Luka 20
20
E ecei utsura u Yesu
(Mat. 21:23-27; Mar. 11:27-33)
1Kanna ke te, an wi a kuyaꞋan kuyotsongusu punu a̱ A̱Ꞌisa̱ a Gbayin, n u danai Arabali a Singai, anan ganu vu gbagbaꞋin koɓolo nu nlum n Wila̱ nu nkoshi a̱ ta̱wa̱i wa̱ ni. 2A danai, “Dana tsu, n utsura we ne u ɗai vi a kuyaꞋan ili i nam pa dem? Yayi u nekei nu utsura u nam pa?”
3Ɗa wu ushuki, “Mi ta̱ feu a kuyaꞋanka ɗa̱ keci, danai mu, 4kusumbu ka akucina ku na Yahaya u yaꞋin, ku Ka̱shile ku ɗa ko ku uma ku ɗa?”
5Ɗaɗa e sheshei biꞋi uteku u le, ɗa a danai, “Tsu dana baci, ‘Ku Ka̱shile ku ɗa,’ wi ta̱ e kece tsu, ‘Yi ɗa̱i ɗa tsu kpa̱ɗa̱i kuneke ka̱ɗu wa̱ ni?’ 6Amma tsu dana baci, ‘Ku uma ku ɗa,’ uma ra̱ka̱ i ta̱ a kuvara tsu, adama a na a dana ta̱ Yahaya keneki kaꞋa.”
7Ɗa a̱ ushuki, “Ci yeve ko ku yayi ba.”
8Yesu u danai, “Mi feu a kudana ɗa̱ ko n utsura u yayi mi a kuyaꞋan ili i nam pa ba.”
Agisana a acimbi a gbani-gbani
(Mat. 21:33-46; Mar. 12:1-12)
9U lyaꞋi kelime n kudana uma agisana a nam pa: “Vuza yoku u yaꞋin kashina ka̱ nɗimbi ma Ayahuda, ɗa u nekei kaꞋa aza a zamalinga, adama a na a̱ la̱na̱ka̱ yi kaꞋa. A̱yi tamkpamu u banai a̱ ubuta̱ ali u yaꞋin ayin n a̱bunda̱i. 10Ana ayin a kutaꞋa a yawai, ɗa u suki kagbashi ka̱ ni ka bana ɗe, adama a na e neke yi umaci wu nɗanga n yoku punu a kashina ka. Amma aza a zamalinga a a lapai ni, ɗa o lokoi ni. U bonoi a kpaꞋa ekiye agaɗa. 11U doku u suki kagbashi ko yoku, amma a lapai ni ɗa e nekei ni wono, o lokoi ni o kubono a kpaꞋa ekiye agaɗa. 12U doku u suki vuza tatsu, ɗa o foroi ni ɗa o lokoi ni punu a ubaru.
13“Ɗaɗa vuza vu kashina va u danai, ‘Yi ɗa̱i n kuyaꞋan? Mi ta̱ a̱ kusuku maku ma̱ va̱ ma na n cigai, u gaꞋan ba e kuneke yi ta̱ tsugbayin ci ni.’
14“Amma ayin a na aza a zamalinga a e enei ni, ɗa a yaꞋin kadanshi biꞋi, a danai, ‘Maku ma̱ ni ma na. Tsu una yi, ka̱ta̱ tso okpo n kashina ka.’ 15Ɗa a taɗuki ni n tsupulai tsu kashina tsa. Ɗa a unai ni.”
Ɗa Yesu we ecei le, “Yi ɗa̱i vuza vu kashina va u kuyaꞋanka le? 16Wi ta̱ a kubana, ka̱ta̱ wu una aza a zamalinga a, ka̱ta̱ u zuwa aza o yoku kpamu aza a na a kindaka yi kaꞋa.”
Ana uma a a panai nannai, ɗa a danai, “U jebeshe biꞋi.”
17Yesu wi indai le magaba, ɗa u danai, “Yi ɗa̱i ili i na yi uɗani na lo yi a kudana, wo ta na:
‘Katali ka na amaꞋi a iwain, ka ɗa ko okpoi kenene ke mere.’?#Ishp. 118:22.
18Vuza na baci de u yikpa̱i a katali ka nan lo, wi ta̱ o kukoɗo agbati agbati, amma vuza na baci ka ka varai, ki ta̱ a kuminjarangu yi.”
Kutsupa ku utafu a̱ ubuta̱ u Kaisa
(Mat. 22:15-22; Mar. 12:13-17)
19Gogo lo, nlum n Wila̱ n anan ganu vu gbagbaꞋin a̱ la̱nsa̱i uye u na a̱ kuka̱na̱ yi, adama a na e yeve ta̱ u dansa ta̱ agisana a nam pa a adama a na u palukpa le. Amma i ta̱ a kupana wovon u uma.
20N kinda ku na Ꞌya a kuyaꞋanka yi, ɗa a̱ suki aza a kasaka aza a na a yaꞋin adanshi uma a̱ usuɓi a ɗa. A ciga ta̱ a̱ ka̱na̱ Yesu n ili i na u dansai, adama a na a banka yi a̱ ubuta̱ wu utsura u gomuna. 21Ɗa aza a kasaka a, e ecei ni, “Malum, ci yeve ta̱ vu tsu dansa ta̱ ka̱ta̱ kpamu vi yotsongu ili i na i gaꞋin. Vi ci yaꞋan kpamu cisheꞋe ba, amma vi yotsongu ta̱ n uye u Ka̱shile m mayun. 22U gaꞋan ta̱ tsu tsupa Mogono Kaisa† utafu, ko u gaꞋan ba?”
23We enei ugboji u le, ɗa u danai, 24“Yotsongi mu ikebe#20:24 La̱na̱ a kaci ku udani “Ikebe”, punu ɗe ka̱ta̱ vu la̱na̱ “Dinari” a̱ Ubuta̱ wi ili i Kuyeve. dinari vi te. Kululu ku yayi n kula ku na ki punu va?”
25Ɗa a danai, “Ku Kaisa ku ɗa.”
U danai le, “Nekei ili i na yi i mogono ili i ni. I Ka̱shile kpamu nekei Ka̱shile.”
26A fuɗa a̱ ka̱na̱ yi n ili i na u dansai e keteshe ka ba. Ɗa kucikpa o bonoi a yaꞋin mereve n wushuki u ni, ɗa a paɗai bini.
Kuɗenga̱ ka̱ a̱kpisa̱ n yolo
(Mat. 22:23-33; Mar. 12:18-27)
27A̱sa̱dukiya† o yoku a banai u Yesu n keci, ele ɗa aza a na a̱ ushuki an kuɗenga̱ ka̱ a̱kpisa̱ ki lo ba. 28A danai, “Malum, Musa u ɗanaka tsu ta̱, u danai, ‘Vuza na baci vuza ni u kuwa̱i, ɗa u ka̱sa̱kpa̱i vuka babu na vu matsai, vuza ni va u sosuku vuka va, adama a na u matsaka vuza ni va maku.’ 29Uma o yoku a ɗa a kpaꞋa ku te, i ta̱ uma e cindere. Vuza iyain u yaꞋin yolo, ali u kuwa̱i babu na vuka va vi ciya̱ kucina̱. 30Ɗa vuza ire u sosuki ni, ɗa u tsu kuwa̱ kpamu. 31Ɗa vuza tatsu u doku u sosuki kpamu, ali a kubana uma e cindere ele ra̱ka̱ a̱ kuwa̱i, a̱ ciya̱ kucina̱ n vuka va ba. 32Ɗa vuka va feu vu ta̱wa̱i vu kuwa̱i. 33To, kanna ka na a̱ kuɗengusa̱ a̱kpisa̱, vuka vi yayi wo ta na u kuɗamgba wo kokpo, an wo oloi ali e cindere a dem?”
34Ɗaɗa Yesu wu ushuki, “Uma a aduniyan a anana a nam pa i ta̱ a kuɗika a̱ma̱ci n o olotongi. 35Amma ta u kuyaꞋan nannai a̱ ka̱tsuma̱ ka aduniyan a na a̱ kuta̱wa̱ ba. Aza a na Ka̱shile ke enei a gaꞋin a̱ ciya̱ kuɗenga̱ ka̱ a̱kpisa̱ a kuyaꞋan yolo kpamu ba. 36O kudoku a̱ kuwa̱ ba, adama a na i ta̱ o kokpo tsa alingata. Muku n Ka̱shile n ɗa kpamu adama a̱ ubuta̱ u kuɗenga̱ a̱ ukpisa̱.
37“Amma a ukuna u na ko uma a̱ kuɗenga̱ a̱ a̱kpisa̱, ko Musa u kumgbasa ta̱ ukuna u nan lo ana u ɗanai u na maɗanga me kenu mi a̱ kukula̱. U ɗekei Vuzavaguɗu tsu nam pa: ‘Ka̱shile ki Ibrahim, n Ka̱shile ki Ishaku, n Ka̱shile ka Yakubu.’#Kut. 3:6. 38A̱yi Ka̱shile ka̱ a̱kpisa̱ ka ba, amma ka aza a wuma, adama a na ubuta̱ u ni u ɗa ele dem i n wuma.”
39Nlum n Wila̱ n yoku mu ushuki, “Vu dansa ta̱ mayin, malum.” 40O doku a kaꞋwan a yaꞋanka yi kadanshi n keci ba.
Kishi maku ma yayi?
(Mat. 22:41-46; Mar. 12:35-37)
41Ɗaɗa Yesu u danai le, “Nini ɗai tamkpamu ɗa a danai Kirisiti Kishi ka Maku ma Dawuda maꞋa? 42Dawuda a̱ ka̱ci ka̱ ni u ɗana ta̱ a Katagarda ki Ishipa,†
‘Vuzavaguɗu u danai Vuzagbayin vu va̱, “Da̱sa̱ngu e kukiye ku usingai ku va̱, 43sai ayin a na m bonokoi irala i nu a ɗaka va ataka e ene a̱ nu.” ’#Ishp. 110:1.
44Dawuda u ci ɗeke yi ta̱ ‘Vuzagbayin,’ nini ɗai tamkpamu u kubono maku ma̱ ni?”
Yesu u dansukai uma adama a nlum n Wila̱
(Mat. 23:1-36; Mar. 12:38-40)
45Ana uma ra̱ka̱ i lo a kupana ɗa Yesu u danai mukumitoni n ni, 46“YaꞋin daꞋin nu nlum n Wila̱. A ci ciga ta̱ kuꞋuka ntogu n gbagbaꞋin adama a na uma e ene le. A ci ciga ta̱ ikya̱shi e kuden, n ucigi wi ida̱shi i singai, kpamu a̱ unu a avasa n ubuta̱ u ka̱ɗiva̱. 47O tsu doro ta̱ agapa a̱ a̱ma̱ci#20:47 “A̱ma̱ci” punu na ele ɗa aza a na ali e le a̱ kuwa̱i. iꞋuwa i le, koɓolo n kuyaꞋan ka avasa a ugaɗi. Uma a nan lo a, i ta̱ a kutakacika le ka̱u.”
Trenutno izabrano:
Luka 20: asgNT
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 2012 Wycliffe Bible Translators, Inc. All rights reserved
