Yahaya 6

Yesu u cuwa̱ta̱ngi uma a̱kpa̱n a tawun

(Mat. 14:13-21; Mar. 6:30-44; Luk. 9:10-17)

1Ana ka nam pa ka lazai, ɗa Yesu u banai upashi u Mala ma̱ Ga̱lili (E ci ɗeke ta̱ feu Mala ma Tibariya). 2Ɗa ka̱bunda̱i ka uma ka ko tonoi ni adama a na e ene ta̱ u yaꞋin urotu wi ili i mereve a na u potsokpoi aza a mbanaki. 3-4Ayin a̱ Ka̱ɗiva̱ ka Kupasamgbanai ka yawa ta̱ ɗevu, ɗa Yesu u livanki a kusan m mukumitoni n ni ɗa u da̱sa̱ngi ɗe.

5Ana Yesu we enei ka̱bunda̱i ka uma ka a̱ kuta̱wa̱ wa̱ ni, ɗa we ecei Filibu, “Te ɗai tsa̱ kuciya̱ ilikulyaꞋa i na i kuyawa uma a nam pa ra̱ka̱?” 6(Yesu u yaꞋanka ta̱ Filibu keci ku nam pa adama a na u kondo yi, adama a na Yesu u yeve ta̱ ɗe ili i na u kuyaꞋan.)

7Ɗa Filibu wu ushuki, “Adama a na yaba dem u ciya̱ kawanshi ko burodi kenu, wi ta̱ a kulaꞋa katsupu ka na vuza u kuciya̱ u yaꞋan baci wotoi kunla̱i a kuyaꞋan ulinga.”#6:7 Katsupu punu na ka ɗaɗa derere n ikebe amangatawenre (200) tsu na ele e ci ɗeke dinari.

8Makumitoni mo yoku vuza na e ci ɗeke Andarawu, Sima Biturusu vuza ni u danai, 9“Maku mo yoku maꞋa na m burodi vi itabi† vu tawun n adan e re. Amma yi ɗa̱i ili i nam pa i kuyaꞋanka ka̱bunda̱i ka uma ka nam pa?”

10Ɗa Yesu u danai, “Danai uma a a̱ da̱sa̱ngu.” (A̱ ubuta̱ wa ta na wi ta̱ m mita̱.) Ɗa uma ra̱ka̱ a̱ da̱sa̱ngi, ali a i ta̱ a kuyawa a̱kpa̱n a tawun (5,000). 11Ɗa Yesu u ɗikai burodi va ɗa u cikpai Ka̱shile. Ɗa u pecekei uma a na i lo ida̱shi ra̱ka̱, ɗa u yaꞋin kpamu nannai n adan a sapu ɗa yaba dem ɗa u cuwa̱i.

12Ana ra̱ka̱ vi le a lyaꞋi ka̱u, ɗa u danai mukumitoni n ni, “Ɓolongi alyashi a na a buwai ko ili ka̱ta̱ i va̱ma̱ ba.” 13Ɗa o ɓolongi alyashi o burodi a na a buwai ali ɗa a yawai mbana kupa ni n re.

14Ana uma a enei ili i mereve i na Yesu u yaꞋin, ɗa a danai, “Mayun a̱yi Keneki ku uzagbi ka na ci a kuvana kaꞋa ka na ki lo a̱ kuta̱wa̱ a aduniyan.” 15Yesu u yeve ta̱ a na uma i e kusheshe ka̱ta̱ a gutsaka yi wo okpo mogono me le, ɗa u lazai u banai nsasan endeꞋen.

Yesu u walai a gaɗi vu mala

(Mat. 14:22-33; Mar. 6:45-52)

16Ana kanna ka̱ yikpa̱i, ɗa mukumitoni n Yesu m banai a mala. 17Ɗa a uwai a kpantsu a kupasa mala a kubana a Kafarnahum. Ubuta̱ u lima̱na̱ ta̱, babu Yesu u yawa we le. 18A ayin a nan lo ɗa wunla̱i wu utsura u ɗenga̱i, ɗa u zuwai aɓau a gbagbaꞋin a̱ ɗenga̱i a mala ma. 19Ana mukumitoni ma a antikai kpantsu sai e mere ma mala,#6:19 Ubuta̱ wa u dana ta̱ “a antika ta̱ meli vu tatsu ko vu na̱shi”. Mala ma̱ Ga̱lili meli kunla̱i ɗa a kubana upashi. Derere ɗa kpamu wi n ikilomita kupa n i tatsu. ɗa e enei Yesu a nwalu a gaɗi vu mala a kuyawa ɗevu n ele. Ɗa a panai wovon ka̱u. 20Amma u danai, “Mpa ɗa, ka̱ta̱ i pana wovon ba.” 21Ɗa u uwai a kpantsu ka uteku u na a cigai, ɗa gogo va ɗa kpantsu ka ku yawai a̱ ka̱kina̱ a̱ ubuta̱ u na i a kubana.

22Ana kayin ka asai, uma a na o okpoi a̱ ka̱kina̱ ka mala n upashi u nan ɗe, ɗa e yevei a na kpantsu ku te ku ɗa ku yongoi ɗe koci. E yeve ta̱ Yesu u uwa a ku ɗa adama a na u laza m mukumitoni n ni ba. 23Antsu o yoku a̱ uta̱i a̱ likuci i Tibariya, ɗa a yawai a̱ ubuta̱ u na Vuzagbayin u cikpai Ka̱shile adama o burodi vu na uma a takumai ɗe va. 24Ana ka̱bunda̱i ka uma ka ke enei a na Yesu wi lo ba, mukumitoni n ni feu n ɗa mi lo ba, ɗa uma a a uwai a antsu ɗa a pasai a kubana Kafarnahum a̱ kula̱nsa̱ yi.

Yesu ɗa burodi vu wuma

25Ana a yawai ɗa a cinai Yesu, ɗa e ecei ni, “Malum, nini ɗa vi yawai punu na?”

26Ɗa wu ushuki, “Mayun, yi ta̱ a̱ kula̱nsa̱ mu adama a na i takumai burodi ɗa i cuwa̱i. Ya̱ kula̱nsa̱ mu adama a na i yeve ukuna wu urotu wi ili i mereve i va̱ ba. 27Ka̱ta̱ i gbagbala kula̱nsa̱ ilikulyaꞋa i na i kuna̱mgba̱ ba, amma kucikpa i gbagbala kula̱nsa̱ ilikulyaꞋa i wuma u babu uteku. IlikulyaꞋa i nam pa i ɗa i na Maku ma Vuma me kuneke ɗa̱ adama a na Ka̱shile Esheku u yotsongu ta̱ a na wu ushuki n a̱yi.”

28Ɗa e ecei ni, “Yi ɗa̱i Ka̱shile ki a kuciga ci yaꞋan?”

29Ɗa wu ushuki, “Ili i na Ka̱shile ka cigai i yaꞋan i ɗa na: Nekei a̱ɗu a̱ ɗa̱ n vuza na Ka̱shile ka̱ suki.”

30Ɗa a danai, “Sai vi yaꞋanka tsu ili i mereve, vi ciga baci tsu ushuki n avu. 31Ikaya i tsu i lyaꞋa ta̱ mana† e mere mu une, ɗa a ɗanai kakuna ka nam pa a Katagarda ka Ciɗa: ‘U nekei le burodi vu na vu uta̱i gaɗi a takuma.’ ”#Kut. 16:4, 15.

32Ɗa u danai, “N dana ta̱ mayun, Musa ɗa u nekei ɗa̱ burodi e mere mu une adama a na i takuma ba. Dada vu va̱ ɗa u ci neke ɗa̱ burodi vu mayun vu na vu uta̱i gaɗi. 33Burodi vu na Ka̱shile ke ci neke vu ɗa kpamu vu na vu uta̱i gaɗi, vu na kpamu vi ci neke wuma a aduniyan.”

34Ɗa a danai, “Vuzagbayin, neke tsu burodi vu nam pa va ayin tutu.”

35Ɗa u danai, “Mpa ɗa burodi vu na vi ci neke wuma. Vuza na baci de dem u ta̱wa̱i wa̱ va̱, kambulu ko kudoku ka̱ ka̱na̱ yi ba. Vuza na kpamu u nekei ka̱ɗu wa̱ va̱, kakuli ko kudoku ka̱ ka̱na̱ yi ba. 36N dana ɗa̱ ta̱ ɗe, ye enei mu, amma i neke a̱ɗu a̱ ɗa̱ nu mpa ba. 37Yaba dem vi le na Dada u nekei mu wi ta̱ a̱ kuta̱wa̱ wa̱ va̱, mpa ta na ma kuꞋiwan yi ba. 38Mu uta̱ ta̱ gaɗi adama a na n yaꞋan ili i na Ka̱shile, vuza na u suki mu, wi a kuciga n yaꞋan, amma ili i na mi a kuciga n yaꞋan ba. 39Ili i na vuza na u suki mu u cigai mu n yaꞋan i ɗa na: Ka̱ta̱ a̱ ka̱tsuma̱ ka aza a na Ka̱shile ke nekei mu, ko vuza te u puwa̱nka̱ mu ba,#Yah. 17:12; 18:9. amma mayun ɗa n ɗengusa̱ le ra̱ka̱ a kanna ku ukocishi. 40Aza a na e enei Maku ma ɗa e nekei a̱ɗu n a̱yi, i ta̱ a̱ kuciya̱ wuma u babu uteku, mi ta̱ kpamu a̱ kuɗengusa̱ le a kanna ku ukocishi. Na va ɗaɗa ili i na Dada vu va̱ u cigai.”

41Ɗa uma a̱ gita̱i kuyaꞋanka yi mololo adama a na u danai, “Mpa ɗa burodi vu na vu uta̱i gaɗi.” 42Ɗa a danai, “Na va ɗaɗa Yesu kolobo ka̱ Isuhu† ka ba? Ci yeve ta̱ esheku a̱ ni n a̱na̱ku a̱ ni. Nini ɗai u kudana, ‘Mpa ɗa mu uta̱i gaɗi’?”

43Ɗa wu ushuki, “Ka̱sa̱kpa̱i mololo uteku u ɗa̱. 44Dada a̱yi ɗa vuza na u suki mu. Babu vuza na u kuta̱wa̱ wa̱ va̱, sai Dada koci u tono n a̱yi a̱ kuta̱wa̱ wa̱ va̱, ka̱ta̱ mpa n ɗengusa̱ vuma vu nan lo a kanna ku ukocishi. 45Eneki a ɗana ta̱, ‘Ka̱shile ki ta̱ o kuyotsongusu le ra̱ka̱.’ Yaba dem vu na u panakai Dada ɗa u piꞋisai ili i na mi o kuyotsongusu wi ta̱ a̱ kuta̱wa̱ wa̱ va̱. 46Ko vuza ka̱ta̱ we ene Dada ba, mpa ɗa koci vuza na Ka̱shile ka̱ suki mpa ɗa kpamu me enei Dada va.

47“N dana ɗa̱ mayun, vuza na baci de dem u nekei ka̱ɗu ka̱ ni nu mpa, wi ta̱ n wuma u babu uteku. 48Mpa ɗa burodi vu na vi ci neke wuma. 49Ikaya i ɗa̱ i lyaꞋa ta̱ mana e mere mu une, ɗaɗa ta na a̱ kuwa̱i. 50Na ɗaɗa burodi vu na vu uta̱i gaɗi, vuza na baci de dem u takumai vu ɗa u kukuwa̱ ba. 51Mpa ɗa burodi vu na vi ci neke wuma vu na vu uta̱i gaɗi. Vuza na baci de dem u takumai burodi vu nam pa wi a̱ kukuwa̱ ba. Burodi vu na n kuneke ɗa̱ ikyamba i va̱ i ɗa, i na n nekei adama a na uma a aduniyan a̱ ciya̱ wuma.”

52Ɗa Ayahuda a̱ gita̱i kanananai uteku u le, a danai, “Nini ɗai vuma vu nam pa u kuneke tsu ikyamba i ni tsu takuma?”

53Ɗa u danai, “Mayun i takuma baci ikyamba i Maku ma Vuma ɗa i soꞋi mpasa i ni ba, ya̱ kuciya̱ wuma ba. 54Aza a na a takumai ikyamba i va̱ ɗa o soꞋi mpasa n va̱, a̱ ciya̱ ta̱ wuma u babu uteku. Mpa kpamu mi ta̱ a̱ kuɗengusa̱ le a kanna ku ukocishi. 55Ikyamba i va̱ ilikulyaꞋa i ɗa i mayun, mpasa n va̱ kpamu ili i kusoꞋo i ɗa i mayun. 56Aza a na a takumai ikyamba i va̱, ɗa kpamu o soꞋi mpasa n va̱, i ta̱ ida̱shi wa̱ va̱, mpa kpamu ida̱shi we le. 57Dada vu wuma ɗa u suki mu, mi ta̱ kpamu n wuma adama a Dada. Adama a nannai vuza na baci u takumai ikyamba i va̱, wi ta̱ a̱ kuciya̱ wuma adama a̱ va̱. 58Mpa ɗa burodi vu mayun vu na vu uta̱i gaɗi. Vuza na baci de dem u takumai burodi vu nam pa, wi ta̱ a̱ kuciya̱ wuma u babu uteku, u kukuwa̱ uteku u na ikaya i tsu i na a lyaꞋi mana a̱ kuwa̱i ba.” 59Yesu u dansa ta̱ ili i nam pa ra̱ka̱ a ayin na a na wi a kuyaꞋan kuyotsongusu a̱ kunu ka avasa† a Kafarnahum.

Uma n a̱bunda̱i a̱ ka̱sa̱kpa̱i kutono Yesu

60Ana aza o kutoni e Yesu a panai nahannai, ɗa a danai, “Ili i nam pa yi ta̱ n atakaci e kuyeve. Nini ɗai vuza u kushuku n i ɗa?”

61Yesu u yeve ta̱ a na ele i o mololo, ɗa we ecei, “Ili i nam pa ya i saꞋwa ɗa̱ ta̱ a̱ɗu? 62To, nini ɗai i kusheshe ye ene baci Maku ma Vuma o kubono gaɗi kpamu? 63Ayinviki a̱ Ka̱shile a ɗa e ci neke wuma u babu uteku. Utsura u vuma wi a kuyaꞋan ili ba. Kadanshi ka na n dansakai ɗa̱ ka zuwa ɗa̱ ta̱ i ciya̱ Ayinviki a̱ Ka̱shile a na e ci neke wuma. 64Amma a̱ɗa̱ vi yoku i neke a̱ɗu ba.” (Yesu u yeve ta̱ ɗe n ugiti aza a na a kuꞋiwan kuneke a̱ɗu, n vuza na kpamu u kudenge yi.) 65Ɗa u danai, “Adama a nannai n dana ta̱, ‘Dada u tuka̱ baci n vuza wa̱ va̱ ba, vuma vu nan lo wi a kufuɗa kuta̱wa̱ ba.’ ”

66Adama a ili i na Yesu u danai, aza o kutoni a̱ ni n a̱bunda̱i a̱ shirikpa̱i ni kucina̱ ɗa a̱ ka̱sa̱kpa̱i kutono yi.

67Ɗa we ecei Kupanazere, “A̱ɗa̱ feu i kuka̱sa̱kpa̱ mu ta̱, ka̱ta̱ i laza?”

68Sima Biturusu wu ushuki, “Vuzagbayin, u yayi tsa kubana? Avu ɗa vi n kadanshi ke kuneke wuma u babu uteku. 69Ci neke ta̱ a̱ɗu ci yeve ta̱ kpamu a na avu ɗa Vuza Ciɗa vu na vu uta̱i a̱ Ka̱shile.”

70Ɗa Yesu u danai, “Mpa n zagba ɗa̱ Kupanazere† ba? Vuza te ɗa̱ kpamu kalijani kaꞋa!” 71Wi ta̱ a kadanshi ka Yahuza, ulobo u Sima Iskaryoti, adama a na a̱yi ɗa u kudenge yi, ko a na wi a̱ ka̱tsuma̱ Kupanazere a.

Trenutno izabrano:

Yahaya 6: asgNT

Istaknuto

Podijeli

Kopiraj