Andowoon 1
1
Andowoon 1
Andowe Ongmenaboon Ye Weng
1Yimin andowoon yiri kuu Godbed ambidiib okadiib ongmenaboon, 2kumban okad kuu wuub nimingkindo, angkon kumkam maayiibban. Kwane kumun kumbed kebenoon. God ye Kingkin kuu ok animari wedyambed yarebeen. 3Godbed yedmoon “Namborok.” andoona namboroon. 4Namboroone, wedmekore “Amun kii.” andoon. Andekore, yembed nambiriyiib kumuniib kuu andokbe yeka yeka keroon. 5Kwanekore, nambiri yaningko kuu “Awingyab” andekore, kumun yaningko kuu “Amnoom” ande keroon. Mirikne ware amkimo keroone, aron mimo keroon.
6Kwanoone, Godbed yedmoon, “Ok yiri kuu yuka keruko, ok ari kuu yeka keroko, wedya kuu nuub yeman kerok.” andoona kwanoon. 7Godbed mindong yi dangimbon ongmekore ok ari dore ok yiri dore wedya kowoon. 8Kowe Godbed mindong yi dangimbon yaningko kuu “Ambid” andoon. Mirikne ware amkimo keroone, aron ayoob keroon.
9Kwanoone, Godbed yedmoon, “Ok yiri kuu kanmimyirimo keruko, bid kuu yaro angkimburuko.” andoona, kwanoon. 10Bid kuu “Okad” ande, ok kuu “Karamok” ande keroon. Kwane wedmekore “Amun kii.” andoon. 11Kwanandekore yedmoon, “Aya kereeka nonga yuma oma mongkob animan maa maa animaibka animaibbanka korem dembok.” andoona, kwanoon. 12Yi korem kuu yi kawiib yowiib. Wedmekore, “Amun kii.” andoon. 13Mirikne ware amkimo keroone, aron ayoobmim keroon.
14Kwanoone, Godbed yedmoon, “Nambiri kuu ambid arimbed menebok. Yi dowad kuu awingyab yemaniib amnoom yemaniib weeb kimingki yemaniib 15ambid arimbed okad yiri yuri yemaniib.” andekore, 16aroniib woodiib mindongiib ongmenaboon. Aron kuu awingyab ye nambiri darewoob yeman. Wood kuu aron arebban amnoom ye nambiri embeng yeman. 17Ongme dowan kerekore, ambid ari nongkoboon. Ambid ari nongkoboon kuu okad yiri yuri ye dowadiib, 18awingyawiib kumuniib andokbi ye dowadiib nongkoboon. Yuriiwe, wedmekore, “Amun kii.” andoon. 19Mirikne ware amkimo keroone, aron kaning keroon.
20Kwanoone, Godbed yedmoon, “Ok yiri dingkan maa maayiib muubnoko ayari on maa maayiib dembe ambid ari wanyarebime.” andekore, 21karamok yiri ye dingkan miin kambari maa maayiib ok yiri dingkan yena koremiib kuu ongmenaboone ok yiri muubniwen. Ok yiri ye dingkan korem komarewa ongmenaboon kuu kwamunemo. Ayari on maa maa kangkon ongmenaboon. Ayari on korem komarewa ongmenaboon kuu kwamunemo. Wedmekore, “Amun kii.” andoon. 22Godbed yi yaa amun kerunde yedmendoon, “Yiib ok yiri ye dingkan kuu mana yemoon kere ok yiri muubne wonok. Ayari on yiib kangkon mana yemoon kere wonok.” andoon. 23Mirikne ware amkimo keroone, aron angko keroon.
24Kwanoone, Godbed yedmoon, “Bid ari dingkan maa maayiib amongkowiib kiiwiib kuu okad yaambed dembenib yiib komarewa ongmenabaan kuu kwamunemo yemoon kerime.” andekore, 25bid ari dingkan maa maa korem ongmenaboon. Dingkan korem komarewa ongmenaboon kuu kwamunemo. Wedmekore, “Amun kii.” andoon.
26Kwanandekore yedmoon, “Nubbed nimakarub nuwareb ongmem. Yi kuu ok yiri ooniib ayari oniib dingkan kiiwiib amongkowiib darewoowiib embengiib dingkan korem yariman kerok.” andoon. 27Andekore, God ye kuruwak areb nimakarub ongmenaboon, ambiyiib yingkiyiib. 28Yi yaa kuu amun kerunde yedmoon, “Dana yemoon woongkanabime. Okad yimin yimin yaa muubnime. Okad kumundin yaa oonime. Dingkan korem kuu yariman kerime, ok yiri ooniib ayari oniib dingkan korem bid ari yarebimaiwiib kui.” andoon. 29Kwanandekore yedmoon, “Kedi, yob irimaan yeman koremiib ayowiib yiib yaa kondaan, yiib animan kui. 30Bid ari dingkaniib ayari oniib dingkan korem bid ari yarebimaiwiib yaa kuu kereekiib bukiib kondaan, yi animan kui.” andoona, kwanoon. 31Godbed ongmenaboon korem yaa wedmendekore, “Korem amun yeman kii.” andoon. Mirikne ware amkimo keroone, aron benme keroon.
Trenutno izabrano:
Andowoon 1: yonB
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 2003, Wycliffe Bible Translators, Inc. All rights reserved.