Aepa Gemae 9
9
Gotiʼa Noaʼeʼmo kotalakemo huʼniya gemae
1 #
Aep 1:28
Gotiʼa ina kava huno Noaʼagi ve mafaʼne anagaʼagi huno alagepa huʼa maisayafeʼmo alino auleno apatenoʼaeʼmo, asole mafaʼnemo alitapa apatesageʼa ma mopafiʼmo maiʼa kili paeyo. 2#Sam 8:6-8Muki afumogi yagagafamogi namamogi noyamemogiʼenagi huʼa lapakaefeʼmo kolitapi nehisagetapa yagaitapa apategae. Aliʼna lapayapiʼmo malove. 3Lapakaemo muki uʼeʼa huʼa maisaya yaʼamo neʼyatapimo hanegaiye. Nagaemo muki yaʼamo lapamiteʼna hegafa talili yaʼeʼmo lapamuvagi afaʼa negae. 4#Ap 15:29Afaʼa negayaʼmonanafa kolaʼamo haneʼnisiya ameʼamo oʼneyo. Kolaʼmo afaʼa neʼmaiya yaʼmo aepaʼamo haneʼniyaʼmofeʼmae. 5#Nap 35:33Mago vekamoʼmofi mago afumoʼmofi huno vayaʼmo hapaesageʼnaeʼmo anonaʼalefeʼmo afaʼa falisiya kavaʼmo huguve. 6#Hat 20:13Ina laʼmo mago vekamo kamiti amagisigeno kolaʼamo hisifi vayaʼmogimo anonaʼalefeʼmo ani vekamo kamiti amagisageno kolaʼamoʼmo hisigeno falino. Gotiʼa vemo agaiʼagana huno alo huʼniyaʼmofeʼmae. 7Lapakaemo asole mafaʼnemo alitapa apatesageʼa asole vayaʼmo ma mopafiʼmo aiʼa atagu faeʼa maiʼa kili paeyo, huno hapa paiʼniye.
8Ina gemo huno hapa paitenoʼaeʼmo magoʼe gemo Noaʼe ve mafaʼne anagaʼaʼefeʼmo hapa painoʼaeʼmo, 9#Aep 6:18; Sam 25:14Afiyo, huno, nagaemo lapakaeʼe afole aisaya lapakinago vayaʼenagi huʼna kotalakemo hu malove. 10Nagaemo muki afaʼa neʼmaiya yaʼapimo haneʼniya yaʼenagi huʼna hu malove. Muki namagi yagagafagi yuna afugi afela afugi huʼa muki sipifatiʼmo ataleʼa emiʼeʼnaya yaʼaʼeʼmo kotalakemo hu malove. 11#Aiy 54:9Kotalakeʼnimo haneʼniyana halate magoʼe huʼna alopa aniʼmo aliʼna atesugeno eno muki yaʼmo aeno ati okaegaiye. 12#Aep 17:11; Hat 12:13; Mt 26:26-28Nagaemo kotalakeʼnimo lapakaeʼe muki afaʼa neʼmaiya yateʼefeʼmo hu maleʼnova kotalakeʼnimo alagena yaʼamo muki afinatefeʼmo hu malegauve. 13#Iyi 1:28Nagaemo kotalakeʼnimo muki ma mopafi maiʼnaya yaʼeʼmo hu malova kotalakeʼnimo alagena yaʼmo hiyateʼmo fugagiʼnaʼmo malegauve. 14Ina kava huno afole aigiye. Nagaemo hiyaʼmo aliʼna afole aiʼna atesugenoʼaeʼmo ani hiyateʼmo fugagiʼnaʼeʼmo afole aisigeʼa agegae. 15#Loa 7:9Nagaemo kotalakeʼnimo alagi nagesale hanegaiyanageno halate magoʼe huno alopa aniʼmo heteno muki afaʼa neʼmaiya yaʼe vayaʼeʼmo alino hano huno oʼapatalegaiye. 16Fugagiʼnaʼmo hiyate afole aisigeʼna ageteʼnaeʼmo muki afaʼa neʼmaiya yatefenagi vayaʼaitefenagi huno hano osisiya geʼnimo hu maleʼnova kotalakeʼnieʼmo nagesa afiguve. 17Gotiʼa Noafeʼmo ina ge huno ha paiʼniye. Fugagiʼnaʼmo kotalakeʼnimo alagena yaʼamo ma mopafiʼmo muki afaʼa neʼmaiya yaʼalefeʼmo hu maleʼnova gemo alagena yaʼamo hanegaiye.
18Noa mafaʼne anagaʼmo sipifatiʼmo emiʼeʼnaya mafaʼne anagaʼai apakiʼapimo Semiʼagi Hamuʼagi Yafetiʼagi huʼa emiʼeʼnae. Hamuʼa Kenani afoʼamoʼmae. 19Mani loleʼe magoʼe mafaʼne anagaʼmo Noa mafaʼnemo maiʼnageʼa apakaepatiʼmo muki ma mopafi vayaʼmo aiʼa atagu faeʼnae.
20Noaʼa hoyamo alino neʼvaiya vekamo aepa faino maiteno mago nofi hoyamo alino vaiʼniye. 21#Mai 20:1Mago afinaʼmo ani nofi alagafati aniʼmo neteno negi nagi huteno seli noʼafiʼmo agufalagaʼageʼmo maiʼniye. 22Hamuʼa Kenani afoʼamoʼmo afoʼamo Noaʼmo ageyana agufalagaʼageʼmo havaeno maiʼnigeno agegeno kumatega uno lamino nepuʼamoʼe aganaʼamoʼeʼmo hana paiʼniye. 23#Hat 20:12Inagi Semiʼe Yefetiʼeʼmo mago kenamo aliʼana anakiʼnaleʼmo male aliteʼana anakamelegatiʼmo vase vase huʼana haiʼana afoʼanimoʼmo kofiʼana ateʼnaʼae. Afoʼanimo avagage yaʼaleʼmo oʼagesaʼafeʼmo aulu ohaeʼana aluyatega anaugosa huʼana maiʼnaʼae. 24Noaʼa negi nagi huteno havaeno maiʼniyapatiʼmo he tinoʼaeʼmo henaga mafaʼneʼamokeʼmo agaetegamo ani kavaʼmo huʼniye, huno ageʼniye. 25Inagi agaemo hunoʼaeʼmo, Gotiʼa Kenaniʼmo lifana huno ategaiye. Kenaniʼa konagaʼamogiteʼmo aliʼyaʼapimo alisiya vekamo maigiye. 26Magoʼe gemo hunoʼaeʼmo, Ala kava neʼmo Semi Gotiʼamoʼmo aulena Gotiʼa maino. Kenaniʼa Semi aliʼyaʼamo alisiya vekamo maino. 27#Aep 10:2-5; Aiy 66:19Gotiʼa Yefetiʼmo ha maenageʼa mafaʼne anagaʼamo asole vayaʼmo afole aiteʼa Semi aginago vayaʼai seli nopiʼmo aiʼa atagu faeʼa maiyo. Kenaniʼa Yefeti aliʼyaʼmo alisiya vekamo maino, huno huʼniye.
28Alopa aniʼmo hetegeno akamelegaʼamo Noaʼa tali hataleti fifitiʼa kafugamo maiʼniye. 29Noaʼa muki maiʼniya kafugaʼamo naeni hataleti fifitiʼa kafugamo maiteno faliʼniye.
Trenutno izabrano:
Aepa Gemae 9: kyg2013
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 2013, Wycliffe Bible Translators, Inc. All rights reserved.