Matiu 10
10
La isaisa giteu la valalua la vimari te Iesus
(Mark 3:13-19; Luk 6:12-16)
1Goma, e Iesus goio tola vikapopo egiteu la valalua tetala ale savulusa gete lua, eia abia giteu la vagagarila tetala veia egite ge kumuli taro la hituhitu ale kama korakora, egite ge vimahuli tai egiteu ale lea te la mata la ilea tomi me te la mata la iligiligi tomi tai ale usu. 2Eala moli la isaisa giteu la valalua la vimari te Iesus ale savulusa gete luale, egite maie:
La mulugala, e Saimon, la isala isa lou e Pita,
egira me tabarala e Andrew;
e Iakob mira me tabarala e Ioanes,
e tama girua e Sebedi;
3e Pilip mira me Batolomeas;
e Tomas mira me Matiu, ale ababi la uati la takes;
e Iakob ale e tamala e Alpias,
egira me Tadeas;
4e Saimon ale egite veia eia la tahalo
la hate paririla;
e Iudas Iskariot tai, ale mulimuli sugu taro
e Iesus soio tegiteu la gima.
E Iesus baha egiteu la valalua la vimari tetala soio te la igogolu
(Mark 6:7-13; Luk 9:1-6)
5Goio, e Iesus baha taro egiteu la valalua la vimari tetala ale savulusa gete lua soio te la igogolu, eia viteteli egiteu, eia veia giteu mago “Amuto umala ge goio tegiteu la valalua ale isapolo, mai egiteu ale kama e Iuda, me egiteu e Sameria tai ele. 6Taritigi amuto ge goio moli tegiteu la valalua e Israel, egite mai la sip ale ruruti soio la hohoi, amuto ge valolo muga egiteu ele. 7Amuto ge goio tegiteu, amuto ge valolo egiteu maie ‘La pulolou la matagagala te La Tahalo Uru oata, eia hagagaviti ge sibitala.’ 8Tiele amuto ge vimahuli egiteu ale lea, amuto ge vimahuli tai egiteu ale pehoti, egiteu tai ale sereka gegeru, amuto ge vimaroka egiteu, amuto ge kumuli taro tai egiteu la hituhitu ale kama korakora. Eala moli la vagagarila ale amuto sau tolea, eau abi molia mutou, eala eia taritigi veia amuto tai ge suli bulalahu moli la valalua me hatavivile tomi oio vola. 9Amuto umala ababi la uati veia amuto ge tamamasia te la tuluga tamutou. 10Amuto umala palavavai la palo te la tuluga tamutou, la kairobola ilua tai ge umala, la silipa te la tulugaluga umala, la toho tai ge umala. Amuto umala ge gabutala papai la vibaumulila tamutou, la vuhula amuto igogolu, me egiteu ale abi la visuli tamutou ge abia mutou la ilali ale eia mai la mapa mutou.
11“Mai amuto ge goilo te la mautu isasa, taritigi amuto ge mata tigi, veia mai amuto ge rovi tigi la tahalo isasa te la mautu alele eia taritigi, eia la tahalo sesele, tio amuto ge pou oio te la luma tetala, amuto ge mou oio tetala kara te la haro ale amuto ge bula taro la mautu alele. 12Mai amuto ge tiroro soilo te la luma isasa, taritigi amuto ge toi pala muga la vibalavala te La Uru soio te la lumale, 13eala moli mai egite la valalua la luma alele egite kama taritigia mutou, tio amuto ge abi rivu lou la merera la vibalavala tamutou ele. 14Mai tai la tahalo isasa eia kama puli amutou soilo te la luma tetala, veia eia kama ge lolo tai la merera tamutou, taritigi amuto ge hiliti taroa la luma alele me la mautu tai alele, amuto ge kuvali taro la magasa la mautu alele otalo te la vaha mutou, ale amuto ge hiliti taro la mautu tegiteu ele. 15Eau vei seselea mutou, te la haro la viputumulila te La Uru la kolibarala soio te la mautu alele eia ge uru sesele, eia ge kara polo la iligiligi te la mautu ale kama kokora ilua e Sodom me Gomora.
La imamala la iligiligi me la tovolalaila mulimuli ge sibitala
(Mark 13:9-13; Luk 21:12-17)
16“Taritigi amuto ge lolo tigi la merera taku. Eau baha taro amutou mai egiteu la sip ale egite ge pou kabili tegiteu la karakara la paia hou. Taritigi amuto ge baumuli tigi amutou, la gabutatalala tamutou tai ge taritigi pepeho, la vulovulo ale kama kokora isa umala ge oio tamutou. 17Amuto ge baumuli tigi amutou tegiteu la valalua la gima, la vuhula egite ge tuha tavu amutou veia ge veipala amutou soio te la luma la vigagiala, egite ge vagari tai veia ge kumamasi vulo amutou oilo te la luma la lotu tegiteu. 18Egite ge lao tola amutou, ge lapu amutou soio tegiteu la mulugaluga, soio tegiteu la uru tomi tai, amuto ge magiri te la vigagiala oio te la lagu giteu ele, la vuhula amuto valolo te la isagu. Eala moli oio vola la valolo taku eia ge vavava soio tegiteu la uru tomi, egite ge loloa, egiteu la valalua la maligoma ge rovi eau. 19Eala moli mai egite ge lapu amutou soio te la luma la vigagiala, amuto umala tataga veia ge makuku mago ‘Etato ge vikara mave? Etato ge vei lava e?’ 20La vuhula te la haro moli alele eia kama ge amutou moli ale ge vigagia, ouka, La Kalulule Tama mutou eia ge vikarakara oio tamutou ele.
21“Te la imamala la viligila, mai la tahalo ale kama rovi eau, eia ge veipala e tabarala soio te la vigagiala, egite ge bilia eia ge peho, la vuhula eia la tahalo taku. Mai tai ele egiteu la valalua isahari ge sugu taro tai e latatu giteu, veia egite la gima ge bili egiteu. Mai tai ele egiteu la valalua me hatavivile ale kama kokora, egite ge hiliti, egite ge sugu taro e tama giteu me tila giteu soio te la pileho.
22“Mai tai ele la valalua me hatavivile tomi, egite ge vile sesele amutou, la vuhula egite rovia veia amuto sau tola la isagu, eala moli egiteu ale magiri vagari kara te la tapasi la maututula, La Tahalo Uru ge vimahuli egiteu. 23Mai amuto ge goio te la mautu isasa, eala moli egite viligi amutou, amuto ge hele soio la mautu isapolo. Ale eau vei seselea mutou, amuto kama ge vikaluvu la valolo tamutou te la maututula tomi omai e Israel pala muga te la guluvi te Latu La Tahalo.
24“E guliliki la vimari eia kama uru te la tahalo la vimari tetala, la bilalaha tai eia kama oata te la mulugaluga tetala. 25Eia koramuli molia veia e guliliki la vimari eia ge sovei la tahalo la vimari tetala, mai tai la bilalaha eia ge sovei la vulovulo la mulugaluga tetala. Mai eau, eau la mapala tamutou, egite la gima toiti leau e Bielsebul, mai la mulugaluga tegiteu la hituhitu ale kama korakora, tio eia matagaga tai mai ele veia mai egite ge vileau mai ele, la vilile tegiteu soio tamutou ale taku eia ge kara polo lou la vilile ale egite vileau oio vola, la vuhula amutou la bilalaha taku.
Etato ge taga moli La Tahalo Uru sekela
(Luk 12:2-7)
26“Amuto umala ge tataga egiteu la valalua la gima taku, la vuhula la gabutatalala tomi ale egite tau kokovua, eia kama pala te la mahulila ale igoie, mulimuli eia ge magiri palala, eia ge matagaga tomi. La gabutatalala tomi ale egite tau kokovua, mulimuli eia ge magiri palala. 27La merera ale eau mai ale veia mutou te la logo, amuto ge veipalea te la haro, la merera tai ale eau mai ale sigilia mutou, amuto ge veipala molia te la tia la mautu. 28Amuto umala ge tataga egiteu ale egite ge bili la mahulila te la vovo mutou, la vuhula egite kama koramulia ge bili tai la kalulu mutou, ouka. Amuto ge taga moli La Tahalo Uru sekela, la vuhula eia koramulia veia ge bili la mahulila tamutou te la vovo, vikapopo tai la mahulila te la kalulu tai, eia koramulia ge pigi amutou sotalo te la havi ale uru, la kaluvula ge ouka. 29La Tahalo Uru eia ge baumuli amutou te la gima. Mai la valalua egite ge masagea ge loto la malu ilua bisisi, egite kama ge pigi la uati uru, egite ge pigi la uati ilua moli. La mapa giteu la malumalu kama uru, eala moli La Tahalo Uru eia gabutatala egiteu la malumalu tomi, isa bisi kama ge boru sotalo la magasa, mai eia kama ge la masasagala te Tama mutou mai ele. 30Mai amutou tai, eia gabu tikumu seseleti amutou ale tetala, kara polo la gabutatalala tetala soio tegiteu la malumalu, mai eia gigi tomiti la ivu mutou bisisi tomi isasasa oata te la gama mutou ele kaluvu. 31Eala moli ele, amuto umala ge tataga, la vuhula eia gabu tikumu amutou, kara polo la gabutatalala tetala soio tegiteu la malumalu bisisi ale eia vibaumuli tataho soio tegite.
Etato ge veipala tataho molia veia etatou te Kraist
(Luk 12:8-9)
32“Mai isa kabili tamutou la valalua me hatavivile taku eia ge vagari, veia eia kama ge mahela taro eau, veia eia ge veipala molia soio te la valalua me hatavivile veia eia taku sesele, tio eau tai ge veipala la isala oata te la lagule Tete veia eia taku seseleti. 33Eala moli mai isa ge mahela taroau veia eia kama taku, tio eau tai ge mahela taro tai eia oata te la lagule Tete veia eau kama rovi eia.
E Iesus veia la valolo tetala ge vipou gagima la valalua me hatavivile
(Luk 12:51-53; 14:26-27)
34“Amuto umala ge gabutalea veia eau sibitala omai te la maututula veia eau ge vikaluvu la vulovulo la vaubila me la vigagimala omai te la magasa, ouka. Eau sibitala moli mai la tahalo ale ababi la gata te la vaubila. 35Eau sibitala veia ge veipala la valolo ale isapolo viruru eia ge vipou gagima la valalua me hatavivile maie:
Mai la tahalo isa ge roromuliau,
e latula ge hiliti ge gima lou e tamala mai ele.
Mai la tavile isa tai ge roromuliau,
e latula ge hiliti ge gima rivu lou e tilala.
Mai tai la tavile ale taulaiti,
eia ge gima lou e uala ale hatavile mai eia ge taku.
36Egiteu e valalua mutou lou,
egite ge sibitala mai la gima sesele tamutou ale taku.
37“Mai la tahalo me la tavile ale masagea veia ge tilimuliau, eala moli eia gabutala papai te la merera taku ale vagari ele, eia goio hate tola lou, me oio vola eia vagari veia ge vitotoko lou me tamala me tilala ale kama roviau, eia goio poke taroau, ale eia kama koramulia ge taku. Mai tai ele, la tahalo ale ge gabu vauru e latula, me oio vola eia ge poke taroau, ale tai ele eia kama koramulia ge taku. 38Mai sesele tai la tahalo isasa eia veia ge taku, eala moli eia kama masagea veia ge bole la tauvalautu tetala, veia ge mai ale bole la iligiligi ale uru mai tai eau, ale tai ele eia kama koramulia veia ge taku. 39Mai la tahalo isasa eia gabutalea veia ge tilimuliau, eala moli eia sigirobo lou eia, veia eia ge hate robo lou la mahulila tetala, tio mai eia ge vagari veia ge sau tola la mahulila tetala lou mai alele, eia ge peho, eala moli la tahalo ale ge sugu taro moli la mahulila tetala soio te la igogolu taku, la tahalo alele ge sau tola la mahulila ale sesele.
La tahalo ale ge sau tola la mapa ale taritigi
(Mark 9:41)
40“Mai la tahalo isasa eia ge rara tavu amutou ale valolo te la isagu, eia ge suli amutou mai ele, eia mai ale suli eau, me mai isasa ge suli eau, eia mai ale suli tai e Tete ale baheau somai. 41Mai isasa eia ge hilo la bilalaha te La Uru eia ge sibitala te la mautu tetala, me la tahalole ge rara tavua ge pulia soio te la luma tetala ge sulia, la tahalo alele eia ge abi la mapa ale taritigi te Tete mai la mapa la bilalaha sesele. Mai isasa eia ge hilo la tahalo isasa ale la vulovulola matata, eia ge guvi te la mautu tetala, me la tahalole ge rara tavua ge pulia soio te la luma tetala ge sulia, tio la tahalo tai alele ge abi tai la mapa te Tete mai la mapa la tahalo ale matata. 42Mai tai isasa ge gogo e maura miteu bisisi ale eau babaha egiteu soio te la igogolu taku, me eia ge hilo isasa eia guvi te la mautu tetala, eia malehu, me eia ge gogoa la vuhula eia la tahalo taku isale, me oio vola eia ge abi moliala la lalu maigi veia eia ge liua, tio eau vei seselea mutou, la tahalo alele eia ge sau tola sesele la vibalavala te La Tahalo Uru mai la mapa la vulovulola ale taritigi ele.”
Trenutno izabrano:
Matiu 10: nakNT
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 1983, Wycliffe Bible Translators, Inc. All rights reserved.
