‪This work is made available under the Creative Commons Attribution-ShareAlike 4‪.0 International License (CC BY-SA). To view a copy of this license, visit http://creativecommons.org/licenses/by-sa/4‪.0 or send a letter to Creative Commons, PO Box 1866, Mountain View, CA 94042, USA. ‪If this work is desired as a source text for modification, alternative dialect translation or other derivative work, permission must be sought from Strategic Resource Group. All such derivative work must indicate what changes have been made and attribute the work as follows: “The original work by Strategic Resource Group is available for free on YouVersion and www.Bible.com." ‪You must also make your derivative work available under the same license (CC BY-SA). Strategic Resource Group may be contacted at info@srginc.org.

کِتابِ مُقدّس سرائیکی ترجمہ

Modern Central Saraiki Bible © 2024 Strategic Resource Group

اُوں ڈینہہ یسُوع گھر تُوں باہر نِکل تے جھیل دے کنارے وَنج بیٹھا۔ اُوندے کولھ لوکاں دی ایجھی وڈی بِھیڑ لگ گئی جو او کشتی ءچ وَنج بیٹھا تے سبھ لوک کنارے اُتے کھڑے ریہے۔ وَل او اُنہاں کُوں مثالاں ءچ بہُوں سارے گالھیں آکھنڑ لگا جو،
”ہِک بیج رہاوݨ آلا بیج رہاوݨ نِکلیا۔ رہیندے ویلے کُجھ بیج راہ دے کنارے ڈھٹھے تے پکھیں آ تے اُنہاں کُوں چُگ گِھدا۔ کُجھ پتھریلی زمین اُتے ڈھٹھے جِتھاں مِٹی گھٹ ہئی تے زیادہ مِٹی نہ مِلنڑ دے سببّوں، جلدی اُگ پئے۔ پر جِیں ویلے سِجھ نِکلیا تاں پودے سڑ گئے تے کیوں جو او جڑھ نہ پکڑ سگے، اِیں واسطے سُک گئے۔ کُجھ جھاڑیاں ءچ ڈھٹھے تے جھاڑیاں ودھ تے اُنہاں کُوں دبا گِھدا۔ کُجھ چنگی زمین اُتے ڈھٹھے تے پھل گِھن آئے۔ کوئی سو گُنا، کوئی سَٹھ گُنا، تے کوئی ترِیح گُنا۔ جیندے سُنڑݨ دے کَن ہووݨ او سُنڑ گِھنے۔“

وَل شاگرداں کولھ آ تے آکھیا، ”تُساں اُنہاں نال مثالاں ءچ گالھیں کیوں کریندے ہیوے؟“
اُوں جواب ءچ آکھیا، ”تُہاکُوں تاں اسمان دی بادشاہی دے راز سمجھنڑ دی قابلیت ڈِتی گئی ہے پر اُنہاں کُوں نئیں ڈِتی گئی۔ کیوں جو جیندے کولھ ہے اُونکُوں ڈِتا ویسی تے اُوندے کولھ زیادہ تھی ویسی پر جیندے کولھ کُجھ نئیں، اُوندے کنُوں او وی جیہڑا اُوندے کولھ ہے گِھن گِھدا ویسی۔ مَیں اُنہاں نال مثالاں ءچ اِیں واسطے گالھیں کریندا ہاں کیوں جو او ڈیدھے ہوئے نئیں ڈیدھے، تے سُنڑدے ہوئے نئیں سُنڑدے تے نئیں سمجھدے۔ یسعیاہ نبی دی ایہ پیشنگوئی اُنہاں اُتے سچ تھیندی ہے جو
’تُساں کَناں نال سُنڑسو پر
اصلُوں نہ سمجھسو
تے اکھیں نال ڈیکھسو
پر اصلُوں نہ جانڑسو۔
کیوں جو اِیں اُمت دے دل اُتے چربی چڑھ گئی ہے
تے او کَناں کنُوں اُچا سُنڑدے ہِن
تے اُنہاں آپنڑے اکھیں بند کر گِھدیاں ہِن
کِتھائیں اِینویں نہ تھیوے جو او اکھیں کنُوں ڈیکھنڑ
تے کَناں نال سُنڑݨ
دل نال سمجھنڑ
تے رجُوع گِھن آوݨ
تے مَیں اُنہاں کُوں شِفا بخشاں۔‘
پر تُہاڈے اکھیں مُبارک ہِن کیوں جو او ڈیدھیاں ہِن تے تُہاڈے کَن مُبارک ہِن اِیں واسطے جو او سُنڑدے ہِن۔ کیوں جو مَیں تُہاکُوں سچ آدھا ہاں جو بہُوں سارے نبیاں تے راستبازاں کُوں آرزو ہئی جو جیہڑے گالھیں تُساں ڈیدھے ہیوے او ڈیکھنڑ پر نہ ڈیکھ سگے تے جیہڑے گالھیں تُساں سُنڑدے ہیوے سُنڑݨ پر نہ سُنڑ سگے۔

بس بیج رہاوݨ آلے دی مثال دا مطلب سُنڑو۔ جِیں ویلے کوئی بندہ بادشاہی دا کلام سُنڑدے پر سمجھدا نئیں تاں شیطان اُوں کلام کُوں جیہڑا اُوندے دل ءچ رہایا گِیا ہا کَھس گِھندے۔ ایہ او ہے جیہڑا راہ دے کنارے رہایا گِیا ہا۔ پتھریلی زمین اُتے رہایا گِیا بیج اُوں بندے دی مثال ہے جیہڑا کلام کُوں سُنڑدے ای خوشی نال قبول کر گِھندے۔ پر او اُوندے ءچ جڑھ نئیں پکڑیندا تے دیر تئیں قائم نئیں راہندا۔ جِیں ویلے کلام دے سببّوں مُصیبت یا ظلم آندے تاں فوراً ٹھوکر کھاندے۔ اِینویں ای جھاڑیاں ءچ رہایا گِیا بیج اُوں بندے دی مثال ہے جیہڑا کلام کُوں سُنڑدا تاں ہے پر دُنیا دی فِکر تے دولت دا فریب اُونکُوں دبا ڈیندے تے اُونکُوں پھل نئیں لگدا۔ پر چنگی زمین ءچ رہایا گِیا بیج اُوں بندے دی مثال ہے جیہڑا کلام کُوں سُنڑدے تے سمجھدے تے پھل وی گِھن آندے، کوئی سو گُنا، کوئی سَٹھ گُنا تے کوئی ترِیح گُنا۔“

اُوں اُنہاں کُوں ہِک بئی مثال سُنڑائی جو ”اسمان دی بادشاہی اُوں بندے وانگُوں ہے جئیں آپنڑی رَڑھ ءچ چنگا بیج رہایا۔ پر جِیں ویلے لوک سُتے پئے ہَن تاں اُوندا دُشمنڑ آیا تے کنڑک ءچ کڑوے دانڑے رَہا گِیا۔ بس جیہڑے ویلے پتے تے سِٹے نِکلے تاں او کڑوے دانڑے ظاہر تھی گئے۔
مالک دے نوکراں آ تے اُونکُوں آکھیا، ’کیا تُساں آپنڑی رَڑھ ءچ چنگا بیج نہ رہایا ہا؟ وَل ایہ کڑوے دانڑے کِتھوں آ گئے؟‘
اُوں جواب ڈِتا، ’ایہ کہیں دُشمنڑ دا کم ہے۔‘
نوکراں پُچھیا، ’کیا تُساں چاہندے ہیوے جو اساں اُنہاں کُوں جمع کرُوں؟‘
پر اُوں آکھیا، ’نہ، اِینویں نہ تھیوے جو اُنہاں کُوں پٹیندے ہوئے تُساں کنڑک کُوں وی پَٹ ڈیؤ۔ فصل دی کٹائی تئیں ڈوہائیں کُوں کٹھے ودھنڑ ڈیؤ تے کٹائی دے ویلے مَیں کٹائی کرݨ آلیاں کُوں آکھ ڈیساں جو پہلے کڑوے دانڑیاں کُوں جمع کر گِھنو تے ساڑن کیتے اُنہاں دے گٹھے بَدھ ڈیؤ تے کنڑک کُوں میڈے گوداماں ءچ جمع کر ڈیؤ‘۔“

اُوں ہِک بئی مثال اُنہاں کُوں سُنڑائی جو ”اسمان دی بادشاہی رائی دے اُوں دانڑے وانگُوں ہے جِینکُوں ہِک بندے گِھدا تے آپنڑی رَڑھ ءچ رَہا ڈِتا۔ ایہ بِیجاں ءچوں سبھ کنُوں چھوٹا ہے پر پھپھڑن تُوں بعد بُوٹیاں ءچوں سبھ سبزیاں کنُوں وڈا تھی ویندے تے ایجھا درخت بنڑ ویندے جو ہوا دے پکھیں آ تے اُوندے اُتے آلہنڑے بنڑیندے ہِن۔“

اُوں ہِک بئی مثال اُنہاں کُوں سُنڑائی جو ”اسمان دی بادشاہی اُوں خمیر وانگُوں ہے جِینکُوں ہِک عورت گِھن تے ترے مُٹھیاں اٹّے ءچ رَلایا تے ہولے ہولے سارا اٹّا خمیر تھی گِیا۔“

ایہ سارے گالھیں یسُوع بِھیڑ کُوں مثالاں ءچ آکھیاں تے بغیر مثال دے او اُنہاں کُوں کُجھ نہ آدھا ہا۔ اِینویں نبی دی آکھی ہوئی ایہ گالھ پُوری تھئی جو
”مَیں مثالاں ءچ آپنڑاں مُنہ کھولیساں۔
تے او گالھیں اکھیساں جیہڑیاں دُنیا بنڑݨ دے ویلے کنُوں لُکیاں رہ گئیاں ہِن۔“

اُوں ویلے او بِھیڑ کُوں چھوڑ تے گھر دے اندر گِیا تے اُوندے شاگرداں اُوندے کولھ آ تے آکھیا، ”ساکُوں کڑوے دانڑیاں دی مثال دا مطلب سمجھا ڈیؤ۔“
اُوں جواب ڈِتا، ”چنگے بیج دا رہاوݨ آلا اِبنِ آدم ہے۔ رَڑھ دُنیا ہے تے چنگا بیج بادشاہی دے فرزند تے کڑوے دانڑے شیطان دے فرزند ہِن۔ دُشمنڑ جئیں اُنہاں کُوں رہایا ابلیس ہے تے کٹائی دُنیا دا آخر ہے تے کٹائی کرݨ آلے فرشتے ہِن۔ بس جِینویں کڑوے دانڑے جمع کیتے تے بھاہ ءچ ساڑ ڈِتے ویندن، اُونویں ای دُنیا دے آخر ءچ تھیسی۔ اِبنِ آدم آپنڑے فرشتیاں کُوں بھجیسی تے او ٹھوکر کھواوݨ آلیاں ساریاں چیزاں تے بدکاراں کُوں اُوندی بادشاہی ءچوں جمع کریسن۔ تے اُنہاں کُوں بھاہ دی بٹھی ءچ سَٹ ڈیسن جِتھاں رووݨ تے ڈنداں دا پِیہوݨ ہوسی۔ اُوں ویلے راستباز آپنڑے باپ دی بادشاہی ءچ سِجھ آلی کار چمکسن۔ جیندے سُنڑݨ دے کَن ہووݨ او سُنڑ گِھنے۔

اسمان دی بادشاہی رَڑھ ءچ لُکے اُوں خزانے وانگُوں ہے جیہڑا ہِک بندے کُوں مِل گِیا تے اُوں ولا لُکا ڈِتا۔ وَل او خوشی خوشی گِیا تے آپنڑا سبھ کُجھ ویچ تے اُوں رَڑھ کُوں مُل گِھن گِھدا۔

تے اسمان دی بادشاہی اُوں وپاری وانگُوں ہے جیہڑا بہُوں اعلیٰ موتیاں دی گولھ ءچ ہا۔ جِیں ویلے اُونکُوں ہِک بہُوں قیمتی موتی مِلیا تاں اُوں وَنج تے آپنڑا سبھ کُجھ ویچ ڈِتا تے اُونکُوں مُل گِھن گِھدا۔

وَل اسمان دی بادشاہی اُوں وڈے جال وانگُوں ہے جیہڑا جھیل ءچ سٹیا گِیا تے اُوں ہر قِسم دیاں مچھیاں کٹھیاں کر گِھدیاں۔ جِیں ویلے بھر گِیا تاں مچھیرے اُونکُوں چھیک تے کنارے اُتے گِھن آئے تے بہہ تے چنگیاں چنگیاں مچھیاں تھانواں ءچ جمع کر گِھدیاں تے جیہڑیاں خراب ہَن سَٹ ڈِتیاں۔ قیامت آلے ڈینہہ اِینویں ای تھیسی۔ فرشتے نِکلسن تے شریراں کُوں راستبازاں کنُوں اَنج کریسن تے اُنہاں کُوں بھاہ دی بٹھی ءچ سَٹ ڈیسن۔ اُتھاں رووݨ تے ڈنداں دا پِیہوݨ ہوسی۔“

وَل یسُوع پُچھیا، ”کیا تُساں ایہ سارے گالھیں سمجھ گئے؟“
شاگرداں اُونکُوں آکھیا، ”ہا۔“
یسُوع اُنہاں کُوں آکھیا، ”اِیں واسطے شریعت دا ہر عالم جیہڑا اسمان دی بادشاہی دا شاگرد بنڑیا ہے، اُوں گھر دے مالک وانگُوں ہے جیہڑا آپنڑے خزانے ءچوں نوِیاں تے پُرانڑیاں چیزاں کڈھیندے۔“

جِیں ویلے یسُوع ایہ مثالاں سُنڑا گِھدیاں تاں اُتھوں کنُوں چلیا گِیا۔ آپنڑے وطن ءچ آ تے او اُتھوں دے عبادت خانے ءچ اُنہاں کُوں ایجھی تعلیم ڈیوݨ لگا جو او حیران تھی تے آکھنڑ لگے جو ”ایہ حِکمت تے معجزے او کِتھوں حاصل کریندے؟ کیا ایہ درکھاݨ دا پوتر نئیں؟ تے اِیندی ماء دا ناں مریم نئیں؟ تے کیا یعقُوب، یُوسف، شمعون تے یہُوداہ اِیندے بِھرا نئیں؟ تے کیا اِیندیاں ساریاں بھینڑاں اِتھاں ساڈے کولھ نئیں؟ وَل ایہ سبھ کُجھ اِیندے ءچ کِتھوں آیا؟“ اِینویں اُنہاں اُوندی وجہ کنُوں ٹھوکر کھادی۔
پر یسُوع اُنہاں کُوں آکھیا، ”نبی دی بےقدری اُوندے آپنڑے وطن تے رشتے داراں دے سوا بِیا کِتھائیں نئیں تھیندی۔“ تے اُوں اُنہاں دی بےاعتقادی دے سببّوں اُتھاں بہُوں معجزے نہ ڈِکھائے۔

Slušaj متّی 13