Acateco (Kanjobal, Western) - 2001 Edition (NT)

Jix lawi tuꞌ xin, jix cꞌoli yecꞌabꞌ Jesús yul-laj yet Galilea. Jal yul-laj yet Judea tuꞌ xin, ma yal scꞌul chi eqꞌui, yutol jaꞌ ebꞌ yaawil yeoc bꞌey Judea tuꞌ, jix ochen jix makꞌon cam Naj. Cꞌuxan cꞌal tol lalan sjul pax jun skꞌin ebꞌ Israel chi yij Skꞌinal Patlaj. Yuxan jix yal ebꞌ yuẍtaj Jesús tet jaxca tiꞌ:
—Manche jaach eecꞌ titiꞌ. Asiꞌ bꞌey Judea, yet watxꞌ chi yil pax ebꞌ ja cuywom a lugar tituꞌ wan milagro cha txꞌoxoꞌ. Ta ey junoj mactxequel chi yoche scꞌul chi otajnele el yu ánima, cꞌam junoj tzetyetal tol jaꞌ bꞌey ewantaj chi yunne. Yuxan, quey ojabꞌ tuꞌ cha wute ja bꞌa. Ta yel ey milagro chi el ja wuneni, sowalil cha txꞌoxel ja bꞌa sattaj ánima, ẍi ebꞌ tet. Queytuꞌ jix tzꞌaj yal ebꞌ yuẍtaj tuꞌ tet, yutol cꞌam chi yaoc scꞌul ebꞌ yin Naj. Catuꞌ jix yalon Jesús tet ebꞌ jaxca tiꞌ:
—Man to scꞌualoj jin txꞌoxon el jin bꞌa. Jal jex xin, yal cꞌal mi tzet cꞌual chi skeꞌ je naꞌoni. Jaꞌ ebꞌ yet yul yibꞌankꞌinal tiꞌ, cꞌam chi skeꞌ ẍichon oc scꞌul ebꞌ je yin. Jal pax win chi chichon oc scꞌul ebꞌ, yutol chin txꞌoxeloj tol pena sbꞌeybꞌal ebꞌ. Asiꞌwej, txꞌoxel je bꞌa bꞌey jun kꞌin tuꞌ jaex tiꞌ. Jain tiꞌ, cꞌamto chin toi, yutol man to scꞌualoj jin txꞌoxon el jin bꞌa, ẍi Jesús tet ebꞌ. Catuꞌ jix cancan bꞌey Galilea tuꞌ yet jix lawi yalon jaxca tuꞌ.

Jaꞌ yet xax too ebꞌ yuẍtaj tuꞌ bꞌey jun kꞌin tuꞌ, jix too Jesús pax oj, catuꞌ yin ewantajil jix yun yapni. Caw jix seyle ecꞌ Naj yu ebꞌ yaaw yeoc bꞌey Judea bꞌey jun kꞌin tuꞌ:
—¿Bꞌeyla tuꞌ eyoc jun winaj tuꞌ? ẍi ebꞌ chi ecꞌ ebꞌ. Miman tzet chi al-le yin Naj xol ánima tituꞌ. Ey ebꞌ chi aloni: “Caw watxꞌ jun winaj tiꞌ,” ẍi ebꞌ. Ey pax ebꞌ chi aloni: “Cꞌamaj, pena, chi etnele ebꞌ ánima yu,” ẍi ebꞌ. Ewantajil chi yal ebꞌ jaxca tuꞌ, yutol chi xiw ebꞌ, tala chi yabꞌ ebꞌ yaaw yeoc bꞌey Judea tuꞌ. Snan wal eyoc jun kꞌin tuꞌ, catuꞌ jix oc Jesús yul stemplo Dios. Catuꞌ jix cꞌoli scuywa xol ánima tituꞌ. Caw jix qꞌueya scꞌul ebꞌ Israel eyoctoj yul tuꞌ yabꞌeni. Catuꞌ jix yalon ebꞌ jaxca tiꞌ:
—¿Tzet jix yute yotajnen el wan chi yal jun Naj tiꞌ, tol man pax cuywinaj oj? ẍi xacꞌal ebꞌ. Yuxan jix yal Jesús tet ebꞌ jaxca tiꞌ:
—Jaꞌ wan cuybꞌanile chi wal ey jex tiꞌ an, man wetoj an. Yet Naj mac jix jin chejontej. Ta ey mac chi yal scꞌul chi yun yochwan Dios, oj naꞌcha el yu, tol yet Dios wan cuybꞌanile tiꞌ, catuꞌ man yul oj wet chi walon an. Jaꞌ mac tol yul cꞌal yet chi kꞌanabꞌi, tol chi yiꞌa can sbꞌa, yet watxꞌ miman xacꞌal yeloc apnoj snaꞌoni. Jal jin jain tiꞌ, chi woche tol jaꞌ Naj mac jix jin chejontej, jaꞌ ojabꞌ Naj miman yeloc apnoj yul je sat. Yuxan caw yel chi wal ey jex an. Cꞌam cꞌal lekꞌtiꞌal chi wun an. Akꞌbꞌil can sley Dios ey jex yu naj Moisés, ilaꞌ, cꞌam pax junoj jex che jije tzet chi yal jun ley tuꞌ. ¿Tzet yuxan che yoche chin je yakꞌ camoj? ẍi Jesús tet ebꞌ. Catuꞌ jix takꞌwi ebꞌ ánima bꞌulan ecꞌ tituꞌ tet Naj jaxca tiꞌ:
—Jaach tiꞌ, tejan ey junoj pena espíritu eyoc ja win. ¿Mactxequel junoj chi ochen chach yakꞌ cam tuꞌ cha wilaꞌ? ẍi ebꞌ tet Naj. Yuxan jix yal pax Naj tet ebꞌ jaxca tiꞌ:
—Asan yu jun tzet jix el wunen yet scꞌual xewilal, yuxan caw jix qꞌueya je cꞌul yu. Jaꞌ tax ebꞌ kichmam yet peyxa, jaꞌ tax ebꞌ jix iꞌon can el yich jun bꞌeybꞌale chi yij circuncisión.* Catuꞌ jaꞌ naj Moisés jix alon can tol sowalil chi cu bꞌeybꞌalne jun tuꞌ. Yuxan, caxcꞌal scꞌual xewilal, che yakꞌ circuncidar ebꞌ unin chi ali, yet watxꞌ cꞌam che ten tzet chi yal sley Moisés tuꞌ, yuxan che yakꞌ circuncidar ebꞌ unin yet scꞌual xewilal. ¿Tzet yuxan chi tit pax je jowal win an, yu jix wakꞌ waꞌxoj scꞌul naj tuꞌ yet scꞌual xewilal? Man ojabꞌ comonoj che naꞌoc win an. Ta ey mac che naꞌoc yin, watxꞌ ojabꞌ che yute je naꞌon oc yin, ẍi Jesús tet ebꞌ.

Yuxan ey jaywan ebꞌ a Jerusalén jix alon jaxca tiꞌ:
—¿Tumi manaj jun winaj tiꞌ chi seyle ecꞌ yu ebꞌ chi ochen chi akꞌon camoj? Ilaꞌ tol ey pax ecꞌ titiꞌ, lalan skꞌanabꞌ cu xol. Cꞌam cꞌal tzet chi al-le pax tet. Tejan jix yaoc scꞌul ebꞌ yaaw yin, tol jaꞌton Cristo. Jaꞌ yet oj jul Cristo tuꞌ, cꞌam mac otajnen bꞌey oj titocoj. Jal jun winaj tiꞌ, kotaj bꞌeytuꞌ jix tita, ẍi ebꞌ. Jaꞌ yet jix yabꞌen Jesús wan tuꞌ, lalan yakꞌon wan cuybꞌanile snan xol ebꞌ eyoctoj yul stemplo Dios tuꞌ, catuꞌ jix yalon eltej xol ebꞌ jaxca tiꞌ:
—Yel toni, je yotaj jin an, catuꞌ je yotaj pax bꞌey titnaj jin an. Man pax yul oj wet jix jin juli. Jaꞌ Naj jaꞌcaw yel, jaꞌ Naj jix jin chejontej. Man pax je yotaj oj Naj tuꞌ. Jal jin xin, wotaj Naj, yutol jaꞌ tituꞌ jix jin tit an. Jaꞌton jix jin chejontej, ẍi Jesús tet ebꞌ. Lalan yalon wan tiꞌ, catuꞌ ey ebꞌ jix ochen chi aon oc naj preso, cꞌam cꞌal pax junoj mactxequel jix oc lacan yin Naj, yutol man to scꞌual oj scami. Ecꞌal ebꞌ ánima jix yaoc scꞌul yin, catuꞌ jix yalon ebꞌ jaxca tiꞌ:
—Jaꞌ yet oj jul Naj Cristo, ¿tumi yel ecꞌbꞌan milagro oj xꞌox yintaj jun tiꞌ? ẍi ebꞌ. Yuxan jix yaoc ebꞌ yin scꞌul tol jaꞌton Cristo Naj Jesús.

Jaꞌ yet jix yabꞌen ebꞌ Fariseo tzet chi yal ebꞌ ánima yin Jesús tuꞌ, junne ebꞌ yetoj ebꞌ yaawil yakꞌomal xaambꞌal ebꞌ Israel tet Dios, jix chejontoj ebꞌ policía steynemal templo yu stoo tit Jesús preso yalon ebꞌ. Catuꞌ jix yalon Jesús tuꞌ jaxca tiꞌ:
—Jayebꞌxane cꞌual ey jin ecꞌ je yetoj. Oj lawoj tuꞌ xin, oj jin pax a bꞌey ey Naj jix jin chejontej an. Jaex tiꞌ, oj to jin je seyecꞌoj, manxa cꞌal oj jin ilcha je yu, yutol ma skeꞌ je yapni bꞌey oj jin apnoj tuꞌ, ẍi Jesús tet ebꞌ. Catuꞌ jix kꞌanabꞌ a ebꞌ Israel xol yet jaxca tiꞌ:
—¿Bꞌeyla tuꞌ oj toj jun tiꞌ, yuxan chi yalaꞌ tol man oj ilcha ku, snaꞌoni? Toj jaꞌ bꞌey ebꞌ ket conobꞌ eyecꞌ xol ebꞌ Griego. ¿Tumi taꞌ chi yoche jaꞌ tituꞌ oj toj xol ebꞌ, catuꞌ chi too cuywa xol ebꞌ Griego tuꞌ, snaꞌoni? Ilaꞌ tol jix yal ey jon jaxca tiꞌ: “Jaex tiꞌ, oj to jin je seyecꞌoj, manxa pax oj jin ilcha je yu, yutol ma skeꞌ je yapni bꞌey oj jin apnoj tuꞌ,” ẍi Naj ey jon. ¿Tzet la chi yal yeloc apnoj wan jix yal ey jon tiꞌ tinaniꞌ xin? ẍi ebꞌ Israel tuꞌ.

Jaꞌ yet jun cꞌu yet chi lawi can el kꞌin, ecꞌal ánima jix yamchai. Yuxan jato yet slawubꞌ scꞌual kꞌin tuꞌ, jix a linan Jesús snan xol ebꞌ, catuꞌ jix yalon yin ipal jaxca tiꞌ:
—Ta ey jex che yoche che chaꞌ can kꞌinale tol ey cꞌal yin tobꞌalkꞌinal, titanwej ey jin an. Jaxca che yute che yuqꞌuen jaꞌ jaꞌ yu je tajin tiꞌal, queytuꞌ oj je yute je chaꞌon jun kꞌinale tuꞌ ey jin an. Ta ey jex che yaoc je cꞌul win an, jaxca tol ey jun jaꞌ jaꞌ oj aol snukꞌ yin je pixan, catuꞌ oj el sne. Jaꞌton jun tuꞌ oj akꞌon je kꞌinal tol ey cꞌal yin tobꞌalkꞌinal. Yutol jaxca tuꞌ yalon can An Juun Tzꞌibꞌebꞌilcanoj, ẍi Jesús tet ebꞌ. Queytuꞌ jix yute yalon jaxca tuꞌ, yutol jaꞌ ebꞌ chi yaoc scꞌul yin Naj, chi ale oc Naj Espíritu yin ebꞌ yu. Jaꞌ yet jun tiempoal tuꞌ, cꞌamto chi akꞌle Espíritu tet ebꞌ ánima, yutol cꞌamto chi paxa Jesús bꞌey satcan.

Jix lawi cꞌal yabꞌen ebꞌ ánima tuꞌ tzet jix yal Jesús tuꞌ, catuꞌ jix yalon ebꞌ jaxca tiꞌ:
—Caw yel, jaꞌton jun ẍejabꞌ Dios tol echbꞌanebꞌil sjul ku tiꞌ, ẍi ebꞌ. Ey pax ebꞌ jix aloni:
—Jaꞌ jun tiꞌ, jaꞌton Naj Cristo,* ẍi ebꞌ.
Ey pax wanxa ebꞌ jix alon jaxca tiꞌ:
—Jaꞌ jun Cristo tuꞌ, ¿tumi taꞌa Galilea jaxca jun tiꞌ che naꞌ? Chi yal yul An Juun Tzꞌibꞌebꞌilcanoj, tol jaꞌ jun Cristo tuꞌ, jaꞌ bꞌey conobꞌ Belén sowalil chi ali, bꞌey ecꞌnaj David yet peyxa, yutol yicꞌaal naj David, ẍi wanxa ebꞌ tuꞌ. Yuxan jix teele ton a sbꞌa ebꞌ ánima tuꞌ yu cꞌal Jesús. Ey jaywan ebꞌ jix ochen chi aon oc Naj preso, cꞌam cꞌal junoj mactxequel jix oc pax mitxꞌan yin Naj.

Jaꞌ ebꞌ policía, ebꞌ eyoc steynemaloj stemplo Dios, jix paxtoj ebꞌ xꞌojli bꞌey ebꞌ Fariseo, yetoj bꞌey ebꞌ yaawil yakꞌomal xaambꞌal ebꞌ Israel tet Dios, tutun jaꞌ ebꞌ jix chejontoj ebꞌ. Catuꞌ jix skꞌanle el tet ebꞌ tuꞌ:
—¿Tzet yuxan ma je yiꞌtej Jesús tuꞌ? ẍi ebꞌ tet ebꞌ.
—Cꞌam junoj mactxequel chi apni skꞌanabꞌ jaxca jun tuꞌ, ẍi ebꞌ policía tuꞌ. Catuꞌ jix yalon ebꞌ Fariseo tuꞌ tet ebꞌ jaxca tiꞌ:
—¿Tumi che yakꞌ pax je bꞌa etnele jaex tiꞌ xin? ¿Ey mi junoj ebꞌ cu yaawil tiꞌ chi yaoc scꞌul yin Naj? Jacꞌalaꞌ jaon Fariseo jon tiꞌ, cꞌam junoj jon chi kaoc cu cꞌul yin Naj. Asan ebꞌ comon ánima, ebꞌ man yotaj oj niꞌoj sley Moisés, asan ebꞌ chi yaoc scꞌul yin. Ey pax sjowal scꞌul Dios yibꞌan ebꞌ, ẍi ebꞌ Fariseo tuꞌ. Ey jun yet Fariseoal ebꞌ tuꞌ chi yij Nicodemo. Jun bꞌetnaj ecꞌ kꞌanabꞌ yetoj Jesús yet akꞌbꞌalil. Jaꞌ jun tuꞌ jix alon tet ebꞌ jaxca tiꞌ:
—Jaꞌ yalon cu ley, tol cꞌam sleyal chi kaoc syaꞌilal yibꞌan junoj mactxequel ta cꞌam chi kabꞌ tet tzet spenail, ẍi naj tet ebꞌ. Yuxan jix yal ebꞌ tet Naj jaxca tiꞌ:
—¿Tumi a Galilea jaach yetoj jun winaj tuꞌ? Il yul An Juun Tzꞌibꞌebꞌilcanoj, jaꞌ tituꞌ oj ja wilaꞌ, tol cꞌam junoj ẍejabꞌ Dios chi tit bꞌey Galilea, ẍi ebꞌ tet naj. Catuꞌ jix pax can junjun ebꞌ bꞌey sna.

Slušaj Juan 7