If you have would like a copy of this version please contact info@davarpartners.org

Arabic Chadian - 2019 Edition (OT) Non Drama

La Bible en arabe tchadien © Alliance biblique du Tchad, 2019

وَ خَلَاصْ، أَبْرَامْ مَرَقْ مِنْ مَصِرْ، هُو وَ مَرْتَهْ وَ كُلَّ مَالَهْ وَ مَشَوْا لِصَحَرَاءْ نَقَبْ. وَ لُوطْ كُلَ مَشَى مَعَايَهْ.

وَ أَبْرَامْ غَنِيْ زِيَادَةْ. عِنْدَهْ بَهَايِمْ كَتِيرِينْ وَ فُضَّةْ وَ دَهَبْ كَتِيرْ. وَ رَحَلْ مِنْ صَحَرَاءْ نَقَبْ لَحَدِّي وِصِلْ الْبَكَانْ الْأَوَّلْ قَعَدْ فَوْقَهْ أَمْبَيْن حِلَّةْ بَيْت إِيلْ وَ حِلَّةْ عَايْ. وَ دَا بَسْ الْبَكَانْ الْأَوَّلْ أَبْرَامْ بَنَى فَوْقَهْ مَدْبَحْ لِلّٰهْ. وَ بَتَّانْ سَأَلْ بِأُسُمْ اللّٰهْ.
وَ لُوطْ الْمَاشِي مَعَ أَبْرَامْ، هُو كُلَ عِنْدَهْ غَنَمْ وَ بَقَرْ وَ نَاسْ كَتِيرِينْ. وَ الْبَكَانْ بِقِي لَيْهُمْ ضَيِّقْ لِمَرْعَاهُمْ أَشَانْ مَالْهُمْ كَتِيرْ. وَ فِي شَانْ دَا، مَا قِدْرَوْا يَقْعُدُوا سَوَا، وَ بِقِي خِلَافْ أَمْبَيْن رُعْيَانْ أَبْرَامْ وَ رُعْيَانْ لُوطْ. وَ فِي الْوَكِتْ دَا، الْفِرِزِّيِّينْ وَ الْكَنْعَانِيِّينْ كُلَ سَاكْنِينْ فِي الْأَرْض مَعَاهُمْ.
وَ أَبْرَامْ قَالْ لِلُوطْ: «مَا مُمْكِنْ يَبْقَى خِلَافْ بَيْنِي وَ بَيْنَكْ وَلَّا بَيْن رُعْيَانِي وَ رُعْيَانَكْ أَشَانْ أَنِحْنَ أَخْوَانْ. دَاهُو الْأَرْض وَسِيعَةْ قِدَّامَكْ. خَلِّي نِنْفَرْقُوا. كَنْ إِنْتَ مَشَيْت وَطِي، أَنَا نَمْشِي مُنْشَاقْ. وَ كَنْ إِنْتَ مَشَيْت مُنْشَاقْ، أَنَا نَمْشِي وَطِي.»
خَلَاصْ، لُوطْ شَافْ تُرَابْ هَنَا بَحَرْ الْأُرْدُنْ لَحَدِّي صُوغَرْ كُلَّ أَخْضَرْ وَ عَجَبَهْ. وَ الْأَرْض دِي سَمْحَةْ بِلْحَيْن مِثِلْ جَنَّةْ اللّٰهْ وَ مِثِلْ تُرَابْ مَصِرْ. وَ دَا قَبُلْ اللّٰهْ مَا دَمَّرْ مُدُنْ سَدُومْ وَ عَمُورَةْ. وَ خَلَاصْ، لُوطْ قَمَّ مَشَى صَبَاحْ عَلَيْ تُرَابْ بَحَرْ الْأُرْدُنْ وَ شَالْ التُّرَابْ دَا لِنَفْسَهْ. وَ بِمِثِلْ دَا، لُوطْ وَ أَبْرَامْ أَنْفَرَقَوْا. وَ أَبْرَامْ سَكَنْ فِي بَلَدْ كَنْعَانْ وَ لُوطْ بَنَى فَرِيقَهْ مِنْ حِلَّالْ الْمَنْطَقَةْ لَحَدِّي سَدُومْ. وَ نَاسْ سَدُومْ هُمَّنْ فَسْلِينْ زِيَادَةْ وَ مُذْنِبِينْ قِدَّامْ اللّٰهْ.
وَ بَعَدْ لُوطْ أَنْفَرَقْ مِنْ أَبْرَامْ، اللّٰهْ قَالْ لِأَبْرَامْ: «مِنْ بَكَانَكْ الْقَاعِدْ فَوْقَهْ، أَرْفَعْ رَاسَكْ وَ شِيفْ مِنْ الصَّبَاحْ لِلْغَرِبْ وَ مِنْ الْمُنْشَاقْ لِلْوَطِي. شِيفَهْ عَدِيلْ! كُلَّ الْأَرْض التِّشِيفْهَا دِي، أَنَا نَنْطِيهَا لَيْك وَ لِذُرِّيّتَكْ إِلَى الْأَبَدْ. وَ نِسَوِّي ذُرِّيّتَكْ كَتِيرَةْ مِثِلْ تُرَابْ الْأَرْض، مَا يَقْدَرَوْا يَحْسُبُوهُمْ. قُمّ أَمْشِي! وَ رُوغْ الْأَرْض دِي مِنْ طُولْهَا لِعُرْضَهَا أَشَانْ أَنَا نَنْطِيهَا لَيْك.»
وَ أَبْرَامْ حَوَّلْ بِفَرِيقَهْ وَ سَكَنْ فِي بَكَانْ الشَّدَرْ الْكُبَارْ هَنَا مَمْرَا، قَرِيبْ لِحِبْرُونْ. وَ هِنَاكْ كُلَ بَنَى مَدْبَحْ لِلّٰهْ لِيِقَدِّمْ فَوْقَهْ ضَحَايَا.

Slušaj تكوين 13