Matthew 3
3
John Bapataito Ari Embo mi Badari da begata siya esisina.
(Mark 1:1-8; Luke 3:1-7; John 1:19-28)
1Edo iji angode John Bapataito Ari Embo emi yai Judea da abu damodamoda gundo dengoro baiari piedo esisina. 2Edo sisina, “Utuda gisijiari#3:2 Utuda gisijiari da moka awa ‘God da sima ari dave’. Iji boroko God da sima ari dave embo da ain Toregari Embo Iesu da toda God da yai gumaina, ainda yai awa God mi ainda sima ari dave arapa aina, edo God mi embo ainda do gisijido aina. Edo daedo, ainda moka nei awa iji amboda Iesu tekago butuda gumbari God mi Iesu da toda embomai berari butuda sima dave edo aina. Daedo ge nei eiwa giwo: Jew embomaimi gebé edo esitera, God da dao awa kotopubé kotopu (Exodus 20:7). Awatedo awamane iji jiwae ge ‘utu’ ge ‘God’ da deroda piedo esitera. Edo Matthew mi ainda bino dave Jew embomai awaembo gagurisina, awatedo iji jiwae ge ‘utuda gisijiari’ ainda ove doda jigamo edo esisina. aikae gumbira,#3:2 aikae gumbira. Iji gumbae gisida John Bapataito Ari Embomi ainda ge karigedo esisina, God mi ainda yai arapa esiri gosisina awa, God da Mai mi God da sima ari dave awa utuda edo embomaida yai kundo gumaina. Awatedo iji ainde John Bapataito Ari Embo ge awa sisina, ainda moka awa God da Mai, Keriso, embo enemboda yai aikae gumbira (John 1:32-35; Micah 5:2). awatedo itomane jimbo bebegae dodo God da yai wareregewo!” 3Edo embo ami ge eiwa peroveta Isaiah mi iji matuda sisina awa esiri bé esisina:
“Embo abu damodamoda aorogateira,
‘Badari#3:3 Badari da moka awa ‘Na awa Natopo Itari’ o Hiburu ge awa Jehovah. Ge Moka Tetekada ge nenei daedo ove einda gunda giwo. da begata dave ewo!
Ainda begata
dambu darewo pepeta are.’”#Isaiah 40:3
4Edo John akuta awa ombarijiari wo kamelo tumi ari#3:4 ombarijiari wo kamelo tumi ari. John Bapataito Ari Embo da ombarijiari awa peroveta Elijah da ombarijiari ango (2 Kings 1:8). awa omundo, bupuri wo aintomi ari awa ainda ipuda jido esisina. Edo ainda indari awa wajina ae abu pika de. 5Iji ainde embomai Jerusalem da, Judea yai berarida, edo un Jodani da demodamo berarida, ami idegedo ainda yai maunsitera. 6Edo gundo awamaneda jimbo bebegae karigoro embo ami un Jodani ainda awamane bapataito edo esisina.
7Ata iji ainde embo ami Parasi mane#3:7 Parasi mane awa Jew embomaida gebé ari jisi bajina Israel doda itora. Awamanemi God da Aodari gisi Moses da yai pipisisina awa dave edo gido ambo ambo edo esitera. Ata awamane aribari neneide ge okain neneide daedo ainda tamonda pisido embomaide atopasido esitera. ae Sadusi mane#3:7 Sadusi mane awa Jew embomaida gebé ari jisi sakago Israel doda itora. Awamane jiwae awa gaiapade edo nenei awa pirisi babain. Awamaneda gebé ari awa embo berarimi Aodari God mi Moses de pipisisina awa akuta ambo ambo orote. Awamane jipapa ae atopatari nenei Parasi manemi Moses da Aodarida tamonda piedo esitera. de jiwae ainda bapataito ari yaida gupero gido ami sisina, “Imomane awa jimbago jitoma ingege! God mi rirowa piain siya eira awa, nane imomane bapataito ano awa daginegawa ango kotembetewa? 8Imomane bapataito anate jipapa edo gido, itomane ni be dave awa piewo gane. Edo itomane do wareregetewa ango gido awa, imomane bapataito ane. 9Nane imondemane tena, God mi ganuma itera eiwa inono tari wasiri budo Abraham da mamai teka ara.#3:9 God mi ainda awara ari Abraham da mamaida yai tepo piainyae. Ata God mi embo ainmi ainda jipapa euri awa ainda awara ari piedo eira. Awatedo imomane akuta kotembedo ge mina tara engo eove, ‘Abraham awa mamo natokare, awaembo God natokare yai rirowa piainyae.’ 10Edo iji borokobé emi, God embomai ainkain jimbo bebegaeda dodo wareregae era, awamaneda rirowa piaina. Awa engo embo otomi ni tutuda kapain siya eira. Awatedo ni berari nomi be dave ekae era awa, imo tutuda tai kapari durudo mumuya aro kundo niyaoda augaina.
11“Awa gebé, itomane jimbo bebegae dodo God da yai wareregetewa, awatedo imomane un mi bapataito ena. Ata embo nei dá nato amboda gumaina awa na ango ae. Embo awa bajina edo na dave ae. Nane ainda tai woru inono kundo mambari tao ae. Embo ami imomane Asisi Kotopu mi bapataito aina, 12edo ainda dagi bajina ainda ipami jido kundo gumaina. Ami ainda vedari wheat#3:12 wheat awa yakarada orobe, edo ainda vero awa tambara vero ango, ata babaingaebé. vero buya edo wotari berari jimundo kundo rorae itari oroda piaina. Ata oen berari jimundo augari niyao matawa aveite isira ainda awaina.”
John mi Iesu bapataito esisina.
(Mark 1:9-11; Luke 3:21-22)
13Ango edo Iesu John mi bapataito arate tedo yai Galili da edo un Jodani da gupusina. 14Ata John mi awa gido imo engiregain sisina, “Ro awaembo imo nane bapataito anate gupesi? Nato jipapa awa inemi na bapataito ata.”
15Ata Iesu ainde mina sisina, “Boroko ingenane God da jipapa berari awa kera ano bé aina. Awatedo doyo gumbare.” Ango tesiri John awara tedo Iesu bapataito esisina.
16Edo iji ainde John mi Iesu bapataito esiri, imo boraebé unda eriri, edo giwo, utu imonde pirigesiri ine God da Asisi Kotopu ni ribo ango wotedo ainda yai anumbesiri gosisina. 17Edo burigibé ge yavi utuda edo gundo sisina, “Eiwa nato dubobari Mai. Nato dubodave aribé ainda yai.”
Trenutno izabrano:
Matthew 3: bhg
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 2014, Wycliffe Bible Translators, Inc. All rights reserved
