Yeneses 7
7
Yúta ta꞉lamo gola꞉dle
1Epame Godtapo Nowa watle epo atlaiyo, “Wata oloma hema ha꞉ha꞉ opa hapuloma dulu dla na꞉ta natiye hatlo wa꞉ tlo sikemte ka꞉dle oplami halema. Epapedeme wa꞉ mate wa꞉ a꞉ya mate epo wa꞉ akimlala mate epo yia꞉ wola꞉ mate koa dulu dla elemtuwane. 2Epame wua꞉ta tumama ullu watalo alinepi#7:2 Ullu pa꞉talo alinepiye isikimi God hi di dla ta꞉demama poyupo hapilalo alinepipo. Amasiyama ullu watalo alinepiye God hi di dla ta꞉demama poyupo pohapilalo wekele alinepipo. mila꞉pi meyelope meyelope dleye patetalo mate molalatalo mate hohopo tumullupe. Amasiyama wa꞉ ullu pa꞉talo alinepi tlo elemtumama alinepi mila꞉pi meyelope meyelope dleye patetalo dla 7 hohoma epame molalatalo dla 7 hohoma demtapame elemtulupe. 3Epame tea mape patetalo dla 7 hohoma epo molalatalo dla 7 hohoma demtapame elemtulupe. Epalati yia꞉tapo ma alotle yia꞉ mila꞉pi sepele usulumha꞉ha꞉mama pasatlepo depame. 4Wata oloma itle alila 7 pololepo gudlati na꞉tapo tiyo patoye ta꞉lamo dla tulune dlowama. Epalati 40 alila mate epo 40 utula꞉la mate tiyo patota hellepe. Epalati na꞉ta mimita꞉pele opa hapuloma mate epo alinepi hapuloma mateye poyuluwepo,” diyo. 5Epalati Nowatapo Godta atlale koko hapulomaye ma-haiyo.
6Nowaye 600 sokomoko hallati yútapo puaiyo. 7Epalati Nowata ya꞉ a꞉ya mate epo ya꞉ akimlala mate epo yia꞉ wola꞉ mate koa pato dulu dla tuwaiyo, yúta ta꞉lamo gola꞉dlati yia꞉tapo pasakalo hallowe halowedeme. #Ma꞉t 24:38-39; Luk 17:27 8-9Epalati Godta atlale yu e dolumama tea mila꞉pi meyelope meyelope dle mate epo alinepi hapuloma mila꞉pi meyelope meyelope dle matetapo Nowa hala dla puame koa dulu dla tumhalaiyo. Yia꞉tapo koa dulu dla tumhalemama patetalo mate molalatalo mate tua demhalaiyo. 10Epame alila 7 mogudlati yútapo ta꞉lamo patoye dokolomhetaiyo.
11Nowata halemama 600 sokomoko umale oloma edla yú mataletapo ta꞉la dulu tle popokotimyaiyo. Epalati omapla di tle tiyo patota heliyo. Koko iye namba 2 mama dulu dla namba 17 alila umulati apiyo. #2Pita 3:6 12Epalati tiyotapo 40 alila mate epo 40 utula꞉la mate dulu dla helemhalaiyo. 13Epalati Nowa mate ya꞉llu mate epo yia꞉ akimlala Sem mate epo Ham mate epo Yapet mate epo yia꞉ wola꞉ mate koa dulu dla tuwaiyo. 14Yia꞉ta tumama alinepi mila꞉pi meyelope meyelope dle dulu dla halo mate epo yowo mate epo tea mila꞉pi meyelope meyelope dle mate elemtuwaiyo. 15-16Godta atlale yu e dolumama alinepi hapulomatapo Nowa mate tumhalale dulu edla patetalo mate epo molalatalo mate tua demhalaiyo. Yia꞉ta hapulomatapo koa dulu dla mo-tupa꞉mele pokadlati God meyelo kokolomaye godiyo.
17-18Tiyota 40 alila dulu dla helemhallati yúta pumhetamama koata hollowe mo-kotiyamaiyo. 19Yútapo ta꞉lamo dokolomhetemama tamali patoto sikemte seselemalli popa꞉le aloweli diye mo-gola꞉gola꞉diyo. 20Epalati tamali patoto aloweli yúta gola꞉dleye 7 mita ga꞉tulli epapele halaiyo. 21-23Epalati alinepi hapuloma mate epo tea hapuloma mate epo opa hapuloma mate ta꞉la medla pomelletapo paliyo. Epedeme ta꞉lamo hema pasakalo ha꞉ha꞉lalo alisisi hapulomatapo mosukulu palipa꞉meliyo. Amasiyama hatlo Nowata koa dulu dla elemtuwale sotapo pasakalo gadlowe haiyo. 24Epalati 150 alila dulu dla yútapo ta꞉laye gola꞉depo elaiyo.
Trenutno izabrano:
Yeneses 7: xlaPB
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
©2005, Wycliffe Bible Translators, Inc. All rights reserved.