使徒 27
27
保羅坐船去羅馬
1既然決定愛𠊎等行水路去意大利，佢等就將保羅㧯其他囚犯交給羅馬皇軍个軍官猶流。 2有一隻對亞大米田來个船，愛順亞細亞省个幾個港口行。𠊎等上了船，就出發。有一個馬其頓个帖撒羅尼迦人，名安到亞里達古，同𠊎等共下去。 3第二日去到西頓，猶流寬待保羅，准佢去尋朋友，受朋友个招待。 4𠊎等又對該位開航，因為風毋順，船就行塞浦路斯背風該片。 5𠊎等渡過基利家、旁非利亞一帶海面，去到呂家个每拉。 6在該位，軍官猶流尋到一隻對亞歷山大來个船，愛去意大利，就喊𠊎等上船。
7一連好多日，船行盡慢，駛到非常艱苦正到革尼土鎮附近。因為風个阻擋，𠊎等無辦法繼續照原來个方向前行，就行克里特島背風該片，對撒摩尼角經過。 8𠊎等順海岸前進，勉強正到離拉西亞城無幾遠个「佳澳港」。
9𠊎等已經延纏好多時間，禁食个節期也已經過掉，行船緊來緊危險；所以保羅就勸大家， 10講：「各位，𠊎看對這位繼續行船係盡危險个事；毋單淨貨物㧯船會大受傷害，連𠊎等个生命也難保。」 11總係，軍官情願信船長㧯船主个話，毋愛信保羅所講个。 12這港口也毋係過冬理想个所在；所以大部份个人贊成開船，愛想辦法駛到菲尼基去過冬。菲尼基係克里特島个港口，面向西南㧯西北。
海上个暴風
13當時，有一陣南風順順仔吹過來，大家恅到做得照原來个計劃行船，就將錨拉起來開船，偎近克里特島行。 14無幾久，有一陣安到「東北風」个狂風對島上吹下來。 15船被風吹到橫來橫去，𠊎等無法度，只有由在暴風吹等走。 16船吹到一個細島背風該片；該島安到高大。𠊎等想盡辦法正保全該隻救生艇。 17船員將該隻救生艇拖上大船，又用大索仔𫟧到大船底紽好。佢等又驚船撞到賽耳底个沙洲，就將大帆布放下來，俾船順風漂流。 18暴風繼續吹等來，第二日，佢等就開始將貨物㧒落海中去， 19又過一日，連船頂用个工具也親手㧒掉。 20好多日，𠊎等無看到日頭㧯星仔；大風浪繼續催迫，最後，𠊎等連得救个希望也落空了。
21船頂个人已經盡多日無食東西，保羅企在佢等面前講：「各位，你等若係早兜聽𠊎个話，莫對克里特島開船，就毋會致到恁慘个損失。 22這下，𠊎勸你等愛勇敢，你等毋會有人喪失性命，只有這隻船會損失。 23因為𠊎所屬、所敬拜个上帝，昨暗晡差佢个天使對𠊎講： 24『保羅，毋使驚！你一定會企在皇帝个面前。毋單淨恁樣，因為上帝个慈愛，佢已經決定愛保守所有同你共船个人个性命。』 25所以各位，愛勇敢；𠊎相信上帝一定會實現佢對𠊎所講个話。 26總係，𠊎等一定會漂到一個島上去。」
27到第十四日暗晡，𠊎等个船還在亞得里亞海漂來漂去。到半夜，船員恅到𠊎等已經近陸地， 28就放下索仔去探水个深淺，結果係四十公尺；又向前，再探，係三十公尺。 29佢等驚船撞到礁石，就對船尾放四隻錨下去，望天光。 30船員想愛偷走，將救生艇縋落海面，詐意愛對船頭放錨落海。 31保羅對軍官㧯兵仔講：「這兜船員若無留在船頂，你等就會無救。」 32兵仔就斬斷救生艇个索仔，由在它漂走。
33天曚光个時，保羅勸大家食兜東西。佢講：「你等愁腸擘肚，毋食毋啉，已經十四日囉。 34這下𠊎勸你等，為到保命，食兜東西，因為你等逐儕連一條頭那毛也毋會損失。」 35講了這個話，保羅拿兜麵包，在大家面前向上帝感謝，然後擘開來食。 36大家就安心，自家也拿兜來食。 37𠊎等在船頂个總共有兩百七十六儕。 38大家食飽後，為到減輕船个負擔，又將船頂个麥仔㧒落海中去。
眾人得救
39天光个時，船員毋識該所在，總係發現一個海灣，又有沙灘，就決定想辦法將船駛上去。 40佢等先斬斷大索，將錨㧒在海中，同時解開船舵个索仔，拉起船頭个帆布，俾風將船吹到岸邊去。 41總係，船卻衝到沙洲，船頭卡死，無法度轉頭，船尾卻被大浪沖壞掉去。
42兵仔想愛將囚犯㓾掉，驚怕有兜會汨水偷走。 43總係，軍官愛救保羅，不准佢等亂來，就下令喊會泅水个人先跳下去，泅水上岸； 44其他个人正利用枋仔㧯船頂个東西上岸。恁樣，大家攏總安全上岸。
Trenutno izabrano:
使徒 27: THV12Hdb
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© The Bible Society in Taiwan, 2012
All rights reserved
© 台灣聖經公會版權所有 2012