Tio 13

Uvaʼs txumbʼalimal itxhusun quBʼaal Jesuus tiʼ taanima inqʼa xaol, tul tiqʼo tzaan vaʼl avom tuulbʼal viyol

Kuxh 4.1-9; Luk 8.4-8

1Antetzxh tuulbʼal u qʼij uvaʼe, tul el vet bʼen Jesuus tu totzotz. Tul yekich vet Jesuus kʼuqloq tziʼ u mam aʼ Galileea. 2Tul mamala xaol motx imol vet tibʼ kʼatz Jesuus. Yaʼne bʼen vet ok Jesuus kʼuqloq tuul val u vaarko tiʼ ijetxhon el inbʼiil tiʼ iyolon xoʼl inqʼa xaol. Tul jankʼalxh inqʼa xaol atich eluʼl tziʼ u mam aʼ.#Luk 5.1-3

3Yaʼne xeʼt vet Jesuus txhus tetz inqʼa xaol. Tul txumbʼalimal nikich talt Jesuus mamala txhusbʼal. Tul ech val u txhusbʼal tal Jesuus s-eche: —Ech ibʼane val u avom uvaʼ bʼen ava tetz vitriigo. 4Tuulbʼal uvaʼ sebʼtich vet ixitut el inqʼa tiiya, tul tanul inqʼa iiya, aʼ ex kuʼk t-bʼey. Uletz vet inqʼa tzʼichin, tul aʼ vet inqʼa tzʼichin ul sikʼon tanul inqʼa iiya.

5Pet tant inqʼa iiya, tan aʼ ex kuʼk xoʼl sivan tal uvaʼ lekʼel kuxh u txʼavaʼ atich s-xoʼl. Naletz kuxh titzʼ inqʼa iiya, tan yeʼxhich jankʼal ipimal u txʼavaʼ. 6Poro ajtetz jaʼ vet ul qʼij, tul tzaq veteʼ. Tiʼetz uvaʼ bʼiil kuxh bʼen vatz taqʼil, tul tira tzaq vet taʼn u qʼij.

7Tant inqʼa iiya, aʼ ex kuʼk xoʼl chʼiʼx. Chʼijetz vet u chʼiʼx, tul aʼ vet u chʼiʼx yeʼ kuyun ichʼij inqʼa iiya.

8Pet tant inqʼa iiya, tan aʼ ex kuʼk tu bʼaʼnla txʼavaʼ. Tul bʼeenoxh vet ivatz taqʼa. Tan at iiya motx aqʼon oʼ txhaq kʼalal (100) ivatz. Atz at iiya motx aqʼon ox txhaq kʼalal (60) ivatz. Atz at iiya motx aqʼon vinaq laval ivatz. 9Jaʼletz ex, uvaʼ nik abʼin inqʼa yol uvaʼ nik valeʼ, tul bʼanvaq yaʼl tiʼ inimaleʼ, —xeʼt Jesuus.

Uvaʼs talt quBʼaal Jesuus kam s-tiʼil txumbʼalimal nikich itxhusvat quBʼaal Jesuus inqʼa xaol

Kuxh 4.10-12; Luk 8.9-10

10Yaʼne imol vet ok tibʼ inqʼa nikich itxhus tibʼ kʼatz Jesuus. Tul echaq tal te Jesuus s-eche: —¿Kametz s-tiʼile uvaʼ txumbʼalimal nik atxhusvat inqʼa xaol? —xeʼtaqe.

11Tul ech tal Jesuus te inqʼa nikich itxhus tibʼ s-kʼatza s-eche: —Bʼaʼn ex, tan toq taqʼ quBʼaal Tiuxh etootzaqi jabʼiste inqʼa txumbʼal uvaʼ yeʼx aqʼel ootzaqiloq tiʼ kam toq ibʼan quBʼaal Tiuxh tiʼ ibʼant iqʼesalil tiibʼa inqʼa xaol, u quBʼaal Tiuxh, uvaʼ een t-amlikaʼ. Pet koq inqʼa xaol inqʼae, tan yeʼ aqʼel s-te uvaʼ laʼ tootzaqi. 12Tan jaʼl u xaol uvaʼ nik ibʼen s-te kam inqʼa yol uvaʼ nik valeʼ, tul aʼl tel toq taqʼax s-te tiʼ tootzaqit tel inuqul inqʼa yol s-bʼaʼn. Pet jaʼl u xaol uvaʼ yeʼ nik ibʼen s-te kam uvaʼ nik valeʼ, tul aʼl tel laʼ imaax jankʼal vatziʼ tootzaqle.#Tio 25.29 13Xaʼtetze txumbʼalimal nik intxhusvat inqʼa xaol:

«Kʼuxh nik motx til

kam uvaʼ nik inbʼaneʼ,

poro yeʼaq nik motx

ibʼen s-te

kam nik elkaʼpun.

Atz kʼuxh nik motx tabʼi

kam uvaʼ nik valeʼ,

poro yeʼaq nik motx tel

s-tuul

kam talaxeʼ.

Tan yeʼaq

nik motx itxhabʼa

tootzaqileʼ.»#Deuteronoomio 29.4; Isaiias 42.19-20; Jeremiias 5.21-25

14Echetz aʼ nik ex elkaʼpun u yole tiibʼa inqʼa xaol uvaʼ itzʼibʼa ka Isaiias, u qʼexsanich tetz viyol quBʼaal Tiuxh, uvaʼ ech nik tal s-eche:

«–Kʼuxh sebʼt ex

tiʼ tabʼil vinyol,

pet yeʼ vet laʼ etootzaqi

kam nik taleʼ.

Kʼuxh sebʼt ex tiʼ tabʼil

kam inqʼa yol nik valeʼ,

poro yeʼ vet laʼ motx bʼen

sete.

15Tan tira qat motx

tijbʼixiy vet taanima

inqʼa xaol.

Tul kaaroxhat nik tabʼi

tuchʼ ixichin.

Atz jupel vet ivatz.

Tan eche uvaʼ nikoq

taqʼ taanima

tiʼ tabʼil inqʼa bʼaʼnla txhaq

yol,

tul laʼ titzʼa tibʼ t-inqʼa ipaʼv,

tul laʼetz inbʼan bʼaʼn,

–chich quBʼaal Tiuxh,»

xeʼt itzʼibʼat Isaiias.#Isaiias 6.9-10; Saalmo 119.70

16Pet at vibʼaʼnil quBʼaal Tiuxh setiibʼa. Tan nik etil kam uvaʼ nik inbʼaneʼ, atz nik etabʼi kam uvaʼ nik valeʼ; tul nik motx ibʼen sete. 17Tul nuqxh toq val sete: Mamala qʼexsanich tetz viyol quBʼaal Tiuxh s-naʼya motx saʼon tilix inqʼa kaebʼal aanima, inqʼa nik etil inbʼant s-txheel. Tul at jolt inqʼa niman tetz quBʼaal Tiuxh s-naʼya motx saʼon tilixeʼ; atz motxaq isaʼ tabʼil inqʼa bʼaʼnla txhaq yol, inqʼa nik motx etabʼi s-txheel. Tul yeʼ motx tila, atz yeʼ motx tabʼi.

Uvaʼs talt quBʼaal Jesuus inuqul kam talax u yol uvaʼ txumbʼalimal talt tiʼ u avom

Kuxh 4.13-20; Luk 8.11-15

18Pet abʼivaq kam talax u yol tiʼ u avom, uvaʼ txumbʼalimal nik intxhust inqʼa xaol s-tiʼ. 19Tan at xaol uvaʼ nik motx tabʼi kam laʼ ibʼan quBʼaal Tiuxh tiʼ ibʼanax iqʼesalil t-taanima, pet yeʼ nik motx ibʼen s-te. Aʼetz inqʼae, eela tuchʼ u bʼey tal uvaʼ ex kuʼk tanul inqʼa iiya. Tan aʼ Satanaas nik sotzsan el tu taanima kam inqʼa yol nik tabʼi, eela tuchʼ inqʼa tzʼichin uvaʼ nik iqʼon inqʼa iiya.

20Atz at jolt xaol uvaʼ eela tuchʼ bʼeeq u txʼavaʼ uvaʼ at viʼ sivan. Tan nik motx tabʼi viyolbʼal quBʼaal Tiuxh, tul yekxh nik motx ichiibʼeʼ uvaʼs nik tabʼitaʼ. 21Poro aʼe tan, yeʼ nik ikʼul koʼp tu taanima, eche inqʼa iiya uvaʼ yeʼxh jankʼal taqʼil bʼennaʼq t-txʼavaʼ. Echetz s-tiʼile yeʼxh jankʼal qʼij qat ibʼan tiʼ inimal viyolbʼal quBʼaal Tiuxh. Tan oq laʼ pal vet t-invaʼq itzaʼlal tiʼ vinimaleʼ, atzoq yeʼ laʼ kaj utxhchil s-tiʼ, tiʼ ikʼaxbʼisaleʼ, tul nal kuxh nik ikaʼkabʼin vet ikʼuul tiʼ inimal viyolbʼal quBʼaal Tiuxh.

22Atz at xaol uvaʼ ech, eche u txʼavaʼ uvaʼ at chʼiʼx s-tuul. Tan nik tabʼi viyolbʼal quBʼaal Tiuxh, pet aʼe tan, ey kuxh taanima tiʼ itxhej kam tetz vatz txʼavaʼ tintanul inqʼa yaʼbʼ s-txheel. Atz at inqʼa tira kuxh nik isotz vet ikʼuul tiʼ tal laʼ tzajk tel txʼijbʼal iqʼij. Aʼetz inqʼa kam inqʼae nik sotzsan el viyolbʼal quBʼaal Tiuxh s-kʼuul, eche ijaʼp u chʼiʼx tiibʼa u txhiko. Echetz yeʼ nik ibʼant vete kam uvaʼ nik isaʼ quBʼaal Tiuxh s-te.

23Pet atetz xaol uvaʼ ech, eche u bʼaʼnla txʼavaʼ. Tan nik tabʼi viyolbʼal quBʼaal Tiuxh, tul nik ibʼen s-te. Tul nik ibʼaneʼ kam uvaʼ nik isaʼ quBʼaal Tiuxh s-te. Tan at xaol nik niman viyolbʼal quBʼaal Tiuxh, eche inqʼa iiya uvaʼ nik taqʼ vinaq laval ivatz. Atz at xaol nik niman viyolbʼal quBʼaal Tiuxh, eche inqʼa iiya uvaʼ nik taqʼ ox txhaq kʼalal (60) ivatz. Atz at xaol uvaʼ tira nik ikʼayi taanima tiʼ inimal viyolbʼal quBʼaal Tiuxh, eche inqʼa iiya uvaʼ nik taqʼ oʼ txhaq kʼalal (100) ivatz, —xeʼt Jesuus.

Uvaʼs txumbʼalimal itxhusun quBʼaal Jesuus tiʼ inqʼa yaabʼla txhaq txhusbʼal, tul tiqʼo tzaan inqʼa yaabʼla txhaq tzeʼ tuulbʼal viyol

24Yaʼne itxhus Jesuus vaʼt u yol, uvaʼ txumbʼalimal talt xoʼl inqʼa xaol. Tul ech tal Jesuus s-eche: —Ech vibʼant quBʼaal Tiuxh iqʼesalil, eche uvaʼ ibʼan val u vinaq uvaʼ taʼnxh iiya triigo ex tava t-vitxʼavaʼ. 25Tuulbʼaletz uvaʼs vatyich inqʼa vinaq, inqʼa nikich xeen inqʼa triigo, tul ul val u vinaq uvaʼ nikich itxhiʼan tiʼ u aj etz triigo. Tul ul tava ka iiya tetz yaabʼla tzeʼ xoʼl inqʼa triigo. Tul bʼen veteʼ. 26Chʼijetz vet inqʼa triigo, tul xeʼt vet vatzinoq. Atz chʼijat vet inqʼa yaabʼla tzeʼ.

27Yaʼne ex tal vet inqʼa aqʼonvil u yol te u aj etz triigo. Tul ech motx tal s-eche: «Quqʼesal, taʼnxh iiya triigoe ex qava. Poro ¿keʼchetz qat itxhej inqʼa yaabʼla txhaq tzeʼ s-xoʼl nik anatxheʼ?» xeʼtaqe.

28Yaʼne ech tal u aj etz triigo s-eche: «¡Naqebʼ vaʼq uvaʼ nik itxhiʼan s-viʼ qat ex avan ka!» xeʼte.

Yaʼne ech tal inqʼa aqʼonvil s-eche: «¿Maqetz laʼ asaʼa uvaʼ laʼ bʼen oʼ, tul bʼen qubʼuqʼeʼl?» xeʼtaqe.

29Yaʼne ech tal u aj etz triigo s-eche: «Yeʼle. Yeʼ laʼ isaʼa uvaʼ laʼ bʼen ebʼuqʼeʼl inqʼa yaabʼla txhaq tzeʼ, tan tzum toq ibʼuqʼtxʼ tzaane tuchʼ inqʼa triigo oq bʼen ebʼuqʼeʼ. 30Pet chʼijoqn inqʼa yaabʼla tzeʼ tuchʼ inqʼa triigo. Tan tzaqnale, atz laʼ nal opoon vet viqʼiil vitxhokpeʼ, yaʼne ech laʼ val te inqʼa molol tetz triigo s-eche: –Bʼaxa laʼ ebʼuqʼeʼl inqʼa yaabʼla txhaq tzeʼ. Tul laʼ motx eqitz s-txhaq bʼookʼol. Tul laʼ motx etzʼeʼsa el. Yaʼne laʼ etxhok vet inqʼa triigo. Tul laʼ ekol t-vinkʼoay, –chaq in,» xeʼt u aj etz triigo, —xeʼt Jesuus te inqʼa xaol.

Uvaʼs txumbʼalimal itxhusun quBʼaal Jesuus tiʼ ipaxin viyolbʼal quBʼaal Tiuxh, tul tiqʼo tzaan tzeʼ u mostaasa tuulbʼal viyol

Kuxh 4.30-32; Luk 13.18-19

31Yaʼne itxhus Jesuus vaʼt u yol uvaʼ txumbʼalimal talt xoʼl inqʼa xaol. Tul ech tal Jesuus s-eche: —Ech vibʼant quBʼaal Tiuxh, uvaʼ een tu amlikaʼ, iqʼesalil xoʼl inqʼa xaol, eche tiiyail tzeʼ u mostaasa uvaʼ nik tavaleʼ. 32Tan kʼuxh unutzʼxh u iiya viʼ jolt inqʼa iiya, poro qatetz chʼij veteʼ. Tul sibʼxh palnaʼq vet ichʼij u tzeʼ viʼ jolt inqʼa txhiko. Tul nimla tzeʼ vet nik bʼenka. Echetz nik tul vet txooe inqʼa tzʼichin bʼan isok viʼ inqʼa iqʼabʼ, —xeʼt Jesuus.

Uvaʼs txumbʼalimal itxhusun quBʼaal Jesuus tiʼ ipaxin viyolbʼal quBʼaal Tiuxh, tul tiqʼo tzaan u aqʼbʼal jaʼ tuul paan tuulbʼal viyol

Luk 13.20-21

33Yaʼne itxhus Jesuus vaʼt u yol uvaʼ txumbʼalimal talt xoʼl inqʼa xaol. Tul ech tal Jesuus s-eche: —Atz ech vibʼant quBʼaal Tiuxh viqʼesalil xoʼl inqʼa xaol, eche u aqʼbʼal jaʼ tuul paan uvaʼ taqʼ val u ixoq iyuqʼ tibʼ tuchʼ ox paul ariina. Tul iyutxhʼ veteʼ. Atz pax vet u aqʼbʼal jaʼ tuul paan xoʼl u ariina. Echetz niimxh vet ichʼij u qʼota s-kaqaayil ibʼana, —xeʼt Jesuus.

Uvaʼs talt quBʼaal Jesuus inuqul kam s-tiʼil txumbʼalimal nikich txhusunka

Kuxh 4.33-34

34Jankʼaletzxh inqʼa yol uvaʼ tal Jesuus xoʼl inqʼa xaol, tan yeʼl Jesuus uvaʼ txhusun koq kuxh s-eche. Pet txumbʼalimal nikich itxhust Jesuus inqʼa xaol. 35Echetz telaʼpune u yol, uvaʼ tzʼibʼamal ka taʼn val u qʼexsanich tetz viyol quBʼaal Tiuxh, uvaʼ ech nik tal s-eche:

—Txumbʼalimal

laʼ valvat inqʼa yol

tiʼ itxhusux inqʼa xaol.

Tul laʼ vaqʼ tootzaqi

inqʼa xaol

inuqul inqʼa yol

uvaʼ yeʼ taqʼ quBʼaal Tiuxh

ootzaqiloq s-naʼya,

uvaʼs ixeʼt u qʼij saq,

—chich u yol.#Saalmo 78.2

Uvaʼs talt quBʼaal Jesuus inuqul kam talax inqʼa yaabʼla txhaq tzeʼ

36Tul ijatx vet tibʼ inqʼa xaol. Tul ul vet Jesuus t-otzotz. Tul molmotxhich tok inqʼa nikich itxhus tibʼ kʼatz Jesuus. Tul ech motx tal te Jesuus s-eche: —Nik qusaʼeʼ laʼ aal inuqul s-qe kam talax inqʼa iiya tetz inqʼa yaabʼla txhaq tzeʼ uvaʼ ex avaloq ka xoʼl inqʼa triigo, —xeʼtaqe.

37Yaʼne ech tal Jesuus s-eche: —Eche naq uvaʼ avan inqʼa triigo, tan aʼetz nik elkaʼpun s-viʼ, in, u Kʼaola uvaʼ qat bʼen s-alam aanima. 38Pet u txʼavaʼ, tan aʼetze inqʼa tenam s-kaqaayil. Pet eche inqʼa triigo, tan aʼetze inqʼa xaol uvaʼ nik ibʼan quBʼaal Tiuxh iqʼesalil tu taanima. Pet inqʼa iiya tetz inqʼa yaabʼla txhaq tzeʼ, tan aʼetze inqʼa xaol, inqʼa aʼ Satanaas nik inima.

39Echetze u xaol uvaʼ ex avan inqʼa iiya tetz inqʼa yaabʼla txhaq tzeʼ, tan aʼetz nik elkaʼpun tiʼ vibʼanoʼm Satanaas. Pet uvaʼs laʼ topoon vet viqʼiil itxhokp inqʼa triigo, tan aʼetze u qʼij vimotxebʼal tanul inqʼa yaʼbʼ s-txheel. Atz eche inqʼa xaol, inqʼa ex txhokon ivatz inqʼa triigo, tan aʼetze inqʼa aanxel.#Apokaliipsis 14.14-20

40Echetz kamxh uvaʼ laʼ ulbʼel ibʼuqʼux inqʼa yaabʼla txhaq tzeʼ, atz laʼ oksal vet viʼ xamal, tul echatxh laʼ ulbʼele inqʼa xaol, inqʼa tetz Satanaas, uvaʼs laʼ topoon u qʼij vimotxebʼal tanul inqʼa yaʼbʼ s-txheel. 41Tan aʼ ine, u Kʼaola uvaʼ bʼen s-alam aanima, laʼ txhaqon tzaan inqʼa inaanxel tiʼ teesal el inqʼa xaol, inqʼa nik motx bʼanon u yeʼbʼaʼn, atz inqʼa nik eesan imol t-bʼey. 42Tul antxh inqʼa inaanxel laʼ motx aqʼon bʼen inqʼa xaol t-val u mam xamal, uvaʼ eche toybʼ xamal t-oorno laʼ ibʼana. Tul tzitzi laʼ bʼen oqʼk inqʼa xaol. Atz tzitzi laʼ ikʼuxivat tibʼ tej t-kʼaxkʼo. 43Pet inqʼa xaol uvaʼ laʼ niman quBʼaal Tiuxh, tan aʼetz inqʼae uvaʼ ech vet tilix u tatin kʼatz quBʼaal Tiuxh, eche tilix u qʼij. Jaʼletz ex, uvaʼ nik abʼin inqʼa yol uvaʼ nik valeʼ, tul bʼanvaq yaʼl tiʼ inimaleʼ.

Uvaʼs txumbʼalimal itxhusun Jesuus tiʼ ibʼant quBʼaal Tiuxh iqʼesalil, tul tiqʼo tzaan vaʼl mam bʼaʼnil uvaʼ muqele tuulbʼal viyol

44Atz echatxh vibʼant quBʼaal Tiuxh iqʼesalil, eche ileqex invaʼq u mam bʼaʼnil uvaʼ muqel ka tuul invaʼq txʼavaʼ. Oqetz laʼ bʼen ileq invaʼq vinaq u mam bʼaʼnil, tul mam vet chiibʼichil laʼ ibʼan s-tiʼ. Tul nal kuxh laʼ imuq vet ka tu txʼavaʼ inpaqte. Yaʼne laʼ bʼen ikʼayi vet inqʼa kamaq tetz s-kaqaayil. Tul aʼ laʼ iloqʼ vet u txʼavaʼ uvaʼ at u mam bʼaʼnil s-tuul. Echetz ileqexe vibʼant quBʼaal Tiuxh iqʼesalil.

Uvaʼs txumbʼalimal itxhusun quBʼaal Jesuus tiʼ ibʼant quBʼaal Tiuxh iqʼesalil, tul tiqʼo tzaan vaʼl u yakol tuulbʼal viyol

45Atz echatxh vibʼant quBʼaal Tiuxh iqʼesalil, eche itxhokt u yakol kʼaʼy bʼaʼnla sivan uvaʼ nik taqʼax bʼen s-uj uvaʼ sibʼxh ijaʼmil. 46Oqetz laʼ ileq u yakol kʼaʼy u bʼaʼnla sivan uvaʼ sibʼxh ijaʼmil, tul nal kuxh laʼ bʼen ikʼayi vet inqʼa kamaq tetz s-kaqaayil. Tul aʼ laʼ iloqʼ vet u bʼaʼnla sivan. Echetz ileqexe vibʼant quBʼaal Tiuxh iqʼesalil.

Uvaʼs txumbʼalimal itxhusun quBʼaal Jesuus tiʼ ibʼant quBʼaal Tiuxh iqʼesalil, tul tiqʼo tzaan imolox txay tuul kʼatxh taʼn txeyol tetz tuulbʼal viyol

47Atz echatxh vibʼant quBʼaal Tiuxh iqʼesalil tiʼ imolox inqʼa xaol, eche nik ikʼonil bʼen vaʼq kʼatxh xeʼ mam aʼ tiʼ imolox jaʼul txay. Tul jatvatzul kuxh xeʼ aʼil txoo nik ex imol tzaan u kʼatxh. 48Oqetz nik inoj vet u kʼatxh, tul nik tiqʼo vet eluʼl u txeyol txay tziʼ u mam aʼ. Yaʼne nikʼuqeʼv veteʼ, tul nik ichʼex vet kuʼ inqʼa bʼaʼnla txay tuul xuʼk. Pet inqʼa jit txay uvaʼ kantxhaq, tan nik ikʼoni el. 49Echatetz laʼ ichʼexex ele inqʼa xaol taʼn inqʼa aanxel. Tan laʼ chʼexex el inqʼa bʼanolaq tetz yeʼbʼaʼn xoʼl inqʼa jik, inqʼa niman vetz, tuulbʼal uvaʼs laʼ topoon vimotxebʼal tanul inqʼa yaʼbʼ s-txheel. 50Tul antxh inqʼa aanxel laʼ motx aqʼon bʼen inqʼa xaol t-val u mam xamal uvaʼ, eche toybʼ xamal t-oorno laʼ ibʼana. Tul tzitzi laʼ bʼen oqʼk inqʼa xaol. Atz tzitzi laʼ ikʼuxivat tibʼ tej t-kʼaxkʼo, —xeʼt Jesuus.

Uvaʼs ibʼant quBʼaal Jesuus eela viyolbʼal quBʼaal Tiuxh tuchʼ vaʼq akʼ kam

51Yaʼne ech vaʼt u yol tal Jesuus te inqʼa nikich itxhus tibʼ s-kʼatza s-eche: —¿Maq nik ibʼen sete kam talax inqʼa yol uvaʼ nik motx valeʼ? —xeʼt Jesuus.

Tul ech tal inqʼa nikich itxhus tibʼ kʼatz Jesuus s-eche: —Ee. Nik ibʼen s-qe, [quBʼaal,] —xeʼtaqe.

52Yaʼne ech tal Jesuus s-eche: —Poro jankʼalxh inqʼa niman vetz, uvaʼ txhuselxh vet tibʼ s-bʼaʼn tiʼ tootzaqit vibʼant quBʼaal Tiuxh iqʼesalil t-taanima, tan nal kuxh laʼ tootzaqi vet inqʼa txhusbʼal uvaʼ nik valeʼ. Atz nalat kuxh laʼ itxhabʼa inqʼa txhusbʼal uvaʼ nik tal inqʼa oʼtla txhaq bʼekʼbʼal. Tan ech vet tatin, eche invaʼq u bʼaal otzotz uvaʼ tootzaqle jatu laʼ bʼen tiqʼo invaʼq akʼla kam tetz t-vikolbʼal, atz tootzaqle jatu laʼ bʼen tiqʼo invaʼq oʼtla kam tetz t-vikolbʼal, —xeʼt Jesuus.

Uvaʼs iqʼaʼv quBʼaal Jesuus tu tenam Nasareet

Kuxh 6.1-6; Luk 4.16-30

53Yaʼetz vet Jesuus tiʼ itxhusux inqʼa yol uvaʼ txumbʼalimal nikich taltaʼ, tul el vet bʼen Jesuus tziʼ u mam aʼ. 54Tul yekich vet Jesuus t-vitenam. Aqʼbʼetz vet Jesuus tzitzi, tul xeʼt vet Jesuus tiʼ itxhusux inqʼa xaol tuul u kʼulbʼal ibʼ. Tul tira nikich ikaj taanima inqʼa xaol tiʼ vitxhusun Jesuus. Tul ech nikich motx tal vet tiʼ Jesuus s-eche: —¿Tal qat tzajk tootzaqibʼal naq uvaʼe? Atz ¿tal qat txhejk tiqleʼm naq tiʼ ibʼanax inqʼa mam bʼaʼnil? 55Tan naq kuxhte vikʼaol naq u seol tzeʼ, u tal ixoq u Mal, atz naqe u tatzik Jakoovo, atz u tatzik Xhuʼl, atz u tatzik Simoon, atz u tatzik Juudas. 56Atz naqe vixibʼen inqʼa ixoq inqʼa ile at s-quxoʼl. Pet ¿taletz qat tzajk inqʼa txumbʼal uvaʼ nik ibʼan naq? —chichich inqʼa xaol tiʼ Jesuus.

57Tul tira nikich teesal iqʼij Jesuus taʼn jolol inqʼa xaol.{*}#13.57 ¿Kam s-tiʼil nikich isotz ikʼuul jolol inqʼa xaol tiʼ vibʼant quBʼaal Jesuus inqʼa mam kaebʼal aanima? Tiʼ uvaʼ tan, alam aanimaich kuxh quBʼaal Jesuus vatz inqʼa xaol. Tul bʼane vatz txʼavaʼil kam koq uvaʼ nikich ibʼan quBʼaal Jesuus, pet tetz quBʼaal Tiuxhich uvaʼ nikich ibʼan quBʼaal Jesuus. Xaʼtetze kaayichxh taanima inqʼa xaol s-tiʼ. Tul nikich kuxh teloʼkin vet titzʼabʼal inqʼa xaol tiʼ quBʼaal Jesuus. Tul aʼ nikich tal vet inqʼa xaol uvaʼ jitich Kriisto quBʼaal Jesuus.

Yaʼne ech tal Jesuus s-eche: —Eche invaʼq u qʼexsan tetz viyol quBʼaal Tiuxh, tan jankʼalxh inqʼa tenam laʼ kʼulun. Pet tuulbʼal vitenam, atz tuulbʼal u totzotz, tan saʼ koq kʼuluxi, —xeʼt Jesuus.#Xhun 4.44

58Echetz s-tiʼile yeʼxh jankʼal inqʼa mam bʼaʼnil motx ibʼan Jesuus t-vitenam, tan yeʼ nikich motx iqej inqʼa xaol u tiqleʼm Jesuus oq uvaʼ aʼich Jesuus u Kriisto.

Trenutno izabrano:

Tio 13: ixlC

Istaknuto

Podijeli

Kopiraj