Luke 20
20
Yesu yana abavehimeya inubana fa'ina hitoliluveluvena.
Madiu 21:23-27; Maki 11:27-33
1-2Tova sa'eyana Yesu manuwa-tafalolo againe kaliva givehavehawaledi kadu Yaubada yana Venuwa'ata Yamumuna fa'ina gilulumamaledi tu abaveyao ana tofaisewa kikaiwabudiyao be Mosese yana vehimeya ana tovehawala kadu kaliva lakahidiyao buye Bana againe hi'ela higayo, “O ugahema, ha'againe ya abavehimeya uvaini-yo boiyesedi mena gaitoma tulina tulina ufifaisewadi? Hakwa'adi mena abavehimeya givele-yo hidedemi uhuluva?”
3-4Yesu gigayo, “Kadu toliluvaluva sa'eyana agaimiya ganasena. Au omi wanagaheku, hakwa'adi abavehimeya Yoni Tobafitaiso givele-yo kaliva gikivebafitaisoyedi? Ka'i yana abavehimeya Yaubada againe give'inuba o ka'i kaliva agaidiya?”
5Yesu gigahe-yo badi buye hive'agahegahe higayo, “Ka'i kanagahe vaita Yoni yana abavehimeya Yaubada againe gidave'inuba au Bana ginagayo, Ka'i Yaubada againe digo, gavadi-yo Yoni yana gahe keke wadavetumaganeni? 6Tu ka'i kanagahe vaita kaliva agaidiya gidave'inuba, kaliva moya'aidi hinatutuve'alikada, fa'ina badi hinuwave'avina vaita Yoni Yaubada bonana ana to'awatalatalaina.”
7Hidedemi hinuwanuwa fa'ina Yesu yana toliluvaluva hidemi hifatana higayo, “Ka'iwa. Ime keke adahalamaneni.”
8Au Yesu gigahedi gigayo, “Omi keke wadagaheku fa'ina, meda anafaiweya Iya keke ganavenuwa'atami hade'againe yaku abavehimeya give'inuba-yo hida gaitoma gafifaisewadi.” Au hidemi Yesu gigahe.
Faha ana to'itave'avina koyodiyao adi gahetalahobuhobu.
Madiu 21:33-46; Maki 12:1-12
9Tu Yesu badi tonagona bonadi gifata-yo yo'o agaidiya gahetalahobuhobu hidede amine gilukahihiyena gigayo, “Kaliva sa'eyana ai guwana ana egana kelefi yana babi againe gifahana, ada kaliva tufoidi faha ana to'itave'avina gisedi tu yana melala gihegena gina mali fafaliya gimiyami lauva tunugina. 10Himiyami tu kelefi ana aikolu ana tova giyemu againe, tonifaha ana agetoga faha ana to'itave'avina agaidiya gi'iveninisena be yana faha guwana tufona hinavelena fa'ina. Atu to'itave'avina agetoga himununa be makagekagena hiwavina. 11Au kadu agetoga velugana gi'iveninisena tu to'itave'avina himununa be hikivekoyo-mo'ena au makagekagena hiwavina. 12Kadu agetoga anaveto gi'iveninisena ada hida kalivai-nadi hi'iveki'onina be ala kwaune hihegevihilena.
13Au tonifaha gigahe gigayo, Gavadi ganagani? Natuku natu'ase'aseku gana'iveninisena. Ka'i bana'e hinave'amohimohinena. Hidemi gigahe.
14Tu to'itave'avina hi'ita-yo taudiyao hive'agahegahe higayo, Hida hima bana ana hilafa. Kanaluve'alikana be higa yana babi taudeyao kanavaina. 15Au ala kwaune hituwa'atugena be hiluve'alikana.”
Au hidedemi Yesu gigahe tu gitoliluvaluva gigayo, “Wananuwanuwa. Tonifaha badi to'itave'avina agaidiya gavaimi ginaga? 16Au ginayewa'ela be ginaluve'alikadi ada yana faha to'itave'avina velugadiyao nimadiya ginasena.” Tovanenega hinogalini-yo higahe higayo, “Au keke, keke-mo'a.”
17 #
Sam 118:22
Au Yesu gi'itadonedonedi gigayo, “Omi wavekeke vaita gava vita galukahihiyena-ma keke ginalakayemu tu omi wakiloweku ma kahihiku Yaubada bonana eto'etoladina giyakahina. Bonai-nadi ana nuwanuwa ma'i wahalamanena o ka'i keke? Gigayo,
Ogola manuwa ana to'aiyogona hikilowena-ma
au holili'abi manuwa hinafane-mo'ane gimidimidi.
18 #
Ais 8:14-15
Wa'ita, gaveyao moya'aidi ogolai-nadi againe hinabe'u-ma luludi hinadobona, atu hai kaliva ogola gina'alatagona, medema ginafuwa-mo'ena.” Au hidemi Yesu gigahe.
19 #
Lu 19:47-48
Tu badi Mosese yana vehimeya ana tovehawala kadu abaveyao ana tofaisewa kikaiwabudiyao mena gahetalahobuhobu badi fa'idiya Yesu gigaheyena-ma hi'ayaunena fa'ina, nuwanuwadi medema bai-nadi againe hinakive'avina. Atu yo'o himatausedi fa'ina, higa-wayoga keke adifaiweya.
Yesu takesi ana sewadi fa'ina hitoliluveluvena.
Madiu 22:15-22; Maki 12:13-17
20Tu badi miYuda adi tonagona keke adifaiweya Yesu hinamadukive'avini fa'ina, aimo hilulubodena ada yadi kaliva tufoidi hivegidedi be yo'o hinafadiya hinanaukau tu vaita kaliva velemodi amine hinahuluva. Nuwanuwadi Yesu tamo yana bonalaufata againe hinavebauna be higa adifaiweya kabemani yana wafaiwala ma yana abavehimeya againe hinahegenauwena. 21Au tonaukau hitoliluveluvena higayo, “Tovehawala, ime ahalamanena ya gahe ya vehawala au tunutunugina, kadu kaliva moya'aidi u'itadi leleleya tu Yaubada yana eda fa'ina uvehavehawala velemo'ena. 22Au anatoliye, kwanaLoma yada tokaiwabu lakahina Sisa againe takesi kanasena, ka'i medema gilubodana o ka'i keke?”
23-24Hidedemi hitoliluvaluva tu Yesu yadi nuwanuwakau gi'ayaunena ada gigahedi gigayo, “Mani kabala wanavehawaleku. Hida hakwadi magigina? Kadu hakwadi ana egana mene kabala againe hikilumini?” Badi higayo, “Bana Sisa.”
25Bana gigahedi gigayo, “Au hadema Sisa yana lokoloko, medema Sisa againe wanasena. Kadu hadema Yaubada yana lokoloko, medema Yaubada againe wanasena.”
26Au keke adifaiweya Yesu yana bonalaufata againe hinavebauni-yo ginakoyo kaliva matadiya. Ada yana bonalaufata fa'ina hiyaulowoga ada au hive'amata.
To'alika yadi mididi-havagi fa'ina Yesu hitoliyena.
Madiu 22:23-33; Maki 12:18-27
27Tu tonagona tafatafalolodiyao adi egana Sadusi tufoidi Yesu againe hi'ela be hinatoliluveluvena. Badi'iyao ma higahe vaita aimo tova mulina to'alika keke hinamididi-havagi. 28#2Veh 25:5Badi higayo, “Tovehawala, Mosese yana buki-vehimeya againe hidede amine gi'etoladi. Ka'i kaliva sa'eyana kwamayoku ginanagina ada natudi keke tu gina'alika, au kaliva tobohiyana yana vayasi anafaiweya gidanagina be tobohiyana ana hilafa fa'ina natuneyao gina'ivetubugidi. Au vehimeya hidede amine Mosese giveleda. 29Au kaliva tobohiyaneyao seveni himiyami tu tomo'ainagona kwamayoku ginagina ada natudi keke tu gi'alika. 30-31Ada taina yana vayasi ginagina ada natudi keke tu gi'alika. Meda anafaiweya kaliva anaveto be hinunauwena tu taina kaliva anaveseveni natuna keke tu gi'alika. 32Muliya-mo'ane kadu kwamayoku gi'alika. 33Au kaliva adiveseveni kwamayoku sa'eyana hinagina fa'ina, aimo tova mulina kaliva hinamididi-havagi ana toveya bana kwamayoku-nadi ma gava kaliva vavinena?”
34Tu Yesu bonadi gifatana gigayo, “Badi kaliva vevine hida aituhai-nadi babiya himimiyami-ma hinaginagi hivenavenagi. 35-36Atu badi gaveyao Yaubada givehawadi vaita gilubodadi be alikeya hinamididi-havagi be aimo tova mulina aituhai-nadi againe hinamiyami, medema keke hinanagi, kadu keke hina'alika-havagi fa'ina yadi miyami badi lobama ana tovenuwa'ata yadi miyami amine. Kadu Yaubada alikeya ginasivemidididi fa'ina, badi Yaubada natuneyao. 37#Yem 3:6Omi wagahegahe vaita to'alika keke hinamididi-havagi tu kaliva velemona hinamididi-havagi ma Mosese tauna yana buki againe givehawaleda. Wa'ita, ai giyabelina tu keke gida'alahini ma kahihina againe Mosese Kaiwabu givewagana Abelahamo yana Yaubada kadu Aisake yana Yaubada kadu Yakobu yana Yaubada, badi kalivai-dina alu'aluwadi yawayawadi himimiyami amanadi. 38Bana Yaubada ma keke ali'alikadiyao yadi Yaubada, au kaliva alu'aluwadi yawayawana yadi Yaubada, fa'ina badi kalivai-dina tuwai-mo'ena hi'alika-ma adamoya wayawaidi Yaubada matane himimiyami.”
39Hidedemi Yesu gigahe-yo Mosese yana vehimeya ana tovehawala tufoidi higahe higayo, “Tovehawala, ubonalaufata yamumuna.” 40Yesu bonadi gifatana yamumuna fa'ina badi tonagona tafatafalolodiyao toliluvaluva kadu keke velugana hidaseni, au himatauta fa'ina hi'ilova.
Keliso inubana fa'ina.
Madiu 22:41-46; Maki 12:35-37
41Tu Yesu tonagona tafatafalolodiyao agaidiya toliluvaluva gisena gigayo, “Gavadi-yo tovehawala higahe vaita Yaubada yana Tovegida ana egana Keliso Devida bwanenena? 42-43#Sam 110:1Bana Devida tauna Same ana buki againe gigahe gigayo,
Bana Yaubada Kaiwabu iya yaku Kaiwabu gigahena gigayo,
Nima i'atagikuya unahiyoto. O unamiyami tu
nibaimomo ageyafayafaniya ganasedi.
44Au hidede amine Devida Keliso givewagana yaku Kaiwabu, tu gavaiya'amine yana Kaiwabu kadu bana bwanenena muliya gitubuga amanadi?”
Yesu Mosese yana vehimeya ana tovehawala
gihawavekoyoyedi.
Madiu 23:1-12; Maki 12:38-40; Luke 11:43
45-46Yesu au hidemi givehawala ada kaliva moya'aidi aimo hivanevanenega tu ana tomuliya givenuwa'atadi gigayo, “Taumiyao wana'itave'avimi be Mosese yana vehimeya ana tovehawala yadi dewa keke nuwami gina'abini. Nuwanuwadi aikeva tunugina hina'oseni-yo abakimokimone againe hinanunudadana be kaliva hinalusiuleyedi kadu hinagayo, Velemodi. Nuwanuwadi manuwa-abavehawala ana egana sinagogi agaidiya kadu avemwamwala againe abavetoga kikaiwabuna againe hinavetoga. 47Ada sikwasikwadiyao yadi lokoloko hilemadi ada hive'ove'o'ola-fa'ila be higa kaliva hinahawaveyamumuyedi. Yadi koyona ve'o'ola-fa'ila againe hikevana fa'ina adi vita gavatubuga hinanuhagana.” Au hidedemi Yesu givenuwa'ata.
Trenutno izabrano:
Luke 20: viv
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 2003, Wycliffe Bible Translators, Inc. All rights reserved.
