Luka 22
22
Yahuza u dengei Yesu
(Mat. 26:1-5; Mar. 14:1-2; Yah. 11:45-53)
1Gogo na, Ka̱ɗiva̱ ka Kupasamgbanai ka na ka̱ gita̱ngi Ka̱ɗiva̱ ko Burodi vu Moloko† ka̱ gita̱ ta̱ kuyawa. 2Anan ganu vu gbagbaꞋin nu nlum n Wila̱ i ta̱ a̱ kula̱nsa̱ uye u na a una Yesu. Amma i ta̱ a kupana wovon u uma. 3Ɗaɗa MalyaꞋi ma uwai u Yahuza, vuza na e ci ɗeke Iskaryoti, a̱ ka̱tsuma̱ ka Kupanazere a. 4Ɗa Yahuza u banai u anan ganu vu gbagbaꞋin n aza a̱ gba̱ra̱gba̱ra̱ a kinda A̱Ꞌisa̱ a Gbayin, ɗa u sheshei n ele uteku u na u kuneke le Yesu. 5A panai ma̱za̱nga̱, ɗa a̱ ushuki kuneke yi ikebe. 6Ɗa u ka̱na̱i kula̱nsa̱ uye u kuka̱na̱ Yesu ka̱ta̱ u neke le, ayin a na baci ka̱bunda̱i ka uma ki lo ba.
IlikulyaꞋa ya Akucina
(Mat. 26:17-30; Mar. 14:12-26; Yah. 13:21-30; 1 Kor. 11:23-25)
7Ana kanna ka yawai ka̱ Ka̱ɗiva̱ ko Burodi vu Moloko ka na a kulyuka malala ma Kupasamgbanai,† 8Yesu u suki Biturusu n Yahaya, u danai le, “Banai, i foɓusoko tsu, adama a na ci lyaꞋa ilikulyaꞋa i Kupasamgbanai.”
9Ɗa e ecei, “Te ɗa̱i vi cigai tsu bana tsu foɓuso i ɗa?”
10Wu ushuki, “A̱ɗa̱ ana ya uwa a̱ likuci, vali vi yoku wi ta̱ a kucina ɗa̱ n kedele ka̱ mini. Tonoi ni a kubana a kpaꞋa ku na u uwai. 11Ka̱ta̱ i dana vuza vu kpaꞋa va, ‘Malum ma dana ci ece wu: Te kunu ko omoci ku na n kulyaꞋa ilikulyaꞋa i Kupasamgbanai m mukumitoni n va̱?’ 12Wi ta̱ o kuyotsongu ɗa̱ kunu ku gbayin ku gaɗi upura̱ngi ciɗa n ili dem. Ka̱ta̱ i yaꞋan ofoɓuso a̱ ɗa̱ ɗe.”
13Ana a lazai, ɗa ta na a cinai ili derere tsu na Yesu u danai le. Ɗa o foɓusoi Ka̱ɗiva̱ ka Kupasamgbanai ka.
14Ana ayin a yawai, Yesu n azusuki a̱ ni a̱ da̱sa̱ngi a kirikpa ki ilikulyaꞋa ka. 15Ɗa u danai le, “N ciga ta̱ ka̱u n lyaꞋa ilikulyaꞋa i Kupasamgbanai i nam pa n a̱ɗa̱, kafu n soꞋo atakaci. 16N dana ɗa̱, mi o kudoku ma lyaꞋa kpamu ba, sai ayin a na i shanai o tsugono tsu Ka̱shile.”
17Ayin a na u ɗikai mataꞋan ma, ɗa u cikpai Ka̱shile u danai, “Isai na ka̱ta̱ i soꞋo uteku u ɗa̱. 18N dana ɗa̱, uteku n anana, mi o kudoku mo soꞋo ma̱kya̱n ba, sai tsugono tsu Ka̱shile tsu ta̱wa̱.”
19U ɗikai burodi ɗa u cikpai Ka̱shile, ɗa u wansai vu ɗa, ɗa u nekei le. U danai, “Na va ikyamba i va̱ i ɗa, e nekei adama a̱ ɗa̱. YaꞋin ili i nam pa adama a kuciɓasa nu mpa.”
20Nannai kpamu ayin a na u kotsoi ilikulyaꞋa ya, ɗa u ɗika mataꞋan. U danai, “Ma̱kya̱n† ma nam pa, uzuwakpani† u savu u ɗa wu mpasa n va̱ n na o lolotongi adama a̱ ɗa̱. 21Amma kukiye ku vuza na u kudenge mu wi ta̱ na ida̱shi e mevene nu mpa. 22Mpa Maku ma Vuma ma̱ kukuwa̱ ta̱ uteku u na Ka̱shile ke sheshei ɗe. Amma atakaci i ta̱ a kuvana vuza na u kudenge yi ka̱ta̱ a una yi va.” 23A̱ gita̱i mecenshenei uteku u le, yayi a̱ ka̱tsuma̱ ke le u kuyaꞋan nannai.
Yayi vuzagbayin?
24Ɗa kpamu kanananai ka̱ ɗenga̱i e mere me le, ko yayi u kokpo vuzagbayin vi le. 25Ɗa Yesu u danai le, “Aduniyan a nam pa ngono n uma a gbagbaꞋin o yotsongu uma utsura u le. Amma ele ta na a kudana ko e kuɗeke le A̱ja̱Ꞌa̱ a Uma. 26Amma a̱ɗa̱ ta i kuyaꞋan nannai ba. Kucikpa vuzagbayin a̱ ka̱tsuma̱ ka̱ ɗa̱, wo okpo maku ra̱ka̱, vuza vu kelime kpamu wo okpo kagbashi. 27To, yayi wo vuzagbayin dem, vuza na wi ida̱shi e mevene a asuvu a̱ ni ko vuza vu tsugbashi? Vuza na wi ida̱shi e mevene a asuvu ba? Amma mpa mi ta̱ a̱ ka̱tsuma̱ ka̱ ɗa̱ tsu kagbashi. 28I shamgba ta̱ nu mpa mayun a kanna ka na o kondosoi mu. 29N ka̱na̱ka̱ ɗa̱ ta̱ tsugono tsu Ka̱shile uteku u na Esheku a̱ va̱ a̱ ka̱na̱ka̱i mu feu tsu ɗa. 30Adama a na a̱ɗa̱ feu i lyaꞋa ka̱ta̱ kpamu i soꞋo e mevene o tsugono tsu va̱, ka̱ta̱ i da̱sa̱ngu a akuba o tsugono a kuyaꞋanka umaci kupa n u re wi Israila u nan lo afada.
Yesu u danai Biturusu wi ta̱ a kunana yi
(Mat. 26:31-35; Mar. 14:27-31; Yah. 13:36-38)
31“Sima, Sima, MalyaꞋi ma na mo folonoi u ciya̱ ɗa̱ uteku u na e ci yelikpe ya̱nji. 32Amma, n yaꞋan ta̱ kavasa adama a̱ nu, Sima, ciya̱ uneki u ka̱ɗu u nu u yikpa̱ ba. Amma ayin a na baci vi shika̱i unushi ɗa vu bonoi wa̱ va̱, vu dokusu aza a̱ nu a shamgba n utsura.”
33Ɗa wu ushuki, “Vuzavaguɗu, mpa n foɓuso ta̱ adama a na m bana n avu a̱ kunu ku ugbashi ko ukpa̱.”
34Yesu wu ushuki, “N dana wu Biturusu, kafu motoku ma sala n usana, vi ta̱ a kunana mu ali kutatsu. Vu dana avu vi yeve mu ba.”
35Ɗa Yesu we ecei le, “Ana n suki ɗa̱ babu nsolo n ajika ko ataka, i namba ta̱ ili?”
Ɗa a̱ ushuki, “A̱Ꞌa̱.”
36U danai le, “Amma gogo na yi baci nu nsolo ɗikai n ajika dem. Yi baci kpamu n otokobi ba, dengei ntogu n ɗa̱ ka̱ta̱ i tsula. 37Ayin a yawa ta̱ a na iɗani i eneki i nam pa i na yi adama a̱ va̱, ya shana: ‘E kece yi ta̱ a̱ ka̱tsuma̱ ka aza a na a ci yaꞋan ugbami u kaci n tsugono.’#Ish. 53:12. Ili i na keneki ka ɗanai adama a̱ va̱ yi ta̱ a kushana.”
38Ɗaɗa mukumitoni n danai, “Inda, Vuzagbayin, otokobi a ɗa na e re.”
Ɗa u danai, “A yawa ta̱.”
Yesu u vasai a Kusan ku Zaitun
(Mat. 26:36-46; Mar. 14:32-42)
39Yesu wu uta̱i tsu na u kiwanai, u banai a Kusan ku Zaitun, ɗa mukumitoni n ni n tonoi ni. 40Ana a yawai a̱ ubuta̱ wa, ɗa u danai le, “YaꞋin kavasa adama a na ka̱ta̱ i yikpa̱ a̱ ubuta̱ u kukondo ba.” 41U walai kelime kenu agisana kubaꞋin ku matan, ɗa u kuɗa̱ngi u yaꞋin kavasa. 42“Dada, vu ushuki baci, ɗika mataꞋan ma atakaci ma nam pa wa̱ va̱. Amma, n ucigi u va̱ ba, amma n u nu.” [ 43Kalingata ka̱ Ka̱shile ka̱ ta̱wa̱i wa̱ ni ɗa ko doki ni utsura. 44U yaꞋin kavasa n utsura n una̱mgbi u ka̱tsuma̱, ali mele ma̱ ni ma̱ ka̱na̱i kuɗa̱kpa̱sa̱ a iɗika tsu mpasa.]
45Ana u ɗenga̱i a̱ ubuta̱ u kavasa, ɗa u bonoi a̱ ubuta̱ wu mukumitoni n ni. Ɗa u cinai le alavu, n woꞋwi adama a̱ una̱mgbi u ka̱tsuma̱. 46We ecei le, “Yi ɗa̱i yi alavu? Ɗenga̱i, i yaꞋan kavasa adama a na, ka̱ta̱ i yikpa̱ a̱ ubuta̱ u kukondo ba.”
A̱ ka̱na̱i Yesu
(Mat. 26:47-56; Mar. 14:43-50; Yah. 18:3-11)
47A̱yi biꞋi a kadanshi ɗa ka̱bunda̱i ka uma ka yawai. Vuma vu na e ci ɗeke Yahuza a̱ ka̱tsuma̱ ka Kupanazere u ukai le kelime. U yawai u Yesu adama a na wo oɓongu yi. 48Amma ɗa Yesu we ecei ni, “Yahuza, vi ta̱ e kuneke Maku ma Vuma a una n woɓongi?”
49Ayin a na otoni e Yesu e enei ili i na yi a kuciga kuta̱wa̱, ɗa a danai, “Vuzagbayin, ci shilika̱ n otokobi a̱ tsu?” 50Ɗa vuza te vi le u gbatyai kutsuvu ku usingai ku kagbashi ko mogono ma anan ganu.
51Ɗa Yesu u danai, “Ka̱ta̱ vu doku kpamu ba.” Ɗa u saꞋwai kutsuvu ku vuma ka. Ɗa ku bonoi ku paɗarai kpamu derere.
52Yesu we ecei anan ganu vu gbagbaꞋin, n aza e kelime a kinda A̱Ꞌisa̱ a Gbayin, nu nkoshi m gbagbaꞋin, aza na a̱ ta̱wa̱i wa̱ ni, u danai, “Mpa vuza vu ma̱ga̱la̱ka̱ ɗa, ali ɗa i ta̱wa̱i n otokobi n alangu? 53Ayin tutu n ci yongo ta̱ n a̱ɗa̱ a̱ A̱Ꞌisa̱ a, amma i ka̱na̱ mu ba. Amma ayin a̱ ɗa̱ a ɗa na, an ka̱yimbi ka kulyaꞋa tsugono.”
Biturusu u nanai Yesu
(Mat. 26:57-75; Mar. 14:53-72; Yah. 18:12-27)
54A̱ ka̱na̱i ni ɗa a lazai n a̱yi a kubanka yi a kpaꞋa ku mogono ma anan ganu. Biturusu u tonoi le kucina̱ dadaꞋin. 55Amma ana a zuwai akina e mere ma̱ ka̱ba̱nga̱ ka kpaꞋa ka, ɗa a̱ da̱sa̱ngi. Biturusu feu u da̱sa̱ngi koɓolo n ele. 56Kagbashi ke mekere ke enei ni a̱ ida̱shi ɗevu n akina a. Ɗa wi indai ni magaba, ɗa u danai, “Vuma vu nam pa va feu wishi ta̱ koɓolo n a̱yi.”
57Amma, u nana ta̱, u danai, “Vuka, mpa n yeve yi ba.”
58M megeshe kpamu kenu, vuza yoku we enei ni, ɗa u danai, “Avu feu, vi ta̱ koɓolo n ele.”
Ɗa Biturusu wu ushuki, “Vuza vu nam pa, mpa, mi koɓolo n ele ba.”
59Ɗevu n viyum vi te va shana, vuza yoku u doku u gbagbalai ni, u dana, “Mayun, vuma vu nam pa wishi ta̱ koɓolo n a̱yi, adama a na a̱yi feu vuza vu Ga̱lili ɗa.”
60Ɗaɗa Biturusu wu ushuki kpamu, “Avu, n yeve ili i na vi ciya̱i ba.” Kafu u ɓa̱ya̱ngu una̱, ɗa motoku ma salai. 61Vuzagbayin u kpatalai ɗa wi indai Biturusu mayin. Ɗa Biturusu u ciɓai n kadanshi ka na Vuzagbayin u danai ni, “Kafu motoku ma sala anana, vi ta̱ a kunana mu ali kutatsu.” 62Ɗa wu uta̱i pulai u shika̱i ka̱u.
A̱duga̱ri o zoꞋosoi Yesu
(Mat. 26:67-68; Mar. 14:65)
63A̱duga̱ri a na a kinda Yesu a̱ ka̱na̱i kuzoꞋoso yi, n a lapai ni. 64A palai ni a̱shi, ɗa a lapai ni. Ɗa e ecei ni, “Avu keneki, yayi u dukpa̱i nu? YaꞋan kene!” 65Ɗa a yaꞋankai ni kadanshi ka gbani-gbani n a̱bunda̱i.
A bankai Yesu wa aza e kusheshe
(Mat. 26:59-66; Mar. 14:55-64; Yah. 18:19-24)
66N usana, nkoshi n gba̱ra̱gba̱ra̱ n uma koɓolo n anan ganu vu gbagbaꞋin, nu nlum n Wila̱ a gasai oɓolo. Ɗa a̱ tuka̱i Yesu kelime ke le. 67A danai, “Avu ɗa baci Kishi ka, dana tsu.”
Yesu wu ushuki, “N dana ɗa̱ baci, ya̱ kushuku mu ba. 68Me ece ɗa̱ baci feu, ya kudansa ba. 69Amma, ili i na i gita̱i gogo na, Maku ma Vuma mi ta̱ a̱ kuda̱sa̱ngu e kukiye ku usingai ku Ka̱shile Uba̱nga̱ri.”
70Ɗa ra̱ka̱ vi le, e ecei, “Avu ɗa wo Maku ma̱ Ka̱shile ma?”
Wu ushuki, “Derere ɗa i dansai, mpa ɗa.”
71Ɗaɗa ta na a danai, “Yi ɗa̱i ci cigai kpamu ci yeve? Tsu pana ɗe n una̱ u ni.”
Trenutno izabrano:
Luka 22: asgNT
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 2012 Wycliffe Bible Translators, Inc. All rights reserved
