi mlapani su u, aloo ní kiliɛ gi mlaapani lɛ su u. Ní lipoe lɛ klɔ mɛ ɛ, biaki mlɔ eboa la gi mlapani i. 20Lɛ ese linu si mlátrapani ní mlɔ isuwla mɛ ɛ. Pɔ̀ eboe la aadɔ ní mlɔ Ɔka yɛ Ɔfuɛfuɛ nɔ klɔ gi ɛɛpani gani mlɔ aʋa ɛ.
21Beneminyime biakpɛ ba beneminyime ní awla tɔ beye; lɛ bebika batɔ kyɛ biabitɛ nite ke tsini ba bebi ba su u, bebi biayɔ kedu ní ba bapɔnɛ ba su gi biaki biaye ba a. 22Ɔnɔ kakaa aavu mlo kpɛ ní ofu me kɔ kpɛ mɛ loso. Pɔ̀ ɔniliɛ gi ɔwla ótse ye kɔna ni ɔgũklɔ ɛ, biazɛ yɛ ligbã a. 23Xegi bɛyɔ kedu ní mlɔ su ní ɔma ɔtɔ mɛ ɛ mlese atrɛ ní odzedze me. Sugba mɛɛsi mlɔ si mlatragù mlɔ axwɛ na ní Israel ima nɛ pɔ́ mɛ xe Ɔnɔɛ Ye Bi ye aaba a.
24Ɔdɔkpasibi ɔtɔtɔ óʋikeme ɔsani yɛ ɔdɔbasɛ yɛ; lɛ ɛ ɔnɔdzidzi ɔtɔtɔ óʋimu ɔsani yɛ ɔkaɛ ɛ. 25Niteme si isami iku ɔdɔkpasibi ye xe bɛbitɛ tsini yɛ su ŋwisi yɛ kiliɛ gi bɛbitɛ tsini yɛ ɔdɔbasɛ yɛ su kinɛ ɛ; tɔ isami iku ɔnɔdzidzi ye xe edzì ŋwisi yɛ kaɛ kinɛ ɛ. Xegi bɛki kepea ɔkaɛ linyi si Beezebul i, kitɛ bátraxwa kepea me benete ba enyi dovo e sanɔ ɛ?
Ɔniliɛ gi lilɛ si kwiase e
26“Lɛ loso, mlakíse banima a. Kidɔ kakaa gi bekpo abla ɛ, biabu ke kudono; lɛ kidɔ kpokpo kakaa a, kiado oŋwe. 27Eboa la gi masi mlɔ ní litumu ne me e, mlebu la edono kemizea; lɛ ɛ, idali ilɛ gi medo a si mlɔ ɛ, mlasa lɛ kamasa ni ɔma kusi. 28Mlakíse banama gi biaye kisugyaɛ pɔ̀ báma esobo la kuye me e; pɔ̀ mlese Aya gi aatani kisugyaɛ ni esobo la kuzizi ní kifu mobloe me. 29Tiasɛ kura abia taʋa izɛɛzɛ ɛ? Pɔ̀ libia ɛtɔtɔ litrawɔli dɔ kesea xegi mlɔ ɔka Aya ɔ́ki kudeonu u. 30Mlɔ kɔ ɛ, mlɔ litukpo le siya sɛ kyɛ ɛ, Aya ete sɛ kiklaklaɛ mɛ ɛ. 31Lɛ loso e, mlakíse lifu u. Lɛ ese linu si, mlɛŋa kedzi isani abia likpi.
Yesu yɛ su kudradra ni yɛ kugbegbe
32“Xe ɔnutɔ aanada si yete me ní banɔ aŋu mɛ, mɛ fɛ maanada si mete ye ní mɛ Ɔka aŋu mɛ ní lifunu ne. 33Pɔ̀ xe ɔnutɔ aagbe me ní banɔ aŋu mɛ ɛ, mɛ fɛ maagbe ye ní mɛ Ɔka aŋu mɛ ní lifunu ne.
Yesu amani kulɛlɛ ní kelea mɛ
34“Mlakígyo le edi si kusuyɔ mamanɔ ní kelea mɛ ɛ. Owo, mámani kusuyɔ ɔ, pɔ̀ kusi lɛlɛ kwitraze e. 35Maba si tɔ bebinyime bayɔ kedu ní ba baka su u; tɔ bebidzɛ bayɔ kedu ní ba bene ba su; atɔ beblidze ba bayɔ kedu ní ba banadze ba su; 36nite si ɔnɔ yɛ ahwafianɛ ba biadɔ yɛ ɔtutɔ yɛ kepea mɛ.
37“Ɔniliɛ klɔ gi adimɛ ni yɛka lo yene a sani mɛ ɛ; ɔ́ma gi aaze mɛ ɔdɔkpasi i; lɛ ɔniliɛ klɔ gi adimɛ ni yebinyime lo yebidzɛ a sani mɛ ɛ, ɔ́ma gi aaze mɛ ɔdɔkpasi i. 38Ɔniliɛ klɔ gi ɔ́pɛ si yimɔ ɔzia mɛ kiniɛ ɛ, ɔ́ma gi aaze mɛ ɔdɔkpasi i. 39Ɔniliɛ gi aapɛ si yibu yɛ ligbã nɛ ɛ, aalila lɛ. Pɔ̀ ɔniliɛ gi aalila yɛ ligbã nɛ kɔkpɛ mɛ loso e, aabu le.
Liʋɛtsatsa ní Yesu yɛ badɔkpasi kuzɛɛzɛ loso
40“Ɔniliɛ klɔ gi aazi mlɔ ɛ, mɛ azɛ, lɛ ɔniliɛ klɔ gi azɛ mɛ ɛ, azɛ ɔniliɛ gi yɛ akpɛ mɛ ɛ. 41Ɔnɔ kakaa gi azɛ Aya yɛ oboedoplɛ ɛ, ní kiliɛ gi onu Aya yɛ oboedoplɛ onu i, aamɔ liʋɛtsatsa ŋwisi oboedoplɛ kinɛ ɛ. Lɛ ɔniliɛ klɔ gi aazi ɔnɔ gi ɔlɛ ní kude gyɔgyɔ aʋa kɔ kpɛ gi ɔlɛ ní kude gyɔgyɔ aʋa loso e, aamɔ liʋɛtsatsa ŋwisi ɔnɔ gi yɛ linɛ ligyɔ kinɛ ɛ. 42Lɛ sugba sugba mɛɛsi mlɔ si, ɔniliɛ gi aki mɛ badɔkpasi ba mɛ ɔgɔgɔɛ kuni ŋrini kepliʋi tiele e, ní kiliɛ gi onu mɛ ɔdɔkpasi onu i, aazi yɛ liʋɛtsatsa lɛ kikaa elu.”
Trenutno izabrano:
Mat 10: avn
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© Ghana Institute of Linguistics, Literacy and Bible Translation, 2017 In cooperation with Wycliffe Bible Translators, Inc
