Luke 15
15
Kaliva sifi sa'eyana ginuhegena-ma ana gahetalahobuhobu.
Madiu 18:12-14
1 #
Lu 5:29-30
Tova sa'eyana takesi ana toyaudi kadu tokoyona velugadiyao moya'aidi Yesu againe hiyo'oyo'o be bonana hinanogalina. 2Tu tonagona tafatafalolodiyao adi egana Falisi kadu Mosese yana vehimeya ana tovehawala hivebutu hi'alawoluwolu higayo, “Medema kaliva tokoyona givevetobohiyanedi buye hi'au'a.”
3-4Au hidede amine higahe fa'ina Yesu hida gahetalahobuhobu agaidiya gilukahihiyena gigayo, “Ka'i kaliva sa'eyana agaimiya yana sifi 100 tu sa'eyana gidanuhegena, gavaimi gidagani? Au sifi 99 ubuleya gidanuyabuyabudi tu sifi ginuhegena-ma gidalelena. Gidalelelena gidanunauwena tu gidanuhagana. 5Ada ahe gidanuhagana againe, gida'avalana be yana wavemwamwala gidanauwena yana manuweya. 6#Lu 19:10Ada ahe gidayemu-yo tobohiyaneyao be yana yo'o gidakovavaga'auhidi gidagahedi gidagayo, Omi buye kanavemwamwala, fa'ina yaku sifi ganuhegena-ma ahe ganuhagana. 7Gagahemi meda anafaiweya tokoyona sa'eyana yana nuwavilana fa'ina vemwamwala lakahi-mo'ena lobameya ginalakayemu, tu yamumudiyao 99 au yegayegadiyao fa'ina keke hidanuwavilani-ma badi fa'idiya vemwamwala ma'ita.” Au hidedemi Yesu gigahetalahobuhobu.
Kwamayoku yadi mani siliva teni tu sa'eyana
hinuhegena-ma ana gahetalahobuhobu.
8Kadu Yesu gigayo, “Ka'i kwamayoku yadi siliva teni tu sa'eyana hidanuhegena digo, gavaimi hidagani? Lamufa hidakabuna manuwa matatabuna hidagili-'owona be hidalelena. Hidalele-hagihagiyena hidanunauwena tu hidanuhagana. 9Ada ahe hidanuhagana againe tobohiyadiyao be yadi yo'o hidakovavaga'auhidi hidagayo, Omi buye kanavemwamwala fa'ina yama mani siliva anuhegena-ma ahe anuhagana. 10Gagahemi meda anafaiweya tokoyona sa'eyana yana nuwavilana fa'ina Yaubada yana tovenuwa'ata hivemwamwala.”
Yaubada yana hinekalikali tokoyona fa'idiya Yesu givehawala.
11Kadu gahetalahobuhobu anaveto Yesu gilukahihiyena gigayo, “Kaliva sa'eyana natuneyao luhei. 12Ada kwamaneya tamana againe gigahe gigayo, Kamaku, lokoloko aku du'u ma udaveleku. Au yana lokoloko natuneyao agaidiya gifolakena.
13 #
Gah 29:3
Himiyami aiyeta keke moya'aina tu kwamaneya yana lokoloko moya'aina givagakokona, gilowoga be gina lauveya mali fafali againe gimiyami. Medede againe gakahikahi tulina tulina agaidiya yana mani giluyauyaulena. 14Tu ahe yana mani givehavaidi-yo mena fafali-nadi againe lokabudubudula gilakayemu, au givebutu mafu gilaulauna anaga keke. 15Au gina melalai-nadi ana kaliva-lakata sa'eyana againe give'agetoga. Ada givegidena be ginana yana babi sa'eyana againe yana bawe gina'itave'avidi. 16#Gah 23:21Ada nuwanuwana lakahina bawe adi bini a'a fwayafwayana againe gina'ahiyauwa tu keke tamo hakwadi ma'i a'a gidaveleni.
17Gimiyami tu nuwanuwa ayaugina a givaina be gi'ayaunena againe gigayo, Kwavakwavaku. Kamaku yana tofaisewa yuwa adi waga tu iya'eku ma hidedei mafulaugeya gana'alika. 18Ganamidi be kamaku againe ganana ada bana againe ganagahe ganagayo, Kamaku ahe gakoyo Yaubada matane kadu o mataniya. 19Keke gidalubodaku be unahawavenatuneku. Au unavehimeyeku be ya tofaisewa amine ganamiyami. Au hidedemi tauna nuwahinage gigahe. 20Au gitowamidi be gilowoga tamana againe.
Aimo lauveya gi'ela'ela tu tamana gi'itana be gihinekalikaliyena. Au gimadu gi'atulauhina giveyaugina.
21Au kwamana gigahe gigayo, Kamaku, Yaubada matane kadu o mataniya ahe gakoyo ada keke gidalubodaku be unahawavenatuneku.
22Au hidedemi gigahe tu tamana ana agetoga gigahedi gigayo, Wamadu, vaigau yamumu-mo'ena wa'aliye be wave'oseni, kadu nimalukabubu nimane wahifo, ageyafayafa agene waseni. 23Bulumakau natudi veve'ahiyauwana wa'aliyeni be wamunu. Avemwamwala againe kanavemwamwala-mo'a. 24#Kl 2:13Fa'ina natuku vaita gida'alika tu ahe giyemu-havagi, kadu vaita gadanuhegeni tu ahe ganuhagana. Au hivebutu hikidewadewa be hivemwamwala.
25Badi yadi wavemwamwala hi'au'a tu tomo'ainagona faheya gimiyami be giyewayewana melaleya. Manuwa liline giyemu tu alata kadu vaga ginogalina. 26Au agetoga sa'eyana giyowanina be gi'ela ada gitoliluveluvena gigayo, Wada gavaimi-yo modawa butuna ganogalini? 27Ma agetoga gigayo, Me o taini a gi'ela ada tama gigahe be bulumakau veve'ahiyauwana ahe amununa, higa natuna wayawaina ginuhagana fa'ina.
28 #
Yon 3:10, 4:1 Au tomo'ainagona gi'ila'a ada manuwa ana luku gidibutoyogena. Medema fa'ina bana tamana gihobu gihawanuwenuwena vaita ginaluku. 29Tu tamana againe gibonalaufata gigayo, U'ita, hida malamala moya'aina againiya gaveve'agetoga. Ya vehimeya keke tamo gadadibutoyogeni tu keke tamo udaveleku, keke-mo'a. Keke tamo kevakeva kabi'ona manugose natudi amine udaveleku-yo tobohiyakweyao buye adavemwamwala. 30Tu wama natu ya lokoloko vevine yamayamadadadiyao agaidiya gihebana amanadi bana fa'ine bulumakau veve'ahiyauwana umununa.
31Tamana gigahena gigayo, Ho natuku, tova moya'aina o iya buye kamimiyami. Yaku gaitoma moya'aina kadu ya gaitoma. 32#Ais 33:11Au gilubodada be kana'avemwamwala, fa'ina taini vaita gida'alika tu giyemu-havagi, kadu vaita kadanuhegeni tu ahe kanuhagana.” Au hidedemi Yesu yana gahetalahobuhobu.
Trenutno izabrano:
Luke 15: viv
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 2003, Wycliffe Bible Translators, Inc. All rights reserved.
