Basketo - 2014 BSE (NT) Drama

Basketo - 2014 BSE (NT) Non Drama

ዪና̇ ኢዝባራ ዬሱ̈ሳ ታማ̈ራን ኢ̈ክ ዬ̈ሪ “ጾ̈ሳ̇̇ ካ̈ቲቲ ጋርታ̇ ዎይ̈ፖ̇ ሺዛ ኦ̈ኖ?” ጋ̈ሪ ኢያ ኦይጪ̇ዴ። ኢያር ኣቂሊ ናኢ ፔታ̇ን ጼይጊ ኤሄ̈ር ኢንታ ጊዳ̇ ኤሳ̇ሪ ኢንታ̇ኮ፥ “ቴ ዪንታ̇ክ ኪን ጋ̈ሬ፥ ዪንቲ̇ ላ̈ሚንታ̇ር ኣቂሊ ናእፌ̈ን ማ̈ቃካ̇ይ ኣቴጌይን ጾ̈ሳ̇̇ ካ̈ቲቲ ጋርታ̇ ዉርሲ ጌሊባ̈ሴ። ዪ̈ኮታ̇ቦ፥ ኣቂሊ ናኣ ዓ̈ዲፌ̈ን ፌ̈ና ዪርክ ዎቲዝ ኣሲ ኦ̈ናካር ማ̈ቂ̇ን ጾ̈ሳ̇̇ ካ̈ቲቲ ጋርታ̇ ሺዛ ኢያ ማ̈ቂ̇̈ሬ።
ዓፌ̈ኖ ኣቂሊ ናኣ̈ዳ ቴ ሱምባር ሞኪ̇ዝ ኣሲ ኦ̈ናካር ማ̈ቂ̇ን ታ̈ና ሞኪ̇̈ሬ። ታ̈ና ኣማ̇ኒዛን ዓን ጊላ̇ን ጋርታ̇ፖ̇ ፔታ̇ና ናጋራ ኦ̈ምፔ̈ን ዎቲዝ ኣሲ ጴች ዎጽ ሹች ፌ ቆ̈ን ጋልዳ ቃቻ̇ር ጌ̈ና̇ ባሃ̈ራ ጋርታ̇ ዱ̈ኪንቲ̇̈ርኮ ኢ̈ብ ኮሼ̇” ጌይዴ። “ኣሲ ናጋራ ኦ̈ምፔ̈ን ዎቲዝ ባዚ ዓኒ ኣላሚን ጋልዳ̇ ዎኮታ̇ቦ ኣላሚን ዓና̇ ባዚ ኣዬ̇! ዪን ናጋራ ኦ̈ሲዝ ባዛን ዬንት ኣቲባ̈ስዶ̈ን ኣሲ ናጋራ ኦ̈ምፔ̈ን ዎቲዝ ና̈ሳ ኢ ባዚ ኣዬ̇! ኔ ናጋራ ኦ̈ምፔ̈ን ዎታዚንዳ ኔ ኩሺንዶ ዎይ ኔ ቶ̈ሂንዶኮ ኔ ኢዞ ቃጻ̇ር ቶጛቤ! ናምኢ ኩሺ ዎይ ናምኢ ቶሂ ኔ̈ብ ዶኢን ሜናብ ቴይቂ̇ባ̈ሶ ታማ ጋርታ̇ ቶጚንታናፖ̇ ቶሂ ዎይ ኩሺ ዎብ ማ̈ቃ̇ራ ሜናብ ሼምፓባር ዶኢዝ ቤስ̇ ጌላዚን ኔ̈ብ ኮሼ̇። ኔ ኣ̈ፊን ኔ̈ና ናጋራ ኦ̈ሳ̈ርኮ ኬሳ̇ር ኢዞ ቶጛቤ! ናምኢ ኣ̈ፊ ኔ̈ብ ዶኢን ኔ ቴይቂ̇ባ̈ሶ ጋ̈ና̇ማ ታማ ጋርታ̇ ቶጚንታ̇ናፖ̇ ፔቲ̇ ኣ̈ፊ ኔ̈ብ ዶኢን ሜናብ ሼምፓባር ዶኢዝ ቤስ̇ ጌሊኖኮ ኔ̈ብ ኮሼ̇። ኢንታ̇ ና̈ጋምፔ̈ን ኪ̈ቲንቲ̇ኖ ኪ̈ታንቻ̇ን ኣፋ ዎ ቴ ባ̈ባ̈ ቲ̈ን ዎይ ጋላስ ዎኮታ̇ቦ ዓን ጊላ̇ን ጋርታ̇ፖ ሜላ ኣቲ̇ን ፔታ̇ናዳር ሌቃካዮዲፌ̈ኒ ና̈ጊንቲ̇ብቴ̇። [ታ ኣሳ ናኣ̈ዳሬ ዬይኖንዳ̇ ዪኖን ፋንዳቦ” ጌይዴ።]


ዬሱ̈ሲ ኢንታ̇ኮ “ዪዚ ዪንቲ̇ ታ̈ብ ሶ̈ሊ̇ንቴ፤ ፔቲ̇ ኣሲ ኢ̈ብ ጼ̈ታ ዶሪ ዎኮ ኢንታ̇ ጋርታፖ ፔታ̇ኒ ዬጌይን ሳ̈ካሊ ታ̈ጶ ሳ̈ካላ̇ን ኢንዳ ጋልዳ ኣሻ̇ር ዪኖ ፔታ̇ና ኮዪ ሉኪ̇ባ̈ሶ ኣሲ ዎ? ቴ ዪንታ̇ክ ኪን ጋ̈ሬ፥ ዪኖ ዶሪን ዲጜጌይንዶ ያካ̇ዮን ሳ̈ካሊ̇ ታ̈ጶ ሳ̈ካላ̇ንፖ̇ ሺ ያር ቤንቲ̇ኖንቦ ኡፋይቲ̈ሬ። ዪና̇ ኢዝፌ̈ኒ ኣፋ ዎ ዪንታ̇ ባ̈ባ̈ ሜላ ኣቲ̇ን ዓን ጊላ̇ን ጋርታ̇ፖ̇ ፔታ̇ኒ ያምፔ̈ን ኮዪባ̈ሴ” ጌይዴ።

“ኔ ኢሻ ኔ̈ብ ኢ̈ት ኦ̈ጌይን ኔ ፌ̈ብ ኢ̈ክ ሉካ̇ራ ኢ ኔ̈ብ ኦ̈ኖ ኢ̈ታ ባዚን ኢ̈ብ ሶ̈ላቤ፤ ኢ ኔ̈ኮን ሲስኬጌይን ኢ ኢ̈ታ ኦ̈ሲ̇ን ጋልዳ̇ፖ̇ ኔ ኢያ ማሂኔ። ኢ ኔ̈ኮን ሲስካ̇ብዳ ጌዬጌይን ናምኢ ዎይ ኣይ̇ዚ ኣሲ ማርኪቲኖ ማርኪቲንዳ̇ ኪን ማ̈ቂ̇ዛኮታ̇ቦ ናምኢ ዎይ ዓይ̇ዚ ኣሲ ኔባር ኤካ̇ር ኢ̈ክ ሉካ̇ቤ። ኢ ኢንታኮንዳር ሲስካ̇ብዳ ጌዬጌይን ዎ̈ሳ ኬ̈ብ ሶ̈ላቤ፤ ኢ ዎ̈ሳ ኬ̈ንኮ̇ንዳር ሲስካብዳ ጌዬጌይን ናጋራንቻኬ ጾ̈ሳ̇̇ ኤሪባ̈ሶ ኣስፌ̈ን ኢያ ፋይዳር ኣሻ̇ቤ።
“ቴ ዪንታ̇ክ ኪን ጋ̈ሬ ዪንቲ̇ ሳ̈ዳ̇ ቃቺ̇ኖ̈ዲ ኣፋር ቃቺ̇ንቲ̇ኖ ማ̈ቂ̇̈ሬ፤ ዪንቲ̇ ሳ̈ዳ̇ ቢሊ̇ኖ̈ዲ ኣፋር ቢሊ̇ንቲ̇ኖ ማ̈ቂ̇̈ሬ።
“ማ ቴ ዪንታ̇ብ ዓታ̇ር ሶ̈ላ̈ሬ፤ ሳ̈ዝ ጋልዳ̇ ዪንታ̇ ጋርታ̇ፖ̇ ናምኢ ኣሲ ፌ ዎ̈ሲዝ ባዛን ዎይንቦ ዎልኣ ፔቲ̇ ቡ̈ዳባር ማ̈ቃ̇ር ጌሼጌይን ኣፋ ዎ ቴ ባ̈ባ̈ዲ ዪንታ̇ብ ኢሚ̇̈ሬ። ናምኣር ማ̈ቂ̇ን ዓይዛ̇ር ማ̈ቃ̇ሪ ቴ ሱምባር ሺ̈ቂኖን ኢንታ̇ ጊዳ̇ ቴ ዎ” ጌይዴ።

ኢናፖ̇ ጴ̈ጥሮ̈ሲ ዬሱ̈ሳክ ዬ̈ሪ “ጎዳ̈ዶ! ፔቲ̇ ኣሲ ታ̈ብ ኢ̈ት ኦጌይን ኣ̈ፊን ቶህ ቴ ኢ̈ብ ኣቶ̇ ጋ̈ኖ? ታብዛ ቶህፌ̈ን ኣቶ̇ ጋ̈ኔቤ?” ጋ̈ር ኦይጪ̇ዴ። ዬሱ̈ሳር ኢ̈ኮ “ታብዛ ቶህ ሙታ̇ ጊዳካ̇ዬ፥ ዎይ ጋላስ ኔ ኢ̈ብ ኣቶ̇ ጋ̈ቤ ጋ̈ሬ” ጌይዴ።
ጾ̈ሳ̇̇ ካ̈ቲቲንዳ̇ ፌ ኣሽካራን ጋልዳ ዎ ሚ̈ሺ̇ን ፋይዲ ኤራንዳብ ኮዪዝ ካ̈ታ ማይጻ̈ሬ። ካ̈ታዳር ዪኖ̇ ኦ̈ሙታ̇ ዎንጋርታ̇ ዎይሊን ሙኩላ ቢራ ኣጫ ኢ ጋልዳ̇ ዎ ፔቲ̇ ኣሽካራ ኤ̈ንታ̇ር ኢ̈ክ ዬይዴ። ዪ ኣሽካ̇ራ̈ዲ ፌ ጋልዳ̇ ዎ ኣጪን ጪጋ̇ንዳ̇ብ ዳንዳ̇ኣካ̇ዮኮታ̇ቦ ኢ ቆሚ̇ንዶ፣ ኢ ማጪ̇ንዶ፣ ኢ ናኣን፣ ኢ̈ብ ዎ ቆሊን ዎይ ጌዳ ዎ̈ጛ̈ሪ ኣጪን ጪጋ̇ምፔ̈ን ኢ ላ̈ ኢያ ኪ̈ቲ̇ዴ። ዪኒ̇ባራ ዪ ኣሽካ̇ራ̈ዲ ፌ ላ̈ ቶሂን ጋልዳ ኬዳ̇ሪ ኢ̈ኮ “ጎዳ̈ዶ! ኔ ጊላ̇ ዋይሲ̇ሼ፥ ቴ ዎይ ኔ̈ብ ጪጋ̇ንዳ̇!” ጋ̈ር ጌሺዴ። ላ̈̈ዳር ኢ̈ብ ሚጪንታ̇ሪ ኢያ ኣሺ̇ዴ፤ ኢ ኣጪንዳ̇ር ኢያ ማ̈ሪዴ።
“ኢ ኢናፖ̇ ኬስካ̇ሪ ሉካ̇ምባራ ኢ ጋልዳፖ̇ ጊላ̇ ሚ̈ሺ̇ ታልቂ ኤኪ̇ኖ ፔቲ̇ ኢ ላ̈ጋ ኢ ቆ̈ታ̇ ኬሲኪ̇ን ኢያ ጩ̈ሊ̇ ኤ̈̇ር “ኔ ጋልዳ ዎ ኣጪን ታ̈ብ ጪጋ̇ቤ!” ጌይዴ። ኢ ላጋ̇ዳር ኢ ቶሂን ጋልዳ ኬዳ̇ሪ ኢ̈ኮ “ኔ̈ብ ዋ̈ዴ፥ ኔ ጊላ̇ ዋይሲ̇ሼ ቴ ኔ̈ብ ጪጋ̇ንዳ̇” ጋ̈ሪ ኢያ ጌሺዴ። ና̈ሳ ሚ̈ሺ̇ን ላ̈̈ዲ ዋኣኬ ዪ ማ̈ቂ̇ባ̈ሴ! ጋ̈ሪ ኣጪን ጪጊ̇ ዉርሲዝ ዲራ̈ስ ኢያ ቃሺ ኣ̈ል ኤ̈ጛር ቃቺሺዴ። ሜላን ኢባር ኦ̈ዝ ላ̈ጋን ዪኖ̇ ቤቃ̇ሪ ዎይሊን ሞርኢዴ፤ ና̈ሳ ኦ̈ኖ ባዛን ዎይ ሉካ̇ር ፌ ላ̈ቦ ሶ̈ሊዴ።
“ላ̈̈ዳሬ ኢያ ጼይጋሪ ኢ̈ኮ “ኣን ኔ ኢ̈ታ ኣሽካራ̈ዲ! ኔ ታ̈ና ጌሺን ኔ ጋልዳ ዎ ኣጫ ዪ ዎይ ቴ ኔ̈ና ማራዴ፤ ቴ ኔ̈ና ማ̈ሪኖንዲፌ̈ኒ ኔ̈ናር ኔ ላጋ̇ ማ̈ራንዳብ ኮሺባ̈ሳ? ላ̈ ኢያ ዎይሊን ጎይላሪ ‘ዓ ታ ኣሽካራ̈ዲ ፌ ጋልዳ ዎ ኣጪን ጪጊ̇ ዉርሲዝ ዲራ̈ስ ቃሺ ኣ̈ል ጋምኦ’ ጋ̈ሪ ዎታ̇̈ዳራንብ ኣ̈ ኢሚ̇ዴ። ዪዚ ዪንታ̇ር ዎይ ዪንታ̇ ኢሺንታ̇ን ኪንባር ኣቶ̇ ጋ̈ካ̇ይ ኣቴ̇ጌይን ኣፎ ታ ባ̈ባ̈ ዪንታ̇ብ ዪና̇ ኢዝፌ̈ን ዎቲ̈ሬ” ጌይዴ።

Slušaj ማ̈ቶ̈ሳ 18